SA SEGA ni caka rawa na ivola, iyaloyalo, kei na qito ena vidio era vakaraitaki kina na daucakaiba, buitevoro, kei na dau gunu dra qai laurai ena ka era cakava ni tiko vei ira na kaukaua vuni. Na cava e taleitaki kina na ka ni veivakamarautaki va qori? *

E vola na parofesa e dau dikeva na itovo ni tamata o Claude Fischer: “E laurai ena veiyabaki sa sivi ni levu mai Merika era vakabauta na vakatevoro. E levu vei ira na vakabauta na vakatevoro, qase kei na gone, era vakabauta nira tawana tu eso na vale na yalovelavela, era kaya tale ga nira sa taro ivakasala oti vei ira na daurairai.”

E sega ni kurabuitaki na kena sa takalevu nikua na italanoa ni curumi yalovelavela. E vola o Michael Calia ena ivola The Wall Street Journal: “E levu era vakabauta na curumi yalovelavela baleta ni sa levu na italanoa ni nodra bula tale mai na mate eso, nodra veisau mera olifa, kei na italanoa ni gunu dra.”

E laurai ena dua na ripote “nira vakabauta e 25 ina 50 na pasede na tamata e veiyasa i vuravura na vakatevoro, qai talanoataki ena levu na ivola.” Ena dua na vakadidike mai Merika, erau raica na parofesa o Christopher Bader kei Carson Menc ken “ni 70 ina 80 na pasede na lewenivanua era vakabauta na vakatevoro.”

Vakacava e ka ni lasa wale ga na vakatevoro qai sega ni yaco kina na leqa?