Yesaia 49:1-26
49 Nyɛ ŋshɔkpɔi, nyɛboa mi toi,Nyɛ jeŋmaji ni yɔɔ shɔŋŋ, nyɛboa toi jogbaŋŋ.+
Yehowa tsɛ mi dani afɔ mi.*+
Be ni miyɔɔ minyɛ musu mli beebe ni etsɛ migbɛ́i.
2 Ehã minaabu etsɔ tamɔ klante ni naa ba;Ekɛ mi eto enine shishi hɔɔŋ lɛ mli.+
Ehã mitsɔ tamɔ gãimlibi ni asha he;Ekɛ mi eto egãimlibii kotoku lɛ mli.
3 Ekɛɛ mi akɛ: “Bo Israel, mitsulɔ ji bo,+Matsɔ onɔ majie minunyam lɛ kpo.”+
4 Shi mikɛɛ akɛ: “Etɔ mi efolo.
Mifite mihewalɛ efolo yɛ nɔ ko ni bɛ shihilɛ mli lɛ he.
Shi Yehowa ji mɔ ni kojoɔ mi lɛɛlɛŋ,*Ni mi-Nyɔŋmɔ lɛ ji mɔ ni woɔ mi nyɔmɔ.”*+
5 Ni agbɛnɛ Yehowa, mɔ ni shɔ̃ mi yɛ musu mli akɛ etsulɔ lɛ,Ekɛɛ mi koni miyamɔ Yakob kɛbahã lɛ,Bɔ ni afee ni abua Israel naa kɛba eŋɔɔ.+
Abaawo mihiɛ nyam yɛ Yehowa hiɛ,Ni mi-Nyɔŋmɔ lɛ baatsɔ mihewalɛ.
6 Ni ekɛɛ akɛ: “Jeee akɛ mitsulɔ kɛkɛ ji boKoni otee Yakob wekui lɛ ashiNi okɛ Israelbii ni abaa amɛyi lɛ aku sɛɛ kɛba.
Shi moŋ, misaa mifee bo la mihã jeŋmaji lɛ,+Koni miyiwalaheremɔ lɛ ashɛ shikpɔŋ lɛ naagbeehei lɛ.”+
7 Nɔ ni Yehowa, Israel Kpɔ̃lɔ lɛ, Israel Mɔ Krɔŋkrɔŋ+ lɛ kɛɔ mɔ ni anyaŋeɔ,*+ mɔ ni jeŋmaŋ lɛ nyaŋeɔ, nɔyelɔi lɛ atsulɔ lɛ nɛ:
“Maŋtsɛmɛi baana ni amɛbaate shi,Ni lumɛi baakula shiYɛ Yehowa, mɔ ni yeɔ anɔkwa,+Israel Mɔ Krɔŋkrɔŋ lɛ, mɔ ni hala bo lɛ hewɔ.”+
8 Nɔ ni Yehowa kɛɛ nɛ:
“Mihere bo nɔ yɛ dromɔ be* mli,+Ni miye mibua bo yɛ yiwalaheremɔ gbi nɔ;+Mitee nɔ mikwɛ onɔ koni mikɛ bo ahã akɛ maŋ lɛ kpaŋmɔ,+Koni osaa shikpɔŋ lɛ,Koni ohã amɛnine ashɛ amɛgboshinii ni akpãtã hiɛ lɛ anɔ,+
9 Koni okɛɛ mɛi ni awo amɛ tsuŋ lɛ akɛ, ‘Nyɛjea kpo!’+
Kɛ mɛi ni yɔɔ duŋ mli lɛ hu akɛ,+ ‘Nyɛhãa anaa nyɛ!’
Amɛbaaye nii yɛ gbɛi ahe,Nanegbɛi ni nɔ eye lɛ* baatsɔ amɛkooloi alɛɛhei.
10 Hɔmɔ yeŋ amɛ, ni kumai hu yeŋ amɛ,+Amɛnuŋ dɔlɛ ni naa wa ko he dɔŋŋ, ni hulu hu eshãŋ amɛ.+
Ejaakɛ mɔ ni ena amɛ mɔbɔ lɛ baanyiɛ amɛhiɛ,+Ni ebaatsɔɔ amɛ gbɛ kɛyatsɔ nuhiŋmɛii ahe.+
11 Mafee migɔji lɛ fɛɛ gbɛi,Ni abaahole migbɛjegbɛi lɛ anɔ.+
12 Naa! Amɛmiijɛ shɔŋŋ kɛmiiba,+Ni naa! amɛjɛ kooyi ni amɛjɛ anai,Ni mɛi komɛi hu jɛ Sinim shikpɔŋ lɛ nɔ.”+
13 Nyɛ ŋwɛii, nyɛláa nyamɔ lala, ni bo shikpɔŋ, omii ashɛ ohe.+
Gɔji lɛ amii ashɛ amɛhe ni amɛlá nyamɔ lala.+
Ejaakɛ Yehowa eshɛje emaŋ lɛ mii,+Ni ena lɛ diɛŋtsɛ ewebii ni naa nɔ lɛ mɔbɔ.+
14 Shi Zion yaa nɔ ekɛɔ akɛ:
“Yehowa ekwa mi,+ ni Yehowa hiɛ ekpa minɔ.”+
15 Ani yoo hiɛ baanyɛ akpa ebi ni miiye fufɔ nɔ?Ani emusuŋ etsɔŋ lɛ yɛ emusuŋ bi* he?
Kɛ́ yei nɛɛ ahiɛ baakpa nɔ po lɛ, mi lɛ, mihiɛ kpaŋ onɔ kɔkɔɔkɔ.+
16 Naa! Mitɛŋ bo miwo midɛ̃.
Ogbogboi lɛ yɛ mihiɛ daa.
17 Obii* lɛ ahe baafee oya kɛba.
Mɛi ni kumɔ bo amɛshwie shi, ni amɛkpãtã ohiɛ lɛ baashi bo aya.
18 Holemɔ ohiŋmɛii anɔ ni okwɛ ohe fɛɛ kɛkpe.
Amɛ fɛɛ amɛmiibua amɛhe naa.+
Amɛmiiba oŋɔɔ.
“Gbii abɔ ni mihiɛ kã nɛɛ,” Yehowa kɛɛ,“Okɛ amɛ fɛɛ baawula ohe tamɔ hewulamɔnii,Ni okɛ amɛ baafi omli tamɔ ayemforo feɔ lɛ.
19 Eyɛ mli akɛ akpãtã oshihilɛhei lɛ ahiɛ, ni ashi amɛ amaŋfɔ ni oshikpɔŋ lɛ efite moŋ,+Shi agbɛnɛ jɛmɛ baafee bibioo tsɔ ahã mɛi ni yɔɔ jɛmɛ lɛ,+Ni okɛ mɛi ni mi bo+ lɛ ateŋ baajekɛ waa.+
20 Bii* ni afɔ ahã bo be ni agbo yɛ onɔ lɛ baakɛɛkɛɛ yɛ otoiiaŋ akɛ,‘Biɛ efee bibioo tsɔ kɛhã mi.
Tsi kɛya koni maná he ko mahi.’+
21 Ni obaakɛɛ yɛ otsui mli akɛ,‘Namɔ fɔ mɛnɛɛmɛi ehã mi,Ejaakɛ miji yoo ni bii egboi ni nyɛɛɛ afɔ,Aŋɔ mi nom ni awo mi tsuŋ.
Namɔ kwɛ mɛnɛɛmɛi?+
Naa! Eshwɛ mikome too,+No hewɔ lɛ, nɛgbɛ mɛnɛɛmɛi jɛ kɛba?’”+
22 Nɔ ni Nuŋtsɔ Ofe Yehowa kɛɛ nɛ:
“Naa! Mawó minine nɔ matsɔɔ jeŋmaji lɛ,Ni mawó mikadi* lɛ nɔ matsɔɔ majimaji lɛ.+
Amɛkɛ obihii lɛ baashãkã amɛtsitsi kɛbaabaNi amɛbaahole obiyei lɛ amɛtara amɛkɔɔji anɔ kɛba.+
23 Maŋtsɛmɛi baatsɔmɔ okwɛlɔi,+Ni amɛbiyei* lɛ baakwɛ obii ni miiye fufɔ lɛ.
Amɛbaakoto bo ni amɛkɛ amɛhiɛ baabumɔ shi+Ni amɛbaalɛmɔ onaji ahe mulu lɛ,+Ni obaaná ole akɛ miji Yehowa;Mɛi ni hiɛ kã minɔ lɛ ahiɛ gboiŋ.”+
24 Ani abaanyɛ ashɔ̃ mɛi ni nuu kãkãlɔ emɔmɔ amɛ momo lɛ yɛ edɛŋ?Ani abaanyɛ akpɔ̃ mɛi ni yiwalɔ ko eŋɔ amɛ nom lɛ?
25 Shi nɔ ni Yehowa kɛɛ nɛ:
“Abaashɔ̃ mɛi ni nuu kãkãlɔ emɔmɔ amɛ momo lɛ po yɛ edɛŋ,+Ni abaakpɔ̃ mɛi ni yiwalɔ ko eŋɔ amɛ nom lɛ.+
Mate shi mawo mɛi ni teɔ shi amɛwoɔ bo lɛ,+Ni mahere bo diɛŋtsɛ obii* lɛ.
26 Mahã mɛi ni waa bo yi lɛ aye amɛ diɛŋtsɛ amɛheloo,Ni mahã amɛ diɛŋtsɛ amɛlá atɔrɔ amɛ dãa tamɔ nɔ ni amɛnu wain ni ŋɔɔ.
Ni mɛi fɛɛ* baaná ale akɛ miji Yehowa,+O-Yiwalaherelɔ+ lɛ kɛ o-Kpɔ̃lɔ lɛ,+Yakob Hewalɔ lɛ.”+
Shishigbɛ Niŋmaa
^ Hebri sht. ŋm., “tsɛ mi kɛjɛ musu mli.”
^ Loo “Yehowa baaye jalɛ sane ehã mi.”
^ Loo “ji mɔ ni jwereɔ mi.”
^ Loo “mɔ ni anyaŋeɔ esusuma.”
^ Loo “be kpakpa.”
^ Shishitsɔɔmɔi komɛi kɛɔ akɛ, “gɔŋkpɔi kpatai.”
^ Hebri sht. ŋm., “binuu.”
^ Hebri sht. ŋm., “Obihii.”
^ Hebri sht. ŋm., “Bihii.”
^ Loo “mitso jaŋŋ.”
^ Loo “amɛmaŋnyɛmɛi; amɛlumɛi yei.”
^ Hebri sht. ŋm., “obihii.”
^ Hebri sht. ŋm., “heloo fɛɛ.”
