Naanyobɔɔ baanyɛ ahã wɔmii ashɛ wɔhe, ni wɔye omanye. Kɛ́ Nyɔŋmɔ nanemɛi kɛ amɛhe bɔ lɛ, mɔ nɛ náa mɔ nɛ nɔ hewalɛ kpakpa, ni amɛhãa wɔtsɔmɔɔ gbɔmɛi kpakpai.​—Abɛi 27:17.

 Kɛ̃lɛ, Biblia lɛ kɛɛ ehe miihia ni wɔkɛ hiɛshikamɔ ahala wɔnanemɛi. Ebɔɔ wɔ kɔkɔ akɛ, kɛ́ wɔkɛ mɛi kpakpai ebɔɔɔ naanyo lɛ, wɔbaana amane. (Abɛi 13:20; 1 Korintobii 15:33) Nanemɛi tamɔ nɛkɛ baanyɛ ahã okpɛ yiŋ gbohii, loo ofee nibii ni baafite osui kpakpai.

Nɔ ni wɔbaasusu he yɛ sane nɛɛ mli

•  Mɛni feɔ mɔ ko naanyo kpakpa?

•  Mɛɛ nanemɛi kpakpai komɛi awie amɛhe yɛ Biblia lɛ mli?

•  Ani mɔ ko baanyɛ ekɛ Nyɔŋmɔ abɔ naanyo?

•  Biblia ŋmalɛi ni kɔɔ naanyobɔɔ he

 Biblia lɛ tsɔɔ akɛ, esa akɛ naanyobɔɔ kpakpa adamɔ nɔ ko ni he hiaa kwraa fe nibii ni nanemɛi enyɔ lɛ fɛɛ nyaa he lɛ kɛkɛ anɔ. Akɛ nɔkwɛmɔnɔ lɛ, Lala 119:63 lɛ kɛɛ: “Minanemɛi ji mɛi fɛɛ ni sheɔ bo a gbeyei, kɛ mɛi fɛɛ ni yeɔ ofamɔi lɛ anɔ lɛ.” Kadimɔ akɛ Biblia ŋmalɔ nɛɛ kɛɛ, ehalaa mɛi ni sumɔɔ akɛ amɛsa Nyɔŋmɔ hiɛ, ni amɛhi shi yɛ Nyɔŋmɔ shishitoo mlai anaa lɛ akɛ enanemɛi.

 Biblia lɛ tsɔɔ sui kpakpai hu ni esa akɛ naanyo kpakpa aná. Akɛ nɔkwɛmɔnɔ lɛ:

•   “Naanyo kpakpa sumɔɔ mɔ yɛ bei fɛɛ mli, ni ebatsɔɔ nyɛmi yɛ haomɔ beiaŋ.”​—Abɛi 17:17.

•   “Nanemɛi komɛi yɛ ni sumɔɔ ni amɛfite amɛteŋ, shi naanyo ko yɛ ni kpɛtɛɔ mɔ gbagbalii fe nyɛmi.”​—Abɛi 18:24.

 Ŋmalɛi nɛɛ tsɔɔ wɔ akɛ, naanyo kpakpa yeɔ anɔkwa, esumɔɔ mɔ, emli hi, ni efeɔ ejurɔ. Naanyo kpakpa ji mɔ ko ni kɛ́ okɛ jaramɔ shihilɛ miikpe lɛ, obaanyɛ oná hekɛnɔfɔɔ akɛ ebaaye ebua bo. Agbɛnɛ hu, naanyo kpakpa ji mɔ ko ni kɛ́ ookɔ gbɛ ko ni ejaaa loo ookpɛ yiŋ gbonyo ko lɛ, ebaanyɛ efee ekãa ni etsɛ otoi sɛɛ.​—Abɛi 27:6, 9.

 Yɛ Biblia lɛ mli lɛ, ayɛ mɛi ni esoro afii abɔ ni amɛye, shihilɛi amli ni amɛjɛ, maji anɔ ni amɛjɛ, kɛ hegbɛi ni amɛyɔɔ, ni amɛkɛ amɛhe bɔ naanyo jogbaŋŋ. Naa naanyobɔɔ nɛɛ he nɔkwɛmɔnii etɛ komɛi.

•   Rut kɛ Naomi. No mli lɛ, Rut shaayoo ji Naomi, ni ekã shi faŋŋ akɛ Naomi ye Rut onukpa kwraa. Agbɛnɛ hu esoro maŋ nɔ ni Rut jɛ, ni esoro ekusum hu yɛ Naomi nɔ lɛ he. Srɔtoi nɛɛ fɛɛ sɛɛ lɛ, amɛtsɔmɔ nanemɛi kpaakpa ni jie suɔmɔ kpo amɛtsɔɔ amɛhe.​—Rut 1:16.

•   David kɛ Yonatan. Eyɛ mli akɛ Yonatan ye David onukpa aaafee afii 30 moŋ, shi Biblia lɛ kɛɛ akɛ “Yonatan kɛ David batsɔmɔ nanemɛi kpaakpa.”​—1 Samuel 18:1.

•   Yesu kɛ ebɔfoi lɛ. No mli lɛ, Yesu yɛ hegbɛ yɛ ekaselɔi 12 lɛ anɔ, ejaakɛ eji amɛtsɔɔlɔ kɛ amɛnuŋtsɔ. (Yohane 13:13) Shi enaaa amɛ akɛ mɛi ni enyɛŋ ekɛ amɛ abɔ naanyo. Moŋ lɛ, Yesu kɛ mɛi ni bo nibii ni etsɔɔ amɛ lɛ toi ni amɛkɛtsu nii lɛ bɔ kpaakpa. Ewie akɛ: “Mitsɛɛɛ nyɛ nyɔji dɔŋŋ, ejaakɛ nyɔŋ leee nɔ ni enuŋtsɔ feɔ. Shi miitsɛ nyɛ nanemɛi, ejaakɛ nibii fɛɛ ni minu yɛ mi-Tsɛ naa lɛ, mihã nyɛle.”​—Yohane 15:14, 15.

 Hɛɛ, adesai baanyɛ amɛkɛ Nyɔŋmɔ abɔ naanyo. Biblia lɛ kɛɛ: “Mɔ ni ja lɛ, lɛ [Nyɔŋmɔ kɛbɔɔ] naanyo.” (Abɛi 3:32) Enɛ tsɔɔ akɛ, Nyɔŋmɔ kɛ mɛi ni bɔɔ mɔdɛŋ amɛhiɔ shi yɛ hetsemɔ mli, amɛyeɔ anɔkwa, amɛjieɔ bulɛ kpo, ni nakai beiaŋ nɔŋŋ lɛ, amɛbɔɔ mɔdɛŋ amɛhiɔ shi yɛ eshishitoo mlai ni kɔɔ nɔ ni ja kɛ nɔ ni ejaaa he lɛ anaa lɛ bɔɔ naanyo. Akɛ nɔkwɛmɔnɔ lɛ, atsɛ nuu anɔkwafo Abraham akɛ Nyɔŋmɔ naanyo yɛ Biblia lɛ mli.​—2 Kronika 20:7; Yesaia 41:8; Yakobo 2:23.