Ðò xóta e wá yì é mɛ ɔ, mǐ gbéjé wuntun e xó Jezu ɖɔ é kpɔ́n. Wuntun enɛ xlɛ́ gannaganna ɖɔ è ko ɖó Axɔ́suɖuto Mawu tɔn ayǐ ɖò jixwé bɔ Jezu Klisu nyí Axɔ́su na.

Biblu ɖɔ ɖɔ hwenu e Jezu na jɛ acɛ kpa jí é ɔ, é na nya Satáan kpo awoví tɔn lɛ kpo sín jixwé. Dìn ɔ, ayikúngban jí kɛɖɛ jɛn ye sixu hɛn nǔ gblé ɖè; hwɛjijɔ e wu nǔ lɛ nyla d’eji sɔmɔ̌ sín 1914 é ɖokpo nɛ.—Nǔɖexlɛ́mɛ 12:7, 9.

Ninɔmɛ gbɛ̀ ɔ tɔn lɛ fɔ́n bo ɖò nylanylá d’eji wɛ có, Jezu e nyí Axɔ́su nú Axɔ́suɖuto Mawu tɔn é ɖò nǔ gegě wà dó d’alɔ gbɛtɔ́ e ɖò ayikúngban ɔ jí lɛ é wɛ. Azɔ̌ Biblu kpinkplɔnmɛ tɔn e ɖò yiyi wɛ gbɔn gbɛ̀ ɔ bǐ mɛ bɔ Jezu ko ɖɔ ɖ’ayǐ é ɖò alɔ dó mɛ gegě wɛ, bɔ ye nɔ kplɔ́n nǔgbododó Biblu tɔn lɛ, lobo nɔ lɛ́ zán ɖò gbɛzán yetɔn gbè bǐ gbè tɔn ɔ mɛ. (Ezayíi 2:2-4) Gbɛtɔ́ livi mɔkpan ko kplɔ́n bo na ɖó linlin e ɖò jlɛ̌ jí é dó azɔ̌ wu, hɛn gbɛzán xwédo tɔn yetɔn kpɔ́n te, lobo lɛ́ ɖu vivǐ nǔ agbaza tɔn lɛ tɔn, ye ka nɔ huzu kannumɔ na ǎ. Mɛ enɛ lɛ ɖò lee ye na hɛn gbɛzán yetɔn kpɔ́n te gbɔn dìn, bo na wá huzu mɛ alɔkpa e Mawu jló ɖɔ ye na nɔ Axɔ́suɖuto emitɔn mɛ lɛ é kplɔ́n wɛ.

Jezu ko ɖò acɛ kpa wɛ ɖò jixwé có, gbɛtɔ́ lɛ ka kpò ɖò acɛ kpa wɛ ɖò ayikúngban ɔ jí. É ɖò mɔ̌ có, Mawu ɖɔ nú Jezu ɖɔ: “Yì bo ɖò ahwan jí ɖu ɖè wɛ ɖò kɛntɔ́ towe lɛ tɛntin.” (Ðɛhan 110:2, nwt) Zaanɖé dìn ɔ, Jezu na sú kún dó nú gbeklánxámɛtɔ́ tɔn lɛ bǐ mlɛ́mlɛ́, bo na bló bɔ mɛ e sɔ́ jlǒ dó setónú nú Mawu lɛ é na mɔ kɔ dó sà fún i.

Ðò hwenɛnu ɔ, Axɔ́suɖuto Mawu tɔn na:

• Sú kún dó nú sinsɛn nǔvú lɛ. Sinsɛn ɖěɖee nɔ kplɔ́n nǔvú mɛ lɛ dó Mawu wu, bo lɛ́ bló bɔ gbɛ̀ vɛwǔ nú gbɛtɔ́ lɛ é ɖě sɔ́ na tíìn ǎ. Biblu jlɛ́ sinsɛn nǔvú dó agalɛtɔ́ ɖé wu. Nú è sú kún dó n’i ɔ, é na zɛ hǔn nú mɛ gegě.—Nǔɖexlɛ́mɛ 17:15, 16.

• Sú kún dó nú acɛkpikpa gbɛtɔ́ tɔn lɛ. Axɔ́suɖuto Mawu tɔn na wà nǔɖe bo na hu acɛ nú acɛkpikpa gbɛtɔ́ tɔn lɛ bɔ ye sɔ́ na tíìn nyǐ ǎ.—Nǔɖexlɛ́mɛ 19:15, 17, 18.

• Sú kún dó nú mɛdídá lɛ. Etɛ ka na jɛ dó mɛ ɖěɖee nɔ fɔ́n bo nɔ ɖò nǔ nyanya wà wɛ, lobo gbɛ́ ɖɔ emi kún na setónú nú Mawu ó lɛ é jí? “Mɛdídá lɛ ɔ, è na ɖè ye sín tò ɔ mɛ.”—Nǔnywɛxó 2:22.

• Sú kún dó nú Satáan kpo awoví lɛ kpo. Satáan kpo awoví tɔn lɛ kpo sɔ́ sixu kpéwú bo na “dɔn tò lɛ ɖě yì bú [ǎ].”—Nǔɖexlɛ́mɛ 20:3, 10.

Lè tɛ lɛ enɛ lɛ bǐ ka na hɛn wá nú mɛ ɖěɖee yí gbè nú Axɔ́suɖuto Mawu tɔn lɛ é?

Jezu na kp’acɛ sín jixwé bo na bló nǔ e acɛkpatɔ́ ɖě ma ko bló kpɔ́n gbeɖé ǎ é. Gbɛtɔ́ 144 000 e è cyan lɛ é na kp’acɛ xá ɛ, bo na d’alɔ ɛ. (Nǔɖexlɛ́mɛ 5:9, 10; 14:1, 3) É na kúdeji ɖɔ jlǒ Mawu tɔn na nyí wiwa ɖò ayikúngban jí fí. Etɛ lɛ Axɔ́suɖuto Mawu tɔn ka na wà nú gbɛtɔ́ e ɖò ayikúngban jí lɛ é?

• É na sú kún dó nú azɔn kpo kú kpo. “Toví ɖé sɔ́ na ɖɔ: ‘Un ɖò azɔn jɛ wɛ’ ǎ,” bɔ “kú sɔ́ na tíìn ǎ.”—Ezayíi 33:24; Nǔɖexlɛ́mɛ 21:4.

• É na hɛn fífá kpo ayijayǐ kpo wá. “Ye bǐ na vo bɔ nǔ na nyɔ́ nú ye tawun.” Bɔ “mɛ ɖokpo ɖokpo na vo ɖò vǐwuntín tɔn kpo fígitín tɔn kpo sá, bɔ mɛ ɖebǔ sɔ́ na ɖè bo na gbà ayi dó nú ye ǎ.”—Ezayíi 54:13; Micée 4:4.

• É na bló bɔ azɔ̌ e ɖó nu lɛ é na tíìn. “Mɛ e un sɔ́ lɛ ɔ, nǔ e ye sɔ́ alɔ yetɔn dó bló lɛ ɔ, ye na ɖu lè tɔn. Ye sɔ́ na jɛ tagba dó wǔvɔ́ ɖě ǎ.”—Ezayíi 65:22, 23.

• É na ɖeɖɛ ninɔmɛ ayǐ mɛ tɔn sín tagba lɛ. “Gbetótló kpo ayikúngban xúxú kpo ni j’awǎ. Nǔ ni víví nú tò e mɛ sin ma ɖè ǎ é, bonu é ni gbà sɛ́ folowa ɖɔhun.”—Ezayíi 35:1.

• Kplɔ́n nǔ e gbɛtɔ́ lɛ ɖó na wà, bo na nɔ gbɛ̀ kaka sɔyi é ye. “Gbɛ̀ mavɔmavɔ ɔ wɛ nyí ɖɔ ye ni tuùn we, bo tuùn ɖɔ hwi wɛ nyí Mawu nǔgbo ɖokpo e tíìn é, bo lɛ́ tuùn Jezu Klisu e a sɛ́dó gbɛ̀ ɔ mɛ é.”—Jaan 17:3.

Mawu ba ɖɔ a ni ɖu vivǐ nyɔna enɛ lɛ tɔn. (Ezayíi 48:18) Xóta e bɔ d’ewu é na tinmɛ nǔ e a sixu wà dìn, bo na ɖu sɔgudo jiwǔ enɛ sín vivǐ é.