Namɔ Ji Nyɔŋmɔ Maŋtsɛyeli Lɛ Nɔ Maŋtsɛ?

TSWAA

Nyɔŋmɔ hã Biblia ŋmalɔi srɔtoi ŋmala nibii ni baahã wɔna mɔ ni baafee Nyɔŋmɔ Maŋtsɛyeli lɛ nɔ Maŋtsɛ. Nɔyelɔ nɛɛ baafee

Mɔ ko ni Nyɔŋmɔ diɛŋtsɛ hala lɛ. “Mi, miwó mimaŋtsɛ . . . mikɛ jeŋmaji lɛ baahã bo akɛ ogboshinii ni mikɛ shikpɔŋ muu lɛ fɛɛ baahã bo akɛ ogbɛfaŋnɔ.”—Lala 2:6, 8.
Maŋtsɛ David seshinyo. “Afɔ bi ahã wɔ, ahã wɔ binuu . . . Enɔyeli lɛ dalɛ kɛ toiŋjɔlɛ lɛ baŋ naagbee, yɛ David maŋtsɛ sɛi lɛ kɛ emaŋtsɛyeli lɛ nɔ, koni ekɛ jalɛsaneyeli kɛ jalɛ nifeemɔi ahã ema shi shiŋŋ.”—Yesaia 9:6, 7.
Mɔ ko ni afɔ lɛ yɛ Betlehem. ‘Betlehem, bo omli mɔ ni baafee nɔyelɔ lɛ baajɛ aba ahã mi. Egbojee lɛ baayashɛ shikpɔŋ lɛ naagbeehei lɛ.’—Mika 5:2, 4.
Mɔ ko ni mɛi baakpoo lɛ, ní amɛgbe lɛ. “Anyaŋe lɛ, ni wɔbuuu lɛ wɔhãaa nɔ ko. . . . Atsu lɛ nɔ yɛ wɔnɔtɔmɔi lɛ ahewɔ; atswia lɛ nii yɛ wɔtɔmɔi lɛ ahewɔ.”—Yesaia 53:3, 5.
Mɔ ko ni abaatee lɛ shi, ní awo ehiɛ nyam. “Oshiŋ mi yɛ Gbonyobu lɛ mli. Ohãŋ onɔkwafo lɛ ana bu lɛ. . . . Miishɛɛ yɛ oninejurɔ nɔ kɛmiiya naanɔ.”—Lala 16:10, 11.

Yesu Kristo—Nɔyelɔ Ni Sa Jogbaŋŋ

Yɛ yinɔsane mli fɛɛ lɛ, mɔ kome pɛ ni yɔɔ sui ni baahã efee Nɔyelɔ ni sa jogbaŋŋ; lɛ ji Yesu Kristo. Anɔkwa, ŋwɛibɔfo ko kɛɛ Maria, ni ji emami lɛ, akɛ: “Nyɔŋmɔ kɛ etsɛ David maŋtsɛ sɛi lɛ baahã lɛ, . . . ni e-Maŋtsɛyeli lɛ baŋ naagbee.”—Luka 1:31-33.

Yesu tsɔɔɔ nɔyelɔ yɛ shikpɔŋ lɛ nɔ. Moŋ lɛ, ebaajɛ ŋwɛi eye adesai anɔ akɛ Nyɔŋmɔ Maŋtsɛyeli lɛ nɔ Maŋtsɛ. Mɛni hãa ebafeɔ Nɔyelɔ ni sa jogbaŋŋ lɛ? Naa nibii ni efee be ni eyɔɔ shikpɔŋ lɛ nɔ lɛ.

Yesu ye ebua mɛi. Yesu ye ebua hii kɛ yei, onukpai kɛ gbekɛbii, ekɔɔɔ he eko shihilɛ mli ni amɛjɛ loo gbɛnaa ni amɛhiɛ. (Mateo 9:36; Marko 10:16) Be ko be ni kpitiyelɔ ko kpa Yesu fai akɛ: “Kɛ́ oosumɔ kome too lɛ, obaanyɛ ohã mihe atse” lɛ, emusuŋ tsɔ lɛ ni etsa lɛ.—Marko 1:40-42.
Yesu tsɔɔ wɔ bɔ ni wɔɔfee wɔsa Nyɔŋmɔ hiɛ. Ekɛɛ akɛ: “Nyɛnyɛŋ nyɛtsɔmɔ nyɔji nyɛhã Nyɔŋmɔ kɛ Ninámɔ fɛɛ.” Ewie hu akɛ, esa akɛ wɔkɛ mɛi aye tamɔ bɔ ni wɔbaasumɔ ni amɛkɛ wɔ aye ahã lɛ nɔŋŋ, ni atsɛɔ ŋaawoo nɛɛ akɛ Mla Kpakpa lɛ. Kɛfata he lɛ, etsɔɔ mli akɛ jeee wɔnifeemɔi pɛ Nyɔŋmɔ kwɛɔ, shi moŋ ekwɛɔ bɔ ni wɔsusuɔ nii ahe kɛ bɔ ni wɔnuɔ he wɔhãa hu. Hewɔ lɛ, kɛ́ wɔmiitao wɔsa Nyɔŋmɔ hiɛ lɛ, esa akɛ wɔkudɔ wɔsusumɔi kɛ wɔhenumɔi. (Mateo 5:28; 6:24; 7:12) Yesu ma nɔ mi akɛ, kɛ́ wɔmiitao wɔná miishɛɛ lɛɛlɛŋ lɛ, esa akɛ wɔle nɔ ni Nyɔŋmɔ sumɔɔ akɛ wɔfee, ni wɔfee.—Luka 11:28.
Yesu tsɔɔ bɔ ni ajieɔ suɔmɔ kpo ahãa. Yesu wiemɔi kɛ enifeemɔi ná etoibolɔi lɛ anɔ hewalɛ waa. “Mɛi ni bua shi lɛ ahe jɔ̃ amɛhe yɛ gbɛ ni etsɔ nɔ etsɔɔ nii lɛ hewɔ, ejaakɛ etsɔɔ amɛ nii akɛ mɔ ni yɔɔ hegbɛ.” (Mateo 7:28, 29) Etsɔɔ amɛ akɛ: “Nyɛsumɔa nyɛhenyɛlɔi.” Esɔle ehã mɛi ni gbe lɛ lɛ ateŋ mɛi komɛi po akɛ: “Ataa, kɛke amɛ, ejaakɛ amɛleee nɔ ni amɛfeɔ lɛ.”—Mateo 5:44; Luka 23:34.