Ðo 2024 ɔ, sɔ́misɔ́mi nabí e è ná bló gbɔn gbɛ ɔ bǐ mɛ é ná sukpɔ́ tawun hú nabí e è bló ɖo xwe ɖokpó mɛ kpɔ́n lɛ́ é bǐ. É ɖo mɔ̌ có, mɛ gěgé sɔ́ nɔ ɖeji dó toxóɖɔtɔ́ lɛ́ wú ǎ.

•   Ðo dobanúnǔ ɖé hwenu ɔ, Amɛlíkanu gěgé ɖɔ ɖɔ toxóɖɔtɔ́ lɛ́ kún sɔ́ nɔ ba ná wa ɖagbe nú mɛ e sín afɔ yě sɔ́ ɖó te lɛ́ é ó, loɔ, “jlǒ cejɛ́nnábí tɔn lɛ́ wɛ nɔ sísɛ́ gěgé toxóɖɔtɔ́ lɛ́ tɔn.” a—Pew Research Center, 19 septembre 2023.

 Mɔ̌ ɖokpó ɔ, mɛ wínnyáwínnyá gěgé sɔ́ nɔ ɖeji dó toxóɖɔtɔ́ lɛ́ wú ǎ.

•   “Égbé ɔ, hwɛhwɛ wɛ lěe è ná ɖe ɖɛ tagba syɛ́nsyɛ́n lɛ́ gbɔn é nɔ ɖu ayi mɛ nú mɛ wínnyáwínnyá lɛ́, amɔ̌, dobanúnǔ lɛ́ hwenu ɔ, yě nɔ ɖɔ ɖɔ toxóɖɔtɔ́ lɛ́ kún ɖo sin mɔ nú tagba mɔ̌hun lɛ́ wɛ ó.”—The New York Times, 29 janvier 2024.

•   “Sɔgbe kpó dobanúnǔ ɖé kpó ɔ, mɛ wínnyáwínnyá lɛ́ nɔ ɖeji dó mɛ ɖěɖěe nɔ sɔ́ nǔ ɖó YouTube jí lɛ́ é wú hú toxóɖɔtɔ́ lɛ́.”—The Korea Times, 22 janvier 2024.

 Mǐ ka sixú ɖeji ɖɔ toxóɖɔtɔ́ lɛ́ ná bló bɔ sɔ ná nyɔ́ a? Mɛ̌ wú mǐ ka sixú ɖeji dó?

 Gbɛtɔ́ lɛ́ sín hwɛ jɔ ɖɔ yě ní nɔ acéjí dó mɛ e wú yě ná ɖeji dó é wú. Biblu ɖɔ ɖɔ “gbɛtɔ́ e ayivɔ vún ɔ nɔ ɖi nǔ nú nǔ e è ɖɔ n’i lɛ́ bǐ; mɛ e ayi tɔn ka ɖo te ɔ nɔ lin tamɛ cóbó nɔ wa nǔ.”—Nǔnywɛ́xó 14:15.

•   Nú a ná mɔ lěe a sixú gbéjé xó e a nɔ se lɛ́ é kpɔ́n gbɔn é sín wlɛnwín ɖagbe lɛ́ hǔn, xa xóta “Nọ Aṣeji Gando Nudọnamẹ Lalo lẹ Go.”

 Gɔ́ ná ɔ, toxóɖɔtɔ́ e tlɛ nɔ ɖɔ nǔgbó hú gǎn bo tlɛ lɛ́ ɖó linlin ɖagbe hú gǎn lɛ́ é sixú wa nǔ e yě nɔ jló ná wa lɛ́ é bǐ ǎ. Énɛ́ wú wɛ Biblu gb’akpá nú mǐ ɖɔ:

•   “Mi ma gán jɛ gǎnhúnǔtɔ́ gbɛ mɛ fí tɔn lɛ́ wú ó. Gbɛtɔ́ wɛ yě nyí, yě kpé wú bo ná hwlɛ́n mɛ gán ǎ.”—Ðɛhan 146:3.

 Biblu tínmɛ ɖɔ Mawu ko sɔ́ gǎn e kpé nǔ wú hú gǎn bɔ è sixú ɖeji dó wǔ tɔn mlɛ́mlɛ́ é ɖé: Jezu Klísu wɛ. (Luki 1:32, 33) Jezu wɛ nyí Axɔ́sú nú Axɔ́súɖuto Mawu tɔn, acɛkpikpa ɖé wɛ bo ná kp’acɛ sín jǐxwé.—Matíe 6:10.

•   Ba do nú nǔ e wú a sixú ɖeji dó Jezu wú é kpó nǔ e é ná wa dó ɖe ɖɛ tagba e mɔ wɛ mǐ ɖe lɛ́ é kpó. Xa xóta “Mɛ̌ ka nyí Axɔ́sú nú Axɔ́súɖuto Mawu tɔn?” kpó “Étɛ́ lɛ́ Axɔ́súɖuto Mawu tɔn ka ná wa?” kpó.