KA ERA KAYA NA SAENITISI

E tukuni ena dua na ulutaga ni ivola na Harvard Mental Health “ni dau vakavu marau vakalevu na vakavinavinaka. E totoka na ivakarau ni yalo e uqeta na vakavinavinaka, qai sotavi kina e levu na ka marautaki. Ena bulabula vinaka kina vakayago e dua, ena vukei koya me vosota na veika dredre, qai dei nona veitokani.”

KA E KAYA NA IVOLATABU

Eda uqeti ena iVolatabu meda dau vakavinavinaka. A vola na yapositolo o Paula: “Me laurai na nomuni vakavinavinaka.” E rawa ni veiuqeti va qori o Paula ni dau vakavinavinaka sara ga o koya. Kena ivakaraitaki, a ‘vakavinavinakataka tiko ga na Kalou’ ena nodra ciqoma e levu na itukutuku e vunautaka vei ira. (Kolosa 3:15; 1 Cesalonaika 2:13) Ke o via marau dina, kua ni vakavinavinaka ga ena so na gauna. Ia me tiki sara ga ni nomu bula na vakavinavinaka. Na vakavinavinaka ena taqomaki iko mai na itovo o na sega ni taleitaki kina qai vakaseavutaka nomu marau me vaka na nanumi iko ga, vuvu, kei na yaloca.

E vakasakiti na nona dau vakavinavinaka na Dauveibuli, vei keda mada ga na tamata! E kaya na Iperiu 6:10: “Sega ni tawayalododonu na Kalou me guilecava na nomuni cakacaka kei na loloma oni vakaraitaka ena vuku ni yacana.” Kena ibalebale e tawayalododonu na Dauveibuli ke sega ni dau vakavinavinaka.

“Moni marau tiko ga. Ni vakavinavinakataka na ka kece.”—1 Cesalonaika 5:16, 18.

KA SA VAKADINADINATAKI

Nida vakavinavinaka vua e dua e soli iloloma vei keda, e vosa vakayalovinaka se vukei keda, ena kila o koya ni taleitaki se marautaki na ka e solia se cakava. Ke caka vinaka tale ga vei iko e dua na vulagi ni dolava na katuba, ena marau vakalevu ke o vakavinavinakataki koya.

KA E KAYA NA IVOLATABU

E kaya o Jisu: “Moni dau soli ka, ena qai soli vei kemuni. Era na sova ina nomuni ilobi ni isulu e dua na ivakarau e sinai vinaka, ena tabaki sobu, ena kuretaki, ena vuabale.” (Luke 6:38) Rogoca mada na italanoa qo me baleti Rose, dua na goneyalewa galu mai Vanuatu.

E dau tiko o Rose ena nodra soqo ni lotu na iVakadinadina i Jiova. Ia e sega ni kila na ka e vakamacalataki ni sega ni kila na vosa vagalu, e sega tale ga ni dua na lewenilotu e kila na vosa vagalu. Erau qai gade yani e dua na veiwatini rau kila vinaka na vosa vagalu. Ni rau via vukei Rose, rau tekivuna kina na vuli vosa vagalu. E kaya ena marau o Rose: “Au kalougata dina ni levu na noqu itokani era lomani au.” Dua na veivakalougatataki vei rau na veiwatini nodrau raica na marau i Rose, kei na nona sa vakaitavi ena soqo ni lotu. E marautaka tale ga o Rose na nodra sasaga eso mera vulica na vosa vagalu me vakarawarawataka na veivosaki.—Cakacaka 20:35.

“O koya e cabora na vakavinavinaka me nona isoro e vakalagilagi [koya na Kalou].”—Same 50:23.

KA E KAYA NA IVOLATABU

E veisemati vinaka na ka eda vakila kei na ka eda vakasamataka. E masuta o Tevita vua na Kalou: “Au vakasamataka vakatitobu na nomuni cakacaka kece, au vakasamataka vakabibi na cakacaka ni ligamuni.” (Same 143:5) Io, e dau vakasamataka vakatitobu o Tevita na ka e cakava ena vukuna na Kalou. Na nona dau vakasamataka na cakacaka i Jiova ena nona bula taucoko e uqeti koya me dau vakavinavinaka.—Same 71:5, 17.

E veivakasalataki na iVolatabu: ‘Ni dau vakananuma na ka kece ga e dina, e uqeta na veilomani, e rogo vinaka, e kilikili, e ganita me vakacaucautaki.’ (Filipai 4:8) E vakabibitaki ena matavosa “dau vakananuma” meda dau vakasama vakatitobu. Qori ena uqeti keda meda dau vakavinavinaka.

“[Ena] vakaraitaka na yalomatua na vakanananu ni lomaqu.”—Same 49:3.