Kɛntɔ́ Klisu tɔn ɔ nyí mɛ ɖokpo alǒ gbɛ̌ta ɖé kpowun ǎ, ɖó Biblu ɖɔ ɖɔ “Klisu sín kɛntɔ́ gegě” wɛ tíìn. (1 Jaan 2:18) È na ɖɔ ɔ, xógbe “kɛntɔ́ Klisu tɔn” e è ɖè sín xókwín Glɛkigbe tɔn mɛ é sín tinmɛ wɛ nyí “mɛ e ma ɖò gbè ɖokpo ɔ dó xá Klisu wɛ ǎ é,” bo nɔ dó gesí mɛ ɖebǔ e nɔ wà nǔ e bɔ d’ewu lɛ é é:

•   Gbɛ́ gbídígbídí ɖɔ Jezu kún nyí Klisu (Mɛsiya) ó, alǒ gbɛ́ gbídígbídí ɖɔ é kún nyí Vǐ Mawu tɔn ó.—1 Jaan 2:22.

•   Klán gbè xá Klisu, Mɛ e Mawu sɔ́ é.—Ðɛhan 2:1, 2; Luki 11:23.

•   Ðɔ ɖɔ emi wɛ nyí Klisu ɔ.—Matie 24:24.

•   Nɔ dóya nú ahwanvu Klisu tɔn lɛ, ɖó Jezu nɔ mɔ ɖɔ nǔ e è nɔ wà nú ye é ɔ, emi wà na wɛ è ɖè.—Mɛsɛ́dó 9:5.

•   Nɔ ɖɔ ɖò nu kpowun ɖɔ emi nyí Klisanwun bo ka nɔ wà nǔ e sɛ́n ɔ zɔ́n lɛ é ǎ, alǒ nɔ wló mɛ ɖu.—Matie 7:22, 23; 2 Kɔlɛntinu lɛ 11:13.

 Biblu ɖɔ xó dó mɛ ɖěɖee nɔ wà nǔ mɔ̌hun lɛ é ɖokpo ɖokpo wu ɖɔ ye nyí kɛntɔ́ Klisu tɔn lɛ gudo é ɔ, é lɛ́ ylɔ́ ye bǐ kplékplé ɖɔ “Klisu kɛntɔ́.” (2 Jaan 7) Kɛntɔ́ Klisu tɔn xwetɔ́n azɔn nukɔntɔn ɔ ɖò mɛsɛ́dó lɛ hwenu, bo ka kpò ɖò ayǐ gbà wɛ sín hwenɛnu. Biblu ko ɖɔ nǔ mɔ̌hun xó ɖ’ayǐ.—1 Jaan 4:3.

•   Ye nɔ fúnfún adingbanxó lɛ kpé dó Jezu wu. (Matie 24:9, 11) Ði kpɔ́ndéwú ɔ, mɛ ɖěɖee nɔ kplɔ́n Atɔnɖobǔ mɛ alǒ nɔ kplɔ́n mɛ ɖɔ Jezu nyí Mawu Nǔbǐwukpétɔ́ ɔ lɛ é nɔ sɔ́ ta nǔkplɔnmɛ Jezu tɔn lɛ, éyɛ ɖɔ: “Tɔ́ ɔ hugǎn mì.”—Jaan 14:28.

•   Kɛntɔ́ Klisu tɔn lɛ nɔ xò nǔ e Jezu ɖɔ dó lee Axɔ́suɖuto Mawu tɔn nɔ wà nǔ gbɔn é wu é nyi kɛ́n. Ði kpɔ́ndéwú ɔ, sinsɛngán ɖé lɛ nɔ ɖɔ ɖɔ Klisu nɔ zán acɛkpikpa gbɛtɔ́ tɔn lɛ dó w’azɔ̌. Amɔ̌, nǔkplɔnmɛ enɛ sɔ́ ta nǔkplɔnmɛ Jezu tɔn elɔ: “Axɔ́suɖuɖu ce nyí gbɛ̀ mɛ fí tɔn ǎ.”—Jaan 18:36.

•   Ye nɔ ɖɔ ɖɔ Jezu wɛ nyí Aklunɔ emitɔn, amɔ̌, ye nɔ setónú nú gbeɖiɖe tɔn lɛ ǎ, kaka jɛ ee ɖɔ ɖɔ è ni jlá wɛnɖagbe Axɔ́suɖuto ɔ tɔn é jí.—Matie 28:19, 20; Luki 6:46; Mɛsɛ́dó 10:42.