Mɛ ɖěɖee nɔ bló hlobóo lɛ é ɖò nǔ sɔ́ nú macinu ɖěɖee na d’alɔ dotóo mɛzɛtɔ́ lɛ bɔ ye na nɔ zɛ akpáxwé e gɛdɛ tawun ɖò gbɛtɔ́ wu lɛ é wɛ. Kanlin e nɔ nyí Pieuvre é sín awa e bɔ tawun lɛ é wu wɛ ye kpɔ́n dó dó sɔnǔ nú macinu lɛ ɖokpo.

Ðǒ Ayi Nǔ Elɔ Wu: Pieuvre sixu zán awa tantɔn e é ɖó bo sixu dlɛ́n bo ka lɛ́ bɔ lɛ é dó wlí nǔ, hɛn nǔ, alǒ fyɔ́n nǔɖe, enyi nǔ ɔ na bo tlɛ ɖò fí e hwe tawun é ɔ nɛ. É sixu nyi awa tɔn lɛ dó fí ɖebǔ, amɔ̌ é sixu bló bɔ gǒflɛ́mɛ awa ɔ tɔn lɛ syɛn, nú é byɔ ɖó mɔ̌ ɔ nɛ.

Dobanúnǔtɔ́ lɛ lin ɖɔ hlobóo sín awa e na bɔ bo na nɔ lilɛ Pieuvre tɔn lɛ ɖɔhun lɛ é na d’alɔ dotóo mɛzɛtɔ́ lɛ hwenu e ye na ɖò azɔ̌ wà nú mɛ wɛ ɖò fí e ján tawun lɛ é wɛ é b’ɛ na vɛ́ jlɛ́. Azɔ̌wanú mɔhun sixu zɔ́n bɔ è na nɔ zɛ azinzɔnnɔ ɖěɖee azɔ̌wiwa nú ye dó glɛ̌ lɛ é.

Kpɔ́n lee awa Pieuvre tɔn e bɔ lɛ é nɔ wà nǔ gbɔn é

È ko bló hlobóo awanɔ mɔhun ɖé, bo ko zán ɖò mɛzizɛ ɖé lɛ hwenu. Akpáxwé awa hlobóo ɔ tɔn ɖé ɖiga yì 135 millimètres bɔ è sixu zǎn dó sɔ́ xomɛnú gbɛtɔ́ tɔn e bɔ lɛ é dó jǐ ɖó bǎ ɖé mɛ, bɔ nǔɖe ka na wà ye ǎ, bɔ akpáxwé tɔn ɖevo ka nɔ ɖò mɛ ɔ zɛ wɛ. Dotóogán Tommaso Ranzani, ee ɖò mɛ ɖěɖee bló hlobóo ɔ lɛ é mɛ é ɖɔ ɖɔ “mǐ lin ɖɔ wlɛnwín enɛ e mǐ mɔ é ɔ, bǐbɛ̌ wɛ jɛn mǐ ɖé nɛ, mǐ ka na lɛ́ blǒ macinu mɔhun ɖevo lɛ bɔ ye na nɔ wà azɔ vovo bo na lɛ́ kpɔ́n te d’eji.”

Etɛ a ka lin? Awa jiwǔ e Pieuvre ɖò é wá nú éɖée wɛ à? Alǒ dǎ wɛ è dá?