“Ao Sɔlemɔ Toibolɔ, bo oŋɔɔ gbɔmɛi srɔtoi fɛɛ baaba.”​—Lala 65:2.

Mɛi komɛi sɔleɔ ejaakɛ amɛkɛɛ, kɛ́ amɛfee nakai lɛ, no hãa amɛhe jɔɔ amɛ, tsɛbelɛ, amɛheee amɛyeee akɛ mɔ ko miibo amɛ toi. Shi sɔlemɔ jeee nɔ ko ni wɔfeɔ kɛkɛ koni wɔnyɛ wɔdamɔ wɔnaagbai lɛ anaa. Biblia lɛ kɛɛ “Yehowa * yɛ mɛi fɛɛ ni boɔ amɛtsɛɔ lɛ lɛ amasɛi, mɛi fɛɛ ni tsɛɔ lɛ kɛ tsui krɔŋŋ lɛ. . . . Eboɔ amɛbolɔmɔ kɛhã yelikɛbuamɔ lɛ toi.”​—Lala 145:18, 19.

No hewɔ lɛ, wɔbaanyɛ wɔhe wɔye akɛ, Yehowa boɔ sɔlemɔi ni ejálɔi lɛ sɔleɔ lɛ toi. Ejɛ suɔmɔ mli ewie akɛ: “Nyɛbaatsɛ mi, ni nyɛbaaba nyɛbasɔle nyɛhã mi, ni mabo nyɛ toi.”​—Yeremia 29:12.

“Nyɛhiɛa sɔlemɔ mli daa.”​—Romabii 12:12.

Biblia lɛ woɔ wɔ hewalɛ ni ‘wɔsɔle daa,’ ni agbɛnɛ hu, ‘wɔsɔle yɛ shihilɛ fɛɛ shihilɛ mli.’ Eyɛ faŋŋ akɛ, Yehowa miisumɔ ni wɔsɔle wɔhã lɛ.​—Mateo 26:41; Efesobii 6:18.

Mɛni hewɔ ni Nyɔŋmɔ miisumɔ ni wɔsɔle wɔhã lɛ lɛ? Susumɔ enɛ he okwɛ: Mɛɛ tsɛ ni kɛ́ ebi fioo kɛɛ lɛ akɛ “Daa, ofainɛ ni owa mi” lɛ, eŋɔŋ enaa? Ekolɛ, tsɛ lɛ le nɔ ni he hiaa ebi lɛ, loo bɔ ni ebi lɛ nuɔ he ehãa, shi kɛ́ enu wiemɔi nɛɛ, no baahã ena akɛ ebi lɛ heɔ lɛ eyeɔ ni esumɔɔ lɛ. Nakai nɔŋŋ kɛ́ wɔsɔle wɔhã Yehowa Nyɔŋmɔ lɛ, ebaana akɛ wɔheɔ lɛ wɔyeɔ ni wɔsumɔɔ lɛ.​—Abɛi 15:8; Yakobo 4:8.

‘Nyɛshɛrɛa nibii ni hãa nyɛyeɔ nyɛtsui lɛ fɛɛ nyɛshwiea enɔ, ejaakɛ ejwɛŋɔ nyɛhe.’​—1 Petro 5:7.

Nyɔŋmɔ miisumɔ ni wɔsɔle wɔhã lɛ ejaakɛ esumɔɔ wɔ ni ejwɛŋɔ wɔhe. Nibii ni gbaa wɔnaa kɛ nibii ni hãa wɔyeɔ wɔtsui lɛ, ele fɛɛ, ni eesumɔ ni eye ebua wɔ.

Yɛ Maŋtsɛ David shihilɛ mli fɛɛ lɛ, esɔleɔ ebiɔ Yehowa Nyɔŋmɔ ni eye ebua lɛ, ni egbaa lɛ esusumɔi kɛ bɔ ni enuɔ he ehãa. (Lala 23:1-6) Te Nyɔŋmɔ nu he ehã tɛŋŋ yɛ David he? Esumɔ David ni ebo esɔlemɔi babaoo lɛ toi. (Bɔfoi 13:22) Wɔ hu Nyɔŋmɔ boɔ wɔsɔlemɔi toi, ejaakɛ ejwɛŋɔ wɔhe.

Biblia lɛ mli lalafolɔi lɛ eko wiemɔi nɛ. Ele akɛ Nyɔŋmɔ bo esɔlemɔi lɛ toi, ni no ye ebua lɛ waa. Ebasumɔ Nyɔŋmɔ waa, ni no hã ená hewalɛ kɛdamɔ shihilɛi ni hã ehao ni ewerɛ ho ehe lɛ anaa.​—Lala 116:1-9.

Kɛ́ wɔna akɛ Nyɔŋmɔ boɔ wɔsɔlemɔi toi lɛ, wɔbaaya nɔ wɔkɛ lɛ agba sane. Nuu ko ni atsɛɔ lɛ Pedro, ni yɔɔ Spain kooyigbɛ lɛ sane lɛ maa enɛ nɔ mi. Ebinuu ni eye afii 19 lɛ gbo yɛ tsɔne oshãra mli. Be ni Pedro yeɔ awerɛho lɛ, efɔse etsuiŋ eshwie Nyɔŋmɔ hiɛ, ni esɔle shii abɔ koni eshɛje emii ni eye ebua lɛ. Mɛni ba? Pedro wie akɛ: “Yehowa bo mi toi, ejaakɛ ehã nyɛmimɛi Kristofoi lɛ shɛje mi kɛ miŋa mii, ni amɛye amɛbua wɔ hu.”

Eyɛ mli akɛ sɔlemɔ ni Pedro sɔle lɛ hãaa ebinuu lɛ aba wala mli ekoŋŋ moŋ, shi no ye bua lɛ kɛ eweku lɛ waa. Eŋa María Carmen wie akɛ: “Sɔlemɔ hã minyɛ mikpee miwerɛhoyeli lɛ naa. Mile akɛ Yehowa Nyɔŋmɔ nuɔ mi shishi, ejaakɛ kɛ́ misɔle lɛ, mihe jɔɔ mi, ni mitsui nyɔɔ mimli hu.”

Biblia lɛ kɛ shihilɛi ni mɛi etsɔ mli lɛ feɔ lɛ faŋŋ akɛ, Nyɔŋmɔ boɔ sɔlemɔi toi. Shi jeee sɔlemɔi fɛɛ Nyɔŋmɔ hãa hetoo. Mɛni hewɔ ehãa sɔlemɔi komɛi hetoo ni ehãaa ekomɛi hetoo lɛ?