“Nyɔŋmɔ ni kɛ hiɛnɔkamɔ hãa lɛ ahã nyɛyimɔ obɔbɔ kɛ miishɛɛ kɛ toiŋjɔlɛ akɛni nyɛkɛ nyɛhiɛ fɔ̃ɔ enɔ lɛ hewɔ, koni nyɛtsɔ mumɔ krɔŋkrɔŋ lɛ hewalɛ nɔ nyɛná hiɛnɔkamɔ kɛteke nɔ.”​—Romabii 15:13, Jeŋ Hee Shishitsɔɔmɔ.

 “Shi nɔhiɛkamɔ Nyɔŋmɔ lɛ kɛ miishɛɛ kɛ hejɔlɛ fɛɛ awo nyɛ obɔ̃bɔ̃ɔbɔ̃ yɛ hemɔkɛyeli mli, koni nyɛná hiɛnɔkamɔ ní ateke nɔ yɛ Mumɔ krɔŋkrɔŋ hewalɛ mli.”​—Romabii 15:13, Ga Biblia momo.

 Wiemɔi ni bɔfo Paulo kɛtsu nii lɛ tsɔɔ bɔ ni eshweɔ koni Nyɔŋmɔ ahã mɛi ni ebahe Nyɔŋmɔ nɔ amɛye ayimɔ obɔbɔ kɛ “miishɛɛ kɛ toiŋjɔlɛ” lɛ. Tsakpãa ko yɛ sui kpakpai nɛɛ kɛ hiɛnɔkamɔ ni Nyɔŋmɔ kɛhãa kɛ hewalɛ ni mumɔ krɔŋkrɔŋ lɛ yɔɔ lɛ teŋ.

 Wɔkaseɔ hiɛnɔkamɔ ni Nyɔŋmɔ kɛhãa lɛ he nii yɛ e-Wiemɔ ni aŋma, ni ji Biblia lɛ mli. Romabii 15:4 lɛ kɛɛ, “Nibii fɛɛ ni aŋma ato momo [yɛ Biblia lɛ mli] lɛ, aŋma koni etsɔɔ wɔ nii, koni kɛtsɔ wɔshifimɔ kɛ agbɛnɛ hu, kɛtsɔ Ŋmalɛ lɛ mli miishɛjemɔ lɛ nɔ lɛ, wɔná hiɛnɔkamɔ.” Biblia lɛ hãa wɔleɔ shi ni Nyɔŋmɔ ewo akɛ ebaajie naagbai tamɔ ohia, jalɛsane ni ayeee, hela, kɛ gbele ni hãa wɔhiɛnɔkamɔ tãa lɛ kɛje shihilɛ mli. (Kpojiemɔ 21:4) Nyɔŋmɔ baatsɔ Yesu Kristo nɔ ehã eshiwoi nɛɛ aba mli, ni no hewɔ lɛ, wɔyɛ hiɛnɔkamɔ akɛ wɔbaaná shihilɛ kpakpa wɔsɛɛ.​—Romabii 15:12.

 Ja wɔhe Nyɔŋmɔ nɔ wɔye dani wɔbaanyɛ wɔná hiɛnɔkamɔ ni Nyɔŋmɔ kɛhãa nɛɛ “kɛteke nɔ.” Babaoo ni wɔkaseɔ ehe nii lɛ, babaoo ni hekɛnɔfɔ̃ɔ ni wɔyɔɔ yɛ emli lɛ mli waa ji no. (Yesaia 46:10; Tito 1:2) Hiɛnɔkamɔ ni nɔ bɛ ni Nyɔŋmɔ kɛhãa hewɔ lɛ, kɛ́ wɔkɛ shihilɛi ni mli wawai miikpe po lɛ, wɔbaanyɛ wɔná miishɛɛ kɛ toiŋjɔlɛ.​—Romabii 12:12.

 Toiŋjɔlɛ, miishɛɛ, kɛ hiɛnɔkamɔ lɛ, amɛkɛ “mumɔ krɔŋkrɔŋ” lɛ ni ji Nyɔŋmɔ hewalɛ ni miitsu nii lɛ yɛ tsakpãa. a Nyɔŋmɔ tsɔɔ mumɔ krɔŋkrɔŋ lɛ nɔ eyeɔ eshiwoi lɛ anɔ, ni enɛ hãa wɔnáa hiɛnɔkamɔ. Mumɔ nɛɛ yeɔ ebuaa mɛi ni amɛnáa sui kpakpai tamɔ miishɛɛ kɛ toiŋjɔlɛ.​—Galatiabii 5:22.

 Romabii awolo lɛ ji lɛta ko ni aŋma ahã Kristofoi ni hi maŋtiase ni ji Roma lɛ. Kristofoi nɛɛ ateŋ mɛi komɛi jɛ Yudafoi aweku mli, ni mɛi komɛi hu jɛɛɛ Yudafoi aweku mli. Paulo wo amɛ hewalɛ akɛ amɛbɔ mɔdɛŋ amɛhã amɛsusumɔi kɛ amɛnifeemɔi afee ekome, eyɛ amli akɛ esoro maji anɔ ni amɛjɛ kɛ shihilɛi amli ni amɛyɔɔ.​—Romabii 15:6.

 Paulo kai Kristofoi ni yɔɔ Roma lɛ akɛ, jeeŋmɔ beebe ni Nyɔŋmɔ gba akɛ, be ko baaba ni gbɔmɛi ni jɛ maji fɛɛ anɔ lɛ baafee ekome kɛjie eyi. Paulo tsɛ ŋmalɛi ayisɛɛ kɛjɛ Hebri Ŋmalɛi lɛ amli shii ejwɛ sɔŋŋ kɛma anɔkwa b sane nɛɛ nɔ mi. (Romabii 15:9-12) No mli lɛ, eetsɔɔ akɛ: Yudafoi kɛ mɛi ni jɛ maji srɔtoi anɔ lɛ baanyɛ aná Yesu shiɛmɔ nitsumɔ lɛ he sɛɛ. Yudafoi kɛ mɛi ni jeee Yudafoi lɛ fɛɛ baanyɛ aná hiɛnɔkamɔ ni Nyɔŋmɔ kɛhãa nɛɛ nɔŋŋ. No hewɔ lɛ, akpa gbɛ akɛ asafo ni yɔɔ Roma lɛ mli bii lɛ ateŋ mɔ fɛɛ mɔ “ahereherei amɛhe,” no ji, amɛkɛ amɛhe aye yɛ mlihilɛ mli loo amɛfee amɛhe gbɔ, ekɔɔɔ he eko shihilɛ mli ni amɛyɔɔ kɛ he ni amɛjɛ.​—Romabii 15:7.