Be Ni Hetsɛ̃ Sɛɛ Baafo Kwraa!
Kɛ́ wɔfã hetsɛ̃ kɛ eshishi kɛje wɔ diɛŋtsɛ wɔtsui mli po lɛ, wɔnyɛŋ wɔkudɔ mɛi anifeemɔi kɛ amɛsui. Bei pii lɛ, hetsɛ̃ hãa ayeɔ mɛi ni efeko efɔŋ ko po lɛ awui. Hewɔ lɛ, namɔ baanyɛ afo hetsɛ̃ sɛɛ kwraa?
Yehowa Nyɔŋmɔ pɛ ji mɔ ni baanyɛ afo hetsɛ̃ sɛɛ kwraa. Biblia lɛ ewo shi akɛ ebaafee nakai.—Abɛi 20:22.
NYƆŊMƆ BAAJIE NƆ NI HÃA MƐI AHE TSƐ̃Ɔ MƐI LƐ KƐJE JƐMƐ
-
1. SATAN ABONSAM. Satan, ni ji ŋwɛibɔfo atuatselɔ lɛ, ji mɔ ni ehã mɛi ahe tsɛ̃ɔ mɛi waa ŋmɛnɛ lɛ. Nyɔŋmɔ baakpãtã Satan kɛ mɛi fɛɛ ni kaseɔ Satan, ni amɛhe tsɛ̃ɔ mɛi lɛ ahiɛ.—Lala 37:38; Romabii 16:20.
-
2. SATAN JEŊ FƆŊ LƐ. Nyɔŋmɔ baakpãtã mɛi fɛɛ ni hãa mɛi ahe tsɛ̃ɔ mɛi lɛ ahiɛ; mɛi ni fata he ji nɔyelɔi fɔji, kɛ jamɔŋ hiɛnyiɛlɔi ni hãa mɛi ahe tsɛ̃ɔ mɛi lɛ. Nyɔŋmɔ baajie nitsumɔi ni shishiuɔ mɛi ni amɛtswaa mɛi ojo lɛ fɛɛ hu kɛje jɛmɛ.—2 Petro 3:13.
-
3. EMUU NI ADESAI YEEE. Biblia lɛ tsɔɔ mli akɛ adesai fɛɛ yeee emuu, ni tsɔɔ akɛ, bei pii lɛ, wɔjwɛŋɔ nibii ni ehiii ahe, loo wɔfeɔ nibii ni ehiii. (Romabii 5:12) Eko ji, wɔhe tsɛ̃ɔ mɛi ni wɔfeɔ nibii wɔshiɔ amɛ. Nyɔŋmɔ baawa adesai koni amɛfã hetsɛ̃ kɛ eshishi kɛje amɛtsui mli bɔ ni afee ni hetsɛ̃ sɛɛ afo kwraa.—Yesaia 54:13.
BIBLIA LƐ EWO SHI AKƐ WƆBAANÁ JEŊ KO NI HETSƐ̃ BƐ MLI
-
1. AYEŊ MƆ KO SANE FƆŊ. Nyɔŋmɔ Maŋtsɛyeli lɛ, ni ji nɔyeli ni yɔɔ ŋwɛi, ni feɔ jalɛ nii lɛ baaye shikpɔŋ lɛ nɔ kɛya naanɔ. (Daniel 2:44) Hetsɛ̃ kɛ niiamlijiemɔ sɛɛ baafo. Nyɔŋmɔ baajaje saji fɔji ni akɛye mɛi lɛ fɛɛ.—Luka 18:7.
-
2. MƆ FƐƐ MƆ TOIŊ BAAJƆ LƐ. Afeŋ yiwalɛ nii ni awuŋ ta hu yɛ he ko he ko. (Lala 46:9) Mɛi fɛɛ ni baahi shikpɔŋ lɛ nɔ lɛ baasumɔ toiŋjɔlɛ, ni no hewɔ lɛ, mɔ fɛɛ mɔ baahi shi shweshweeshwe.—Lala 72:7.
-
3. MƆ FƐƐ MƆ BAAHI SHI KƐYA NAANƆ YƐ SHIHILƐ KPAKPA MLI. Mɛi fɛɛ ni baahi shikpɔŋ lɛ nɔ lɛ baajie suɔmɔ krɔŋŋ kpo amɛtsɔɔtsɔɔ amɛhe. (Mateo 22:39) Mɔ ko mɔ ko yeŋ etsui yɛ sane fɔŋ ko hewɔ. (Yesaia 65:17) Yɛ nakai beiaŋ lɛ, hetsɛ̃ sɛɛ baafo, ni no hewɔ lɛ, adesai amii “baashɛ amɛhe waa yɛ toiŋjɔlɛ babaoo mli.”—Lala 37:11.
Ani obaasumɔ ni ohi jeŋ ni tamɔ nakai mli? Amrɔ nɛɛ po lɛ, mɛi babaoo kɛ Biblia mli ŋaawoi miitsu nii, ni no hewɔ lɛ, amɛmiiye hetsɛ̃ nɔ. (Lala 37:8) Yehowa Odasefoi akpekpei abɔ ni yɔɔ jeŋ fɛɛ lɛ miifee nakai. Eyɛ mli akɛ amɛjɛ maji kɛ shihilɛi srɔtoi amli moŋ, shi amɛfee ekome, ni suɔmɔ yɛ amɛteŋ.—Yesaia 2:2-4.
Yehowa Odasefoi baasumɔ ni amɛtsɔɔ bo bɔ ni amɛfeɔ amɛdamɔɔ hetsɛ̃ kɛ niiamlijiemɔ naa. Kɛ́ obo amɛ toi lɛ, fiofio lɛ, okɛ suɔmɔ baaye hetsɛ̃ nɔ. Okɛ mɛi fɛɛ baaye jogbaŋŋ—mɛi ni hiɛ esɔɔɔ nii, kɛ mɛi ni he tsɛ̃ɔ mɛi po. Nɔ ni baajɛ mli aba ji akɛ, obaaná miishɛɛ bianɛ, ni okɛ mɛi krokomɛi hu baahi shi jogbaŋŋ. Nɔ ni fe fɛɛ lɛ, obaana nɔ ni esa akɛ ofee koni onyɛ ohi shi yɛ Nyɔŋmɔ Maŋtsɛyeli lɛ shishi. Nakai beiaŋ lɛ, hetsɛ̃ sɛɛ baafo kwraa.—Lala 37:29.
Ekolɛ Obaasumɔ Enɛ Hu
BUU-MƆƆ
Mɛni Nyɔŋmɔ Maŋtsɛyeli Lɛ Baafee?
Yesu le akɛ Nyɔŋmɔ Maŋtsɛyeli lɛ pɛ baanyɛ atsu naagbai ni yɔɔ shikpɔŋ lɛ nɔ lɛ ahe nii. Mɛni Maŋtsɛyeli nɛɛ efee momo ni baahã wɔnyɛ wɔkɛ wɔhiɛ afɔ̃ nɔ?
