E Rawa ni Vakaleqa Vakacava na iYaya Vakalivaliva Nomu iVakarau ni Vuli?
Eda vuli tiko ga e veisiga, e koronivuli, vanua ni cakacaka se nida vakaitavi ena so tale na ka. E dau yaga gona vakalevu na iyaya vakalivaliva ena vuli va qori. Gauna qo sa rawarawa sara meda raica na itukutuku eda vinakata, nida tu mada ga i vale.
Ia e levu nira vakayagataka vakasivia na iyaya vakalivaliva . . .
-
e dredre me dei nodra vakasama ena ka era wilika.
-
era via cakava e vicavata na ka ena dua ga na gauna.
-
era vucesa nira tu taudua.
KA MO KILA
IVAKARAU NI WILIWILI
Eso era sega ni dau via wilika taucoko e dua na itukutuku, era raica ga vakatotolo mera kila na ka e vakabibitaki.
E sega ni ca ke o wiliwili vakatotolo mo raica e dua na isaunitaro. Ia e sega ni vinaka qori ke o saga tiko mo kila vinaka e dua na ka.
VAKASAMATAKA MADA: O dau wilika vinaka na itukutuku e balavu na kena ivakamacala? Ena vakavinakataka vakacava qori nomu ivakarau ni vuli?—VOSA VAKAIBALEBALE 18:15.
CAKAVA E VICAVATA NA KA
Eso era dau vakayagataka nodra talevoni mera cakava e vicavata na ka ena dua ga na gauna. Kena ivakaraitaki, era text vei ira nodra itokani nira vuli lesoni tiko. E sega ni dei nodra vakasama ena dua ga na ka. Era sega ni cakava gona vakavinaka na ka era cakava tiko, vakabibi ke vinakati kina mera vakasama vakavinaka.
Dina ga ni vinakati na sasaga me dei noda vakasama ena ka eda cakava, ia ena yaga vakalevu. E kaya e dua na goneyalewa o Grace: “Ena sega ni levu kina nomu cala se lomaocaoca. Au raica ni vinaka meu cakava mada ga e dua na ka ena dua na gauna, meu kua ni vakawelei ena so tale na ka.”
VAKASAMATAKA MADA: E dau vakadredretaka noqu vulica e dua na ka niu vakawelei ena talevoni?—VOSA VAKAIBALEBALE 17:24.
TU DUADUA
Eso era dau tikotikoca nira tu duadua, ra qai dau vakayagataka nodra talevoni mera vakawelei tu kina. E kaya e dua na yalewa o Olivia: “E dau vakavucesa keu sega ni raica noqu talevoni, tablet, se sara tivi ena loma mada ga ni 15 na miniti.”
Ia ke da mani qase se gone, eda na rawa ni vulica e levu na ka nida vakasama vakatitobu ena gauna eda tu duadua kina.
VAKASAMATAKA MADA: O dau vakayagataka vinaka na gauna o tu duadua tu kina?—1 TIMOCI 4:15.
KA MO CAKAVA
DIKEVI IKO TALE
Ena yaga vakacava na iyaya vakalivaliva mo vakavinakataka kina nomu ivakarau ni vuli? Ia na cava mo qarauna mo kua kina ni vakawelei?
IVAKAVUVULI VAKAIVOLATABU: “Mo taura matua na vuku kei na raiyawa.”—VOSA VAKAIBALEBALE 3:21.
Rawa ni o Wilika Tale ga
RA TAROGA NA ITABAGONE
Ena Dei Vakacava ena Noqu Vakasama na ka au Vulica?
Qo e tolu na ituvaki ena rawa ni vakawelei iko kina na iyaya vakalivaliva.
YADRA!
O Dau Veiraurautaka na ka o Cakava?
Era sega ni taqea rawa e levu na ka e namaki vei ira e vanua ni cakacaka kei na nodra vuvale. Cava na vuna? Rawa ni wali vakacava na leqa qori?
RA TAROGA NA ITABAGONE
Cava Meu Kila me Baleta na Cakava e Levu Tale na ka ena Dua ga na Gauna?
O rawa ni raica vakabibi nomu itavi ni o cakava e levu na ka ena dua ga na gauna?
