Miijitee fii ngurndan ka hoore leydi ɓaawo ndaygu naange ngen. Naange ngen no waɗude leɗɗe ɗen funtina kaaki, piindi, ɓiɓɓe leɗɗe e awdi. Ko naange ngen kadi waɗata ɗaɗi leɗɗe ɗen yara ndiyan ka leydi e ƴawna ɗan haa ka kaaki, wonta norngal e ƴawra ka weeyo.

Ndiyan saaƴoojan ko dokkal moƴƴal iwrungal ka Alla. Ɗan waɗay leydi ndin fuɗina ɲaametee fii fow. Alla yeɗii en ndiyan saaƴoojan iwrude ka kammu e saa’iiji moƴƴooji fii demal, e timminangol on neemaaji e hebbingol ɓerɗe men ɗen welo-welo.

Baabiraaɓe buy no aana ɓayri welaa fii soono woo ɲammingol e holtingol ɓeynguureeji maɓɓe ɗin. Ndaaree ko Deftere Alla nden haali kon * : « Ndaaree colli ɗin ka kammu : ɗi sankataa, ɗi wa’ataa, ɗi mooɓataa hay huunde e nder caagaaje, kono Ben mon Kammuyankeejo on no wurni ɗi. E taw si on ɓuraa ɗi hittude ? » (Matta 6:25, 26).

« Ndaaree no ɗii piindiiji ka gese fuɗirta njanɗa [...]. Kono non mi andinii on, hay Sulaymaana [lanɗo on] e nder darja mun on fow holtiraali hay wa wootiri e majji. Si tawii non Allaahu on no holtinirde non hay huɗo wonuko hande ka ngesa kon [...], hara o ronkay waɗande on ko ɓuri ɗun ? » (Matta 6:28-30).

Ɓayri Alla no waawi okkorde en ko ɲaameten e ko ɓornotoɗen, pellet himo waawi en wallude kadi heɓugol kala ko haani fii ngurndan men ɗan. Si en wakkilike waɗugol faale Alla on, o barkinay wakkilaare men nden fii remugol maa heɓugol golle ko okkorta en kaalisi fii soodugol piiji ɗi hatonjiniɗen (Matta 6:32, 33).

Tigi tigi on, si en miijitike fii naange ngen, ndiyan saaƴoojan ɗan, piindiiji ɗin e colli ɗin, ɗun no jonna en dalilji moƴƴi fii yiɗugol Alla. Winndannde jokkitunde nden haalay honno Taguɗo en on yewtirta tagaaɗo.