Ani Nyɔŋmɔ Maŋtsɛyeli lɛ yɛ Otsui Mli?
Hetoo ni Biblia lɛ kɛhãa
Dabi, Nyɔŋmɔ Maŋtsɛyeli lɛ jeee shihilɛ ko kɛkɛ ni yɔɔ Kristofoi atsui amli. a Biblia lɛ tsɛ lɛ akɛ “ŋwɛi Maŋtsɛyeli lɛ” ni ekɛtsɔɔ he tuuntu ni eyɔɔ. (Mateo 4:17) Kanemɔ koni ole nɔ hewɔ ni Biblia lɛ kɛɔ akɛ eji nɔyeli ni miiye nɔ kɛmiijɛ ŋwɛi lɛ.
Nyɔŋmɔ Maŋtsɛyeli lɛ yɛ nɔyelɔi, shishibii, mlai, kɛ hegbɛ ni ekɛbaahã afee Nyɔŋmɔ suɔmɔnaa nii yɛ ŋwɛi kɛ shikpɔŋ lɛ nɔ.—Mateo 6:10; Kpojiemɔ 5:10.
Nyɔŋmɔ nɔyeli lɛ loo Maŋtsɛyeli lɛ baaye “majimaji kɛ asafoi kɛ wiemɔi lɛ fɛɛ” anɔ yɛ shikpɔŋ lɛ nɔ. (Daniel 7:13, 14) Hegbɛ ni Nyɔŋmɔ nɔyeli lɛ yɔɔ lɛ jɛ lɛ diɛŋtsɛ eŋɔɔ shi jeee eshishibii lɛ aŋɔɔ.—Lala 2:4-6; Yesaia 9:7.
Yesu kɛɛ ekaselɔi anɔkwafoi lɛ akɛ amɛbaafata ehe yɛ ŋwɛi Maŋtsɛyeli lɛ mli koni ‘amɛtara maŋtsɛ sɛii anɔ.’—Luka 22:28, 30.
Maŋtsɛyeli lɛ yɛ henyɛlɔi ni ebaakpata amɛhiɛ.—Lala 2:1, 2, 8, 9; 110:1, 2; 1 Korintobii 15:25, 26.
Biblia lɛ etsɔɔɔ akɛ Nyɔŋmɔ Maŋtsɛyeli lɛ yɛ otsui mli kɛ shishinumɔ akɛ eyeɔ nɔ kɛjɛɔ mɔ ko tsui mli. Kɛ̃lɛ, etsɔɔ akɛ, “Maŋtsɛyeli lɛ he wiemɔ lɛ” loo “Maŋtsɛyeli lɛ he sane kpakpa” lɛ baanyɛ aná wɔtsuii anɔ hewalɛ ni esa akɛ efee nakai.—Mateo 13:19; 24:14.
Te wiemɔ ni ji “Nyɔŋmɔ maŋtsɛyeli lɛ, nyɛmli eyɔɔ” lɛ shishi lɛ?
Bɔ ni Biblia shishitsɔɔmɔi komɛi etsɔɔ Luka 17:21 lɛ shishi lɛ ehã mɛi komɛi ayiŋ efutu amɛ yɛ he ni Nyɔŋmɔ Maŋtsɛyeli lɛ yɔɔ lɛ he. Ákɛ nɔkwɛmɔnɔ lɛ, King James Version lɛ wie he akɛ “Nyɔŋmɔ maŋtsɛyeli lɛ, nyɛmli eyɔɔ.” Kɛ́ wɔbaanu ŋmalɛ nɛɛ shishi diɛŋtsɛ lɛ, esa akɛ wɔsusu sane ni awie kɛtsɔ hiɛ lɛ he.
Nyɔŋmɔ Maŋtsɛyeli lɛ bɛ nakai gbɔmɛi gbelɔi ni kpiliŋ amɛtsui ni te shi wo Yesu lɛ atsuiiaŋ
No mli lɛ, Yesu kɛ Farisifoi ni ji jamɔŋ hiɛnyiɛlɔi akuu ko ni te shi wo lɛ, ni fata mɛi ni taoɔ Yesu agbe lɛ he lɛ miiwie. (Mateo 12:14; Luka 17:20) Ani nilee yɛ mli akɛ abaasusu akɛ Maŋtsɛyeli lɛ ji shihilɛ ko ni yɔɔ amɛtsuii ni ekpiliŋ lɛ amli diɛŋtsɛ? Yesu kɛɛ amɛ akɛ: “Nyɛmligbɛ eyimɔ obɔbɔ kɛ osatofeemɔ kɛ mlatɔmɔ.”—Mateo 23:27, 28.
Biblia shishitsɔɔmɔi krokomɛi kɛ wiemɔi ni mli kã shi faŋŋ etsɔɔ Yesu wiemɔ ni yɔɔ Luka 17:21 lɛ shishi akɛ: “Nyɔŋmɔ Maŋtsɛyeli lɛ kɛ nyɛ yɛ.” (Wɔma efã ko nɔ mi; Contemporary English Version) “Nyɔŋmɔ Maŋtsɛyeli lɛ yɛ nyɛteŋ.” (Jeŋ Hee Shishitsɔɔmɔ) Abaanyɛ akɛɛ akɛ ŋwɛi Maŋtsɛyeli lɛ “kɛ amɛ yɛ” aloo “eyɛ amɛteŋ,” ejaakɛ, no mli lɛ, Yesu mɔ ni Nyɔŋmɔ ehala lɛ akɛ ebaaye Maŋtsɛyeli lɛ nɔ Maŋtsɛ lɛ damɔ Farisifoi lɛ ahiɛ.—Luka 1:32, 33.
a Sɔlemɔi babaoo tsɔɔ akɛ Nyɔŋmɔ Maŋtsɛyeli lɛ yɛ gbɔmɔ mli, loo eyɛ mɔ ko tsui mli. Ákɛ nɔkwɛmɔnɔ lɛ, sɔlemɔ ko ni yɔɔ Amerika ni gbɛ́i ji Southern Baptist Convention lɛ kɛɛ akɛ, yɛ gbɛ ko nɔ lɛ Nyɔŋmɔ Maŋtsɛyeli lɛ ji “Nyɔŋmɔ nɔyeli ni miiye nɔ yɛ aŋkro ko tsui kɛ eshihilɛ mli.” Nakai nɔŋŋ Pope Benedict XVI lɛ wie yɛ ewolo ni ji Jesus of Nazareth lɛ mli akɛ, “Kɛ́ mɔ ko jɛ etsuiŋ efee toiboo lɛ, etsɔɔ akɛ ená Nyɔŋmɔ Maŋtsɛyeli lɛ.”
Ekolɛ Obaasumɔ Enɛ Hu
ESSENTIAL BIBLE TEACHINGS
Mɛni Ji Nyɔŋmɔ Maŋtsɛyeli Lɛ?
Yɛ Yesu sɔɔmɔ nitsumɔ lɛ mli fɛɛ lɛ, ewie Nyɔŋmɔ Maŋtsɛyeli lɛ he fe nibii krokomɛi fɛɛ. Afii ohai abɔ nɛ ní esɛɛnyiɛlɔi esɔle koni nakai Maŋtsɛyeli lɛ aba.
BIBLIA MLI ŊMALƐI NI AGBALA MLI
Agbala Marko 1:15 Lɛ Mli—“Nyɔŋmɔ Maŋtsɛyeli Lɛ Enina Nyɛ”
Ani no mli lɛ, Yesu miitsɔɔ akɛ Nyɔŋmɔ Maŋtsɛyeli lɛ ebɔi nɔyeli?
BUU-MƆƆ
Namɔ Ji Nyɔŋmɔ Maŋtsɛyeli Lɛ Nɔ Maŋtsɛ?
Biblia ŋmalɔi srɔtoi ŋmala nibii ni baahã wɔna mɔ ni baafee Nyɔŋmɔ Maŋtsɛyeli lɛ nɔ Maŋtsɛ. Yɛ yinɔsane mli fɛɛ lɛ, mɔ kome pɛ ni nibii ni aŋmala lɛ kɔɔ ehe.
SANEBIMƆI NI BIBLIA LƐ EHÃ HETOO
Mɛni Nyɔŋmɔ Maŋtsɛyeli Lɛ Baatsu?
Kanemɔ koni ole nibii ni baaba be ni Nyɔŋmɔ nɔyeli lɛ yeɔ shikpɔŋ lɛ nɔ lɛ.
BIBLIA TSƆƆMƆI
Kaa Wɔ-Biblia Kasemɔ Lɛ Okwɛ
Biblia kasemɔ ni baafee sanegbaa ni mɔ ko baawa bo; aheee shika.