Mɛjitɔ́ e nɔ yi azɔ̌mɛ é ɖé lɛ́ nɔ wá gbeta ɔ kɔn bó nɔ sɛ́ vǐ yětɔn e ma ko su wěmaxɔmɛ yi ǎ lɛ́ é dó vǐhɛntɛn ɖé. Fí ɖé wɛ bɔ è nɔ wa nǔ ɖe wěmaxɔmɛ ɖɔhun. Énɛ́ ka ná wa ɖagbe nú vǐ towe a?

•  Nǔ ɖěɖěe a ɖó ná kanbyɔ́ hwiɖée lɛ́ é

•  Nǔ e a sixú wa é

 Vǐhɛntɛn ka ná d’avaja kancícá mɛjitɔ́ kpó vǐ kpó tɔn mɛ wɛ a? É sixú wa mɔ̌. Ðo xwe nukɔntɔn e vǐ ɖé nɔ ɖó lɛ́ é mɛ ɔ, tamɛfɔn tɔn nɔ yá wǔ su ɖo ali ɖé lɛ́ nu, bó nɔ kúnkplá kancícá e é ɖó xá mɛ ɖěvo lɛ́ é. Tɛ́n kpɔ́n bó nɔ kpɔ́ xá vǐ towe lěe a kpé wú gbɔn é bǐ, hwe énɛ́ e nu tamɛfɔn tɔn ná ɖo susu wɛ é.—Sɛ́nflínmɛ 6:6, 7.

•    Mɛjitɔ́ ɖěɖěe ɖo linlin wɛ bó ná sɔ́ vǐ yětɔn ɖó vǐhɛntɛn lɛ́ é ɖó ná lin tamɛ kpɔ́n dó lěe yě ná kpo ɖo kancícá syɛ́nsyɛ́n ɖé ɖó xá vǐ yětɔn wɛ gbɔn é wú.

 Vǐhɛntɛn ná vɔ́ da nú yɛ e vǐ towe ná mɔ ɖo ta nú we é wɛ a? É sixú wa mɔ̌. Wěma Hold On to Your Kids ɖɔ: “Lě do e vǐ e ma ko su wěmaxɔmɛ yi ǎ lɛ́ é nɔ zán hwenu ɖó kpɔ́ xá yěɖée lɛ́ sɔ é ɔ, mɔ̌ do wɛ yě nɔ kplɔ́n walɔ e ɖo gbɛ̌ yětɔn lɛ́ fɛnnu lɛ́ é sɔ.”

•    Mɛjitɔ́ ɖěɖěe ɖo linlin wɛ bó ná sɔ́ vǐ yětɔn ɖó vǐhɛntɛn lɛ́ é ɖó ná lin tamɛ kpɔ́n ɖɔ émí ka ná kpé wú bó ná kpo ɖo gbe ɖó dó vǐ émítɔn jí wɛ hú gǎn a jí.

 Vǐhɛntɛn ka ná bló b’ɛ ná bɔwǔ nú vǐ towe bɔ é ná se wěma hwenu e é ná bɛ́ wěmaxɔmɛ é? Mɛɖé lɛ́ ɖɔ ɛɛn. Mɛ ɖěvo lɛ́ ɖɔ ɖɔ vǐhɛntɛn ɖó kancícá kpɛví ɖé xá nǔwúkpíkpé nǔkplɔ́nkplɔ́n tɔn vǐ ɖé tɔn, alǒ kún ɖó ɖěbǔ xá ó. Ðěbǔ wɛ é ná bó nyí ɔ, dotóo Penelope Leach, éé nɔ gbéjé taglo yɔkpɔ́vú lɛ́ tɔn kpɔ́n é ɖɔ: “Ma nɔ lin ɖɔ nǔ e yɔkpɔ́vú lɛ́ kplɔ́n ɖo wěmaxɔmɛ é wɛ ná hɛn le wá nú yě hú gǎn ɖo gbɛzán yětɔn mɛ ó. Ma ka nɔ lɛ́ lin ɖɔ é nyɔ́ hú gǎn hwebǐnu ɖɔ vǐ ɖé ní kpo ɖo vǔ tawun bó bɛ́ wěmaxɔmɛ ó. Nú a nɔ lin nǔ gbɔn mɔ̌ ɔ, a ná hu tɛ́ nú nǔ ɖěɖěe a ko kplɔ́n vǐ towe sín hwenu e a ji i é.”

•    Mɛjitɔ́ ɖěɖěe ɖo linlin wɛ bó ná sɔ́ vǐ yětɔn ɖó vǐhɛntɛn lɛ́ é ɖó ná lin tamɛ kpɔ́n ɖɔ mɔ̌ wiwa ka ná hɛn le wá, alǒ ɖo dandan a jí.

 É ka sixú nyɔ́ bló bɔ hwɛ, alǒ mɛ e a da é ná nɔ nɔ xwégbe bó ná nɔ kpé nukún dó vǐ ɔ wú a? Ðo ninɔmɛ gěgé mɛ ɔ, mɛjitɔ́ we lɛ́ bǐ nɔ w’azɔ̌ bó ná dó ɖó akwɛ́ d’é jí kpowun wútu. Le e yě ná mɔ ɖ’é mɛ lɛ́ é ka ná sɔ mɔ̌ kɔ a?

•    Mɛjitɔ́ ɖěɖěe ɖo linlin wɛ bó ná sɔ́ vǐ yětɔn ɖó vǐhɛntɛn lɛ́ é ɖó ná kpɔ́n ɖɔ émí ka sixú ɖe akwɛ́zínzán kpo, bónú mɛjitɔ́ ɖokpó ná sixú nɔ xwégbe a jí.

 Cóbónú mi ná wá gbeta ɔ kɔn bó ná sɔ́ vǐ mitɔn ɖó vǐhɛntɛn ɖé hǔn, mi gbéjé nyɔ̌ná e ɖ’é mɛ lɛ́ é kpó nǔ e é ná ji lɛ́ é kpó kpɔ́n. Nú mi wa mɔ̌ gúdo, bó mɔ ɖɔ vǐhɛntɛn ɖé wɛ mi ná sɔ́ vǐ ɔ ɖó ɔ, nǔ ɖěvo tɛ́ lɛ́ jí mi ka ɖó ná lɛ́ lin tamɛ dó?

 Biblu ɖɔ ɖɔ “mɛ e ayi tɔn . . . ɖo te ɔ nɔ lin tamɛ cóbó nɔ wa nǔ.” (Nǔnywɛ́xó 14:15) Mi hɛn nǔgbódodó énɛ́ ayi mɛ, bó lin tamɛ kpɔ́n ganjí cóbó sɔ́ vǐhɛntɛn alɔkpa ɖěbǔ.

 Mi ba do nú nǔ dó vǐhɛntɛn e ɖe nú mi lɛ́ é jí

•   Mɛjitɔ́ ɖé lɛ́ nɔ sɔ́ vǐ yětɔn ɖó vǐhɛntɛn e ɖo mɛɖé xwé, bɔ nukúnkpévǐwútɔ́ ɖokpó, alǒ kléwún ɖé ɖe, lobɔ gbɛ̌ta yɔkpɔ́vú lɛ́ tɔn kléwún ɖé ɖe é é.

•   Mɛjitɔ́ ɖěvo lɛ́ nɔ ylɔ́ hɛ̌nnumɔ yětɔn ɖé, alǒ nukúnkpévǐwútɔ́ ɖé, b’ɛ nɔ nɔ gɔ̌n yětɔn bó nɔ kpé nukún dó vǐ yětɔn wú.

 Ninɔmɛ lɛ́ bǐ wɛ ɖó ɖagbe kpó nyanya kpó. Étɛ́wú mi ma ka ná kan nǔ byɔ́ mɛjitɔ́ ɖěɖěe ko sɔ́ vǐ yětɔn ɖó vǐhɛntɛn alɔkpa ɖé lɛ́ é ǎ? Biblu ɖɔ: “Mɛ ɖěɖěe nɔ ba wěɖexámɛ lɛ́ é nɔ ɖó nǔnywɛ́.”—Nǔnywɛ́xó 13:10, nwt.

 Bɔ nú vǐhɛntɛn ɖé wɛ mi sɔ́ ɔ ka lo? Ðo ninɔmɛ énɛ́ mɛ ɔ . . .

 Mi ba do nú nǔ dó fí ɔ wú

•   Axɔ́sú ka yí gbe nú fí ɔ, alǒ, fí ɔ ka xwedó nǔ e sɛ́n byɔ́ lɛ́ é a? Gbeɖewéma tɛ́ lɛ́ fí ɔ ka ɖó? Xá tɛ́ mɛ é ka ɖe? É ka ɖó nyǐkɔ ɖagbe a?

•   Fí ɔ ka mɛ́ bó ɖo ayijayǐ mɛ a?

•   Azɔ̌ tɛ́ lɛ́ yě ka nɔ kplɔ́n vǐ lɛ́ ɖo fínɛ́? a

 Mi ba do nú nǔ dó nukúnkpévǐwútɔ́ lɛ́ wú

•   Azɔ̌ tɛ́ è ka kplɔ́n yě? Kpɔ́n ɖɔ è ka kplɔ́n lěe yě ná kplɔ́n vǐ e ɖo vǔ e ɖé gbɔn é sín azɔ̌ yě a jí. Lɛ̌ kpɔ́n ɖɔ nú ajijimɛ sín nǔɖé jɛ dó vǐ ɔ jí, alǒ vǐ ɔ xɛ́ nǔ ɔ, yě ka sixú yá wǔ d’alɔ a jí.

•   Mɛ ɖěɖěe ja nukún kpé dó vǐ mitɔn wú gbé lɛ́ é ko wa sɛ́nnú ɖé kpɔ́n wɛ a?

•   È nɔ ɖo azɔ̌watɔ́ lɛ́ ɖyɔ́ wɛ hwɛhwɛ wɛ a? Ényí mɔ̌ wɛ ɔ, vǐ mitɔn ná nɔ ɖo hǔzúhúzú sɔgbe xá nukúnkpévǐwútɔ́ yɔ̌yɔ́ lɛ́ wɛ gbɛmɛ nɛ́.

•   Vǐ nabí wú nukúnkpévǐwútɔ́ ɖokpó ɖokpó ka nɔ kpé nukún dó? Nú vǐ gěgé wɛ ɖo kɔ jí nú nukúnkpévǐwútɔ́ ɔ, é ná sixú kpé nukún dó vǐ mitɔn wú ganjí lěe é byɔ́ ɖó é ǎ. É ɖo wɛn ɖɔ bǎ e mɛ è ná kpé nukún dó vǐ ɖé wú yi ɖó é nɔ sín xwe e é ɖó é kpó nǔwúkpíkpé tɔn lɛ́ kpó wú.

•   Nukúnkpévǐwútɔ́ lɛ́ ka nɔ ɖo gbesisɔmɛ bó ná ɖɔ xó xá mi dó nǔ e ɖo ayi mɛ ɖu nú mi wɛ lɛ́ é jí a, alǒ yědɛɛ lɛ́ tɔn lɛ́ jí?