Dabi, Biblia lɛ etsɔɔɔ akɛ ‘kɛ́ ahere mɔ ko yiwala lɛ, belɛ ahere eyiwala kɛmiiya naanɔ’. Kɛ́ mɔ ko ná hemɔkɛyeli yɛ Yesu Kristo mli lɛ abaanyɛ ahere eyiwala, shi kɛ́ eŋmɛɛ nakai hemɔkɛyeli lɛ he lɛ, eyiwalaheremɔ lɛ hu baaŋmɛɛ lɛ. Biblia lɛ kɛɔ akɛ, ebiɔ mɔdɛŋbɔɔ loo ‘hiɛmiamɔ’ dani wɔbaanyɛ wɔhiɛ wɔhemɔkɛyeli lɛ mli. (Yuda 3, 5) Akɛɛ Kristofoi ni hi shi yɛ blema ni ekpɛlɛ Kristo nɔ lɛ akɛ: ‘Amɛya nɔ amɛkɛ gbeyeishemɔ kɛ hekpokpomɔ atsu amɛ diɛŋtsɛ amɛyiwalaheremɔ he nii.’—Filipibii 2:12.

Ŋmalɛi ni tsɔɔ akɛ tsɔɔmɔ nɛɛ ejaaa

•   Biblia lɛ wieɔ eshiɔ eshai ni yɔɔ hiɛdɔɔ ni hãŋ mɔ ko abote Nyɔŋmɔ Maŋtsɛyeli lɛ mli lɛ. (1 Korintobii 6:9-11; Galatiabii 5:19-21) Kɛ́ yiwalaheremɔ nyɛŋ aŋmɛɛ mɔ ko lɛ, kulɛ, Biblia lɛ kɛ kɔkɔbɔi nɛɛ hãŋ. Moŋ lɛ, Biblia lɛ tsɔɔ akɛ mɔ ko ni ehe Yesu nɔ eye lɛ baanyɛ aku esɛɛ ni eyafee eshai ni yɔɔ hiɛdɔɔ. Akɛ nɔkwɛmɔnɔ lɛ, Hebribii 10:26 lɛ kɛɔ akɛ: “Kɛ́ wɔjeɔ gbɛ wɔfeɔ esha, be ni wɔná anɔkwale lɛ he nilee krɔŋŋ lɛ sɛɛ lɛ, belɛ eshai ahe afɔle ko bɛ dɔŋŋ.”—Hebribii 6:4-6; 2 Petro 2:20-22.

•   Yesu kɛ nɔkwɛmɔnɔ ko hã, ni yɛ nɔkwɛmɔnɔ lɛ mli lɛ, ekɛ ehe to wain tso he ni ekɛ esɛɛnyiɛlɔi lɛ hu to wain tso lɛ niji lɛ ahe. Ekɛ enɛ ma bɔ ni ehe hiaa ni wɔhiɛ wɔhemɔkɛyeli lɛ mli lɛ nɔ mi. Esɛɛnyiɛlɔi lɛ ateŋ mɛi komɛi baatsɔ yibii ni amɛwoɔ loo amɛnifeemɔi anɔ amɛtsɔɔ akɛ amɛyɛ hemɔkɛyeli yɛ emli, shi sɛɛ mli lɛ, amɛbaakpa nakai feemɔ ni ‘abaashɛrɛ amɛ ashwie tamɔ tso niji’ ni wooo yibii, ni yiwalaheremɔ baabɔ amɛ. (Yohane 15:1-6) Bɔfo Paulo kɛ nɔkwɛmɔnɔ ni tamɔ nakai nɔŋŋ tsu nii, ni ekɛɛ Kristofoi ni eyaaa nɔ amɛhiɛɛɛ amɛhemɔkɛyeli lɛ mli lɛ akɛ ‘abaafolɔ amɛ ashɛrɛ ashwie.’—Romabii 11:17-22.

•   Afã Kristofoi akɛ ‘amɛya nɔ amɛbu.’ (Mateo 24:42; 25:13) Mɛi ni tsuɔ “duŋ mli nitsumɔi” loo amɛtsuuu nitsumɔ ni Yesu fã akɛ atsu lɛ ewɔ yɛ mumɔŋ, ni yiwalaheremɔ baabɔ amɛ.—Romabii 13:11-13; Kpojiemɔ 3:1-3.

•   Ŋmalɛi babaoo tsɔɔ akɛ esa akɛ mɛi ni abaahere amɛyiwala lɛ aya nɔ ahiɛ amɛhemɔkɛyeli lɛ mli kɛya naagbee. (Mateo 24:13; Hebribii 10:36; 12:2, 3; Kpojiemɔ 2:10) Kristofoi ni hi shi yɛ klɛŋklɛŋ afii 100 lɛ mli lɛ ná miishɛɛ be ni amɛná amɛle akɛ amɛnyɛmimɛi Kristofoi lɛ miifi shi yɛ amɛhemɔkɛyeli lɛ mli lɛ. (1 Tesalonikabii 1:2, 3; 3 Yohane 3, 4) Kɛ́ abaahere mɛi ni fiii shi yɛ hemɔkɛyeli lɛ mli lɛ ayiwala lɛ, ani kɛ́ okwɛ lɛ, nilee yɛ mli akɛ Biblia lɛ baama nɔ mi akɛ afi shi shiŋŋ yɛ hemɔkɛyeli mli?

•   Be ni eshwɛ fioo ni bɔfo Paulo baagbo lɛ dani enyɛ ewie kɛ nɔmimaa akɛ abaahere eyiwala. (2 Timoteo 4:6-8) Be ni ebatsɔ Kristofonyo sɛɛ etsɛɛɛ lɛ, eyɔse akɛ kɛ́ eŋmɛɛ ehe ehã nibii ni eheloo lɛ shweɔ lɛ ahereŋ eyiwala. Eŋma akɛ: “Migbalaa migbɔmɔtso lɛ mai ni miyeɔ lɛ nyɔŋ, koni be ni mishiɛ mitsɔɔ mɛi krokomɛi migbe naa lɛ, mi diɛŋtsɛ lɛ, akabu mi mɔ ni esaaa yɛ gbɛ ko nɔ.”—1 Korintobii 9:27; Filipibii 3:12-14.