Hiob 20:1-29
20 Zofar,+ Naamanyo lɛ, jie naa akɛ:
2 “Enɛ hewɔ ni mi diɛŋtsɛ mijwɛŋmɔi ní haoɔ mi lɛ tsirɛɔ mi ní majie naa lɛEjaakɛ mihao waa.
3 Minu ni aawie wiemɔ ko akɛ akɛmiijaje mi, shi jɛ moŋ akɛjɛɔ mi lɛ;Ni miniiashishinumɔ* tsirɛɔ mi ní majie naa.
4 Ekã shi faŋŋ akɛ, ole enɛ kɛjɛ teteete,Ejaakɛ nakai eji kɛjɛ be ni aŋɔ gbɔmɔ* ato shikpɔŋ lɛ nɔ lɛ,+
5 Akɛ mɛi fɔji anyamɔ sɛɛ etsɛɛɛ,Ni mɛi ni ebuuu Nyɔŋmɔ* lɛ amiishɛɛnamɔ lɛ yeɔ hiŋmɛitswaa kɛkɛ.+
6 Eyɛ mli akɛ egbojee lɛ kwɔɔ kɛyaa ŋwɛiNi eyitso shɛɔ atatuiaŋ moŋ,
7 Shi ehiɛ baakpãtã kɛya naanɔ tamɔ lɛ diɛŋtsɛ efei;Mɛi ni tsutsu lɛ amɛnaa lɛ lɛ baakɛɛ akɛ, ‘Nɛgbɛ lɛ yɔɔ?’
8 Ebaafiliki kɛya tamɔ lamɔ, ni amɛnaŋ lɛ;Abaawo lɛ foi ni ebaaya tamɔ nyɔɔŋ mli ninaa.
9 Hiŋmɛi ni na lɛ be ko ni eho lɛ, enaŋ lɛ dɔŋŋ,Ni eshihilɛhe lɛ enaŋ lɛ dɔŋŋ.+
10 Ebii baatao ohiafoi ahiɛ dromɔ,Ni lɛ diɛŋtsɛ eniji kɛ nii ni ená lɛ baaku sɛɛ ahã.+
11 Ewuiaŋ eyi obɔ kɛ oblahiiaŋ hewalɛ,Shi ekɛ* lɛ baayakã shi yɛ sũ* mli.
12 Kɛji nɔ fɔŋ ŋɔɔ dɔkɔdɔkɔ yɛ edaaŋ,Ni ekɛteɔ elilɛi shishi,
13 Kɛji elɛteɔ he ni eŋmɛɛɛ heShi moŋ, eyaa nɔ ehãa ehiɔ edaaŋ lɛ,
14 No lɛ, eniyenii baajoo yɛ emli;Ebaatsɔ tamɔ blikãi apɔizin* yɛ emli.
15 Emi ninámɔ, shi ebaashwe eshwie shi;Nyɔŋmɔ baajie fɛɛ kɛjɛ emusuŋ eshwie shi.
16 Ebaashɔ blikãi apɔizin;Onufu ni pɔizin yɔɔ emli nyanyɔji* baagbe lɛ.
17 Enaŋ fai ni hoɔ,Hɛɛ, wo kɛ bɔta ni hoɔ babaoo lɛ kɔkɔɔkɔ.
18 Ekɛ enibii baaku sɛɛ ahã ní eyeee eko;*Eyeŋ nii ni ená yɛ ejarayeli mli lɛ mli ŋɔɔmɔ.+
19 Ejaakɛ ekumɔɔ ohiafoi dukuduku, ni ekpoɔ amɛ;Eshɔ̃ɔ shĩa ní jeee lɛ ema.
20 Shi enáŋ toiŋjɔlɛ;Nii ni ená lɛ yeŋ ebuaŋ lɛ ní eje mli.
21 Nɔ ko nɔ ko eshwɛŋ hãŋ lɛ ni ebaami;No hewɔ ni nii ni ená lɛ sɛɛ etsɛŋ lɛ.
22 Kɛ́ ená nii kpɔtɔɔ po lɛ, ebaaye etsui;Nibii gbohii fɛɛ baaba enɔ.
23 Be ni ewoɔ emusu obɔ lɛ,Nyɔŋmɔ baahã* emlifu ni naa wa lɛ aba enɔ,Ebaahã enɛ eshwie enɔ kɛbote emlinii amli.
24 Kɛji ejo dade tawuu nii anaa foi lɛ,Gãimlibii ni akɛ akɔɔble gãi tsɛ̃rɛ̃ baagbulɔ lɛ.
25 Efãa gãimlibi yɛ esɛɛ,Efãa tawuu nii ni kpɛlɛɔ kaŋkaŋ kɛjɛɔ edɔrɔ* mli,Ni ŋmiŋmi mɔɔ lɛ.+
26 Duŋ kpii diɛŋtsɛ miimɛ ejwetrii;La ni jeee mɔ ko mɔ ko huu baashã lɛ;Amanehulu miimɛ mɛi fɛɛ ni baashwɛ yɛ emama tsũ lɛ mli lɛ.
27 Ŋwɛi baajie etɔmɔ kpo;Shikpɔŋ lɛ baate shi awo lɛ.
28 Nu afua baaloo eshĩa kɛya;Ebaaho boboobo yɛ Nyɔŋmɔ mlifu* gbi lɛ nɔ.
29 Enɛ ji mɔ fɔŋ gbɛfaŋnɔ ni jɛ Nyɔŋmɔ ŋɔɔ,Gboshinii ni Nyɔŋmɔ eto ehã lɛ.”
Shishigbɛ Niŋmaa
^ Hebri sht. ŋm., “mumɔ ko ni jɛ miniiashishinumɔ mli.”
^ Loo “adesa; Adam.”
^ Loo “mɛi ni ekwa Nyɔŋmɔ.”
^ Ni ji, eblahiiaŋ hewalɛ lɛ.
^ Hebri sht. ŋm., “mulu.”
^ Loo “adɔrɔ.”
^ Hebri sht. ŋm., “lilɛi.”
^ Hebri sht. ŋm., “ni emiŋ.”
^ Hebri sht. ŋm., “Ebaahã.”
^ “Dɔrɔ” ni awieɔ he yɛ biɛ lɛ ji nɔ ni kpɛtɛ kooloi komɛi kɛ gbɔmɛi amlɛbo he ní joɔ waa lɛ.
^ Hebri sht. ŋm., “yɛ emlifu.”
