Mɛi kɛ Yesu Kristo tsɔɔmɔi lɛ etsu nii kɛto nɔ ni wɔbaatsɛ lɛ akɛ Kristofoi ajámɔ kui srɔtoi. Kɛ̃lɛ, Biblia lɛ hãa wɔnaa akɛ anɔkwa Kristofoi ajámɔ kuu kome pɛ ni yɔɔ. Hã wɔsusu yiŋtoi etɛ ahewɔ ni wɔmuɔ sane naa nakai lɛ he wɔkwɛ.

1.   Yesu wie akɛ, etsɔɔ “anɔkwale lɛ,” ni mra beiaŋ Kristofoi lɛ tsɛ amɛjámɔ lɛ akɛ “anɔkwale lɛ.” (Yohane 8:32; 2 Petro 2:2; 2 Yohane 4; 3 Yohane 3) Wiemɔi nɛɛ tsɔɔ akɛ, mɛi ni tsɔɔ nibii ni teɔ shi woɔ Yesu tsɔɔmɔi lɛ ehiii shi yɛ anɔkwa Kristofoi atsɔɔmɔ lɛ naa.

2.   Biblia lɛ tsɔɔ akɛ, esa akɛ Kristofoi fɛɛ ‘anaabu afee ekome.’ (1 Korintobii 1:10) Kɛ̃lɛ, jámɔi babaoo ni tsɛɔ amɛhe Kristofoi lɛ kɛ amɛhe kpãaa gbee yɛ tsɔɔmɔi bibii po ni hãa ayɔseɔ mɔ ko akɛ Kristofonyo lɛ he. Enyɛŋ eba kɔkɔɔkɔ akɛ jámɔi ni tsɛɔ amɛhe Kristofoi nɛɛ fɛɛ ajámɔ lɛ ja.—1 Petro 2:21.

3.   Yesu gba efɔshi akɛ, mɛi babaoo baakɛɛ akɛ Kristofoi ji amɛ, kɛ̃lɛ amɛyeŋ efamɔi lɛ anɔ, ni ebaakpoo nakai mɛi lɛ. (Mateo 7:21-23; Luka 6:46) Jámɔŋ hiɛnyiɛlɔi ni tsɔɔ tsɔɔmɔi ni ejaaa koni amɛná mɛi ahe sɛɛ lɛ baalaka mɛi babaoo. (Mateo 7:15) Kɛfata he lɛ, mɛi komɛi hu baasumɔ ni amɛkɛ amɛhe adɔmɔ jámɔi ni tsɛɔ amɛhe Kristofoi lɛ, akɛni mɛi nɛɛ sumɔɔ ni akɛɛ amɛ nibii ni baaŋɔɔ amɛtoi anaa moŋ fe anɔkwalei ni yɔɔ Biblia lɛ mli.—2 Timoteo 4:3, 4.

 Yɛ Yesu abɛbua ni kɔɔ ŋmaa lɛ kɛ jwɛi lɛ ahe lɛ mli lɛ, egba akɛ abaatse atua ashi anɔkwa Kristojamɔ (abaakwa anɔkwa Kristojamɔ). (Mateo 13:24-30, 36-43) Bei kpalaŋ baashwie mli ni anyɛŋ ana srɔto ni yɔɔ anɔkwa Kristofoi kɛ apasa Kristofoi ateŋ. Taakɛ Yesu gba fɔ̃ shi lɛ, Yesu bɔfoi lɛ agbele sɛɛ lɛ, akwa anɔkwa jámɔ kwraa. (Bɔfoi 20:29, 30) Eyɛ mli akɛ jámɔkwalɔi lɛ atsɔɔmɔi lɛ yɛ srɔtoi moŋ, kɛ̃lɛ, amale Kristofoi fɛɛ “edu gbɛ kɛje anɔkwale lɛ he.”—2 Timoteo 2:18.

 Kɛfata he lɛ, Yesu gba fɔ̃ shi akɛ, be baashɛ ni srɔto ni yɔɔ anɔkwale Kristofoi kɛ apasa Kristofoi ateŋ lɛ baafee faŋŋ. Gbalɛ nɛɛ eba mli yɛ wɔbe nɛɛ, ni ji “shihilɛ gbɛjianɔtoo nɛɛ naagbee gbii lɛ amli.”—Mateo 13:30, 39.