Akɛmaje Hebribii Lɛ 2:1-18
2 No hewɔ ni esa akɛ wɔkɛ wɔjwɛŋmɔ ama nibii ni wɔnuɔ lɛ anɔ jogbaŋŋ fe bɔ ni wɔfeɔ daa lɛ,+ koni wɔkaje hemɔkɛyeli lɛ he kɔkɔɔkɔ.+
2 Ejaakɛ kɛ́ wiemɔ ni atsɔ ŋwɛibɔfoi anɔ awie+ lɛ ma shi shiŋŋ, ni akɛ toigbalamɔ ni ja hã yɛ mlatɔmɔ fɛɛ mlatɔmɔ kɛ toigbele fɛɛ toigbele he lɛ,+
3 te wɔbaafee tɛŋŋ wɔjo toigbalamɔ naa foi kɛji wɔku wɔhiɛ wɔfɔ̃ nɛkɛ yiwalaheremɔ kpele nɛɛ nɔ?+ Ejaakɛ wɔ-Nuŋtsɔ lɛ nɔ atsɔ abɔi he wiemɔ,+ ni mɛi ni nu nɔ ni ewie lɛ hu ma nɔ mi amɛhã wɔ,
4 ni Nyɔŋmɔ hu kɛ okadii kɛ naakpɛɛ nii kɛ hewalɛ nitsumɔi srɔtoi+ kɛ mumɔ krɔŋkrɔŋ lɛ ni eja ehã yɛ esuɔmɔ naa+ lɛ hu miiye odase miishi nɔ.
5 Ejaakɛ jeee ŋwɛibɔfoi eto akɛ amɛye jeŋ* ni baaba,+ ni wɔwieɔ he lɛ nɔ.
6 Shi odasefonyo ko wie yɛ he ko akɛ: “Mɛni ji gbɔmɔ ni ojwɛŋɔ ehe, aloo gbɔmɔ bi hu, ni ogbaa ohe naa yɛ ehe?+
7 Shwɛ fioo ni ohã ekɛ ŋwɛibɔfoi fee pɛpɛɛpɛ; okɛ anunyam kɛ woo efi lɛ akekere, ni owó lɛ oto oninenaa nitsumɔi lɛ anɔ.
8 Okɛ nibii fɛɛ ewo enajiashi.”+ Kɛ́ akɛɛ Nyɔŋmɔ kɛ nibii fɛɛ ewo eshishi lɛ,+ etsɔɔ akɛ, nɔ ko nɔ ko bɛ ni ekɛwooo eshishi.+ Shi amrɔ nɛɛ, wɔnaaa akɛ nibii fɛɛ yɛ eshishi.+
9 Shi wɔnaa Yesu, mɔ ni aba lɛ shi fioo fe ŋwɛibɔfoi+ lɛ ni amrɔ nɛɛ akɛ anunyam kɛ woo efi lɛ akekere, ejaakɛ ena amanehulu kɛtee gbele mli+ koni yɛ Nyɔŋmɔ dromɔ naa lɛ esa enaa gbele ehã mɔ fɛɛ mɔ.+
10 Akɛni Nyɔŋmɔ, mɔ hewɔ ni nibii fɛɛ yɔɔ kɛ mɔ nɔ ni nibii fɛɛ tsɔ kɛba lɛ kɛ bii babaoo miiba anunyam mli hewɔ lɛ,+ esa jogbaŋŋ akɛ, ehã amɛyiwalaheremɔ lɛ Hiɛnyiɛlɔ-Nukpa+ lɛ atsɔ amanehului amli koni eye emuu.+
11 Akɛni mɔ ni feɔ mɛi krɔŋkrɔŋ lɛ kɛ mɛi ni afeɔ amɛ krɔŋkrɔŋ lɛ fɛɛ+ jɛ mɔ kome mli hewɔ lɛ,+ efeee lɛ hiɛgbele akɛ ebaatsɛ amɛ nyɛmimɛi,+
12 tamɔ bɔ ni ekɛɛ akɛ: “Majaje ogbɛ́i lɛ matsɔɔ minyɛmimɛi lɛ; malá majie oyi yɛ asafo lɛ teŋ.”+
13 Kɛ agbɛnɛ hu: “Mikɛ mihiɛ baafɔ̃ enɔ.”+ Ni agbɛnɛ hu: “Naa! Mi kɛ bii bibii ni Yehowa* ehã mi lɛ.”+
14 No hewɔ lɛ, akɛni “bii bibii” lɛ hiɛ heloo kɛ lá hewɔ lɛ, lɛ hu ekɔ no nɔŋŋ eko tamɔ amɛ,+ koni etsɔ egbele lɛ nɔ ekpãtã mɔ ni baanyɛ agbe mɔ,+ ni ji Abonsam lɛ hiɛ,+
15 koni ehã mɛi ni yɛ amɛwala be fɛɛ mli lɛ, gbele gbeyei ni amɛsheɔ lɛ hewɔ lɛ amɛtsɔmɔ nyɔji amɛhã nakai gbeyeishemɔ lɛ, aye amɛhe.+
16 Ejaakɛ yɛ anɔkwale mli lɛ, jeee ŋwɛibɔfoi eyeɔ ebuaa lɛ, shi moŋ eeye eebua Abraham seshi* lɛ.+
17 No hewɔ lɛ, ehe bahia ni etsɔ tamɔ ‘enyɛmimɛi’ lɛ yɛ nibii fɛɛ mli,+ koni etsɔ osɔfonukpa mɔbɔnalɔ kɛ anɔkwafo yɛ nibii ni kɔɔ Nyɔŋmɔ he lɛ amli, bɔ ni afee ni ekɛ kpatamɔ afɔle*+ ahã yɛ mɛi lɛ ahe eshai lɛ hewɔ.+
18 Ni akɛni lɛ diɛŋtsɛ lɛ, be ni akaa lɛ akwɛɔ lɛ ena amanehulu hewɔ lɛ,+ enyɛɔ eyeɔ ebuaa mɛi ni aaka amɛ aakwɛ lɛ.+
Shishigbɛ Niŋmaa
^ Loo “shikpɔŋ ni mɛi baahi nɔ.”
^ Kwɛmɔ Saji Krokomɛi A5 lɛ.
^ Greek sht. ŋm., “dumɔwu.”
^ Loo “afɔle ni akɛsaa gbɔmɛi kɛ Nyɔŋmɔ teŋ.”
