1, 2. Mɛni hewɔ wɔbaasusu tɔmɔi ni Yuda maŋtsɛmɛi ejwɛ lɛ tɔ̃ lɛ ahe?

WƆBAANYƐ wɔkase nii kɛjɛ mɛi krokomɛi atɔmɔi amli. Akɛ nɔkwɛmɔnɔ lɛ, kɛ́ ona ni mɔ ko eshane egbee shi yɛ he ko lɛ, ani okwɛŋ jogbaŋŋ kɛ́ bo hu oyaatsɔ jɛmɛ? Nakai nɔŋŋ eji yɛ Yehowa sɔɔmɔ lɛ mli. Kɛ́ wɔhe be kɛsusu tɔmɔi ni mɛi ni awie amɛhe yɛ Biblia lɛ mli lɛ tɔ̃ lɛ ahe lɛ, ebaanyɛ eye ebua wɔ ni wɔkatɔ̃ tɔmɔi ni amɛtɔ̃ lɛ.

² Yuda maŋtsɛmɛi ejwɛ ni wɔsusu amɛhe yɛ nikasemɔ ni tsɔ hiɛ lɛ amli lɛ sɔmɔ Yehowa kɛ amɛtsui muu fɛɛ. Kɛ̃lɛ, amɛtɔ̃ tɔmɔi komɛi ni yɔɔ hiɛdɔɔ. Mɛni wɔbaanyɛ wɔkase yɛ nɔ ni amɛfee lɛ mli, koni wɔkatɔ̃ tɔmɔi ni amɛtɔ̃ lɛ eko? Biblia lɛ kɛɔ akɛ nibii ni aŋma ato momo lɛ, aŋma koni etsɔɔ wɔ nii. No hewɔ lɛ, kɛ́ wɔjwɛŋ maŋtsɛmɛi nɛɛ anɔkwɛmɔnii lɛ anɔ lɛ, wɔbaaná he sɛɛ waa.—Kanemɔ Romabii 15:4.

3-5. (a) Eyɛ mli akɛ Asa sɔmɔ Yehowa kɛ tsui ni eye emuu moŋ, shi mɛɛ tɔmɔ etɔ̃? (b) Mɛni eeenyɛ efee akɛ no hã Asa kɛ ehiɛ fɔ̃ adesai anɔ be ni Baesha batutua Yuda lɛ?

³ Mɔ klɛŋklɛŋ ni wɔbaasusu ehe ji, Asa. Be ni Etiopiabii 1,000,000 lɛ batutua Yuda lɛ, Asa kɛ ehiɛ fɔ̃ Yehowa nɔ. Shi  be ni Israel maŋtsɛ Baesha bama Rama, ni ji maŋ ko ni kã Asa maŋtsɛyeli lɛ husu lɛ naa lɛ, Asa kɛ ehiɛ efɔ̃ɔɔ Nyɔŋmɔ nɔ; ekɛ ehe fɔ̃ lɛ diɛŋtsɛ ehiɛshikamɔ nɔ. (2 Kron. 16:1-3) Eloo shika eyahã Siria Maŋtsɛ Benhadad, koni Siria maŋtsɛ lɛ ayatutua Baesha. Siria maŋtsɛ lɛ tee eyatutua Israel lɛɛlɛŋ, ni “be ni Baesha nu he lɛ, efɔ̃ɔ Rama maa, ni efɔ̃ɔ enitsumɔ lɛ.” (2 Kron. 16:5) No hewɔ lɛ, efee tamɔ nɔ ni Asa ŋaa lɛ eye omanye.

⁴ Shi Yehowa nyaaa nɔ ni Asa fee lɛ he kwraa. Etsu gbalɔ Hanani koni eyakã Asa hiɛ yɛ ehiɛ ni ekɛfɔ̃ɔɔ Yehowa nɔ lɛ hewɔ. (Kanemɔ 2 Kronika 16:7-9.) Hanani kɛɛ lɛ akɛ: “Kɛjɛ ŋmɛnɛ nɔ kɛyaa nɛɛ tai aaate shi awo bo!” No hewɔ lɛ, eyɛ mli akɛ Asa nyɛ eshwie Baesha kɛjɛ Rama moŋ nɛ, shi ekɛ ewebii lɛ ahe ejɔɔɔ amɛ kɛyashi egbo. Maji babaoo kɛ amɛ bawu.

⁵ Yɛ nikasemɔ ni tsɔ hiɛ lɛ mli lɛ, wɔna akɛ be ni Nyɔŋmɔ ka Asa tsui ekwɛ lɛ, ena akɛ Asa miisɔmɔ lɛ kɛ tsui ni eye emuu. (1 Maŋ. 15:14) Ni tsɔɔ akɛ, Nyɔŋmɔ yɔse akɛ Asa sumɔɔ lɛ kɛ etsui fɛɛ. Fɛɛ sɛɛ lɛ, Asa kpa gbɛ fɔŋ ni ekɔ lɛ mli yibii. Mɛni kwraa hã Asa kɛ ehe yafɔ̃ lɛ diɛŋtsɛ ehiɛshikamɔ kɛ Siria maŋtsɛ lɛ nɔ, moŋ fe Yehowa? Ani eeenyɛ efee akɛ eyasusu akɛ kɛ́ ekɛ ehe yabɔ Siria maŋtsɛ lɛ, loo ewo Siria maŋtsɛ lɛ kɛ Baesha teŋ béi lɛ, ehe baajɔ lɛ? Ani eeenyɛ efee akɛ mɔ ko wo lɛ ŋaa gbonyo ni no hã ekɔ gbɛ ni ekɔ lɛ?

6. Mɛni wɔkaseɔ yɛ Asa tɔmɔ lɛ mli? Okɛ enɛ he nɔkwɛmɔnɔ ahã.

⁶ Mɛni wɔbaanyɛ wɔkase yɛ tɔmɔ ni Asa tɔ̃ lɛ mli? Kɛ́ wɔkɛ naagbai ni naa wala kpe lɛ, bei pii lɛ, wɔkɛ wɔhiɛ fɔ̃ɔ Yehowa nɔ. Shi ani wɔkɛ wɔhiɛ fɔ̃ɔ enɔ be ni wɔtsuɔ naagbai bibii ni wɔkɛkpeɔ daa gbi lɛ hu ahe nii? Aloo wɔkɛ wɔhe fɔ̃ɔ wɔ diɛŋtsɛ wɔhe nɔ? Kɛ́ wɔkɛ naagbai kpe, bibii jio, ewuji jio lɛ, ani wɔtaoɔ Biblia mli shishitoo mlai ni kɔɔ sane lɛ he ni wɔbɔɔ mɔdɛŋ akɛ wɔkɛbaatsu nii? Kɛ́ wɔkɛ nɔ ni Biblia lɛ kɛɔ lɛ tsu nii lɛ, no baatsɔɔ akɛ wɔkɛ wɔhiɛ fɔ̃ɔ Yehowa nɔ. Akɛ nɔkwɛmɔnɔ lɛ, ŋɔɔ lɛ akɛ oweku lɛ sumɔɔɔ ni oyaa Kristofoi akpeei. Ani obaasɔle obi Yehowa gbɛtsɔɔmɔ kɛ yelikɛbuamɔ koni ona bɔ ni obaatsu shihilɛ lɛ he nii ohã? Aloo ekolɛ onitsumɔ efite, ni ootao eko shi onáaa. Kɛ́ naagbee lɛ, oyaná eko lɛ, ani obaaná ekãa ni ohã nitsumɔtsɛ lɛ ale akɛ daa otsi lɛ obaaya asafoŋ kpeei yɛ otsi lɛ teŋ? Ekɔɔɔ he eko naagbai ni wɔkɛbaakpe lɛ, esa akɛ wɔkai ŋaa ni lalatsɛ lɛ wo lɛ, akɛ: “Gbɛ ní onyiɛ nɔ lɛ, ŋɔɔfɔ̃ Yehowa nɔ, ní oŋɔ ohiɛ hu ofɔ̃ enɔ, ni eeefee.”—Lala 37:5.

7, 8. Mɛɛ tɔmɔi Yehoshafat tɔ̃, ni mɛni jɛ mli kɛba? (Kwɛmɔ mfoniri ni yɔɔ nikasemɔ lɛ shishijee lɛ.)

⁷ Ni Asa bi Yehoshafat hu? Yehoshafat jie sui kpakpai pii akpo. Ekɛ ehiɛ fɔ̃ Nyɔŋmɔ nɔ, ni efee nibii kpakpai babaoo. Shi lɛ hu ekpɛ yiŋ gbohii komɛi. Akɛ nɔkwɛmɔnɔ lɛ, ehã ebinuu kɛ Israel maŋtsɛ Ahab yitsoŋwalɔ lɛ biyoo bote gbalashihilɛ mli. Sɛɛ mli be ni Ahab kɛ Siriabii lɛ yaawu lɛ, efata ehe kɛtee, eyɛ mli akɛ gbalɔ Mikaia bɔ lɛ kɔkɔ yɛ he. Shwɛ sharao kulɛ agbe Yehoshafat yɛ nakai ta lɛ mli. (2 Kron. 18:1-32) Be ni eku esɛɛ eba Yerusalem lɛ, gbalɔ Yehu bi lɛ akɛ: “Aso esa akɛ oye obua mɛi fɔji, ní osumɔ mɛi ní nyɛɔ Yehowa?”—Kanemɔ 2 Kronika 19:1-3.

⁸ Ani Yehoshafat kase nii kɛjɛ nɔ ni nina lɛ lɛ mli? Ani ebo Yehu kɔkɔbɔɔ lɛ toi? Dabi. Eyɛ mli akɛ etee nɔ ebɔ mɔdɛŋ  waa akɛ ebaafee nɔ ni sa Nyɔŋmɔ hiɛ moŋ, shi etee nɔ ekɛ mɛi fɔji bɔ. Ekɛ Yehowa henyɛlɔ Maŋtsɛ Ahazia, ni ji Ahab binuu lɛ, bɔ naanyo. Ekɛ maŋtsɛ gbonyo nɛɛ fee ekome ní amɛkpɛ lɛji. Shi lɛji lɛ fɛɛ fite, ni ehiii amɛ kɛ nitsumɔ shi kome po.—2 Kron. 20:35-37.

9. Kɛ́ wɔkɛ mɛi fɔji bɔ lɛ, mɛni baanyɛ ajɛ mli kɛba?

⁹ Esa akɛ Yehoshafat sane lɛ ahɛle wɔ shi waa. Yehoshafat “tao Yehowa sɛɛgbɛ kɛ etsui muu lɛ fɛɛ” ni efee nɔ ni ja. No hewɔ lɛ, Yehowa bu lɛ akɛ maŋtsɛ kpakpa. (2 Kron. 22:9) Kɛ̃lɛ, nanemɛi gbohii ni ekɛbɔ lɛ hã ená naagbai babaoo. Enɛ kaiɔ wɔ abɛ ko ni yɔɔ Biblia lɛ mli ni kɛɔ akɛ: “Mɔ ni kɛ nilelɔi nyiɛɔ lɛ, eeetsɔ nilelɔ; shi mɔ ni kɛ kwashiai bɔɔ lɛ, eeena amane.” (Abɛi 13:20) Esoro ni wɔkɛ mɔ ko miibɔ koni wɔye wɔbua lɛ ni eba anɔkwale lɛ mli, ni esoro ni wɔkɛ lɛ miibɔ naanyo kɛkɛ. Yehoshafat kɛ Ahab bɔ gbagbalii, ni shwɛ fioo kulɛ ekɛ ewala tse. Nakai nɔŋŋ kɛ́ wɔ hu wɔkɛ mɛi ni sɔmɔɔɔ Yehowa lɛ bɔ gbagbalii lɛ, wɔkɛ wɔhe baawo oshara mli.

10. (a) Kɛ́ wɔmiitao wɔbote gbalashihilɛ mli lɛ, mɛni wɔbaanyɛ wɔkase yɛ Yehoshafat sane lɛ mli? (b) Kɛ́ eefee wɔ akɛ wɔkɛ mɛi ni sumɔɔɔ Yehowa abɔ lɛ, mɛni esa akɛ wɔkai?

¹⁰ Mɛni wɔkaseɔ yɛ Yehoshafat nɔkwɛmɔnɔ lɛ mli? Nyɛmimɛi komɛi ená suɔmɔ amɛhã mɛi ni sumɔɔɔ Yehowa. Amɛnuɔ he akɛ amɛnáŋ hefatalɔi ni sa yɛ amɛnyɛmimɛi Kristofoi lɛ ateŋ. Amɛteŋ mɛi komɛi hu yɛ ni amɛwekumɛi ni bɛ asafo lɛ mli lɛ miinyɛ amɛnɔ ni amɛbote gbalashihilɛ mli. Amɛkɛɔ amɛ akɛ kɛ́ amɛsɛɛ tsɛ pii lɛ, ‘amɛbe baaho.’ Bɔ ni Yehowa bɔ wɔ ehã lɛ hewɔ lɛ, suɔmɔ kɛ naanyobɔɔ he miihia wɔ fɛɛ. No hewɔ lɛ, kɛ́ mɔ ko miitao ebote gbalashihilɛ mli lɛ, ejeee tɔmɔ. Shi susumɔ nɔ ni ba Maŋtsɛ Yehoshafat nɔ lɛ he okwɛ. Yehoshafat bi Nyɔŋmɔ gbɛtsɔɔmɔ yɛ nibii pii amli. (2 Kron. 18:4-6) Shi akɛni Ahab sumɔɔɔ Yehowa hewɔ lɛ, be ni ekɛ lɛ bɔi bɔɔ lɛ, eku ehiɛ efɔ̃ Yehowa kɔkɔbɔɔ lɛ nɔ. Kulɛ esa akɛ Yehoshafat akai akɛ, “Yehowa yɔɔ nɛɛ, ehiŋmɛii kpaa shikpɔŋ muu lɛ fɛɛ nɔ, ni ejieɔ ehewalɛ kpo ehãa mɛi ní amɛtsui ehi kɛwula shi yɛ egbɛfaŋ lɛ.” (2 Kron. 16:9) Esa akɛ wɔ hu wɔhã ehi wɔjwɛŋmɔŋ  akɛ, Nyɔŋmɔ yeɔ ebuaa etsuji anɔkwafoi. Ele shihilɛi ni wɔkɛkpeɔ, ni esumɔɔ wɔ. Ele akɛ suɔmɔ kɛ naanyobɔɔ he miihia bo, ni bɔ fɛɛ bɔ ni fee lɛ, ebaatsu hiamɔ nii nɛɛ he nii ehã bo yɛ be ni sa mli, koni otsui anyɔ omli. Ani oheɔ enɛ oyeɔ?

11, 12. (a) Mɛɛ gbɛ nɔ Hezekia nifeemɔ hã ana nɔ ni yɔɔ etsui mli? (b) Mɛni hewɔ Nyɔŋmɔ kɛ Hezekia he ke lɛ lɛ?

¹¹ Hezekia tɔmɔ lɛ tsɔɔ wɔ nɔ ko yɛ tsui lɛ he. Be ko lɛ, Yehowa, mɔ ni kaa tsuii ekwɛɔ lɛ, ye ebua Hezekia koni ena nɔ diɛŋtsɛ ni yɔɔ etsui mli. (Kanemɔ 2 Kronika 32:31.) Bɔ ni eba lɛ ji akɛ, Hezekia he baye waa. Shi Nyɔŋmɔ hã ele akɛ ehe baawa lɛ, ni ekɛ okadi ko ma enɛ nɔ mi. Yehowa hã hɔɔŋ ko ku esɛɛ yɛ gbɛ ni yɔɔ naakpɛɛ nɔ. Sɛɛ mli lɛ, Babilon lumɛi lɛ tsu mɛi Hezekia ŋɔɔ, ekolɛ koni amɛyabi lɛ okadi nɛɛ he sane. (2 Maŋ. 20:8-13; 2 Kron. 32:24) Be ni amɛba lɛ, ‘Nyɔŋmɔ shi Hezekia’ koni ena nɔ ni yɔɔ etsui mli. Hezekia fee buulu; ekɛ “enitoohei lɛ” amli nibii fɛɛ tsɔɔ Babilonbii lɛ. Enɛ hã ana “nɔ fɛɛ nɔ ni yɔɔ etsui mli.”

¹² Hezekia tsui wó ehe nɔ. Shi mɛni tuuntu hã eba lɛ nakai? Ani eeenyɛ efee akɛ Asiriabii lɛ anɔ kunim ni eye lɛ ni bote eyitsoŋ? Aloo ekolɛ, tsamɔ ni Nyɔŋmɔ tsɔ naakpɛɛ gbɛ nɔ etsa lɛ lɛ? Ani “nii kɛ anunyam babaoo diɛŋtsɛ” ni ená lɛ ni hã eyitsoŋ fuu lɛ? Biblia lɛ etsɔɔɔ. Nɔ pɛ ni wɔle ji akɛ, Hezekia ‘etooo Yehowa najiaŋ’ yɛ ejurɔ ni efee lɛ lɛ hewɔ. Moŋ lɛ, ewó ehe nɔ. Mɛɛ mɔbɔ sane po nɛ! Eyɛ mli akɛ Hezekia kɛ afii pii sɔmɔ Nyɔŋmɔ kɛ tsui ni eye emuu moŋ, shi yɛ nakai be kukuoo lɛ mli lɛ, efee nɔ ko ni Yehowa sumɔɔɔ. Sɛɛ mli lɛ, Hezekia ba ehe shi, ni Nyɔŋmɔ kɛ lɛ kɛ emaŋbii lɛ ahe ke amɛ.—2 Kron. 32:25-27; Lala 138:6.

13, 14. (a) Mɛɛ shihilɛi amli kɛ́ wɔkwɛɛɛ ni ahi lɛ, wɔtsui baawó ehe nɔ? (b) Kɛ́ mɛi jie wɔyi yɛ nɔ ko ni wɔnyɛ wɔtsu lɛ hewɔ lɛ, mɛni esa akɛ wɔfee?

¹³ Kɛ́ wɔkane Hezekia sane lɛ ni wɔjwɛŋ nɔ lɛ, mɛɛ gbɛ nɔ wɔbaaná he sɛɛ? Kɛ́ obaakai lɛ, be ni Yehowa hã Hezekia ye Sanherib nɔ kunim, ni etsa lɛ yɛ hela ni naa wa ni mɔ lɛ lɛ sɛɛ etsɛɛɛ ni ewó ehe nɔ lɛ. Ni wɔ hu? Kɛ́ wɔnyɛ wɔtsu nɔ ko ni sa kadimɔ yɛ Yehowa sɔɔmɔ lɛ mli, loo mɛi jie wɔyi lɛ, te wɔfeɔ wɔnii wɔhãa tɛŋŋ? Ni mɛni wɔnifeemɔ lɛ hãa anaa yɛ nɔ ni yɔɔ wɔtsui mli lɛ he? Akɛ nɔkwɛmɔnɔ lɛ, kɛ́ oje gbɛ osaa ohe jogbaŋŋ kɛhã maŋshiɛmɔ ko yɛ mɛi pii ahiɛ, ni onyɛ ohã lɛ jogbaŋŋ lɛ, mɛi baajie oyi. Shi te obaafee onii ohã tɛŋŋ yɛ oyi ni amɛjieɔ lɛ he?

¹⁴ Be fɛɛ be ni mɛi baajie wɔyi lɛ, nyɛhãa wɔkaia nɔ ni Yesu wie lɛ. Ewie akɛ: “Kɛ́ nyɛfee nibii fɛɛ ni afã nyɛ lɛ, nyɛkɛa akɛ: ‘Nyɔji ni he bɛ sɛɛnamɔ ko ji wɔ. Nɔ ni ji wɔgbɛnaa akɛ wɔtsuɔ lɛ, no pɛ wɔtsu nɛɛ.’” (Luka 17:10) Kaimɔ akɛ, Hezekia ‘etooo Yehowa najiaŋ’ yɛ ejurɔ ni efee lɛ lɛ hewɔ, ni no hã awie akɛ etsui wó ehe nɔ lɛ. Kɛ́ wɔjwɛŋ nibii abɔ ni Nyɔŋmɔ efee ehã wɔ lɛ ahe lɛ, no baatsirɛ wɔ ni wɔjie eyi ni wɔda lɛ shi, ni wɔya nɔ wɔba wɔhe shi. Akɛ nɔkwɛmɔnɔ lɛ, kɛ́ mɛi jie wɔyi yɛ wiemɔ ko ni wɔhã lɛ hewɔ lɛ, esa akɛ wɔda Yehowa shi, ejaakɛ lɛ ehã aŋma Biblia lɛ, ni lɛ nɔŋŋ ekɛ emumɔ krɔŋkrɔŋ lɛ ye ebua wɔ ni wɔnyɛ wɔhã wiemɔ lɛ.

15, 16. Mɛni ba ni Nyɔŋmɔ hebuu ŋmɛɛ Yosia ni ehiɛ kpãtã lɛ?

¹⁵ Naagbee mɔ ni wɔbaasusu ehe ji, Maŋtsɛ Yosia. Yosia ji maŋtsɛ kpakpa, shi  hã wɔsusu tɔmɔ ni etɔ̃ ni hã agbe lɛ lɛ he wɔkwɛ. (Kanemɔ 2 Kronika 35:20-22.) Be ko lɛ, “Yosia yiŋ etee” ni ekɛ Neko, ni ji Ejipt maŋtsɛ lɛ ayawu. Shi Neko kɛɛ lɛ akɛ eku esɛɛ, ejaakɛ sane ko kwraa bɛ ekɛ lɛ teŋ. Biblia lɛ hãa wɔleɔ akɛ, Neko wiemɔi lɛ “jɛ Nyɔŋmɔ daaŋ.” Mɛni hewɔ Yosia kpɛ eyiŋ akɛ ekɛ Neko yaawu lɛ? Biblia lɛ ewieee.

¹⁶ Kulɛ Yosia baanyɛ atao nibii amli ekwɛ kɛji Yehowa kɛ Neko ewie lɛɛlɛŋ. No mli lɛ, gbalɔ anɔkwafo Yeremia yɛ, ni kulɛ ebaanyɛ ebi lɛ kɛji Neko wiemɔi lɛ yɛ mli. (2 Kron. 35:23, 25) Shi nɔ ko bɛ ni tsɔɔ akɛ efee nakai. Kɛfata he lɛ, no mli lɛ, jeee Yerusalem Neko baa ebatutua lɛ. Enyiɛ gbɛ eeya Karkemish ni ekɛ “shĩa” kroko ayawu. Agbɛnɛ hu, Neko ewieko eshiko Nyɔŋmɔ gbɛ́i lɛ, ni asaŋ, ebɔko Yehowa loo ewebii lɛ ahora. No hewɔ lɛ, jeee nilee mli Yosia jɛ ekpɛ eyiŋ akɛ ekɛ Neko yaawu lɛ. Mɛni wɔkaseɔ yɛ sane nɛɛ mli? Kɛ́ wɔkɛ naagba ko kpe lɛ, esa akɛ wɔtao Yehowa susumɔ yɛ sane lɛ he.

17. Kɛ́ wɔkɛ naagba ko kpe lɛ, mɛni esa akɛ wɔfee koni wɔkatɔ̃ tɔmɔ ni Yosia tɔ̃ lɛ eko?

¹⁷ Kɛ́ wɔkɛ naagba ko kpe lɛ, esa akɛ wɔsusu Biblia mli shishitoo mlai ni kɔɔ naagba lɛ he lɛ ahe, ni wɔkwɛ bɔ ni wɔbaafee wɔkɛtsu nii jogbaŋŋ. Bei komɛi lɛ, ebaahi akɛ wɔkɛ asafoŋ onukpa ko baagba he sane po. Ekolɛ, wɔsusu sane lɛ he saŋŋ, ni wɔtao nibii amli yɛ asafo lɛ woji lɛ amli. Shi ani eeenyɛ efee akɛ Biblia mli shishitoo mlai krokomɛi yɛ ni kɔɔ sane lɛ he shi wɔjwɛŋmɔ eyako nɔ? Asafoŋ onukpa lɛ baanyɛ agbala wɔjwɛŋmɔ kɛya enɛɛmɛi anɔ ni ekɛ wɔ asusu he. Akɛ nɔkwɛmɔnɔ lɛ, ŋɔɔ lɛ akɛ nyɛmi yoo ko ni ewu jeee Odasefonyo lɛ ekpɛ eyiŋ akɛ eeya shiɛmɔ. (Bɔf. 4:20) Shi nakai gbi lɛ kome too lɛ, ewu lɛ kɛɛ ebaasumɔ ni amɛje kpo amɛyata he ko ni amɛná amɛhewɔŋ miishɛɛ, ejaakɛ amɛje kpo etsɛ. Mɛɛ ŋmalɛi nɛkɛ baanyɛ aye abua nyɛmi yoo lɛ ni ekpɛ eyiŋ yɛ nɔ ni ebaafee he? Ekome ji nɔ ni kɛɔ akɛ esa akɛ abo Nyɔŋmɔ toi lɛ, ni ekroko hu ji nɔ ni kɔɔ Yesu famɔ akɛ ayashiɛ lɛ he lɛ. (Mat. 28:19, 20; Bɔf. 5:29) Shi ŋmalɛi krokomɛi hu yɛ ni esa akɛ esusu he, tamɔ nɔ ni kɛɔ akɛ esa akɛ ŋamɛi aŋɔ amɛhe amɛwo amɛwumɛi ashishi lɛ, kɛ nɔ ni woɔ wɔ hewalɛ ni wɔfee mɛi ni nuɔ nii ashishi lɛ. (Efe. 5:22-24; Fil. 4:5) Ani shiɛmɔ lɛ kɛkɛ ni nuu lɛ sumɔɔɔ ni eŋa lɛ yaa dɔŋŋ, aloo nakai gbi lɛ pɛ ni eesumɔ ni ekɛ lɛ aje kpo? Wɔmiisumɔ ni wɔjɛ henilee ni he tse mli wɔfee Nyɔŋmɔ suɔmɔnaa nii, shi yɛ nakai beiaŋ nɔŋŋ lɛ esa akɛ wɔŋmɛ pɛpɛɛpɛ.

18. Mɛni obaanyɛ okase yɛ maŋtsɛmɛi ejwɛ ni wɔsusu amɛhe yɛ nikasemɔ nɛɛ mli lɛ ahe saji ni aŋmala ashwie shi lɛ mli?

¹⁸ Wɔ fɛɛ wɔyeee emuu, ni no hewɔ lɛ, wɔbaanyɛ wɔtɔ̃ tɔmɔi ni maŋtsɛmɛi ejwɛ nɛɛ tɔ̃ lɛ eko. Wɔbaanyɛ (1) wɔkɛ wɔhe afɔ̃ wɔ diɛŋtsɛ wɔhiɛshikamɔ nɔ, (2) wɔkɛ mɛi ni sumɔɔɔ Nyɔŋmɔ abɔ naanyo, (3) wɔwó wɔhe nɔ, loo (4) wɔkpɛ wɔyiŋ yɛ sane ko he, be ni wɔtsɔko hiɛ wɔsusuko nɔ ni Nyɔŋmɔ miisumɔ ni wɔfee yɛ he lɛ he. Shi miishɛɛ sane ji akɛ, Yehowa kɛ ejwɛŋmɔ maa nibii kpakpai ni wɔfeɔ lɛ anɔ, tamɔ bɔ ni efee yɛ maŋtsɛmɛi ejwɛ lɛ fɛɛ agbɛfaŋ lɛ. Kɛfata he lɛ, ele akɛ wɔsumɔɔ lɛ waa ni wɔmiisumɔ ni wɔsɔmɔ lɛ jogbaŋŋ kɛmɔ shi. Enɛ hewɔ ehã aŋmala saji nɛɛ ashwie shi ahã wɔ lɛ, koni ekɛbɔ wɔ kɔkɔ ni wɔkatɔ̃ tɔmɔi ni yɔɔ hiɛdɔɔ. No hewɔ lɛ, nyɛhãa wɔjwɛŋa Biblia mli saji nɛɛ anɔ, ni wɔda Yehowa shi waa akɛ ehã aŋmala fɛɛ ashwie shi ahã wɔ!