Ðò xá ɖěɖee mɛ è nɔ dó Flansegbe ɖè ɖò zǎnzǎnhweji Canada tɔn lɛ é mɛ ɔ, tokunɔ gègě nɔ dó Tokunɔgbe Quebec tɔn (LSQ). * Ðó tokunɔ 6 000 mɔ̌ jɛn ɖò finɛ wutu ɔ, wema kpɛɖé jɛn ɖò Tokunɔgbe Quebec tɔn mɛ. É ɖò mɔ̌ có, bo na dó d’alɔ gbɛtɔ́ lɛ bonu ye na mɔ nǔ jɛ Biblu mɛ ɔ, Kúnnuɖetɔ́ Jehovah tɔn lɛ flɔ́ zo dó glɔ nú gǎn e dó wɛ ye ɖè lɛ é agaɖanu dìn, bo na mɔ tɛn dó ɖè wema lɛ tɔ́n dó gbè ɔ mɛ vɔ̌nu.

Bo na dó mɔ nǔ jɛ nǔ e wu gǎn ɖěɖee è dó bo na lilɛ wema lɛ dó gbè ɔ mɛ é ɖò taji é mɛ ɔ, ɖǒ ayi tan Marcel tɔn wu. È jì i ɖò 1941 ɖò toxo Canada tɔn e nɔ nyí Quebec é mɛ. Xwè wè gudo ɔ, é bɛ́ taglomɛzɔn e nɔ nyí méningite é, bo kú tó. Marcel ɖɔ: “Hwenu e un ɖó xwé tɛnnɛ é ɔ, un bɛ́ tokunɔ lɛ sín wemaxɔmɛ ɖé, bo kplɔ́n Tokunɔgbe Quebec tɔn ɖò finɛ. Nugbǒ wɛ ɖɔ wema ɖé lɛ tíìn bɔ è sixu zán dó kplɔ́n mɛ nǔ klewun klewun ɖé lɛ dó tokunɔgbe mɛ, amɔ̌, wema ɖebǔ ɖè ɖò tokunɔgbe mɛ ǎ.”

Etɛwu é ka ɖò taji ɖɔ è ni ɖè wema lɛ tɔ́n dó Tokunɔgbe Quebec tɔn mɛ? Marcel ɖɔ: “Tokunɔ lɛ nɔ jló ɖɔ è ni dó wɛn ɔ emi dó gbè e mɛ emi mɔ nǔ jɛ mlɛ́mlɛ́ é ɖé mɛ, ye nɔ ba na ɖu ɖò dogbó gbemase tɔn lɛ jí ǎ. Ðó wema lɛ ɖò Tokunɔgbe Quebec tɔn mɛ ǎ wutu ɔ, gbè e è nɔ dó kpo nu kpo lɛ é jɛn mǐ ɖó na zán, bɔ nǔ gègě nɔ gú mǐ!”

Bo na dó sú dò hudo Marcel kpo tokunɔ ɖevo e nɔ dó Tokunɔgbe Quebec tɔn lɛ é kpo tɔn ɔ, Kúnnuɖetɔ́ Jehovah tɔn lɛ ɖè wema yetɔn nukɔntɔn ɔ tɔ́n dó Tokunɔgbe Quebec tɔn mɛ ɖò 2005. Ayisɔnmɔ ɔ, ye gbló ada nú azɔ̌xɔsa lilɛdogbeɖevomɛ tɔn yetɔn e ɖò Montreal, ɖò Quebec é. Dìn ɔ, mɛ tɛnwe wɛ nɔ w’azɔ̌ hwebǐnu ɖò finɛ, bɔ mɛ wěwè jɛji ɖevo lɛ lɔ nɔ wá w’azɔ̌ nú táan ɖé. Ye ɖó gbɛ̌ta lilɛdogbeɖevomɛ tɔn atɔn, bo nɔ zán xóyidókanji-xɔsa e mɛ azɔ̌wanú akánkpé lɛ ɖè é wè dó bló video lɛ ɖò ayǐ ɔ jí.

Video tewungbeju ɖěɖee Kúnnuɖetɔ́ Jehovah tɔn lɛ nɔ ɖetɔ́n dó Tokunɔgbe Quebec tɔn mɛ lɛ é nɔ sù nukún tokunɔ ayǐ ɔ jí tɔn lɛ tɔn mɛ tawun. Stéphan Jacques e nyí alɔgɔtɔ́ nú gǎn e nɔ kpé nukún dó Association des Sourds de l’Estrie * wu é ɖɔ: “Un mɔ ɖɔ ye bló video yetɔn lɛ ganji. Alɔ e ye nɔ bló lɛ é nɔ zawě tawun, bɔ nukúnmɛ sín xlɛ̌ lɛ nɔ lɛ́ jɛ acɔ́. Nǔ ɖevo e lɛ́ nyɔ́ nukún ce mɛ é wɛ nyí ɖɔ mɛ ɖěɖee nɔ ɖò video lɛ mɛ lɛ é nɔ sɔnǔ ganji.”

Xójlawema e nɔ nyí Atɔxwɛ bɔ è nɔ zán ɖò kplé e Kúnnuɖetɔ́ Jehovah tɔn lɛ nɔ bló gbɔn gbɛ̀ ɔ bǐ mɛ ɖò aklunɔzán gblamɛ fifo lɛ é hwenu é ko tíìn ɖò Tokunɔgbe Quebec tɔn mɛ dìn nú Kúnnuɖetɔ́ Jehovah tɔn 220 lɛ kpo mɛ ɖevo e nɔ yì kplé lɛ ɖò agun kpo gbɛ̌ta kpo tɛnwe ɖěɖee nɔ dó gbè enɛ ɔ ɖò Quebec lɛ é mɛ é kpo. * Gɔ́ na ɔ, Kúnnuɖetɔ́ lɛ kpó ɖò video Tokunɔgbe Quebec tɔn ɖevo lɛ ɖetɔ́n dó ɛntɛnɛti jí wɛ, kaka jɛ han ɖěɖee jinjɔn Biblu jí bo nɔ dó wusyɛn lanmɛ nú mɛ lɛ é jí.

É víví nú Marcel e xó mǐ ɖɔ ɖò bǐbɛ̌mɛ é tawun ɖɔ nǔ gègě tíìn ɖò Tokunɔgbe Quebec tɔn mɛ dìn. Ðěɖee Kúnnuɖetɔ́ Jehovah tɔn lɛ ɖetɔ́n lɛ é ka sù nukún tɔn mɛ hú bǐ. É ɖɔ: “Nyɔna ɖé wɛ é nyí ɖɔ è ni mɔ video gègě dó Tokunɔgbe Quebec tɔn mɛ ɖò jw.org jí. Enyi un mɔ nǔ ɖěɖee tɔ́n dò gbè ce mɛ ɖò finɛ lɛ é bǐ ɔ, é nɔ víví nú tawun!”