Biblia lɛ ji woji krɔŋkrɔŋi 66 ni aŋmala ni abua naa afee lɛ ekome. Akɛ aaafee afii 1,600 ni ŋma. Saji ni yɔɔ Biblia lɛ mli lɛ jɛ Nyɔŋmɔ ŋɔɔ, ni eji “Nyɔŋmɔ wiemɔ.”​—1 Tesalonikabii 2:13.

Nɔ ni wɔbaasusu he yɛ sane nɛɛ mli

•  Anɔkwalei ni kɔɔ Biblia lɛ he

•  Mɛni he Biblia lɛ wieɔ?

•  Ani atsake saji ni yɔɔ Biblia lɛ mli lɛ?

•  Mɛni hewɔ afee Biblia shishitsɔɔmɔi srɔtoi babaoo lɛ?

•  Namɔ tsɔɔ nɔ ni esa akɛ akɛwo Biblia lɛ mli?

•  Ani Biblia lɛ mli woji lɛ ekomɛi elaaje?

•  Bɔ ni obaafee ona Biblia ŋmalɛ ko ni otaoɔ

•  Biblia mli woji ni ato naa

•   Namɔ ŋma Biblia lɛ? Nyɔŋmɔ ji mɔ ni ŋma Biblia lɛ, shi ekɛ hii srɔtoi aaafee 40 tsu nii kɛŋma. Hii nɛɛ ekomɛi ji Mose, Maŋtsɛ David, Mateo, Marko, Luka, kɛ Yohane. a Nyɔŋmɔ hã mɛi ni ŋma Biblia lɛ le esusumɔi ni amɛŋmala amɛshwie shi.​—2 Timoteo 3:16.

   Akɛ nɔkwɛmɔnɔ lɛ: Kɛ́ nitsumɔtsɛ ko kɛɛ ewoloŋmalɔ akɛ eŋma nɔ ko eyahã mɔ ko ehã lɛ, ni eko lɛ, etsɔɔ lɛ nɔ ni eŋma lɛ he sane fioo po lɛ, abaanyɛ akɛɛ akɛ nitsumɔtsɛ lɛ ni ŋma ejaakɛ enaa saji ni yɔɔ mli. Yɛ nakai gbɛ nɔ nɔŋŋ lɛ, eyɛ mli akɛ Nyɔŋmɔ kɛ gbɔmɛi tsu nii kɛŋmala ewiemɔ lɛ moŋ, shi lɛ ji Biblia lɛ Ŋmalɔ.

•   Mɛni wiemɔ ni ji “Biblia” lɛ tsɔɔ? Bɔ ni Gamɛi tsɛɔ “Biblia lɛ,” nakai nɔŋŋ atsɛɔ lɛ yɛ Greek mli, ni wiemɔ biblia yɛ Greek mli shishi ji “woji bibii.” Be ni be shwie mli lɛ, akɛ Greek wiemɔ ni ji biblia lɛ badamɔ shi ahã woji bibii lɛ fɛɛ ni feɔ Biblia muu lɛ.

•   Mɛɛ be aŋma Biblia lɛ? Abɔi Biblia lɛ ŋmaa yɛ afi 1513 D.Ŋ.B. ni agbe naa aaafee afi 98 Ŋ.B,. Enɛ tsɔɔ akɛ ehe nɔ ni fe afii 1,600 ni akɛŋma.

•   Ani klɛŋklɛŋ Biblia ni aŋma lɛ yɛ lolo? Dabi, eko kwraa bɛ shihilɛ mli bianɛ. Nɔ hewɔ ji akɛ, mɛi ni ŋmala Biblia lɛ yɛ nakai beiaŋ lɛ ŋmala yɛ nibii ni fiteɔ tamɔ papiro kɛ kooloi ahewoji anɔ. Kɛ̃lɛ mɛi ni amɛ nitsumɔ ji woloŋmaa lɛ to amɛtsui shi amɛkɔpe Biblia lɛ jogbaŋŋ ni enɛ tee nɔ afii ohai abɔ, enɛ ehã abaa Biblia mli saji lɛ ayi koni mɛi aná eko amɛkane wɔsɛɛ.

•   Mɛni ji nɔ ni mɛi tsɛɔ lɛ Kpaŋmɔ Momo lɛ kɛ Kpaŋmɔ Hee lɛ? Nɔ ni mɛi fɔɔ lɛ tsɛmɔ akɛ Kpaŋmɔ Momo lɛ ji Biblia lɛ fã ni aŋma titri yɛ Hebri mli, b ni ale lɛ hu akɛ Hebri Ŋmalɛi lɛ. Nɔ ni mɛi tsɛɔ lɛ Kpaŋmɔ hee lɛ ji Biblia lɛ fã ni aŋma yɛ Greek mli, ni ale lɛ hu akɛ Kristofoi A-Greek Ŋmalɛi lɛ. Fãi enyɔ nɛɛ ni kɛ́ afee fɛɛ ekome lɛ efeɔ Biblia muu lɛ, ni atsɛɔ lɛ hu akɛ Ŋmalɛ krɔŋkrɔŋ lɛ. c

•   Mɛni yɔɔ Biblia lɛ mli? Nibii ni yɔɔ Biblia lɛ mli lɛ ekomɛi ji yinɔsaji, mlai, gbalɛi, lalawiemɔi, abɛi, lalai, kɛ lɛtai loo woji ni aŋmala kɛmaje mɛi.​—Kwɛmɔ fã ni ji “ Biblia mli woji” lɛ.

 Biblia lɛ je shishi kɛ bɔ ni fee ni Ofe lɛ bɔ ŋwɛi kɛ shikpɔŋ lɛ. Yehowa tsɔ Biblia lɛ nɔ ejie ehe shi etsɔɔ, ehã wɔle egbɛ́i ni ji Yehowa lɛ, ni eefɔ̃ adesai anine koni amɛbale lɛ.​—Lala 83:18.

 Biblia lɛ tsɔɔ akɛ awie Nyɔŋmɔ he bɔ ni esaaa, ni ehãa wɔnaa nɔ ni Nyɔŋmɔ baafee kɛtse egbɛ́i lɛ he.

 Biblia lɛ hãa wɔnaa nɔ hewɔ ni Nyɔŋmɔ bɔ ŋwɛi kɛ shikpɔŋ lɛ. Etsɔɔ bɔ ni wɔsɛɛ lɛ, Nyɔŋmɔ baajie nibii ni hãa gbɔmɛi piŋɔ lɛ kɛje shihilɛ mli.

 Biblia lɛ kɛ ŋaawoo ni he yɔɔ sɛɛnamɔ ni wɔbaanyɛ wɔkɛtsu nii yɛ wɔ daa gbi shihilɛ mli lɛ hãa. Ŋaawoi nɛɛ ekomɛi nyiɛ sɛɛ nɛɛ:

•   Esa akɛ wɔkɛ mɛi ahi shi jogbaŋŋ. “Nɔ fɛɛ nɔ ni nyɛtaoɔ akɛ mɛi afee ahã nyɛ lɛ, nyɛ hu nyɛfea nakai nɔŋŋ nyɛhãa amɛ.”​—Mateo 7:12.

   Nɔ ni etsɔɔ: Bɔ ni wɔmiisumɔ ni mɛi kɛ wɔ aye ahã lɛ, esa akɛ wɔ hu wɔkɛ amɛ aye nakai nɔŋŋ.

•   Nɔ ni wɔbaanyɛ wɔfee kɛ́ wɔhao. “Nyɛkayea nyɛtsui yɛ wɔ́ he kɔkɔɔkɔ, ejaakɛ wɔ́ hu kɛ lɛ diɛŋtsɛ etsuiyelii baaba.”​—Mateo 6:34.

   Nɔ ni etsɔɔ: Yɛ nɔ najiaŋ ni wɔbaahao fe nine yɛ nɔ ni ekolɛ ebaaba wɔsɛɛ lɛ he lɛ, ehi akɛ wɔbaatsu naagbai ni wɔkɛkpeɔ bianɛ lɛ moŋ ahe nii.

•   Nɔ ni baahã miishɛɛ ahi wɔgbalashihilɛ mli. “Esa akɛ nyɛteŋ mɔ fɛɛ mɔ asumɔ eŋa tamɔ lɛ diɛŋtsɛ ehe; ni esa akɛ ŋa lɛ aná bulɛ ni mli kwɔ ehã ewu.”​—Efesobii 5:33.

   Nɔ ni etsɔɔ: Kɛ́ gbalashihilɛ ko baaye omanye lɛ, esa akɛ ajie suɔmɔ kɛ bulɛ kpo yɛ mli.

 Dabi. Woloŋlelɔi kɛ blema Bibliai ni akɛ niji ŋmala lɛ eto Biblia ni aŋma yɛ wɔbei nɛɛ amli lɛ he, ni amɛna akɛ atsakeko Hebri Ŋmalɛ lɛ. Nilee yɛ enɛ mli​—ejaakɛ kɛ́ Nyɔŋmɔ miisumɔ ni mɛi akane saji ni ehã aŋma lɛ ni amɛnu shishi lɛ, ani efeŋ nɔ fɛɛ nɔ ni ebaanyɛ koni akatsake saji nɛɛ? d​—Yesaia 40:8.

 Mɛi ni kaneɔ nii yɛ wɔbei nɛɛ amli lɛ ateŋ mɛi babaoo nyɛŋ anu blema wiemɔi ni aŋmala Biblia lɛ yɛ mli lɛ ashishi. Kɛ̃lɛ, Biblia lɛ yɛ “sane kpakpa” kɛhã “jeŋmaŋ fɛɛ jeŋmaŋ kɛ weku fɛɛ weku, kɛ wiemɔ fɛɛ wiemɔ.” (Kpojiemɔ 14:6, shishigbɛ niŋmaa) Yiŋtoo nɛɛ hewɔ lɛ, esa akɛ mɛi aná Biblia shishitsɔɔmɔ yɛ wiemɔ ko ni amɛbaanyɛ amɛkane ni amɛnu Nyɔŋmɔ wiemɔ lɛ shishi jogbaŋŋ yɛ mli lɛ mli.

 Gbɛi srɔtoi etɛ yɔɔ ni atsɔɔ nɔ atsɔɔ Biblia lɛ shishi:

•   Akwɛɔ bɔ ni ato wiemɔi lɛ ahã lɛ, ni atsɔɔ shishi nakai, koni aná eshishinumɔ ŋmiiŋmi.

•   Akwɛɔ shishinumɔi ni yɔɔ sane loo wiemɔ lɛ mli lɛ, no ji akwɛɔ nɔ tuuntu ni Hebri loo Greek wiemɔi ni akɛtsu nii kɛŋma Biblia lɛ tsɔɔ, ni akɛtsɔɔ sane lɛ shishi.

•   Akɛ wiemɔi krokomɛi tsuɔ nii kɛtsɔɔ shishi, ni afeɔ nakai koni ekanemɔ aŋɔɔ. Kɛ̃lɛ, kɛ́ akɛ wiemɔi krokomɛi tsu nii, ni ato naa yɛ gbɛ kroko nɔ lɛ, enyɛɔ etsakeɔ shishinumɔ diɛŋtsɛ ni yɔɔ ŋmalɛ lɛ mli lɛ.

 Biblia ni atsɔɔ shishi jogbaŋŋ lɛ ŋmɛɔ pɛpɛɛpɛ yɛ bɔ ni atsɔɔ saji ashishi ŋmiiŋmi lɛ gbɛfaŋ, ni ekɛ wiemɔi ni akɛtsuɔ nii ŋmɛnɛ ni anuɔ shishi lɛ tsuɔ nii kɛtsɔɔ saji lɛ ashishi jogbaŋŋ koni mɛi ni kaneɔ Nyɔŋmɔ wiemɔ lɛ aná saji ni ja ni mli kã shi. e

 Akɛni Nyɔŋmɔ ji mɔ ni ŋma Biblia lɛ hewɔ lɛ, lɛ etsɔɔ nɔ ni esa akɛ akɛwo mli. Klɛŋklɛŋ lɛ, ehala blema Israel maŋ lɛ akɛ mɛi ni “atu Nyɔŋmɔ wiemɔi krɔŋkrɔŋi lɛ awo amɛdɛŋ,” ni amɛbafee mɛi hiɛ Hebri Ŋmalɛi lɛ.​—Romabii 3:2.

 Dabi. Biblia lɛ mli woji lɛ eshɛ; emli woji lɛ eko kwraa elajeko. Mɛi komɛi baakɛɛ akɛ blema woji komɛi ni akɛto jogbaŋŋ lɛ fata Biblia mli woji lɛ ahe. f Kɛ̃lɛ, saji komɛi yɛ Biblia lɛ mli ni akɛyɔseɔ ja ni Biblia lɛ ja lɛ. (2 Timoteo 1:13) Kɛ́ adamɔ nakai saji lɛ anɔ lɛ, anaa akɛ Biblia lɛ mli woji ni Nyɔŋmɔ kɛ emumɔ lɛ tsirɛ mɛi ni amɛŋmala lɛ kɛ amɛhe kpãa gbee. Anyɛŋ awie nakai yɛ blema woji fɛɛ ni mɛi komɛi kɛɔ akɛ efata Biblia mli woji ahe lɛ agbɛfaŋ. g