ÐÒ Biblu sín táan mɛ ɔ, nǔjikpɔntɔ́ ɖé nɔ kpé nukún mɛ ɖevo sín xwé alǒ nǔɖokan lɛ wu. Hweɖelɛnu ɔ, xókwín Glɛkigbe kpo Ebléegbe kpo tɔn e è lilɛ dó “nǔjikpɔntɔ́” é nɔ dó gesí nukúnkpénuwutɔ́ alǒ xwé ɖé wu kpé nukún dó tɔ́.

Hwenu e Jozɛfu e nyí vǐ sunnu tɔ́gbó Jakɔbu tɔn é nyí kannumɔ ɖé ɖò Ejipu é ɔ, é huzu nǔjikpɔntɔ́ nú gǎn tɔn sín xwé. Nǔgbo ɔ, gǎn Jozɛfu tɔn Ejipunu ɔ, “zé nǔ tɔn lɛ bǐ dó alɔ mɛ [n’i].” (Bǐb. 39:2-6) Nukɔnmɛ hwenu e Jozɛfu lɔ huzu gǎn ɖaxó ɖé ɖò Ejipu é ɔ, é sɔ́ nǔjikpɔntɔ́ ɖé b’ɛ nɔ xwé tɔn nu.​—Bǐb. 44:4.

Ðò Jezu hwenu ɔ, hwɛhwɛ wɛ mɛ e ɖó ayikúngban lɛ é nɔ nɔ toxo lɛ mɛ bɔ fí e ye ɖè é nɔ lín dó gle yetɔn lɛ ta. Enɛ wu ɔ, ye nɔ sɔ́ nǔjikpɔntɔ́ lɛ bɔ ye nɔ kpé nukún dó glezɔ́ e è nɔ wà ayihɔngbe ayihɔngbe ɖò gle ɔ ta lɛ é wu.

Mɛ̌ ka nɔ jɛxa bɔ è nɔ sɔ́ ɛ nǔjikpɔntɔ́? Nǔwlantɔ́ Hlɔmanu xwè kanweko nukɔntɔn ɔ tɔn e nɔ nyí Columella é ɖɔ ɖɔ mɛsɛntɔ́ e è nɔ sɔ́ b’ɛ nɔ nyí nukúnkpénuwutɔ́ alǒ nǔjikpɔntɔ́ ɖé é ɖó na nyí mɛɖé bo ko “kplɔ́n azɔ̌ bɔ é bí alɔnu n’i.” Mɛ ɔ na nyí mɛɖé bo na “kúdeji ɖɔ azɔ̌watɔ́ lɛ wà azɔ̌ yetɔn lɛ, amɔ̌ é ka na nɔ xò daka ye wu ǎ.” É lɛ́ ɖɔ gɔ́ na ɖɔ: “Nǔ e ɖò taji hugǎn nǔ ɖevo lɛ bǐ bɔ è na ba ɖò así tɔn é wɛ nyí ɖɔ, é na nɔ lin ɖɔ emi tuùn nǔ e é ma tuùn ǎ lɛ é ǎ, bɔ akpakpa na nɔ sɔ́ ɛ hwebǐnu bɔ é na nɔ kplɔ́n nǔ d’eji.”

Xó Mawu tɔn zán kpɔ́ndéwú nǔjikpɔntɔ́ ɖé kpo azɔ̌ e é nɔ wà é kpo tɔn dó tinmɛ azɔ̌ e è nɔ wà ɖò agun Klisanwun tɔn mɛ lɛ é ɖé lɛ. Ði kpɔ́ndéwú ɔ, mɛsɛ́dó Piyɛ́ɛ dó wusyɛn lanmɛ nú Klisanwun lɛ ɖɔ ye ni zán nǔwukpíkpé e Mawu na ye lɛ é bo ‘nyí nǔjikpɔntɔ́ ɖagbe nǔnina e Mawu na ye lɛ é tɔn, bo lɛ́ zán nú ɖagbe mɛ bǐ tɔn.’​—1 Pi. 4:10.

Jezu zán kpɔ́ndéwú nǔjikpɔntɔ́ ɖé tɔn ɖò nǔjlɛdonǔwu e ɖò Luki 16:1-8 mɛ é mɛ. Gɔ́ na ɔ, ɖò nǔɖɔɖ’ayǐ Jezu tɔn e ɖɔ xó dó fí ɖiɖe tɔn ɖi Axɔ́su sín xlɛ̌ wu é ɖokpo mɛ ɔ, é vɔ́ ganjɛwu na ahwanvu tɔn lɛ ɖɔ emi na sɔ́ ‘deví gbejinɔtɔ́ ayiɖotenanɔ’ kabǐ “mɛsɛntɔ́ [alǒ, nǔjikpɔntɔ́] nǔnywɛtɔ́” ɖé. Azɔ̌ taji nǔjikpɔntɔ́ enɛ tɔn wɛ nyí ɖɔ é na na nǔɖuɖu gbigbɔ tɔn e sín hudo ahwanvu Klisu tɔn lɛ ɖó ɖò azǎn gudogudo tɔn lɛ mɛ lɛ é bǐ ye. (Mat. 24:45-47; Luk. 12:42) É sù nukún mǐtɔn mɛ tawun ɖɔ mǐ ɖò mɛ ɖěɖee nɔ mɔ wema e nɔ hɛn nǔɖiɖi mɛtɔn lidǒ, bɔ nǔjikpɔntɔ́ gbejinɔtɔ́ ɔ nɔ sɔnǔ na lobo nɔ má gbɔn gbɛ̀ ɔ bǐ mɛ lɛ é mɛ.