Mɛni Ji Kooloo Ni Tsuɔ Fɔɔ Ni Awie Ehe Yɛ Kpojiemɔ Yitso 17 Lɛ?
Hetoo ni Biblia lɛ kɛhãa
Kooloo ni tsuɔ fɔɔ ni awie ehe yɛ Kpojiemɔ yitso 17 lɛ feɔ gbɛjianɔtoo ko ni yiŋtoo ji, ebaafee maji ni yɔɔ je lɛŋ fɛɛ lɛ ekome koni etsɔ amɛnajiaŋdamɔlɔ lɛ he mfoniri. Tsutsu lɛ, atsɛɔ lɛ Jeŋmaji Akpaŋmɔ lɛ, ni amrɔ nɛɛ atsɛɔ Jeŋmaji Ekomefeemɔ lɛ.
Nibii ni akɛyɔseɔ kooloo ni tsuɔ fɔɔ lɛ
Eji maŋkwramɔŋ gbɛjianɔtoo. Kooloo ni tsuɔ fɔɔ lɛ yɛ “yitsei kpawo” ni edamɔ shi kɛhã “gɔji kpawo” kɛ “maŋtsɛmɛi kpawo” loo nɔyeli hegbɛi. (Kpojiemɔ 17:9, 10) Akɛ gɔji kɛ kooloi feɔ nɔyelii ahe mfoniri yɛ Biblia lɛ mli.—Yeremia 51:24, 25; Daniel 2:44, 45; 7:17, 23.
Efeɔ jeŋ fɛɛ maŋkwramɔŋ gbɛjianɔtoo lɛ he mfoniri. Kooloo ni tsuɔ fɔɔ lɛ tamɔ kooloo ni hiɛ yitsei kpawo ni awie ehe yɛ Kpojiemɔ yitso 13 akɛ damɔ shi kɛhã jeŋ fɛɛ maŋkwramɔŋ gbɛjianɔtoi lɛ nɔŋŋ. Kooloi enyɔ lɛ ateŋ eko fɛɛ eko yɛ yitsei kpawo, akolontoi nyɔŋma, kɛ musubɔɔ gbɛ́ii. (Kpojiemɔ 13:1; 17:3) Nibii ni je amɛhe ni sa kadimɔ waa yɛ amɛhe nɛɛ jeee heniianaa kɛkɛ. Kooloo ni tsuɔ fɔɔ lɛ feɔ jeŋ fɛɛ maŋkwramɔŋ gbɛjianɔtoo lɛ he mfoniri loo ehe amaga.—Kpojiemɔ 13:15.
Enáa hewalɛ kɛjɛɔ nɔyelii krokomɛi aŋɔɔ. Kooloo ni tsuɔ fɔɔ lɛ ‘jɛ’ nɔyelii krokomɛi lɛ amli, loo amɛ amɛhã eba shihilɛ mli.—Kpojiemɔ 17:11, 17.
Ekɛ jamɔ yɛ tsakpãa. Babilon Kpeteŋkpele lɛ, ni ji jeŋ fɛɛ amale jamɔ gbɛjianɔtoo lɛ, ta kooloo ni tsuɔ fɔɔ lɛ nɔ, ni tsɔɔ akɛ jamɔ gbɛjianɔtoi nɛɛ ji mɛi ni kudɔɔ kooloo lɛ.—Kpojiemɔ 17:3-5.
Egbeɔ Nyɔŋmɔ he guɔ. Kooloo lɛ he “eyi obɔ kɛ musubɔɔ gbɛ́ii.”—Kpojiemɔ 17:3.
Ehewalɛ baaje edɛŋ be kukuoo ko. Akɛ kooloo ni tsuɔ fɔɔ lɛ baawo “bu kwɔŋkwɔŋ” a ko mli, loo ehewalɛ baaje edɛŋ be kukuoo ko, shi ebaaje kpo ekoŋŋ.—Kpojiemɔ 17:8.
Biblia gbalɛ ba mli
Hã wɔsusu bɔ ni Jeŋmaji Ekomefeemɔ lɛ kɛ nɔ ni tsɔ ehiɛ, ni ji Jeŋmaji Akpaŋmɔ lɛ ewo Biblia gbalɛ ni kɔɔ kooloo ni tsuɔ fɔɔ lɛ he lɛ obɔ lɛ he wɔkwɛ.
Eji maŋkwramɔ gbɛjianɔtoo. Jeŋmaji Ekomefeemɔ lɛ fiɔ maŋkwramɔ gbɛjianɔtoi asɛɛ; no ji, yɛ nɔyeli gbɛfaŋ lɛ, ekwɛɔ koni “Maji ni kɛ amɛhe ebadɔmɔ lɛ lɛ eko akaye eko nɔ.” b
Efeɔ jeŋ fɛɛ maŋkwramɔŋ gbɛjianɔtoo lɛ he mfoniri. Yɛ afi 2011 lɛ, maŋ kome bafata Jeŋmaji Ekomefeemɔ lɛ he ni eyibɔ yashɛ maji 193. Enɛ hewɔ lɛ, ekɛɛ edamɔ shi kɛhã maji kɛ gbɔmɛi ni yɔɔ je lɛŋ lɛ ateŋ kpotoo.
Enáa hewalɛ kɛjɛɔ nɔyelii krokomɛi aŋɔɔ. Maji ni yɔɔ Jeŋmaji Ekomefeemɔ lɛ mli lɛ ji mɛi ni to kuu lɛ, ni amɛ nɔŋŋ amɛhãa lɛ hewalɛ.
Ekɛ jamɔ yɛ tsakpaa. Je lɛŋ jamɔi lɛ fi Jeŋmaji Akpaŋmɔ lɛ sɛɛ, ni amɛmiifi Jeŋmaji Ekomefeemɔ lɛ hu sɛɛ. c
Egbeɔ Nyɔŋmɔ he guɔ. Ato Jeŋmaji Ekomefeemɔ lɛ shishi koni “ebaa toiŋjɔlɛ kɛ shweshweeshwefeemɔ yi yɛ jeŋ fɛɛ.” d Etamɔ nɔ ni yiŋtoo nɛɛ sa jogbaŋŋ moŋ, shi Jeŋmaji Ekomefeemɔ lɛ gbeɔ Nyɔŋmɔ he guɔ, ejaakɛ ekɛɔ akɛ lɛ etsuɔ nitsumɔ ni Nyɔŋmɔ Maŋtsɛyeli lɛ pɛ baatsu lɛ.—Lala 46:9, Ga Biblia hee; Daniel 2:44.
Ehewalɛ baaje edɛŋ be kukuoo ko. Jeŋmaji Akpaŋmɔ lɛ, ni ato shishi bei fioo yɛ Jeŋ Ta I lɛ sɛɛ koni ebaa toiŋjɔlɛ yi lɛ, eyanyɛɛɛ etsĩ bei ni yaa nɔ yɛ majimaji ateŋ lɛ naa. Ekpa nitsumɔ be ni Jeŋ Ta II lɛ je shishi yɛ 1939 lɛ. Yɛ afi 1945, be ni Jeŋ Ta II lɛ ba naagbee lɛ, ato Jeŋmaji Ekomefeemɔ lɛ shishi. Yiŋtoi ahewɔ ni ato, gbɛi anɔ ni etsuɔ nii ehãa, kɛ bɔ ni ato he gbɛjianɔ ahã lɛ tamɔ Jeŋmaji Akpaŋmɔ lɛ pɛpɛɛpɛ.
a Wolo ni ji Vine’s Expository Dictionary of Old and New Testament Words lɛ tsɔɔ mli akɛ, Greek wiemɔ ni atsɔɔ shishi akɛ “bu kwɔŋkwɔŋ” lɛ tsɔɔ “bu ko ni anaaa enaagbee.” King James Version lɛ tsɔɔ shishi akɛ, “bu ko ni bɛ naagbee.” Akɛ wiemɔ nɛɛ tsuɔ nii yɛ Biblia lɛ mli kɛtsɔɔ he ko aloo shihilɛ ko ni atsĩ mɔ ko naa awo mli ni enyɛɛɛ nɔ ko nɔ ko efee.
b Kwɛmɔ wolo ni ji Charter of the United Nations, Article 2.
c Akɛ nɔkwɛmɔnɔ lɛ, kuu ko ni ji najiaŋdamɔlɔ kɛhã Protɛstant jamɔi kpotoo ni yɔɔ Amerika lɛ jaje yɛ afi 1918 akɛ, Jeŋmaji Akpaŋmɔ baafee “Nyɔŋmɔ maŋtsɛyeli lɛ najiaŋdamɔlɔ yɛ shikpɔŋ lɛ nɔ.” Yɛ afi 1965 lɛ, Buddha jamɔ, Katolik jamɔ, Eastern Orthodoxy, Hindu jamɔ, Islam jamɔ, Yudafoi ajamɔ, kɛ Protɛstant jamɔ najiaŋdamɔlɔi bɔ gwa yɛ San Francisco kɛtsɔɔ akɛ amɛfiɔ Jeŋmaji Ekomefeemɔ lɛ sɛɛ, ni amɛsɔle amɛhã lɛ. Yɛ afi 1979 lɛ, Pope John Paul II wie akɛ, Jeŋmaji Ekomefeemɔ lɛ “baaya nɔ efee gbɛjianɔtoo titri ni kɛ toiŋjɔlɛ kɛ jalɛsaneyeli baaba.”
d Kwɛmɔ wolo ni ji Charter of the United Nations, Article 1.
Ekolɛ Obaasumɔ Enɛ Hu
SANEBIMƆI NI BIBLIA LƐ EHÃ HETOO
Kpojiemɔ Wolo Lɛ—Mɛni Etsɔɔ?
Wolo lɛ diɛŋtsɛ kɛɔ akɛ mɛi ni kaneɔ emli wiemɔi lɛ, ní amɛnuɔ shishi ní amɛyeɔ nibii ni aŋmala yɛ mli lɛ anɔ lɛ yɛ miishɛ.
SANEBIMƆI NI BIBLIA LƐ EHÃ HETOO
Mɛni Kooloo Awuiyelɔ Ni Yɔɔ Yitsei Kpawo Ni Awie Ehe Yɛ Kpojiemɔ Yitso 13 Lɛ Damɔ Shi Kɛhã?
Kooloo awuiyelɔ lɛ yɛ hegbɛ, hewalɛ kɛ nɔyeli. Mɛni ekoŋŋ gbalɛ lɛ tsɔɔ?
SAJI NI MƐI FƆƆ BIMƆ
Mɛni Hewɔ Yehowa Odasefoi Fiii Afã Ko Sɛɛ Yɛ Maŋkwramɔ Saji Amli Lɛ?
Ani afã ko sɛɛ ni wɔfiii lɛ kɛ maŋ shweshweeshwe feemɔ woɔ oshara mli?
BUU-MƆƆ
Ani Be ko Baashɛ ni Wɔbaaná Nɔyeli Kome ni Baaye Jeŋ Muu lɛ Fɛɛ Nɔ?
Kɛ́ nɔyeli kome yeɔ jeŋ muu lɛ fɛɛ nɔ lɛ, toiŋjɔlɛ kɛ shweshweeshwe shihilɛ baaba jeŋ fɛɛ. Mɛni hewɔ wɔbaanyɛ wɔhe shi ni Nyɔŋmɔ ewo akɛ ekɛ nɔyeli ni tamɔ nakai baaba lɛ wɔye lɛ? Namɔ baafee enɔyelɔ?
BIBLIA TSƆƆMƆI
Kaa Wɔ-Biblia Kasemɔ Lɛ Okwɛ
Biblia kasemɔ ni baafee sanegbaa ni mɔ ko baawa bo; aheee shika.