1, 2. Mɛni hewɔ ehe miihia ni wɔsusu bɔ ni wɔbaafee wɔye wɔbua mɛi ni nɔ enyɔ amɛhiŋmɛi mli lɛ he? (Kwɛmɔ mfoniri ni yɔɔ nikasemɔ lɛ shishijee lɛ.)

NYƐMI yoo ko ni atsɛɔ lɛ Susi lɛ wie akɛ: “Be ni wɔbinuu lɛ gbo lɛ, aaafee afi fɛɛ ni eedɔ wɔ waa lolo.” Nyɛmi nuu kroko hu wie akɛ, be ni eŋa gbo trukaa lɛ, “ehewojiaŋ fɛɛ wa ehe waa bɔ ni enyɛŋ mli etsɔɔ.” Dɔlɛ sane ji akɛ, mɛi pii kɛ shihilɛ ni jaraa nɛɛ ekpe. Nyɛmimɛi pii yɛ ni amɛkpaaa gbɛ kwraa akɛ amɛhefatalɔi baagboi dani Harmagedon baaba. Kɛ́ bo loo mɔ ko ni ole lɛ suɔlɔ egbo lɛ, ekolɛ obaabi ohe akɛ, ‘Mɛni abaanyɛ afee kɛye abua mɛi ni yeɔ awerɛho lɛ?’

² Afɔɔ kɛɛmɔ akɛ tsɛlɛ gbeɔ dɔlɛ. Shi ani be fɛɛ be sane nɛɛ ji anɔkwale? Yoo okulafo ko wie akɛ: “Mina akɛ nɔ moŋ ni esa akɛ wɔwie ji, nɔ ni mɔ kɛ ebe feɔ lɛ ji nɔ ni yeɔ ebuaa kɛgbeɔ dɔlɛ lɛ.” Etamɔ fala, ja ato nɔ dani fiofio lɛ ebaagbo. No hewɔ lɛ, mɛɛ nibii baanyɛ aye abua mɛi ni agbo yɛ amɛnɔ lɛ koni amɛkaye awerɛho tuutu?

3, 4. Mɛni hewɔ wɔbaanyɛ wɔná nɔmimaa akɛ kɛ́ wɔsuɔlɔ ko gbo ni wɔmiiye awerɛho lɛ, Yehowa nuɔ wɔ shishi lɛ?

³ Yehowa, ni ji wɔ-Tsɛ ni yɔɔ ŋwɛi ni yɔɔ musuŋtsɔlɛ lɛ, ji mɔ  titri ni shɛjeɔ wɔmii. (Kanemɔ 2 Korintobii 1:3, 4.) Mɔ ko bɛ ni nuɔ he ehãa wɔ ni enaa wɔ mɔbɔ fe Yehowa. Ekɛɛ ewebii lɛ akɛ: “Mi, mi ji nyɛmiishɛjelɔ.”​—Yes. 51:12; Lala 119:50, 52, 76.

⁴ Yehowa, ni ji musuŋtsɔlɛi a-Tsɛ lɛ, hu suɔlɔi egboi pɛŋ. Amɛteŋ mɛi komɛi ji Abraham, Isak, Yakob, Mose, kɛ Maŋtsɛ David. (4 Mose 12:6-8; Mat. 22:31, 32; Bɔf. 13:22) Nyɔŋmɔ Wiemɔ lɛ hãa wɔleɔ akɛ, Yehowa baatee anɔkwafoi nɛɛ ashi, ni eekpa nakai be lɛ gbɛ waa. (Hiob 14:14, 15) Amɛmii baashɛ amɛhe, ni amɛbaaná gbɔmɔtsoŋ hewalɛ kpakpa. Ani okaiɔ be ni Nyɔŋmɔ Bi ni esumɔɔ lɛ, mɔ ni ‘enáa ehe miishɛɛ waa’ lɛ, gbo musuŋshãa gbele lɛ? (Abɛi 8:22, 30, NWT) Be ni Yehowa na ni aagbe e-Bi lɛ, ŋwanejee ko bɛ he akɛ edɔ lɛ waa; edɔ lɛ waa fe bɔ ni wɔbaanyɛ wɔfee he mfoniri po.​—Yoh. 5:20; 10:17.

5, 6. Mɛɛ gbɛ nɔ Yehowa shɛjeɔ wɔmii?

⁵ Wɔbaanyɛ wɔná nɔmimaa akɛ, bɔ fɛɛ bɔ ni fee lɛ Yehowa baaye abua wɔ. No hewɔ lɛ, kɛ́ wɔmiiye awerɛho lɛ, esaaa akɛ wɔshashaoɔ shi kwraa akɛ wɔbaasɔle wɔhã lɛ, ni wɔfɔse wɔtsuiŋ saji fɛɛ wɔshwie ehiɛ. Le ni wɔle akɛ Yehowa nuɔ wɔ shishi ni eshɛjeɔ wɔmii be ni miishɛjemɔ he miihia wɔ waa lɛ hãa wɔnáa miishɛɛ! Shi mɛɛ gbɛ nɔ eshɛjeɔ wɔmii?

⁶ Gbɛ kome ni Nyɔŋmɔ tsɔɔ nɔ eshɛjeɔ wɔmii ji, kɛtsɔ mumɔ krɔŋkrɔŋ lɛ nɔ. (Bɔf. 9:31) Yesu wie akɛ, wɔ-Tsɛ ni yɔɔ ŋwɛi lɛ efee klalo akɛ ekɛ emumɔ krɔŋkrɔŋ ni yɔɔ hewalɛ waa lɛ ‘baahã mɛi fɛɛ ni biɔ lɛ’ lɛ. (Luka 11:13) Susi, ni wɔtsĩ etã kɛtsɔ hiɛ lɛ, wie akɛ: “Wɔkula shi wɔkpa Yehowa fai shii abɔ ni eshɛje wɔmii. Ni be ko bɛ ni wɔfee nakai ní wɔnuuu he akɛ Nyɔŋmɔ toiŋjɔlɛ lɛ miibu wɔtsuii kɛ wɔjwɛŋmɔi ahe.”​—Kanemɔ Filipibii 4:6, 7.

7, 8. Mɛni hewɔ wɔbaanyɛ wɔná nɔmimaa akɛ Yesu baashɛje wɔmii lɛ?

⁷ Be ni Yesu yɔɔ shikpɔŋ lɛ nɔ lɛ, ejie e-Tsɛ lɛ musuŋtsɔlɛ lɛ kpo yɛ gbɛ ni eye emuu nɔ, yɛ ewiemɔi kɛ enifeemɔi amli. (Yoh. 5:19) Yehowa tsu Yesu kɛba shikpɔŋ lɛ nɔ koni ebashɛje “mɛi ni amɛtsuii ekumɔ” kɛ mɛi fɛɛ ni ‘yeɔ ŋkɔmɔ’ lɛ amii. (Yes. 61:1, 2; Luka 4:17-21) Mɛi bale Yesu akɛ mɔ ko ni musuŋ tsɔɔ lɛ yɛ mɛi ahewɔ, ni miishwe waa akɛ eye ebua amɛ.​—Heb. 2:17.

⁸ Ŋwanejee ko bɛ he akɛ, be ni Yesu ji oblanyo fioo lɛ, ewekumɛi kɛ enanemɛi komɛi gboi. Eeenyɛ efee akɛ, Yosef, mɔ ni ŋɔ Yesu efee ebi lɛ, gbo be ni Yesu yɔɔ eblahiiaŋ lolo. * Bo lɛ feemɔ Yesu he mfoniri ni eye afii 24 loo nɔ ni shɛɛɛ nakai ni eeshɛje lɛ diɛŋtsɛ ehe, emami, kɛ enyɛmimɛi krokomɛi lɛ amii. Ekã shi faŋŋ akɛ, oblanyo ni susuɔ mɔ he nɛɛ náŋ lɛ mlɛo kwraa.

9. Be ni Lazaro gbo lɛ, mɛni Yesu fee ni tsɔɔ akɛ enuɔ he ehãa mɛi?

⁹ Be ni Yesu tsuɔ esɔɔmɔ nitsumɔ lɛ, ehã mɛi na akɛ esusuɔ amɛhe diɛŋtsɛ ni enuɔ he ehãa amɛ waa. Akɛ nɔkwɛmɔnɔ lɛ, be ni Lazaro, ni ji enaanyo ni esumɔɔ esane waa lɛ gbo lɛ, Yesu na akɛ gbele lɛ edɔ Maria kɛ Marta waa diɛŋtsɛ, ni amɛmiiye awerɛho. Anɔkwa, enu he ehã amɛ aahu akɛ, lɛ hu ebɔi yaafo, tsɛ ele akɛ etsɛŋ ebaatee Lazaro shi.​—Yoh. 11:33-36.

10. Mɛni hewɔ wɔbaanyɛ wɔná nɔmimaa akɛ Yesu nuɔ he ehãa wɔ lɛ?

 ¹⁰ Mɛɛ gbɛ nɔ nibii ni Yesu wie kɛshɛje mɛi amii yɛ blema lɛ baanyɛ aye abua wɔ ŋmɛnɛ? Ŋmalɛi lɛ feɔ lɛ faŋŋ akɛ, “Yesu Kristo lɛ, bɔ ni eyɔɔ nyɛ lɛ, nakai nɔŋŋ eyɔɔ ŋmɛnɛ, ni nakai nɔŋŋ eyɔɔ kɛmiiya naanɔ.” (Heb. 13:8) Lɛ ji “Hiɛnyiɛlɔ-Nukpa kɛhã wala.” Ele bɔ ni kɛ́ agbo yɛ mɔ ko nɔ lɛ, eyɔɔ dɔlɛ hã, ni “enyɛɔ eyeɔ ebuaa mɛi ni aaka amɛ lɛ.” (Bɔf. 3:15; Heb. 2:10, 18) No hewɔ lɛ, wɔbaanyɛ wɔná nɔmimaa akɛ, ŋmɛnɛ lɛ, kɛ́ wɔmiiye awerɛho lɛ, Kristo nuɔ he ehãa wɔ. Enuɔ wɔ shishi ni eshɛjeɔ wɔmii “yɛ be ni sa mli.”​—Kanemɔ Hebribii 4:15, 16.

11. Mɛɛ ŋmalɛi shɛjeɔ omii waa?

¹¹ Biblia mli sane ni hãa wɔleɔ bɔ ni Yesu ye awerɛho waa be ni Lazaro gbo lɛ shɛjeɔ wɔmii. Shi ŋmalɛi krokomɛi pii hu yɛ ni baanyɛ ashɛje wɔmii. Enɛ bɛ naakpɛɛ, “ejaakɛ nibii fɛɛ ni aŋma ato momo lɛ, aŋma koni etsɔɔ wɔ nii, koni kɛtsɔ wɔshifimɔ kɛ agbɛnɛ hu kɛtsɔ Ŋmalɛi lɛ amli miishɛjemɔ lɛ nɔ lɛ, wɔná hiɛnɔkamɔ.” (Rom. 15:4) Kɛ́ ooye awerɛho lɛ, ŋmalɛi tamɔ nɔ ni nyiɛ sɛɛ nɛɛ baanyɛ ashɛje omii waa:

• “Yehowa bɛŋkɛɔ mɛi ni tsuii ekumɔ lɛ, ni ehereɔ mɛi ni mumɔ tswiaa shi kɛ dɔlɛ lɛ.”​—Lala 34:19, 20.

• “Kɛ́ ŋkɔmɔyeli fa babaoo yɛ mimli lɛ, omiishɛjemɔi lɛ hãa misusuma mii shɛɔ ehe.”​—Lala 94:19.

• “Wɔ-Nuŋtsɔ Yesu Kristo diɛŋtsɛ kɛ Nyɔŋmɔ ni ji wɔ-Tsɛ lɛ, mɔ ni sumɔ wɔ ni etsɔ duromɔ lɛ nɔ ehã wɔ naanɔ miishɛjemɔ kɛ hiɛnɔkamɔ kpakpa lɛ, ashɛje nyɛtsuii amii ni ehã nyɛhe awa.”​—2 Tes. 2:16, 17. *

12. Mɛni ji gbɛ kome ni he hiaa waa ni wɔbaanyɛ wɔtsɔ nɔ wɔshɛje mɛi krokomɛi amii?

¹² Nyɛmimɛi ni yɔɔ Kristofoi asafo lɛ mli lɛ hu baanyɛ ashɛje mɛi ni nɔ enyɔ amɛhiŋmɛi mli lɛ amii. (Kanemɔ 1 Tesalonikabii 5:11.) Mɛni obaanyɛ ofee kɛwaje mɛi ni yeɔ ŋkɔmɔ lɛ ni oshɛje amɛmii? (Abɛi 17:22) Hã ehi ojwɛŋmɔ mli akɛ, “dioofeemɔ be yɛ, ni wiemɔ be yɛ.” (Jaj. 3:7) Yoo okulafo ko ni atsɛɔ lɛ Dalene lɛ wie akɛ: “Ehe miihia ni mɛi ni agbo yɛ amɛnɔ lɛ awie nibii ni amɛsusuɔ kɛ bɔ ni amɛnuɔ he amɛhãa lɛ he. No hewɔ lɛ, nɔ ni he hiaa fe fɛɛ ni obaanyɛ ofee ohã amɛ ji, ni obo amɛ toi ni okafolɔ amɛwiemɔ lɛ mli.” Nyɛmi yoo ko ni atsɛɔ lɛ Junia lɛ nyɛmi nuu gbe ehe. Nɔ ni ewie ji akɛ: “Eyɛ mli akɛ ekolɛ onyɛŋ onu bɔ ni sane lɛ edɔ amɛ ehã lɛ shishi jogbaŋŋ moŋ, shi mɔdɛŋ ni obɔɔ akɛ obaanu amɛ shishi lɛ ji nɔ ni he hiaa.”

13. Mɛni ehe miihia ni wɔhã ehi wɔjwɛŋmɔ mli yɛ awerɛhoyeli he?

¹³ Kaimɔ hu akɛ, esoro mɔ fɛɛ mɔ kɛ bɔ ni sane dɔɔ lɛ ehãa kɛ nibii ni efeɔ kɛtsɔɔ akɛ eeye awerɛho. Mɛi komɛi yɛ ni kɛ́ amɛmiiye awerɛho lɛ, ewa kɛhã amɛ akɛ amɛbaawie bɔ ni amɛnuɔ he amɛhãa yɛ amɛtsuiŋ tɔ̃ɔ lɛ he. Nyɔŋmɔ Wiemɔ lɛ kɛɔ akɛ: “Tsui le lɛ diɛŋtsɛ enidɔɔnii, ni emiishɛɛ hu, mɔ ko mɔ ko kɛ ehe wooo mli.” (Abɛi 14:10) Kɛ́ amɛwie bɔ ni amɛnuɔ he amɛhãa lɛ he po lɛ, jeee be fɛɛ be mɛi krokomɛi nuɔ amɛ shishi.

14. Te wɔbaafee tɛŋŋ wɔná wiemɔi kɛshɛje mɛi ni amɛsuɔlɔi egboi lɛ amii?

 ¹⁴ No hewɔ lɛ, ekolɛ ebaawa kɛhã wɔ akɛ wɔbaale nɔ ni wɔbaawie kɛshɛje mɛi ni agbo yɛ amɛnɔ lɛ amii. Shi Biblia lɛ kɛɔ akɛ, “nilelɔ lilɛi tsaa mɔ.” (Abɛi 12:18) Mɛi pii ena akɛ amɛbaanyɛ amɛkɛ saji ni yɔɔ broshuɔ ni yitso ji Beni Mɔ Ko ni Osumɔɔ Lɛ Egbo lɛ mli lɛ ashɛje mɛi krokomɛi amii. * Bei pii lɛ, nɔ ni hi fe fɛɛ ni obaanyɛ ofee kɛye obua ji, ni ‘okɛ mɛi ni foɔ lɛ baafo.’ (Rom. 12:15) Nyɛmi yoo ko ni atsɛɔ lɛ Gaby ni ewu egbo lɛ wie akɛ: “Bei pii lɛ, yaafo ji gbɛ ni mitsɔɔ nɔ mihãa mɛi leɔ bɔ ni minuɔ he mihãa yɛ mitsuiŋ. No hewɔ lɛ, kɛ́ minanemɛi lɛ fata mihe kɛfo lɛ, eshɛjeɔ mimii. Kɛ́ eba lɛ nakai lɛ, ehãa minuɔ he akɛ jeee mi kome miyeɔ awerɛho lɛ.”

15. Kɛ́ ewa kɛhã wɔ akɛ wɔbaawie nɔ ko kɛshɛje mɛi ni miiye awerɛho lɛ amii lɛ, mɛni wɔbaanyɛ wɔfee? (Kwɛmɔ akrabatsa ni yitso ji, “ Miishɛjemɔ Wiemɔi Ni Taa Mɔ Tsuiŋ.”)

¹⁵ Kɛ́ ewa kɛhã bo akɛ obaawie nɔ ko kɛshɛje mɛi ni yeɔ awerɛho lɛ amii lɛ, ekolɛ ebaafee mlɛo kɛhã bo akɛ obaaŋma amɛ wolo loo oŋma nɔ ko kuku yɛ kaadi nɔ ni okɛhã amɛ. Aloo obaanyɛ osɛndi amɛ e-mail, loo tɛs mɛseji. Mɛɛ saji nɛkɛ obaanyɛ oŋma oyahã amɛ? Obaanyɛ oŋma ŋmalɛ ko ni shɛjeɔ mɔ mii, su kpakpa ko ni okaiɔ yɛ mɔ ni egbo lɛ he, loo niiashikpamɔ ko ni yɔɔ miishɛɛ ni okɛ mɔ ni egbo lɛ ná. Junia wie akɛ: “Kɛ́ nyɛmi ko sɛndi mi mɛseji kuku ko, ekolɛ koni ekɛwo mi hewalɛ, loo ekɛfɔ̃ mi nine ni mibasara lɛ lɛ, eyeɔ ebuaa mi fe bɔ ni manyɛ matsɔɔ mli po. Ehãa minaa akɛ, mɔ lɛ sumɔɔ mi ni esusuɔ mihe.”

16. Mɛni ji gbɛ ko ni sa jogbaŋŋ ni wɔbaanyɛ wɔtsɔ nɔ wɔshɛje mɛi ni agbo yɛ amɛnɔ lɛ amii?

 ¹⁶ Nɔ kroko ni wɔbaanyɛ wɔfee kɛye wɔbua wɔnyɛmimɛi ni amɛsuɔlɔi egboi lɛ ji, ni wɔbaakai amɛ yɛ wɔsɔlemɔi amli, ni agbɛnɛ hu wɔkɛ amɛ afee ekome kɛsɔle. Ekolɛ bɔ ni oyeɔ awerɛho lɛ hewɔ lɛ, obaanu he akɛ, kɛ́ okɛ amɛfee ekome kɛsɔle lɛ, ogbee baakpokpo ni obaajwa yaafo. Shi kaahã no gba onaa. Kɛ́ ojɛ otsuiŋ okɛ amɛ sɔle lɛ, ebaanyɛ eshɛje amɛmii waa. Dalene wie akɛ: “Bei komɛi kɛ́ nyɛmimɛi yei ba koni amɛbashɛje mimii lɛ, mibiɔ amɛ kɛji amɛbaasumɔ ni amɛkɛ mi asɔle. Bei pii kɛ́ amɛbɔi sɔlemɔ lɛ, wiemɔ waa kɛhãa amɛ. Shi be fɛɛ be lɛ, kɛ́ amɛwie fioo lɛ, amɛnáa ekãa agbɛnɛ, ni amɛsɔleɔ kɛjɛɔ amɛtsuiŋ tɔ̃ɔ. Bɔ ni amɛhemɔkɛyeli lɛ mli wa, suɔmɔ ni amɛjieɔ lɛ kpo, kɛ bɔ ni amɛsusuɔ mihe lɛ, ehã mihemɔkɛyeli lɛ mli ewa waa.”

17-19. Mɛni hewɔ esa akɛ wɔya nɔ wɔshɛje mɛi ni agbo ashi amɛ lɛ amii?

¹⁷ Mɛi komɛi yeɔ awerɛho be fioo kɛkɛ lɛ amɛkpa, shi mɛi komɛi yaa nɔ amɛyeɔ awerɛho be kplaŋŋ. Kɛ́ nɔ nyɔ mɔ ko hiŋmɛi mli lɛ, nanemɛi kɛ wekumɛi pii baa amɛbashɛjeɔ emii. Shi gbii fioo komɛi asɛɛ lɛ, amɛshiɔ mɔ lɛ koni amɛyatsu amɛnitsumɔi srɔtoi. Ani obaanyɛ oya nɔ oshɛje mɔ lɛ mii ni oye obua lɛ be ni amɛtee lɛ? Biblia lɛ kɛɔ akɛ: “Naanyo sumɔɔ mɔ bei fɛɛ mli, ni afɔ lɛ akɛ nyɛmi hã haomɔ be.” (Abɛi 17:17) Ekɔɔɔ he eko be abɔ ni wɔnyɛmi Kristofonyo ko kɛbaaye awerɛho yɛ esuɔlɔ ko gbele hewɔ lɛ, wɔbaanyɛ wɔya nɔ wɔshɛje emii.​—Kanemɔ 1 Tesalonikabii 3:7.

¹⁸ Kaimɔ akɛ, lalai, mfonirii, gbɛɛmɔi, ŋmai, loo nifeemɔi komɛi baanyɛ ahã mɔ ni agbo ashi lɛ lɛ abɔi awerɛhoyeli ekoŋŋ. Bei komɛi hu lɛ, kɛ́ eshɛ be ni amɛbote gbalashihilɛ mli, loo be pɔtɛɛ ko yɛ afi lɛ mli lɛ, amɛyeɔ awerɛho. Nibii pii yɛ ni ekolɛ, mɔ lɛ kɛ ehefatalɔ lɛ fee ekome kɛfee. No hewɔ lɛ, be klɛŋklɛŋ ni mɔ lɛ kome too baafee lɛ, ebaanyɛ ewa kɛhã lɛ waa. Ekomɛi ji, kɛ́ ebaaya kpee loo Kaimɔ lɛ. Nyɛmi nuu ko wie akɛ, be ni eŋa gbo lɛ, enu he akɛ be klɛŋklɛŋ ni gbi ni amɛbote gbalashihilɛ mli lɛ baashɛ ni eŋa lɛ bɛ emasɛi lɛ, ebaaye awerɛho waa, ni lɛɛlɛŋ, enáaa lɛ mlɛo. Shi ewie akɛ: “Nyɛmimɛi fioo komɛi to henaabuamɔ ko he gbɛjianɔ ni amɛfɔ̃ minanemɛi ni misumɔɔ amɛsane waa lɛ nine koni mihe akafee shoo.”

¹⁹ Shi esaaa akɛ wɔhiɛ kpaa nɔ akɛ, jeee be pɔtɛi komɛi pɛ amli hewalɛwoo he baahia mɔ ko ni agbo ashi lɛ. Junia wie akɛ: “Bei pii lɛ, kɛ́ mɛi ba omasɛi loo amɛye amɛbua bo be ni nifeemɔ krɛdɛɛ ko shɛko lɛ, onáa he sɛɛ waa. Enɔ bɛ, ni eshɛjeɔ mɔ mii waa.” Wɔnyɛŋ wɔhã mɔ ni suɔlɔ egbo lɛ akpa awerɛhoyeli kwraa, ni asaŋ wɔnyɛŋ wɔto lɛ mɔ ni egbo lɛ najiaŋ. Shi kɛ́ wɔfee nɔ ni wɔbaanyɛ kɛye wɔbua lɛ lɛ, wɔbaanyɛ wɔshɛje emii. (1 Yoh. 3:18) Gaby wie akɛ: “Asafoŋ onukpai lɛ jɛ suɔmɔ mli amɛye amɛbua mi be ni miwu lɛ gbo lɛ, ni midaa Yehowa shi waa yɛ enɛ hewɔ. Amɛhã minu he akɛ Yehowa sumɔɔ mi lɛɛlɛŋ.”

20. Mɛɛ gbɛ nɔ Yehowa shiwoi lɛ shɛjeɔ wɔmii?

²⁰ Wɔsɛɛ lɛ, “mɛi fɛɛ ni yɔɔ gbohii akaimɔ bui lɛ amli lɛ baanu [Kristo gbee] ni amɛbaaje kpo”! (Yoh. 5:28, 29) Yehowa, miishɛjemɔ fɛɛ Nyɔŋmɔ lɛ baatsɔ enɛ nɔ eshɛje mɛi fɛɛ ni yeɔ awerɛho lɛ amii kɛya naanɔ. Nuŋtsɔ Yehowa ewo shi akɛ ‘ebaami gbele kɛaatee naanɔ,’ ni ebaatsumɔ “hiɛiaŋ fɛɛ yaafonui.” (Yes. 25:8) No beiaŋ lɛ, mɛi fɛɛ ni yɔɔ shikpɔŋ lɛ nɔ lɛ foŋ dɔŋŋ, moŋ lɛ, amɛkɛ ‘mɛi ni nyaa lɛ baanya.’​—Rom. 12:15.