Na cava ena rawa ni vakavuna na veivakaduiduitaki? Na vanua e cavutu mai kina e dua, nona yavusa, nona vosa, nona lotu, ni tagane se yalewa kei na nona ivakatagedegede ni bula. So tale era veivakalewai ena vuku ni duidui ni yabaki, ivakatagedegede ni vuli, na kena irairai e dua se na kena ibulicaki. Ia era sega ni liaca nira sa veivakaduiduitaki tiko.

Vakacava o rawa tale ga ni veivakaduiduitaki? Levu vei keda eda rawa ni raica na nodra veivakaduiduitaki eso tale. Ia e dredre nida liaca ni tiko sara ga vei keda. Na kena dina, eda dau veivakaduiduitaki kece ena so na gauna. Na gauna eda sotava kina e dua na lewe ni matatamata eda dau raicalataka, e kaya o David Williams na parofesa e dau dikeva na itovo ni tamata, “ena duatani sara ga na noda itovo vua, da qai sega ni liaca nida sa veivakaduiduitaki tiko.”

Kena ivakaraitaki, e vakaitikotiko o Jovica ena dua na vanua ena cevaicake kei Urope, era dau sevaki kina e dua na matatamata. E kaya, “Au nanuma nira sa ca kece ga na lewe ni matatamata qori. Ia au sega ni liaca niu sa veivakaduiduitaki tiko. Au nanuma ni sa donu sara tu ga na noqu rai me baleti ira.”

Levu na matanitu era vakarautaka na lawa me valuti kina na veivakaduiduitaki, ia se takalevu tiko ga na leqa qori. Na vuna? Ni lawa qori e rawa ni veisautaka na ka e cakava e dua. Ia ena sega ni veisautaka na vanua e vu mai kina na veivakaduiduitaki, qori na ivakarau ni nona rai se lomana. Vakacava eda na rawa ni vorata na veivakaduiduitaki? E tiko beka na kena iwali?