Daa afi lɛ, oblahii kɛ oblayei pii ni atsɔseɔ amɛ yɛ Yehowa Odasefoi aweku mli lɛ hãa abaptisiɔ amɛ. Ani oosusu he akɛ obaakɔ gbɛ ni tamɔ nakai? Kɛ́ nakai lɛ, klɛŋklɛŋ ehe baahia ni onu baptisimɔ kɛ henɔjɔɔmɔ shishi.

•  Mɛni ji baptisimɔ?

•  Mɛni ji henɔjɔɔmɔ?

•  Mɛni hewɔ baptisimɔ he hiaa?

•  Nɔ ni otipɛŋfoi kɛɔ

•  Afo atã kɛ anɔkwa sane

 Baptisimɔ ni awie he yɛ Biblia lɛ mli lɛ tsɔɔ gbɔmɔtso muu fɛɛ ni akɛwoɔ nu mli, jeee ni akɛ nu ashwa mɔ lɛ nɔ​—ni gbɔmɔtso muu lɛ fɛɛ ni akɛwoɔ nu lɛ mli lɛ hiɛ shishinumɔ ko ni he hiaa waa.

•   Kɛ́ aabaptisi bo lɛ, ogbɔmɔtso muu lɛ fɛɛ ni akɛwoɔ nu lɛ mli lɛ tsɔɔ akɛ osumɔɔɔ ni ofee nɔ ni sa bo diɛŋtsɛ ohiɛ.

•   Kɛ́ owó onɔ yɛ nu lɛ mli lɛ, no tsɔɔ akɛ oje shihilɛ hee shishi kɛ oti lɛ akɛ obaafee nɔ ni sa Nyɔŋmɔ hiɛ.

 Kɛ́ ohã abaptisi bo lɛ, etsɔɔ akɛ okpɛlɛɔ nɔ akɛ, Yehowa pɛ yɔɔ hegbɛ akɛ etsɔɔ nɔ ni ja kɛ nɔ ni ejaaa, ni owo shi yɛ faŋŋ mli akɛ obaasumɔ ni ofee nɔ ni etaoɔ ni ofee lɛ be fɛɛ be.

 Kɛhã he susumɔ: Mɛni hewɔ esa akɛ ohã mɛi fɛɛ ale akɛ owo shi akɛ obaabo Yehowa toi be fɛɛ be lɛ? Kwɛmɔ 1 Yohane 4:19 kɛ Kpojiemɔ 4:11.

 Dani abaabaptisi bo lɛ, esa akɛ bo diɛŋtsɛ ojɔɔ ohe nɔ ohã Yehowa. Yɛ mɛɛ gbɛ nɔ?

 Esa akɛ bo diɛŋtsɛ osɔle ni owo Yehowa shi akɛ obaasɔmɔ lɛ kɛya naanɔ ni obaasumɔ ni ofee esuɔmɔnaa nii ekɔɔɔ he eko nɔ ni baaba loo nɔ ni mɛi baakɛɛ.

 Baptisimɔ hãa mɛi krokomɛi naa ohe nɔ ni ojɔɔ ohã Yehowa lɛ. Ehãa mɛi krokomɛi naa akɛ osumɔɔɔ ni ohiɔ shi bɔ ni osumɔɔ dɔŋŋ ni oosumɔ ni ofee Yehowa pɛ suɔmɔnaa nii.​—Mateo 16:24.

 Kɛhã he susumɔ: Mɛni hewɔ kɛ́ okɛ ohe hã akɛ obaafee Yehowa suɔmɔnaa nii lɛ, oshihilɛ hiɔ fe tsutsu lɛ? Kwɛmɔ Yesaia 48:17, 18 kɛ Hebribii 11:6.

 Yesu to baptisimɔ shishi akɛ taomɔ nii ni esa akɛ mɛi ni baatsɔmɔ ekaselɔi lɛ ashɛ he. (Mateo 28:19, 20) No hewɔ lɛ, baptisimɔ kã he eji taomɔ nii kɛhã Kristofoi. Anɔkwa, Biblia lɛ kɛɛ ehe miihia kɛhã yiwalaheremɔ.​—1 Petro 3:21.

 Shi esa akɛ yiŋtoo hewɔ ni osumɔɔ ni abaptisi bo lɛ afee akɛ osumɔɔ Yehowa ni ohiɛ sɔɔ naanyobɔɔ ni yɔɔ okɛ lɛ teŋ lɛ. Esa akɛ onu he tamɔ lalatsɛ lɛ nu he lɛ, eŋma akɛ: “Mɛni mikɛbaato Yehowa najiaŋ yɛɛ nibii kpakpai fɛɛ ni efee ehã mi lɛ hewɔ? . . . Mabo matsɛ Yehowa gbɛ́i lɛ. Maye mishiwoi lɛ anɔ mahã Yehowa.”​—Lala 116:12-14.

 Kɛhã he susumɔ: Mɛɛ nɔ kpakpa Yehowa efee ehã bo ni mɛni okɛbaato lɛ najiaŋ? Kwɛmɔ 5 Mose 10:12, 13 kɛ Romabii 12:1.