Mɔ fɛɛ mɔ yɛ egbɛ́i. Aso ebafeŋ nɔ ni nilee yɔɔ mli akɛ Nyɔŋmɔ hu baaná gbɛ́i? Mɔ ko gbɛ́i ni akɛtsɛɔ lɛ lɛ he hiaa waa yɛ adesai asa teŋ. Ani esa akɛ no afee srɔto yɛ wɔkɛ Nyɔŋmɔ teŋ naanyobɔɔ lɛ he?

 Nyɔŋmɔ kɛɔ yɛ Biblia lɛ mli akɛ: “Mi ji Yehowa. Migbɛi ji no.” (Yesaia 42:8) Eyɛ mli akɛ eyɛ gbɛnaa gbɛ́i babaoo tamɔ “Nyɔŋmɔ Ofe,” “Jeŋ Muu Fɛɛ Nuŋtsɔ,” kɛ “Bɔlɔ” moŋ, kɛ̃lɛ eŋɔ hegbɛ lɛ ehã mɛi ni jáa lɛ lɛ koni amɛkɛ egbɛ́i lɛ atsɛ lɛ.—1 Mose 17:1; Bɔfoi lɛ Asaji 4:24; 1 Petro 4:19.

 Anaa Nyɔŋmɔ diɛŋtsɛ gbɛ́i lɛ Biblia shishitsɔɔmɔi babaoo amli yɛ 2 Mose 6:3. Nakai ŋmalɛ lɛ kɛɔ akɛ: “Mijie mihe kpo mitsɔɔ Abraham kɛ Isak kɛ Yakob akɛ Nyɔŋmɔ Ofe lɛ; shi migbɛi Yehowa lɛ mihako amɛle no.”

 Yehowa ji gbɛ́i ni akɛtsɛɔ Nyɔŋmɔ yɛ Ga wiemɔ mli, ni akɛ gbɛ́i nɛɛ etsu nii afii ohai komɛi. Eyɛ mli akɛ woloŋlelɔi babaoo sumɔɔ ni amɛtsɛ lɛ “Yahweh” moŋ, shi Yehowa ji gbɛ́i ni ehé shi waa. Aŋma Biblia lɛ klɛŋklɛŋ fã lɛ yɛ Hebri wiemɔ mli, jeee Blɔfo, ni akaneɔ Hebri niŋmai lɛ kɛjɛɔ ninejurɔgbɛ kɛbaa abɛkugbɛ. Yɛ nakai Hebri wiemɔ mli lɛ, akɛ niŋmaa okadii ejwɛ ni ji יהוה damɔɔ shi ahãa Nyɔŋmɔ gbɛ́i lɛ. Atsɛɔ nakai Hebri niŋmaa okadii ejwɛ—ni afɔɔ shishitsɔɔmɔ akɛ YHWH—lɛ akɛ Tetragrammaton.