“Nyɔŋmɔ jieɔ lɛ diɛŋtsɛ esuɔmɔ lɛ yi ehãa wɔ, akɛ be ni wɔkã he wɔji eshafeelɔi lɛ, Kristo gbo ehã wɔ.”​—Romabii 5:8, Jeŋ Hee Shishitsɔɔmɔ.

 “Nyɔŋmɔ jieɔ lɛ diɛŋtsɛ esuɔmɔ ní ekɛsumɔ wɔ lɛ shi etsɔ̃ɔ, akɛ be mli ni wɔji eshafeelɔi lɛ beebe ni Kristo bagbo yɛ wɔnajiaŋ.”​—Romabii 5:8, Ga Biblia momo.

 Yehowa a Nyɔŋmɔ jie suɔmɔ kpele kpo etsɔɔ adesai be ni ehã e-Bi Yesu Kristo bagbo kɛhã amɛ yɛ amɛhe eshai lɛ ahewɔ lɛ. (Yohane 3:16) Akɛni adesai ji eshafeelɔi hewɔ lɛ, efɔɔ kaa akɛ bɔ ni amɛsusuɔ nii ahe amɛhãa kɛ bɔ ni amɛhiɔ shi amɛhãa lɛ teɔ shi ewoɔ Nyɔŋmɔ jalɛ shishitoo mlai lɛ. (Romabii 1:21, 22) Kɛ̃lɛ, Nyɔŋmɔ ‘tsɔ e-Bi lɛ gbele lɛ nɔ esaa wɔ kɛ lɛ teŋ.’ (Romabii 5:10) Enɛ ehã hegbɛ egbele akɛ wɔbaanyɛ wɔná wɔkɛ Nyɔŋmɔ teŋ naanyobɔɔ kpakpa kɛ hiɛnɔkamɔ akɛ wɔbaanyɛ wɔhi shi kɛya naanɔ.​—Romabii 5:11; 1 Yohane 4:9, 10.

 Bɔfo Paulo ŋma wolo nɛɛ kɛyahã Kristofoi ni yɔɔ Roma lɛ. Paulo tsɔɔ nɔ hewɔ ni Kristofoi baanyɛ anya, ni amɛná hekɛnɔfɔ̃ɔ yɛ amɛhiɛnɔkamɔ lɛ mli yɛ ewolo ni eŋma kɛhã Romabii lɛ yɛ nɔ ni wɔle lɛ bianɛ akɛ Romabii yitso 5 lɛ mli. (Romabii 5:1, 2) Nakai hiɛnɔkamɔ lɛ “hãaa mɔ nine anyɛ shi,” ejaakɛ edamɔ suɔmɔ kpele ni Nyɔŋmɔ jie kpo etsɔɔ wɔ yɛ Yesu ni ekɛ lɛ shã afɔle ehã wɔ lɛ hewɔ lɛ nɔ. (Romabii 5:5, 6) Yesu tee nɔ ebo Nyɔŋmɔ toi kɛmɔ shi, enɛ ji nɔ ko ni klɛŋklɛŋ gbɔmɔ ni ji, Adam lɛ efeee. (Romabii 5:19) Esha kɛ gbele ji nɔ ni jɛ Adam toigbele lɛ mli kɛba kɛhã eseshibii lɛ. (Romabii 5:12) Nɔ ni tamɔɔɔ nakai lɛ, Yesu bo Nyɔŋmɔ toi kɛmɔ shi ni ekɛ ewala sha afɔle koni adesai ni baabo Nyɔŋmɔ toi lɛ aná hiɛnɔkamɔ akɛ amɛbaahi shi kɛya naanɔ.​—Romabii 5:21.