Gudo mɛ ɔ, sunnu e ɖò xó ɖɔ wɛ lɛ é cí xwíi. Nǔ ɖokpo e sín gbè sè wɛ è sixu ko ɖè dìn é wɛ nyí jɔhɔn myɔɖowǔ e ɖò nyinyi wɛ sín gbetótló Alabíi tɔn mɛ é. Ðó agbɔ̌n ko kpé Jɔbu ɖó xó tobutobu e ye ko ɖɔ wá yì é wu wutu ɔ, é sɔ́ ɖó xó ɖé bo na ɖɔ ǎ. Dǒ nukún mɛ kpɔ́n: Jɔbu kpɔ́n Elifazi, Biludadi kpo Sofáa kpo xaan bo ɖò nukún ɖó wɛ ɖɔ ye ni lɛ́ gbɛkan dó xó e ɖɔ wɛ ye ɖè é nu. Ye tlɛ ba na kpɔ́n ɛ lɔ vɔ́vɔ́ ǎ, bo lɛ́ sin xomɛ, ɖó hwɛjijɔ e ye sɔ́ ayi winniwínní dó ba lɛ é, “xógbló” e ye wlí ɖɔ lɛ é kpo nǔ baɖabaɖa e ye ɖɔ dó Jɔbu wu bɔ bǐ cifo lɛ é kpo wutu. (Jɔbu 16:3) Ðebǔ wɛ é na bo nyí gbɔn ɔ, Jɔbu lɛ́ kánɖeji bǐ gbídígbídí bo na jɛhun dó gbejininɔ tɔn jí.

Jɔbu na ko mɔ ɖɔ gbejininɔ kɛɖɛ jɛn nyí nǔ e kpò nú emi é. Nǔɖokan tɔn lɛ bǐ gblé, vǐ tɔn wǒ lɛ bǐ kú, xɔ́ntɔn tɔn lɛ kpo nɔzo tɔn lɛ kpo sɔ́ nɔ jɛ ahwan jǐ tɔn ǎ, ye ka sɔ́ lɛ́ sí i ǎ, bɔ wǎgbɔ tɔn ɔ, éɖesunɔ lɛ́ bɛ́ azɔn. Azɔn hɛn agbaza tɔn bǐ wi, wǔtu tɔn bǐ nyí akpa, bo lɛ́ jì wě. Jɔhɔn e nɔ gosin awɔntín tɔn mɛ é tlɛ nɔ hwɛ́n wǎn. (Jɔbu 7:5; 19:17; 30:30) Enɛ wu ɔ, nǔyá e sunnu atɔn enɛ lɛ ɖɔ nú Jɔbu é zɔ́n b’ɛ sin xomɛ tawun. É kánɖeji bo na ɖexlɛ́ ɖɔ emi kún nyí hwɛhutɔ́ awoxotɔ́ e ye ɖɔ emi nyí é ó. Xó gudo tɔn e Jɔbu ɖɔ lɛ é xwè nu yetɔn dó xɔ. Nǔyá tobutobu e ye ɖɔ wá yì lɛ é zɔ́n bɔ ye sɔ́ wá tuùn nu e ye na lɛ́ kɛ é ǎ. É ɖò mɔ̌ có, Jɔbu kpò ɖò wuvɛ̌ sè wɛ. É kpó ɖò hudo alɔdó tɔn mɛ ɖò ninɔmɛ syɛnsyɛn e mɛ é ɖè é.

Mǐ sixu mɔ nukúnnú jɛ nǔ e wu Jɔbu ma ɖó linlin e sɔgbe é dó ninɔmɛ tɔn wu ǎ é wu. É ɖó hudo alixlɛ́mɛ kpo nǔgbɛnúmɛ kpo tɔn. É lɛ́ ɖó hudo alɔɖakɔ́njinúmɛ kpo gbɔdónúmɛ kpo tɔn; nǔ enɛ lɛ wɛ xɔ́ntɔn tɔn atɔn lɛ ɖó na ko bló. A ko ɖó hudo alixlɛ́mɛ kpo gbɔdónúmɛ kpo tɔn gbɔn mɔ̌ kpɔ́n à? Mɛ ɖěɖee a lin ɖɔ ye nyí xɔ́ntɔn towe lɛ é ka ko flú we kpɔ́n à? Nǔ kplɔnkplɔn dó lee Jehovah Mawu d’alɔ mɛsɛntɔ́ tɔn Jɔbu gbɔn é kpo lee Jɔbu wà nǔ gbɔn é kpo wu sixu zɔ́n bɔ a na ɖó nukúnɖiɖó bo lɛ́ mɔ alɔdó e nyɔ́ zán lɛ é.

Tan Jɔbu tɔn wá ɖè nǔmaɖónukún ɖé xlɛ́. Mɛtuùnmɛ Jɔbu tɔn ɖevo wá xwetɔ́n, é wɛ nyí dɔnkpɛvu Elihu. É cí finɛ xwíi hwenu e sunnu xóxó atɔn lɛ ɖò xó ɖɔ wɛ é bo ɖótó ye. Nǔ e ye ɖɔ lɛ é ɖebǔ nyɔ́ sè n’i ǎ.

Xomɛ sin Elihu dó Jɔbu wu. É ɖ’akpɔ n’i ɖɔ sunnu atɔn lɛ gbidí kɔ nú Jɔbu kaka bɔ ‘é tɛ́n kpɔ́n bo ba hwɛjijɔ nú éɖée bo ba nú Mawu ǎ.’ Enɛ wu ɔ, Elihu sè wuvɛ̌ xá Jɔbu, ɖó é mɔ wuvɛ̌ e mɛ é ɖè é, nǔgbo e é nɔ ɖɔ é gɔ́ nú wěɖexámɛ kpo gbɔdónúmɛ kpo sín hudo e é ɖó bo ma ka mɔ ɖɔxátɔ́ ɖé d’ewu ǎ é. É ɖò wɛn ɖɔ xɔ́ntɔn gbɔdónúmɛtɔ́ enyíì atɔn lɛ sín agbɔ̌n kpé Elihu. É sè nǔyá e ɖɔ nú Jɔbu wɛ ye ɖè lɛ é, bo lɛ́ mɔ gǎn e dó wɛ ye ɖè bo na vɔ́da nú nǔɖiɖi tɔn, kpo gbejininɔ tɔn kpo, lobo lɛ́ kɔ́n wi e ɖò ta tɔn é. Ee lɛ́ nyla bǐ é wɛ nyí ɖɔ ye ɖ’adingban, bo ɖexlɛ́ ɖɔ Mawu ɖesunɔ ɔ, mɛ nyanya wɛ. Elihu sè xó lɛ bǐ gudo é ɔ, é mɔ ɖɔ emi ɖó na ɖɔ xó ɖé dandan.—Jɔbu 32:2-4, 18.

É ɖɔ: “Midɛɛ lɛ ɔ, mɛxo wɛ nú mi, yɔkpɔvu wɛ nyɛ ka nyí; enɛ ɔ wu wɛ un ɖi xɛsi bo ma glá ɖɔ nǔ e nyɛ tuùn ɔ ǎ.” Amɔ̌, é sɔ́ sixu bɔnu d’aɖǔ dìn ǎ. É ɖɔ gɔ́ na ɖɔ: “Nǔnywɛ ɖiɖó ɔ ɖò xwè nu ǎ. Nǔ jlɔjlɔ tuùntuùn ɖò mɛxo nyínyí nu ǎ. (Jɔbu 32:6, 9) Enɛ gudo ɔ, Elihu wá ɖɔ xó habǔ, b’ɛ xlɛ́ ɖɔ xó enɛ lɛ e é ɖɔ wá yì lɛ é nyí nǔgbo. Xó e é ɖɔ lɛ é gbɔn vo bǐ gbídígbídí nú nǔ e Elifazi, Biludadi kpo Sofáa kpo ɖɔ lɛ é. Elihu na ganjɛwu Jɔbu ɖɔ emi kún na ɖɔ xó dó ɖè è kpò alǒ dó dó wuvɛ̌ wuvɛ̌ jí n’i ó. É lɛ́ wlí yɛ̌yi nú Jɔbu, bo ylɔ́ nyikɔ tɔn dó ɖɔ xó n’i, lobo hɛn d’ayi mɛ ɖɔ sunnu atɔn ɖě lɛ kún ɖó sísí n’i ó. * É ɖɔ kpo sísí kpo ɖɔ: “Dìn ɔ Jɔbu, ɖǒtó xó e un ɖó bo na ɖɔ ɔ.”—Jɔbu 33:1, 7; 34:7.

Elihu ɖè wě e ɖò tlɔlɔ lɛ é xá Jɔbu, bo ɖɔ: “Xó e a ɖɔ ɔ kpó ɖò tógwle ce mɛ; . . . ‘Un mɛ́, un hu hwɛ ɖebǔ ǎ, xomɛvɔnɔ wɛ un nyí, un wà nǔ ɖebǔ nyi dò ǎ. Mawu ka kpó ɖò nǔjɛdo mɔ ɖò wǔ ce wɛ.’” Elihu yì xó ɔ jí tlɔlɔ, bo kanbyɔ Jɔbu ɖɔ: “A nɔ ɖɔ: ‘Mawu ɖesu tuùn ɖɔ un nyí hwɛjijɔnɔ!’ Xó towe sɔgbe wɛ a vɛ́dó à?” Elihu sixu yí gbè nú xó enɛ e Jɔbu ɖɔ é ǎ. Enɛ wɛ zɔ́n b’ɛ ɖɔ: “Xó enɛ e tɔ́n sín nu towe mɛ ɔ, un na ɖɔ nú we ɖɔ hwɛ towe kún jɔ ó.” (Jɔbu 33:8-12; 35:2) Elihu tuùn ɖɔ nǔ e gbò Jɔbu lɛ é kpo nǔyá e xɔ́ntɔn tɔn enyíì lɛ ɖɔ n’i lɛ é kpo zɔ́n bɔ xomɛ ko sin i gbadó. É ɖò mɔ̌ có, Elihu gb’akpá nú Jɔbu ɖɔ: “Ma nú xomɛsin kun we yì gbà ó!”—Jɔbu 36:18.

Taji bǐ ɔ, Elihu ɖɔ xó dó jɛ ahwan Jehovah Mawu jí. É ɖɔ xó e ɖò wɛn, bo ka ɖó agbɔ̌n tawun é ɖé dó sɛ̀ sin xwè nú nǔgbo e gɔ́ngɔ́n tawun é ɖé, bo ɖɔ: “Mawu nɔ wà nǔ nyanya gbeɖé ǎ. Nǔbǐwukpétɔ́ ɔ nɔ dóhwɛ agɔ gbeɖé ǎ. . . . Nǔbǐwukpétɔ́ ɔ nɔ kpé ta dò nú hwɛjijɔ ǎ.” (Jɔbu 34:10, 12) Elihu d’alɔ Jɔbu bonu é ni mɔ lee Jehovah nyí nǔblawukúnúmɛtɔ́ kpo nǔjlɔjlɔwatɔ́ kpo sɔ́ é, ɖó Jɔbu ɖò éɖokponɔ tɔn mɛ vídó wɛ, bo ko dó mɛmasí gbè ɖé lɛ nú Mawu. Jehovah hɛn ɔ, é na ko dɔn tó nú Jɔbu ɖó xó enɛ wu, cobo ka tin. (Jɔbu 35:13-15) Bonu Elihu ma na dó ɖexlɛ́ ɖɔ emi tuùn nǔ bǐ ǎ ɔ, é ɖɔ kpo mɛɖéesɔ́hwe kpo ɖɔ: “Mawu kló bɔ è sixu jlɛ́ ǎ.”—Jɔbu 36:26.

Elihu ɖè wě e ɖò tlɔlɔ lɛ é xá Jɔbu cobo ka lɛ́ kpó ɖò xomɛ nyɔ́ dó wǔ tɔn wɛ. É ɖɔ xó dó nukúnɖiɖó jiwǔ ɖé wu, bo ɖɔ ɖɔ Jehovah na lɛ́ bló bɔ Jɔbu na lɛ́ yì kan tɔn xóxó ɔ mɛ gbè ɖokpo. Mawu ɖɔ dó mɛsɛntɔ́ tɔn gbejinɔtɔ́ ɔ wu ɖɔ: “Gbɛ̀ na wá wǔ tɔn; é na lɛ́ winnya.” Xomɛnyínyɔ́ Elihu tɔn sín kpɔ́ndéwú ɖevo ɖíe: Elihu ɖɔ nǔ e Jɔbu ɖó na wà é n’i kpowun ǎ, é nyɔ́ wà ɔ, é ɖɔ é lɔ ni kɛnu. É ɖɔ: “Ðɔ xó, nú hwɛ towe jɔ ɔ, un na ɖɔ hwɛ towe jɔ.” (Jɔbu 33:25, 32) Jɔbu ka kɛnu ǎ. Vlafo xomɛnyínyɔ́xó enɛ lɛ kpo wěɖexámɛ enɛ e dó wusyɛn lanmɛ nú mɛ lɛ é kpo na ko zɔ́n bɔ Jɔbu mɔ ɖɔ emi kún sɔ́ sixu ɖɔ xó ɖé dó jɛ ahwan emiɖée jí ó. Jɔbu sixu ko y’avǐ hwenu e é mɔ ɖɔ nǔ emitɔn ɖu ayi mɛ nú Elihu nǔgbo nǔgbo é.

Nǔ e sunnu gbejinɔtɔ́ enɛ lɛ ɖɔ lɛ é sixu kplɔ́n nǔ taji ɖé lɛ mǐ. Kpɔ́ndéwú Elihu tɔn kplɔ́n lee mǐ na nɔ ɖè wě xá mɛ, bo lɛ́ dó gbɔ nú mɛ gbɔn é mǐ. Xɔ́ntɔn jɔ xɔ́ntɔn ɖé na gbɔ fí e a jɛ dò ɖè tawun é, alǒ ali nyanya e a mlɛ́ é ɖɔ nú we ǎ. (Nǔnywɛxó 27:6) Xɔ́ntɔn mɔhun wɛ mǐ ba na nyí, bo na kpó ɖò xomɛ nyɔ́ dó mɛ ɖěɖee ɖó hudo xomɛnyínyɔ́ kpo wusyɛn dó lanmɛ nú mɛ kpo tɔn lɛ é wɛ, ye na bo tlɛ ɖò nǔ wlá ɖɔ wɛ ɔ nɛ. Enyi mǐɖesunɔ ɖó hudo wěɖexámɛ mɔhun tɔn ɔ, kpɔ́ndéwú Jɔbu tɔn sixu flín mǐ ɖɔ mǐ ni nɔ ɖótó wěɖexámɛ lɛ kpo mɛɖéesɔ́hwe kpo, é nyɔ́ hú ɖɔ mǐ ni gbɛ́. Mǐ mɛ bǐ wɛ ɖó hudo wěɖexámɛ kpo nǔgbɛnúmɛ kpo tɔn. Nú mǐ yí gbè nú ye ɔ, ye sixu hwlɛn gbɛ̀ mǐtɔn.—Nǔnywɛxó 4:13.

Nú Elihu ɖò xó ɖɔ wɛ ɔ, é nɔ kɛnu dó jɔhɔn, akpɔ́kpɔ́, jǐkɛwun kpo jǐ dó gbè kpo wu hwɛhwɛ. É ɖɔ dó Jehovah wu ɖɔ: “Mi ɖótó! Mi ɖótó Mawu sín gbè!” É na nɔ zaan é ɔ, Elihu ɖɔ xó dó “jɔhɔn ɖaxó” ɖé wu. (Jɔbu 37:2, 9) É cí ɖɔ hwenu e é ɖò xó ɖɔ wɛ é ɔ, jɔhɔn syɛnsyɛn ɖé ɖò nyinyi wɛ, bo ɖò syɛnsyɛn d’eji wɛ mɔhunkɔtɔn. Gudo mɛ ɔ, jɔhɔn ɔ wá syɛn bǐ gbídígbídí. Enɛ gudo ɔ, nǔ e syɛn hú mɔ̌ é ɖé jɛ. Jehovah ɖɔ xó!—Jɔbu 38:1.

Nú mǐ ɖò wema Jɔbu tɔn xà wɛ bo wá jɛ wemata ɖagbeɖagbe enɛ lɛ e mɛ Jehovah ɖɔ xó nú Jɔbu ɖè lɛ é jí ɔ, é nɔ víví nú mǐ. Lee jɔhɔn syɛnsyɛn ɖé kpéwú bo na kplɔ́ zunkɔ́hɛnnú ɖé yì gbɔn é ɖɔhun ɔ, é cí ɖɔ xó e Jehovah ɖɔ lɛ é ɖè xó masɔgbe, xó gblégblé e Elifazi, Biludadi kpo Sofáa kpo ɖɔ lɛ é síìn wɛ ɖɔhun. Jehovah tò tin dó sunnu enɛ lɛ hwɛ̌. Jɔbu ɖokponɔ jí wɛ é sɔ́ ayi ɖó; é gbɛ́ nǔ nú mɛsɛntɔ́ vívɛ́ tɔn syɛnsyɛn lee tɔ́ ɖé nɔ gbɛ́ nǔ nú vǐ tɔn gbɔn é.

Jehovah tuùn wuvɛ̌ e mɛ Jɔbu ɖè é. Nǔ tɔn blawǔ nú Jehovah lee é ko nɔ blawǔ n’i gbɔn hwenu e vǐ vívɛ́ éɖesunɔ tɔn lɛ ɖò wuvɛ̌ mɛ é. (Ezayíi 63:9; Zakalíi 2:12) Amɔ̌, é lɛ́ tuùn ɖɔ ‘xlonɔxó é ɖɔ wɛ Jɔbu ɖè lɛ’ é zɔ́n bɔ ninɔmɛ éɖesunɔ tɔn tlɛ lɛ́ ɖò nylanylá d’eji wɛ. Enɛ wu ɔ, Jehovah kan nǔ gegě byɔ Jɔbu bo dó gbɛ́ nǔ n’i. É bɛ́ kpo nǔkanbyɔ elɔ kpo: “Hwenu e un ɖò ayikúngban ɔ ɖó ayǐ wɛ ɔ, fitɛ wɛ a ɖè hwenɛnu? Enyi a ɖó nǔnywɛ hǔn, ɖɔ lee a mɔ dò na gbɔn ɔ nú mì.” Ðò bǐbɛ̌mɛ nǔɖiɖó lɛ tɔn ɔ, “sunví zǎnzǎn tɔn” ɖěɖee nyí xwédo Mawu tɔn e mɛ wɛnsagun lɛ ɖè é ɖò alɔ xò wɛ kpo xósúsú kpo, ɖó nǔjiwǔ e ɖò nǔɖiɖó lɛ mɛ lɛ é wu. (Jɔbu 38:2, 4, 7) É ɖò wɛn ɖɔ Jɔbu kún tuùn nǔtí dó nǔ enɛ wu ó.

Jehovah lɛ́ kpó ɖò xó ɖɔ dó nǔɖiɖó tɔn lɛ wu wɛ. Ðò ali ɖé nu ɔ, mǐ sixu ɖɔ ɖɔ é gbò jagé klewun ɖé nú Jɔbu dó nǔ e gbɛtɔ́ nɔ ylɔ́ ɖɔ nǔnywɛ xwitixwiti e kúnkplá jɔwamɔ sín nǔ lɛ é wu. Nǔ lɛ ɖě ɖíe: akpáxwé nǔnywɛ xwitixwiti tɔn e mɛ è nɔ kplɔ́n nǔ dó sunví lɛ, planɛti kpo nǔ jɔwamɔ tɔn ɖevo e ɖò jɔ mɛ lɛ é kpo wu ɖè é, nǔ kplɔnkplɔn dó nǔ e ɖò gbɛ̀ lɛ é wu, nǔ kplɔnkplɔn dó lee ayikúngban ɔ cí é wu kpo physiques kpo. Taji bǐ ɔ, Jehovah ɖɔ xó dó kanlin ɖěɖee ɖò Jɔbu sín xá mɛ lɛ é ɖé lɛ wu, ɖi kinnikinni, avǔnsákɔwó, sógbɔ́, tócí gbě tɔn, agbo gbě tɔn, gowungo, sɔ́, gɛ̌n, hɔ̌n, Behemɔti (é ɖò wɛn ɖɔ tɔkanlin ɖaxó ɔ wɛ), bɔ Levyatáan wá gbɔn tó (é na ɖibla nyí lǒ). Kpɔ́n bo, wǔjɔmɛ ɖé wɛ é nyí ɖɔ è ni ɖò te, hwenu e Gbɛɖotɔ́ ɔ ɖò nǔ kplɔ́n mɛ dó gbɛ̀ e mǐ jɔ bo wá mɔ é wu wɛ é! *

Etɛ nǔ enɛ lɛ bǐ ka kplɔ́n mǐ? Jɔbu ɖó na lɛ́ sɔ́ éɖée hwe d’eji nǔgbo nǔgbo. Gbɛ̀ vo e sà wɛ Jɔbu ɖè bo lin ɖɔ Jehovah ɖò ya dó nú emi wɛ é ɔ, wuvɛ̌ dó wuvɛ̌ jí nú éɖée wɛ é ɖè kpowun, bo ka lɛ́ ɖò zɔ sɛyi nú Tɔ́ tɔn wanyiyinɔ ɔ wɛ bo dán ɛ. Enɛ wu ɔ, Jehovah kan fí e Jɔbu ɖè hwenu e É bló nǔjiwǔ enɛ lɛ é byɔ ɛ azɔn nabi ɖé, bo lɛ́ kanbyɔ ɛ ɖɔ é sixu ɖ’acɛ dó ye jí à jí. Enyi Jɔbu ma tlɛ sixu kp’acɛ dó nǔɖiɖó Jehovah tɔn yɔywɛ lɛ jí ǎ ɔ, nɛ̌ é ka sixu lin ɖɔ hwɛ emitɔn jɔ bo na ɖɔ nǔ e Gbɛɖotɔ́ ɔ na wà é n’i gbɔn? Ali Jehovah tɔn lɛ kpo linlin tɔn lɛ kpo zɛ linlin Jɔbu tɔn e ɖó dogbó é wu flaflá tɔn à cé?

Nǔ e Jehovah ɖɔ lɛ é bǐ ɖexlɛ́ ɖɔ wǎn e é yí nú Jɔbu é gɔ́ngɔ́n tawun. É cí ɖɔ xó lěhun ɖé ɖɔ nú Jɔbu wɛ Jehovah ɖè, bo ɖò tamɛ linlin zɔ́n ɛ wɛ ɖɔhun: ‘Vǐ ce, enyi nyɛ jɛn dá nǔ enɛ lɛ bǐ bo nɔ kpé nukún dó ye wu ɔ, a lin ɖɔ un kún na kpéwú bo kpé nukún dó wǔ we ó wɛ à? A kpɔ́n é ɔ, un hɛn ɔ na ɖè alɔ sín kan towe mɛ, hu vǐ towe lɛ, gɔn xɛ nya ɖò jǐ we bo lɛ́ d’azɔn we nǔgbo nǔgbo à? Mɛɖé sɔ́ sixu lɛ́ vɔ́ nǔ e a hɛn bú lɛ é na we, bo lɛ́ ɖè we sín wuvɛ̌ syɛnsyɛn e mɛ a ɖè é zɛ Nyiɖokponɔ wu à?’

Nǔkanbyɔ Jehovah tɔn lɛ zɔ́n tamɛ lin Jɔbu; we sín xósin wu jɛn é kpé bo na. É ba hwɛjijɔ nú éɖée ǎ. Kpo mɛɖéesɔ́hwe kpo ɔ, é wá mɔ nǔ jɛ wu nǔgbo ɖɔ emi kún tuùn nǔ kaka ɖé ó, bɔ xó e é wlá ɖɔ wá yì lɛ é wá vɛ́ n’i. (Jɔbu 40:4, 5; 42:1-6) Nǔɖiɖi Jɔbu tɔn sín kpɔ́ndéwú nukúnɖeji ɖé nɛ. É dɛ ɖò nǔ enɛ lɛ bǐ nu gudo cobo ka kpó ɖò nǔɖiɖi e lidǒ tawun é ɖó wɛ. É yí gbè nú nǔgbɛnúmɛ Jehovah tɔn bo huzu jijɔ. Enɛ wu ɔ, enɛ sixu sísɛ́ mǐ bɔ mǐ na kan nǔ elɔ e zɔ́n tamɛ lin mɛ é byɔ mǐɖée, ‘Un ka nɔ sɔ́ nyiɖée hwe ganji bo nɔ yí gbè nú nǔgbɛnúmɛ kpo wěɖexámɛ kpo à?’ Mǐ bǐ wɛ ɖó hudo alɔdó mɔhun tɔn. Enyi mǐ yí gbè nú alɔdó ɔ hǔn, nǔɖiɖi Jɔbu tɔn sín kpɔ́ndéwú xwedó wɛ mǐ ɖè nɛ.

Dìn ɔ, Jehovah ɖè afɔ ɖé bo na dó dó gbɔ nú Jɔbu ɖò wuvɛ̌ tɔn mɛ. Jehovah ɖɔ nú Elifazi e é ɖò wɛn ɖɔ é wɛ nyí mɛxo bǐ ɔ ɖò gbɔdónúmɛtɔ́ enyíì atɔn lɛ mɛ é ɖɔ: “Un sin xomɛ dó we ɖesu, bo sin dó xɔ́ntɔn towe we lɛ, ɖó mi ɖɔ xó ce dó jlɔjlɔ jí lee mɛsɛntɔ́ ce Jɔbu ɖɔ gbɔn é ǎ.” (Jɔbu 42:7) Lin tamɛ dó xó enɛ lɛ jí. Ðiɖɔ wɛ Jehovah ɖè ɖɔ nǔ e sunnu atɔn enɛ lɛ wà lɛ é bǐ wɛ nyla, alǒ xó e Jɔbu ɖɔ lɛ é sɔgbe à? É nyí mɔ̌ ɖebǔ ǎ. * É ɖò mɔ̌ có, vogbingbɔn ɖaxó ɖé ɖò Jɔbu kpo hwɛdómɛtɔ́ tɔn lɛ kpo tɛntin. Jɔbu sín ayi bǐ ko fan, aluwɛ ko ɖi bú i, bɔ hwɛdómɛtɔ́ adingbannɔ lɛ lɛ́ dó kpò awa mɛ n’i. Mɔ̌ mɛ ɔ, é na wlá nǔ ɖɔ hweɖelɛnu ɔ, nǔ ɖò gaan wɛ. Amɔ̌, Elifazi kpo xɔ́ntɔn tɔn we lɛ kpo sè wuvɛ̌ mɔhun lɛ ǎ. Ðó nǔɖiɖi yetɔn vɔ́da wutu ɔ, ye ɖɔ xó gblégblé lɛ ma ɖi xɛsi bo lɛ́ wà mɔ̌ kpo goyiyi kpo. É nyí Jɔbu xomɛvɔnɔ ɔ kɛɖɛ wɛ ye tɔ́n ahwan ǎ, amɔ̌, ee nyla bǐ é wɛ nyí ɖɔ ye ɖɔ ɖagbe Jehovah ɖesunɔ tɔn ǎ, bɔ mɔ̌ mɛ ɔ, ye dó jì i ɖɔ é nyí Mawu acɛgbatɔ́, bo tlɛ lɛ́ nyí nǔnyanyawatɔ́!

Enɛ wu ɔ, é sɔgbe ɖɔ Jehovah byɔ sunnu atɔn enɛ lɛ ɖɔ ye na savɔ̌ gboblí ɖokpo. Ye ɖó na zán nyibu’sú tɛnwe kpo agbo tɛnwe kpo dó savɔ̌ ɔ; azɔ̌ kpannyikpannyi ɖé wɛ, ɖó Mɔyizisɛ́n ɔ wá ɖɔ ɖò nukɔnmɛ ɖɔ nyibu’sú wɛ vɔsanúxwlémawutɔ́ ɖaxó ɔ na zán dó savɔ̌, enyi hwɛ e é hu é dɔn akɔta ɔ bǐ dó hwɛ mɛ ɔ nɛ. (Levíi ví lɛ 4:3) É wɛ v’axi hú kanlin e è nɔ zán dó savɔ̌ na ɖò Sɛ́n ɔ glɔ́ lɛ é bǐ. Gɔ́ na ɔ, Jehovah ɖɔ ɖɔ cobonu emi na yí gbè nú vɔsisa hwɛdómɛtɔ́ Jɔbu tɔn enɛ lɛ tɔn ɔ, Jɔbu ɖó na tó xoɖɛ dó ta yetɔn mɛ hwɛ̌. * (Jɔbu 42:8) Kpɔ́n lee é na ko dó gbɔ nú Jɔbu sɔ ɖɔ Mawu tɔn mɔ xomɛvɔnɔ tɔn, b’ɛ lɛ́ mɔ bɔ nǔjlɔjlɔwiwa Jehovah tɔn jɛ wě vaan é!

Jehovah ɖó jiɖiɖe ɖɔ Jɔbu na bló nǔ e emi byɔ ɖ’así tɔn é, bo na sɔ́ hwɛ kɛ sunnu enɛ lɛ e d’akpɔ n’i syɛnsyɛn é. Jɔbu ka dó winnya Tɔ́ tɔn ǎ. (Jɔbu 42:9) Tónúsíse tɔn nyí gbejininɔ tɔn sín xlɛ̌ ɖaxó ɖé, bo tlɛ ɖó agbɔ̌n tawun hú xó e é sixu ɖɔ tɔ́n é. Enɛ hun nyɔna sín ali ɖaxó ɖé nú Jɔbu.

Jehovah ‘nyɔ́ xomɛ dó Jɔbu wu ɖesu, bɔ nǔ tɔn lɛ́ blawǔ n’i titewungbe.’ (Jaki 5:11) Gbɔn nɛ̌ é? Jehovah bló bɔ Jɔbu sín azɔn gbɔ. Dǒ nukún mɛ bo kpɔ́n lee nǔ na ko cí nú Jɔbu, hwenu e é ɖ’ayi wu ɖɔ gbɛ̀ wá emi wu, bɔ emi “lɛ́ winnya” lee Elihu ko ɖɔ ɖ’ayǐ gbɔn é é! Mɛtɔn lɛ kpo xɔ́ntɔn tɔn lɛ kpo wá dó alɔ e sín hudo é ɖó é è lo, gbɔn xomɛ nyinyɔ́ dó wǔ tɔn ganji kpo nǔ nina ɛ kpo gblamɛ. Jehovah lɛ́ vɔ́ nǔ e Jɔbu ko ɖó ɖ’ayǐ é donu we na ɛ, dó dó dɔkun n’i. Bɔ vǐ tɔn e kú lɛ é ka lo? Etɛ Jehovah ka wà dó ɖ’alɔ akɔ́n jí n’i? Jɔbu kpo asì tɔn kpo mɔ gbɔdónúmɛ e sín hudo ye ɖó é ɖó bǎ ɖé mɛ, bo lɛ́ wá ɖó vǐ wǒ. Gbɔn nǔjiwǔ gblamɛ ɔ, Jehovah lɛ́ na jidɔ́ Jɔbu. Jɔbu lɛ́ nɔ gbɛ̀ nú xwè 140 jɛji, bo kpéwú bo lɛ́ mɔ jijimɛ vǐ tɔn lɛ tɔn ɛnɛ, bɔ ye sù ɖò nukún tɔn mɛ. Mǐ xà ɖɔ: “Jɔbu ko kpò bǐ cobo kú; é dɔ́ji ɖesu.” (Jɔbu 42:10-17) Ðò Palaɖisi mɛ ɔ, Jɔbu kpo asivɛ́ tɔn kpo na nɔ bǔ xá xwédo yetɔn, kaka jɛ vǐ wǒ e ahwantɔ́nmɛ Satáan tɔn hu lɛ é jí.—Jaan 5:28, 29.

Etɛwu Jehovah ka d’ajɔ Jɔbu sɔmɔ̌? Biblu ɖɔ: “Suúlu e Jɔbu ɖó ɔ, mi sè.” (Jaki 5:11) Jɔbu dɛ ɖò wuvɛ̌ e syɛn tawun bɔ mǐ mɛ gegě ma tlɛ sixu lin ɖɔ nǔ na nyí mɔ̌ ǎ lɛ é nu. Xókwín “dɛ” ɔ kplɔ́n mǐ ɖɔ Jɔbu wà nǔ hú mɛtɛnkpɔn enɛ lɛ mɛ gbingbɔn dín kpowun. Nǔɖiɖi syɛnsyɛn e é ɖó nú Jehovah é kpo wǎn e é yí n’i é kpo zɔ́n b’ɛ dɛ ɖ’enu. É sin xomɛ, bo hɛn mɛ dó xomɛ ǎ, é nyɔ́ wà ɔ, é sɔ́ jlǒ dó sɔ́ hwɛ kɛ mɛ ɖěɖee tlɛ tuùn bo d’akpɔ n’i lɛ é. É ka jó nukúnɖiɖó xɔ akwɛ tɔn alǒ gbejininɔ tɔn dó kpɔ́n ǎ.—Jɔbu 27:5.

Mǐ mɛ bǐ wɛ ɖó hudo didɛ tɔn. Mǐ sixu ɖó nukún ɖɔ Satáan na tɛ́n kpɔ́n, bo dó kpò awa mɛ nú mǐ lee é bló gbɔn nú Jɔbu é. Amɔ̌, enyi mǐ dɛ kpo nǔɖiɖi kpo, sɔ́ mǐɖée hwe, sɔ́ jlǒ dó sɔ́ hwɛ kɛ mɛ ɖevo lɛ, bo kánɖeji bo na nya xɛ ɖò gbejininɔ mǐtɔn jí ɔ, mǐ lɔmɔ̌ sixu ɖeji ɖɔ sɔ na nyɔ́. (Eblée lɛ 10:36) Nú mǐ nɔ gbeji Jɔbu ɖɔhun ɔ, xomɛ na sin Satáan gbadó, xomɛ ka na hun Jehovah e yí wǎn nú mǐ é.