Kɛjɛ be ni wɔ-Bɔlɔ lɛ bɔ adesai kɛbaa nɛɛ, etsɔ ŋwɛibɔfoi kɛ gbalɔi anɔ ejie ehe shi etsɔɔ wɔ. Kɛfata he lɛ, ehã aŋmala saji ni eesumɔ ni wɔle lɛ kɛ shi srɔtoi ni ewo akɛ ebaajɔɔ wɔ lɛ ashwie shi. Nyɔŋmɔ shiwoi nɛɛ baanyɛ ahã oná miishɛɛ wɔsɛɛ. Hewɔ lɛ, nɛgbɛ obaanyɛ ona Nyɔŋmɔ shiwoi nɛɛ yɛ ŋmɛnɛ?

Wɔbaanyɛ wɔna nibii ni Nyɔŋmɔ miisumɔ ni wɔle lɛ yɛ Ŋmalɛ Krɔŋkrɔŋ lɛ mli. (2 Timoteo 3:16) Nyɔŋmɔ tsɔ gbalɔi anɔ ehã aŋmala saji nɛɛ, shi mɛɛ gbɛ nɔ etsɔ efee nakai? Nyɔŋmɔ hã amɛle esusumɔi lɛ, ni amɛŋmala amɛshwie shi. (2 Petro 1:21) Nɔ ko ni tamɔ nakai yaa nɔ ŋmɛnɛ. Akɛ nɔkwɛmɔnɔ lɛ, kɛ́ nitsumɔtsɛ ko hã ewoloŋmalɔ ŋma wolo ko ehã lɛ lɛ, wɔkɛɔ akɛ nitsumɔtsɛ lɛ ni ŋma wolo lɛ, shi jeee woloŋmalɔ lɛ. No hewɔ lɛ, eyɛ mli akɛ Nyɔŋmɔ hã hii komɛi ŋmala nibii ni eesumɔ ni wɔle lɛ yɛ Ŋmalɛ Krɔŋkrɔŋ lɛ mli moŋ, shi lɛ ji mɔ ni ŋma, ejaakɛ lɛ esusumɔi yɔɔ mli.

Saji ni yɔɔ Ŋmalɛ Krɔŋkrɔŋ lɛ mli lɛ he hiaa waa aahu akɛ, Nyɔŋmɔ miisumɔ ni mɛi fɛɛ akane ni amɛnu shishi. Ŋmɛnɛ lɛ, mɛi ni jɛ “jeŋmaŋ fɛɛ jeŋmaŋ kɛ weku fɛɛ weku, kɛ wiemɔ fɛɛ wiemɔ” mli lɛ baanyɛ akase Nyɔŋmɔ “naanɔ sane kpakpa” lɛ he nii. (Kpojiemɔ 14:6) Nyɔŋmɔ eye ebua ni anyɛ atsɔɔ Ŋmalɛ Krɔŋkrɔŋ muu lɛ fɛɛ loo efã ko shishi kɛtee wiemɔi ni fa fe 3,000 amli, ni wolo ko wolo ko bɛ ni atsɔɔ shishi kɛtee wiemɔi babaoo amli nakai.