“Enɛ hewɔ ni mikɛɔ nyɛ akɛ, nibii fɛɛ ni nyɛbaasɔle nyɛbi lɛ, nyɛnáa hemɔkɛyeli akɛ nyɛnine eshɛ nɔ momo, ni nyɛbaaná lɛ.”​—Marko 11:24, Jeŋ Hee Shishitsɔɔmɔ. 

 “No hewɔ lɛ miikɛɛ nyɛ akɛ: Nii abɔ fɛɛ ni nyɛkpaa he fai yɛ nyɛsɔlemɔ mli lɛ, nyɛhea nyɛyea akɛ nyɛaaná, ni aaaŋɔha nyɛ.”​—Marko 11:24, Ga Biblia momo. 

 Yesu kɛ wiemɔi nɛɛ tsɔɔ ekaselɔi lɛ nɔ hewɔ ni esa akɛ amɛná hemɔkɛyeli ni mli wa yɛ sɔlemɔ he lɛ. Ema nɔ mi ehã amɛ akɛ, jeee sɔlemɔi atoi kɛkɛ Nyɔŋmɔ boɔ, shi ehãa hetoo hu. Kɛ́ mɔ ko jɛ etsuiŋ esɔle yɛ gbɛ ni kɛ Nyɔŋmɔ suɔmɔnaa nii kpãa gbee nɔ lɛ, ebaanyɛ ená nɔmimaa akɛ, nɔ ni ebiɔ lɛ enine baashɛ nɔ. Etamɔ nɔ ni ahã esɔlemɔ lɛ hetoo momo. 

 Yesu ma nɔ mi akɛ esa akɛ wɔkɛ hemɔkɛyeli asɔle. Etsɔɔ mli akɛ, mɔ ni sɔleɔ lɛ ‘akaje ŋwane yɛ etsui mli,’ shi moŋ, ená “hemɔkɛyeli akɛ nɔ ni ekɛɔ lɛ baaba mli.” (Marko 11:23) Mɛni hewɔ? Ejaakɛ mɛi ni yiŋ feɔ amɛ kɔshikɔshi lɛ nyɛŋ ‘amɛkpa gbɛ akɛ amɛbaaná nɔ ko kɛjɛ Yehowa dɛŋ.’ a​—Yakobo 1:5-8. 

 Mɔ ni yɔɔ hemɔkɛyeli lɛ sɔleɔ yɛ shihilɛi srɔtoi amli. (Luka 11:9, 10; Romabii 12:12) Yɛ nɛkɛ gbɛ nɔ lɛ, etsɔɔ akɛ nɔ ni ebiɔ lɛ he miihia lɛ waa, ni eheɔ eyeɔ akɛ Nyɔŋmɔ baahã esɔlemɔi lɛ ahetoo. Shi ele hu akɛ, Nyɔŋmɔ baanyɛ ehã sɔlemɔ lɛ hetoo yɛ gbɛ kroko nɔ fe gbɛ ni ekpaa gbɛ lɛ, ni ebaanyɛ ehã hetoo hu yɛ be kroko mli fe be ni ekpaa gbɛ lɛ.​—Efesobii 3:20; Hebribii 11:6. 

 Kɛ̃lɛ, Yesu wiemɔi lɛ etsɔɔɔ akɛ mɔ fɛɛ mɔ kɛkɛ baanyɛ akpa gbɛ akɛ, enine baashɛ nɔ fɛɛ nɔ ni etsɔɔ sɔlemɔ nɔ ebiɔ Nyɔŋmɔ lɛ nɔ. No mli lɛ, Yesu kɛ ekaselɔi lɛ miiwie; ekaselɔi nɛɛ ji mɛi ni yɔɔ hemɔkɛyeli, ni miibɔ mɔdɛŋ amɛfee nɔ fɛɛ nɔ ni amɛbaanyɛ kɛjá Nyɔŋmɔ yɛ gbɛ ni ekpɛlɛɔ nɔ lɛ nɔ. Biblia lɛ kɛɔ akɛ, Yehowa boɔ sɔlemɔi ni kɛ esuɔmɔnaa nii kpãa gbee lɛ pɛ atoi. (1 Yohane 5:14) Ebooo mɛi ni jeɔ gbɛ amɛkpoɔ ejalɛ shishitoo mlai lɛ kɛ mɛi ni feɔ nibii gbohii ni amɛtsakeee amɛtsui lɛ asɔlemɔi atoi. (Yesaia 1:15; Mika 3:4; Yohane 9:31) Kwɛmɔ vidio kuku nɛɛ kɛna bɔ ni Nyɔŋmɔ boɔ sɔlemɔi atoi lɛ he saji krokomɛi. 

 Be ni eshwɛ fioo ni Yesu baagbe esɔɔmɔ nitsumɔ lɛ naa yɛ shikpɔŋ lɛ nɔ lɛ, ekɛ ekaselɔi lɛ susu nɔ hewɔ ni ehe miihia ni aná hemɔkɛyeli ni mli wa yɛ Nyɔŋmɔ mli lɛ he. Ekɛ nɔkwɛmɔnɔ ko ma nɛkɛ sane ni he hiaa nɛɛ nɔ mi. Be mli ni efãa gbɛ kɛyaa Yerusalem lɛ, ehiŋmɛi gba agbamitso ko ni bai yɔɔ nɔ lɛ nɔ. Shi no mli lɛ tso lɛ woko yibii, no hewɔ lɛ Yesu lomɔ tso lɛ. (Marko 11:12-14) Bɔ ni anaa tso lɛ tamɔ nɔ ni ewo yibii, shi no mli lɛ ewoko yibii lɛ, nakai ji bɔ ni blema Israel maŋ lɛ hi shi ehã, no ji, anaa maŋ lɛ tamɔ amɛmiijá Nyɔŋmɔ, shi yɛ anɔkwale mli lɛ, amɛbɛ hemɔkɛyeli. (Mateo 21:43) No sɛɛ etsɛɛ lɛ, agbami tso lɛ ŋala, ni enɛ tsɔɔ nɔ ni etsɛŋ, ebaaba Israel maŋ ni bɛ hemɔkɛyeli lɛ nɔ.​—Marko 11:19-21. 

 Nɔ ni tamɔɔɔ nakai lɛ, Yesu ná nɔmimaa akɛ esɛɛnyiɛlɔi lɛ baanyɛ aná hemɔkɛyeli ni baahã amɛye naagbai anɔ, koni amɛfee nibii ni gbɔmɛi ajwɛŋmɔ shɛɛɛ he. (Marko 11:22, 23) Ŋaa ni Yesu wo yɛ sɔlemɔ he lɛ ba yɛ be naa waa diɛŋtsɛ, titri lɛ kɛhã ekaselɔi lɛ, ejaakɛ no mli lɛ etsɛŋ ni amɛkɛ amɛhemɔkɛyeli lɛ he kaa baakpe. No ji akɛ Yesu baagbo, ni no baagba amɛnaa waa. Agbɛnɛ hu, amɛkɛ shiteekɛwoo baakpe yɛ amɛsɔɔmɔ nitsumɔ lɛ mli. (Luka 24:17-20; Bɔfoi 5:17, 18, 40) Nakai nɔŋŋ ŋmɛnɛ lɛ, kɛ́ Yesu kaselɔi lɛ fee nibii ni tsɔɔ akɛ amɛyɛ hemɔkɛyeli yɛ Nyɔŋmɔ mli, ni amɛhe amɛye hu akɛ sɔlemɔ nyɛɔ etsuɔ nii lɛ, amɛbaanyɛ amɛye shihilɛi ni kaa mɔ hemɔkɛyeli lɛ anɔ.​—Yakobo 2:26. 

 Kwɛmɔ Marko wolo lɛ hiɛkpamɔ vidio kuku nɛɛ.