“Yesu kɛɛ lɛ akɛ: ‘Miji gbɛ lɛ kɛ anɔkwale lɛ kɛ wala lɛ. Mɔ ko mɔ ko baaa Tsɛ lɛ ŋɔɔ akɛ ja etsɔ minɔ.’”​—Yohane 14:6, Jeŋ Hee Shishitsɔɔmɔ.

 “Yesu kɛɛ lɛ akɛ: Mi nɔŋŋ ji gbɛ lɛ kɛ anɔkwale lɛ kɛ wala lɛ; mɔ ko baaa tsɛ lɛ ŋɔɔ, akɛ ja etsɔ minɔ.”​—Yohane 14:6, Ga Biblia Momo.

 Kɛ́ mɔ ko miisumɔ akɛ ejá Tsɛ lɛ, ni ji Yehowa a Nyɔŋmɔ lɛ, esa akɛ eyɔse gbɛfaŋnɔ ni he hiaa waa ni Yesu tsuɔ lɛ.

“ Miji gbɛ lɛ.” Yesu tsɔɔ “gbɛ” ni sa ni abaanyɛ atsɔ nɔ abɛŋkɛ Nyɔŋmɔ. Akɛ nɔkwɛmɔnɔ lɛ, esa akɛ mɛi ni sɔleɔ amɛhãa Nyɔŋmɔ lɛ afee nakai kɛtsɔ Yesu gbɛ́i lɛ mli. (Yohane 16:23, 24) Yesu gbele lɛ gbele gbɛ koni anyɛ asaa adesai kɛ Nyɔŋmɔ teŋ loo adesai aná Nyɔŋmɔ hiɛ dromɔ ekoŋŋ. (Romabii 5:8-11) Yesu tsɔ bɔ ni ehi shi ehã lɛ nɔ efee nɔkwɛmɔnɔ efɔ̃ shi ehã mɛi ni miitao amɛsa Nyɔŋmɔ hiɛ lɛ koni amɛkase.​—Yohane 13:15.

“ Miji . . . anɔkwale lɛ.” Yesu wie anɔkwale ni jɛ Nyɔŋmɔ ŋɔɔ lɛ be fɛɛ be, ni ehi shi yɛ naa. (1 Petro 2:22) Mɛi ni boɔ lɛ toi lɛ, baale anɔkwalei ni kɔɔ Nyɔŋmɔ he lɛ. (Yohane 8:31, 32) Agbɛnɛ hu, Yesu ji “anɔkwale lɛ,” ejaakɛ ehã Biblia gbalɛi ba mli. Etsɔ nakai feemɔ nɔ ehã Nyɔŋmɔ shiwoi ba mli.​—Yohane 1:17; 2 Korintobii 1:19, 20; Kolosebii 2:16, 17.

“ Miji. . . wala lɛ.” Yesu kɛ ewala hã koni mɛi ni heɔ enɔ amɛyeɔ lɛ aná naanɔ wala. (Yohane 3:16, 36) Eji “wala” kɛhã mɛi ni egboi lɛ hu, ejaakɛ ebaatee amɛ shi kɛba wala mli.​—Yohane 5:28, 29; 11:25.

“ Mɔ ko mɔ ko baaa Tsɛ lɛ ŋɔɔ akɛ ja etsɔ minɔ.” Esa akɛ mɛi ni miitao ni Nyɔŋmɔ akpɛlɛ amɛ kɛ lɛ naanyobɔɔ nɔ lɛ ayɔse gbɛhe ni yɔɔ srɔto ni Yesu yɔɔ yɛ Nyɔŋmɔ gbɛjianɔtoo mli lɛ. Kɛ́ amɛsɔleɔ amɛhãa Nyɔŋmɔ kɛtsɔ Yesu gbɛ́i lɛ mli lɛ, belɛ amɛmiifee nakai, ni tsɔɔ akɛ amɛmiiyɔse hegbɛ ni Yesu Kristo yɔɔ lɛ. (Yohane 15:16) Agbɛnɛ hu, amɛkpɛlɛɔ nɔ akɛ Yesu Kristo pɛ nɔ abaanyɛ atsɔ ahere adesai ayiwala.​—Bɔfoi 4:12; Filipibii 2:8-11.

 Wɔnaa ŋaawoo ni Yesu kɛhã ebɔfoi anɔkwafoi 11 lɛ, gbi gbɛkɛ dani enɔjetsɛremɔ lɛ ebaagbo lɛ yɛ Yohane yitso 13 kɛyashi 17 lɛ mli. Yɛ yitso 14 lɛ mli lɛ, Yesu wo ekaselɔi lɛ hewalɛ akɛ amɛhe lɛ kɛ e-Tsɛ lɛ nɔ amɛye, amɛsumɔ lɛ kɛ e-Tsɛ lɛ, ni amɛbo amɛ toi. (Yohane 14:1, 12, 15-17, 21, 23, 24) Ehã amɛle wekukpaa ni mli wa ni no mli lɛ eyɔɔ ekɛ e-Tsɛ lɛ teŋ, kɛ be ni ekɛ amɛ wieɔ lɛ hu lɛ. (Yohane 14:10, 20, 28, 31) Eyɛ mli akɛ no mli lɛ, etsɛŋ ni Yesu baaku esɛɛ kɛya ŋwɛi moŋ, shi ema nɔ mi ehã ekaselɔi lɛ akɛ eshiŋ amɛ kɔkɔɔkɔ, no ji ekwaŋ amɛ. (Yohane 14:18) Ewo amɛ shi akɛ ebaahã amɛ “yelikɛbualɔ,” ni ekɛɛ amɛ akɛ yelikɛbualɔ lɛ ji “mumɔ krɔŋkrɔŋ lɛ, ni Tsɛ lɛ baatsu yɛ migbɛ́i mli lɛ.” (Yohane 14:25-27) Yesu tsɔ gbɛi nɛɛ kɛ gbɛi krokomɛi anɔ esaa esɛɛnyiɛlɔi lɛ eto naagbai ni amɛkɛbaakpe lɛ.