Lalai 139:1-24
Kɛhã lalatsɔɔlɔ lɛ. Lala ni afo. David nɔ.
139 Ao Yehowa, otao mimli, ni ole mi.+
2 Ole mishitamɔ kɛ mishitee fɛɛ.+
Onaa misusumɔi yɛ shɔŋŋ.+
3 Okwɛɔ* migbɛfaa kɛ mishikamɔ fɛɛ;Ole migbɛi lɛ fɛɛ.+
4 Dani wiemɔ ko baaba mililɛi nɔ lɛ,Naa! Bo Yehowa, ole momo.+
5 Obɔle mi yɛ misɛɛ kɛ mihiɛ fɛɛ;Ni okɛ onine efɔ̃ minɔ.
6 Nilee nɛɛ ji nɔ ni mijwɛŋmɔ shɛɛɛ he lɛ.*
Enɔ kwɔ kwraa fe bɔ ni manyɛ mashɛ he.*+
7 Nɛgbɛ manyɛ majo omumɔ lɛ naa foi kɛya,Ni nɛgbɛ manyɛ majo foi yɛ ohiɛ kɛya?+
8 Kɛ́ mikwɔ kɛtee ŋwɛi lɛ, oyɛ jɛmɛ,Ni kɛ́ miyaŋmɛ misaa yɛ Gbonyobu* lɛ mli po lɛ, naa! oyɛ jɛmɛ.+
9 Kɛ́ mikɛ jetsɛremɔ fiji filikiKoni miyahi ŋshɔ ni kã shi yɛ shɔŋŋ lɛ sɛɛ lɛ,
10 Jɛmɛ po, onine baatsɔɔ mi gbɛ,Ni oninejurɔ baahiɛ mimli.+
11 Kɛ́ mikɛɛ akɛ: “Bɔ fɛɛ bɔ ni fee lɛ, duŋ baaha minɔ!” lɛ,
No lɛ, nyɔɔŋ ni ebɔle mi lɛ baatsɔ la.
12 Duŋ lɛ po mli woŋ duŋ kɛhãŋ bo,Shi moŋ, nyɔɔŋ lɛ baatse heŋŋ tamɔ jetsɛremɔ;+Duŋ tamɔ la nɔŋŋ kɛhã bo.+
13 Ejaakɛ bo ofee misabai lɛ;Ni okɛ afabaŋ fo mihe* yɛ minyɛ musuŋ.+
14 Mijieɔ oyi ejaakɛ ofee mi yɛ gbɛ ni yɔɔ gbeyei kɛ naakpɛɛ nɔ.+
Onitsumɔi lɛ yɛ naakpɛɛ,+Ni mile* enɛ jogbaŋŋ.
15 Akɛ miwui lɛ eteee boBe ni afee mi yɛ teemɔŋ,Be ni ashɔ̃ mi yɛ shikpɔŋ lɛ shishi tɔ̃ɔ lɛ.+
16 Be ni aŋɔ mi hɔ beebe lɛ, ohiŋmɛii na mi;Aŋmala ehe nibii lɛ fɛɛ yɛ owolo lɛ mli—Gbii ni ashɔ̃ amɛ—Dani amɛteŋ eko fɛɛ eko ba shihilɛ mli.
17 No hewɔ lɛ, osusumɔi lɛ ajara wa yɛ mihiɛ!+
Ao Nyɔŋmɔ, amɛyi fa waa akɛ nɔ ko!+
18 Kɛ́ mika akɛ makane lɛ, amɛyi fa kwraa fe ŋshɔnaa shia.+
Kɛ́ mihiɛ tsɛ̃ lɛ, miyɛ omasɛi lolo.*+
19 Ao Nyɔŋmɔ, miná kulɛ ogbe mɛi fɔji lɛ!+
Kulɛ mɛi ni yeɔ awui* lɛ baaje mihe kɛya,
20 Mɛi ni wieɔ amɛshiɔ bo kɛ jwɛŋmɔ fɔŋ lɛ;*Amɛji ohenyɛlɔi ni kɛ ogbɛ́i lɛ tsuɔ nii yɛ gbɛ ni esaaa nɔ lɛ.+
21 Ao Yehowa, ani minyɛɛɛ mɛi ni nyɛɔ bo lɛ?+Ni minyaŋeee mɛi ni teɔ shi amɛwoɔ bo lɛ?+
22 Minyɛɔ amɛ waa diɛŋtsɛ;+Amɛtsɔmɔ mihenyɛlɔi diɛŋtsɛ.
23 Ao Nyɔŋmɔ, taomɔ mimli, ni ole mitsui.+
Pɛimɔ mimli, ni ole susumɔi ni gbaa minaa* lɛ fɛɛ.+
24 Kwɛmɔ kɛji gbɛ fɔŋ ko yɛ mimli,+Ni otsɔɔ mi gbɛ+ kɛya naanɔ gbɛ lɛ nɔ.
Shishigbɛ Niŋmaa
^ Hebri sht. ŋm., “Osusuɔ.”
^ Loo “ji nɔ ni feɔ mi naakpɛɛ waa lɛ.”
^ Loo “bɔ ni manyɛ manu shishi.”
^ Hebri mli lɛ, “Sheol,” ni ji, mfonirifeemɔŋ gbonyobu kome kɛhã adesai. Kwɛmɔ Wiemɔi Titrii Amligbalamɔ lɛ.
^ Shishitsɔɔmɔi komɛi kɛɔ akɛ, “Ni oshɔ̃ mi.”
^ Loo “Ni misusuma le.”
^ Shishitsɔɔmɔi komɛi kɛɔ akɛ, “maya nɔ makane amɛ.”
^ Loo “mɛi ni shwieɔ lá shi.”
^ Loo “amɛshiɔ bo yɛ amɛsusumɔ naa lɛ.”
^ Loo “ni ole nɔ ni haoɔ mi.”
