CHAITH sliocht Iosrael blianta fada san Éigipt faoi rath agus ag dul i líonmhaire. Ach ansin tháinig Faró nua i réim. Ní raibh aon aithne ag an rialtóir seo ar Iósaef. Tíoránach fíochmhar a bhí ann. Chuir an méadú a bhí ag teacht ar líon na nIosraeilíteach faitíos air. Rinne sé sclábhaithe díobh agus d’ordaigh sé gach fireannach nuabheirthe dá gcuid a bhá in Abhainn na Níle. Chuir máthair chróga amháin a naíonán mic i bhfolach i gcléibhín i measc na ngiolcach lena chosaint. Fuair iníon Fharó an naíonán, thug sí Maois mar ainm air, agus thóg sí é i measc teaghlach ríoga na hÉigipte.

Nuair a bhí Maois 40 bliain d’aois, tharraing sé trioblóid ar féin agus é ag cosaint sclábhaí Iosraeilíteach ar mhaor Éigipteach. Theith Maois go dtí tír i bhfad i gcéin, áit ar mhair sé mar dheoraí. Nuair a bhí Maois 80 bliain d’aois, chuir Iehova ar ais chun na hÉigipte é le dul os comhair Fharó chun éileamh air pobal Dé a scaoileadh saor.

Dhiúltaigh Faró. Dá bhrí sin, chuir Dia deich bplá ar an Éigipt. Gach uair a théadh Maois os comhair Fharó chun deis a thabhairt dó an chéad phlá eile a sheachaint, thugadh Faró a dhúshlán, ag léiriú dímheasa ar Mhaois agus ar a Dhia, Iehova. Faoi dheireadh, mar thoradh ar an deichiú plá, maraíodh gach céadghin sa tír—ach amháin i dteaghlaigh a bhí umhal do Iehova agus a chuir fuil an uain íobartha ar a gcuid ursaineacha. Níor mharaigh aingeal Dé an chéadghin sna teaghlaigh sin. As sin amach, rinne na hIosraeilítigh comóradh bliantúil ar an tarrtháil mhíorúilteach seo. Cáisc na nGiúdach a thugtar ar an gceiliúradh sin.

Nuair a chaill Faró a chéadghin mic féin, d’ordaigh sé do Mhaois agus do na hIosraeilítigh ar fad an Éigipt a fhágáil. D’eagraigh siad iad féin láithreach leis an tír a thréigean. Ach d’athraigh Faró a intinn. Lean sé iad le slua mór fear cogaidh agus carbaid. Bhí an chuma air go raibh na hIosraeilítigh sáinnithe ar chladach na Mara Rua. Scar Iehova an Mhuir Rua, rud a chuir ar chumas na nIosraeilíteach siúl tríd ar ghrinneall tirim idir na ballaí uisce a bhí ar an dá thaobh! Nuair a thug na hÉigiptigh ruathar ina ndiaidh, scaoil Dia na ballaí uisce ina thuile anuas orthu ag bá Faró agus a arm.

Níos déanaí, agus iad campáilte le hais Shliabh Shíonái, rinne Iehova conradh leis na hIosraeilítigh. Le Maois mar idirghabhálaí, thug Dia dlíthe d’Iosrael a thabharfadh treoir agus cosaint dóibh i mbeagnach gach gné dá saol. An fhad is a ghlac Iosrael go dílis le riail Dé, bheadh Iehova leo agus ba bheannacht a bheadh sa náisiún sin do chách.

Ach níor léirigh formhór na nIosraeilíteach muinín i nDia. Dá bhrí sin, chuir Iehova an ghlúin sin ar seachrán sa bhfásach ar feadh 40 bliain. Ansin, cheap Maois an fear ionraic Iósua le teacht i gcomharbacht air. Faoi dheireadh, bhí Iosrael réidh le dul isteach sa tír a gheall Dia d’Abrahám.

—Bunaithe ar Eaxodus; Léivític; Uimhreacha; Deotranaimí; Salm 136:10-15; Gníomhartha 7:17-36.