Ahwan Haamagedɔni tɔn nɔ dó gesí ahwan gudogudo tɔn e acɛkpikpa gbɛtɔ́ tɔn lɛ kpo Mawu kpo na fun xá yeɖée é. Acɛkpikpa enɛ lɛ kpo mɛ e nɔ nɔ gudo nú ye lɛ é kpo nɔ gbɛ́ ɖɔ emi kún na hwíhwɛ́ emiɖée dó acɛkpikpa Mawu tɔn glɔ́ ó, dó ɖè gbè e klán xá ɛ wɛ ye ɖè dìn é xlɛ́. (Ðɛhan 2:2) Ahwan Haamagedɔni tɔn na bló bɔ acɛkpikpa gbɛtɔ́ tɔn lɛ na wá vivɔnu.—Daniyɛli 2:44.

 Azɔn ɖokpo géé jɛn xókwín “Haamagedɔni” ɔ tɔ́n ɖò Biblu mɛ, ɖò Nǔɖexlɛ́mɛ 16:16 mɛ. Ðò nǔɖɔɖ’ayǐ linu ɔ, wema Nǔɖexlɛ́mɛ tɔn xlɛ́ ɖɔ è na xò “axɔ́su e ɖò ayikúngban ɔ bǐ jí lɛ” é kplé ɖò “tɛn e mɛ è nɔ ylɔ́ ɖɔ Haamagedɔni . . . dó Ebléegbe mɛ é” “nú ahwan e è na fun ɖò Mawu Nǔbǐwukpétɔ́ ɔ sín azǎn ɖaxó ɔ gbè é.”—Nǔɖexlɛ́mɛ 16:14.

 Mɛ̌ mɛ̌ e ka na fun ahwan ɖò Haamagedɔni? Jezu Klisu na nɔ nukɔn nú ahwankpá jixwé tɔn, bɔ ye na ɖu ɖò kɛntɔ́ Mawu tɔn lɛ jí. (Nǔɖexlɛ́mɛ 19:11-16, 19-21) Mɛ ɖěɖee nɔ klán gbè xá acɛkpikpa Mawu tɔn lɛ é kpo mɛ ɖěɖee nɔ sɔ́ nyikɔ tɔn xò kɔ́ lɛ é kpo ɖò kɛntɔ́ enɛ lɛ mɛ.—Ezekiyɛli 39:7.

 Gbadahweji Azíi tɔn ɖesu wɛ è na fun ahwan Haamagedɔni tɔn ɔ ɖè à? Eǒ. É nyí xá ɖé mɛ lě wɛ è na fun ahwan Haamagedɔni tɔn ɔ ɖè ǎ, loɔ, gbɛ̀ ɔ bǐ mɛ wɛ è na fun gbɔn.—Jelemíi 25:32-34; Ezekiyɛli 39:17-20.

 Haamagedɔni, ee hweɖelɛnu ɔ, è nɔ lilɛ dó Har-Maguédon (Har Meghiddôn ɖò Ebléegbe mɛ) é sín tinmɛ wɛ nyí “Só Mɛgido tɔn.” Toxo Izlayɛli hwexónu tɔn ɔ tɔn ɖé wɛ nɔ nyí Mɛgido. Hwenuxó ɖɔ xó dó ahwan baɖabaɖa ɖěɖee è fun ɖò xá tɔn mɛ lɛ é wu, kaka jɛ ɖěɖee xó è ɖɔ ɖò Biblu mɛ lɛ é jí. (Hwɛɖɔtɔ́ lɛ 5:19, 20; 2 Axɔ́su lɛ 9:27; 23:29) É ɖò mɔ̌ có, Haamagedɔni sixu dó gesí fí e yá dó Mɛgido hwexónu tɔn é lě ǎ. Só ɖaxó ɖě ɖò finɛ ǎ, gɔ́ na ɔ, Tɔdo Izleyɛli tɔn e ɖò akpá tɔn é tlɛ sixu hɛn mɛ e na fun ahwan xá Mawu lɛ é bǐ ǎ. È na ɖɔ ɔ, Haamagedɔni ɔ, ninɔmɛ gbɛ̀ ɔ bǐ tɔn e mɛ akɔta lɛ na xò yeɖée kplé, bo na klán gbè xá acɛkpikpa Mawu tɔn azɔn gudogudo tɔn ɔ ɖè é wɛ.

 Nɛ̌ nǔ lɛ ka na nyí gbɔn ɖò ahwan Haamagedɔni tɔn hwenu? Mǐ tuùn lee Mawu na zán hlɔnhlɔn tɔn gbɔn é ǎ, amɔ̌, ahwanfunnú lěhun lɛ e é ko zán ɖò hwexónu kpɔ́n lɛ é ɖò así tɔn: kɛ́njí, ayikúngban dánwǔ, jǐ ɖaxó, myɔ kpo hwemí kpo, weziza kpo azɔn kpo. (Jɔbu 38:22, 23; Ezekiyɛli 38:19, 22; Xabakuku 3:10, 11; Zakalíi 14:12) É hwe bǐ ɔ, kɛntɔ́ Mawu tɔn ɖé lɛ na hu yeɖée lɛ ɖò manywɛ mɛ, cobo na wá tuùn ɖɔ Mawu wɛ ɖò ahwan fun xá emi wɛ.—Ezekiyɛli 38:21, 23; Zakalíi 14:13.

 Haamagedɔni wɛ na nyí vivɔnu gbɛ̀ ɔ tɔn à? É na nyí vivɔnu planɛti mǐtɔn tɔn ǎ, ɖó xwé gbɛtɔ́ lɛ tɔn wɛ ayikúngban ɔ nyí, bo ka na nyí kaka sɔyi. (Ðɛhan 37:29; 96:10; Nǔnywɛtɔ́xó 1:4) Haamagedɔni na sú gbɛtɔ́ kún dó ǎ, é nyɔ́ wà ɔ, é na hwlɛn mɛ gán wɛ, ɖó “mɛ wɔbuwɔbu ɖé” na xò zlɛ́. Mɛsɛntɔ́ Mawu tɔn lɛ wɛ ye nyí.—Nǔɖexlɛ́mɛ 7:9, 14; Ðɛhan 37:34.

 BXókwín “gbɛ̀” ɔ nɔ dó gesí ayikúngban ɔ, bɔ hweɖelɛnu ɔ, é nɔ lɛ́ dó gesí gbɛtɔ́ nyanya ɖěɖee klán gbè xá Mawu lɛ é. (1 Jaan 2:15-17) Mɔ̌ mɛ ɔ, Haamagedɔni na bló bɔ “gbɛ̀ elɔ na vɔ.”—Matie 24:3.

 Hwetɛnu Haamagedɔni ka na bɛ́? Hwenu e Jezu ɖò xó ɖɔ dó ya ɖaxó ɔ e sín vivɔnu ahwan Haamagedɔni tɔn na bɛ́ é wu wɛ é ɔ, é ɖɔ: “Mɛɖé tuùn azǎn ɔ ǎ; mɛɖé ka tuùn gan ɔ mɛ ǎ; wɛnsagun Mawu tɔn lɛ tuùn ǎ; nyɛ Mawu ví ɔ ɖesu tuùn ǎ; Tɔ́ ɔ ɖokponɔ géé wɛ tuùn.” (Matie 24:21, 36) É ɖò mɔ̌ có, Biblu ɖexlɛ́ ɖɔ Haamagedɔni na bɛ́ ɖò fí ɖiɖe Jezu tɔn e è ma na mɔ kpo nukún kpo ǎ, b’ɛ bɛ́ ɖò 1914 é hwenu.—Matie 24:37-39.