GREEK wiemɔ ni atsɔɔ shishi akɛ “shwiili” yɛ Jeŋ Hee Shishitsɔɔmɔ lɛ mli lɛ, baanyɛ akɔ shwiilii srɔtoi ahe. (Bɔf. 8:​28, 29, 38) Shi etamɔ nɔ ni shwiili ni no mli lɛ Etiopianyo lɛ ta mli lɛ da fe shwiili ni akɛyaa ta loo shwiili ni akɛdaa foi. Hã wɔkwɛ yiŋtoi komɛi ahewɔ ni wɔkɛɔ nakai lɛ.

Etiopianyo lɛ ji maŋ onukpa, ni he ni ejɛ kɛba lɛ jekɛ waa. Awie yɛ nuu nɛɛ he akɛ eyɛ “hegbɛ kpele yɛ Etiopia maŋnyɛ Kandake shishi, ni lɛ ekwɛɔ maŋnyɛ lɛ jwetri fɛɛ nɔ.” (Bɔf. 8:27) Yɛ blema lɛ, maŋ ni ŋmɛnɛ lɛ atsɛɔ lɛ Sudan lɛ kɛ ŋmɛnɛŋmɛnɛ beiaŋ Ejipt wuoyigbɛ maji lɛ ekomɛi fata Etiopia he. No hewɔ lɛ, no mli lɛ Etiopia da waa. Eyɛ mli akɛ ekolɛ jeee shwiili kome too lɛ nɔŋŋ ni nuu lɛ kɛfã gbɛ muu lɛ fɛɛ moŋ, shi akɛni gbɛ lɛ jekɛ hewɔ lɛ, eeenyɛ efee akɛ ehiɛ nibii babaoo ni he baahia lɛ kɛhã gbɛfãa lɛ. Yɛ blema lɛ, ayɛ shwiilii ni aha he ni hiɛ taii ejwɛ ni akɛholeɔ mɛi. Wolo ko (Acts—An Exegetical Commentary) wie akɛ: “Abaanyɛ akɛ jatsui pii awo shwiili ni tamɔ nɛkɛ lɛ mli, ekɛ gbɛfãa ŋɔɔ, ni abaanyɛ akɛfã gbɛ kakadaŋŋ hu.”

Be ni Filipo tsi ebɛŋkɛ shwiili lɛ, no mli lɛ Etiopianyo lɛ miikane nii. Biblia lɛ kɛɛ “be ni Filipo joɔ foi yɛ shwiili lɛ he lɛ, enu ni piafonyo lɛ miikane gbalɔ Yesaia wolo lɛ.” (Bɔf. 8:30) Yɛ blema lɛ, shwiili ni akɛfãa gbɛ lɛ ejooo foi waa. Enɛ hewɔ lɛ, ewaaa akɛ piafonyo lɛ baanyɛ akane nii be ni eta mli lɛ, ni agbɛnɛ hu, ewaaa akɛ Filipo baajo foi eyanina shwiili lɛ.

Etiopianyo lɛ kpa “Filipo fai ni ekwɔ ni ebata emasɛi.” (Bɔf. 8:31) Ataaa shi yɛ shwiili ni akɛdaa foi lɛ mli, bei pii lɛ, emli adamɔɔ. Shi sɛi yɛ shwiilii ni akɛfãa gbɛ lɛ amli bɔ ni piafonyo lɛ kɛ Filipo fɛɛ baanyɛ ata shi.

Yɛ nɔ ni aŋma yɛ Bɔfoi yitso 8, kɛ nɔ ni yinɔsane tsɔɔ lɛ hewɔ lɛ, bianɛ lɛ atɛŋɔ Etiopia piafonyo lɛ ni eta shwiili ni da fe shwiili ni akɛyaa ta loo akɛdaa foi lɛ mli yɛ wɔwoji lɛ amli.