Mina Hewalɛ Ni Biblia Mli Anɔkwalei Yɔɔ

Mɔ ni gba ji Vito Fraese

EEENYƐ eba akɛ onuko gbɛ́i ni ji Trentinara lɛ dã. Eji maŋ bibioo ko ni yɔɔ Naples wuoyigbɛ, yɛ Italy. Jɛmɛ ji he ni afɔ mifɔlɔi kɛ minyɛmi nuu nukpa Angelo yɛ. Yɛ Angelo fɔmɔ sɛɛ lɛ, mifɔlɔi lɛ fã kɛtee United States ni amɛyahi Rochester, yɛ New York, ni afɔ mi yɛ jɛmɛ yɛ afi 1926. Be klɛŋklɛŋ kwraa ni Tsɛ Ataa kɛ Yehowa Odasefoi kpe ji afi 1922, no mli lɛ atsɛɔ amɛ Biblia Kaselɔi. Etsɛɛɛ ni lɛ kɛ Awo fɛɛ batsɔmɔ Biblia Kaselɔi.

Tsɛ Ataa ji nuu ko ni yɔɔ kpoo, ni jwɛŋɔ waa, shi esumɔɔɔ ni ashishiuɔ mɛi. Kɛ́ ekwɛ bɔ ni osɔfoi lɛ etsɔɔɔ mɛi lɛ nɔ ko kpakpa ko lɛ, ewoɔ emlila aahu akɛ ehaaa hegbɛ ko ni ebaanyɛ ekɛtsɔɔ mɛi Biblia mli anɔkwalei lɛ aŋmɛɛ lɛ. Beni eba nitsumɔ mli hejɔɔmɔ lɛ, ekɛ ehe wo be fɛɛ sɔɔmɔ nitsumɔ lɛ mli, ni etsa nɔ aahu kɛyashi hela kɛ snoonɛmɔ beaŋ fɛ̃i ni naa wa lɛ ha ekpá beni eye afii 74. Shi yɛ nakai beaŋ po lɛ, etee nɔ ekɛ ŋmɛlɛtswai 40 kɛmiimɔ 60 shiɛ daa nyɔɔŋ kɛbote afii 90 afii lɛ amli. Tsɛ Ataa nɔkwɛmɔnɔ lɛ ná minɔ hewalɛ waa. Eyɛ mli akɛ eshwɛɔ moŋ, shi eji mɔ ko ni kɛ hiɛdɔɔ tsuɔ saji ahe nii. Efɔɔ kɛɛmɔ akɛ, “Esa akɛ wɔhiɛ adɔ yɛ anɔkwale lɛ he.”

Ataa kɛ Awo fɛɛ bɔ mɔdɛŋ akɛ amɛkɛ Nyɔŋmɔ Wiemɔ lɛ baatsɔse wɔ, ni ji amɛbii enumɔ lɛ fɛɛ. Abaptisi mi yɛ August 23, 1943, ni mibatsɔ daa gbɛgbalɔ yɛ June 1944. Minyɛmi yoo nukpa Carmela kɛ Fern ni he yɔɔ miishɛɛ waa lɛ fee ekome kɛtsu gbɛgbamɔ nitsumɔ lɛ yɛ Geneva, yɛ New York. Etsɛɛɛ ni mibayɔse akɛ Fern ji oblayoo ni masumɔ mi kɛ lɛ ahi shi miwala be ni eshwɛ lɛ fɛɛ. No hewɔ lɛ, wɔbote gbalashihilɛ mli yɛ August 1946.

Maŋsɛɛ Sanekpakpa Shiɛmɔ Nitsumɔ Lɛ

Klɛŋklɛŋ hei ni aha mi kɛ Fern ní wɔyashiɛ yɛ akɛ gbɛgbalɔi krɛdɛi ji Geneva kɛ Norwich, yɛ New York. Yɛ August 1948 lɛ, wɔná hegbɛ ni wɔtee Gilead skul, klas ni ji 12 nɔ̃ lɛ. No sɛɛ lɛ, aha wɔ, kɛ Carl Ridgeway kɛ eŋa Joanne ní amɛ hu amɛji maŋsɛɛ sanekpakpa shiɛlɔi lɛ yasɔmɔ yɛ Naples, yɛ Italy. No beaŋ lɛ, ta lɛ sɛɛ efo, ni kpaako aasaa nibii ni ta lɛ efite lɛ. Ewa akɛ wɔbaaná shĩa ni da bɔ ni sa, no hewɔ lɛ, wɔhi shĩa bibioo ko ni tsui enyɔ pɛ yɔɔ mli lɛ mli nyɔji fioo ko.

Beni miji gbekɛ lɛ, no mli lɛ minuɔ ní mifɔlɔi miiwie bɔ ni Naples maŋ lɛ nɔ bii lɛ wieɔ Italy wiemɔ lɛ amɛhaa lɛ, no hewɔ lɛ, eyɛ mli akɛ miwie Italy wiemɔ lɛ tamɔ Amerikanyo baawie lɛ lɛ moŋ, shi anu shishi. Fern náaa wiemɔ lɛ kasemɔ mlɛo. Shi enyɛ ekase, ni enaa batse fe mi po.

Shishijee mli lɛ, mɛi ni nya wiemɔ lɛ he yɛ Naples ji weku ko kɛ emlibii ejwɛ pɛ. Weku nɛɛ hɔɔ zigaret ni aju shi akɛba maŋ lɛ mli. Daa gbi dani amɛbaabɔi nitsumɔ lɛ, weku lɛ mlinyo kome ni atsɛɔ lɛ Teresa lɛ tsakeɔ kwraa. Kɛ́ ona lɛ leebi lɛ, obaasusu akɛ eshwi waa ejaakɛ ekɛ zigaret lɛ woɔ kotokui babaoo ni  yɔɔ eskɛɛti lɛ he lɛ mli fɛɛ. Shi beni je baana lɛ, efee legelege tamɔ blɔ wu. Anɔkwale lɛ tsake weku nɛɛ kwraa. Beni be shwie mli lɛ, weku nɛɛ mlibii 16 batsɔmɔ Odasefoi. Amrɔ nɛɛ, Odasefoi aaashɛ 3,700 ni yɔɔ Naples maŋ lɛ mli.

Ate Shi Awo Wɔnitsumɔ Lɛ

Beni wɔhi Naples nyɔji nɛɛhu sɛɛ lɛ, maŋ hiɛnyiɛlɔi lɛ shwie wɔyi ejwɛ lɛ fɛɛ kɛje maŋ lɛ mli. Wɔyahi Switzerland aaafee nyɔɔŋ kome, ni wɔku sɛɛ wɔba Italy akɛ gbɔi ni eba shisharamɔ. Aha mi kɛ Fern yasɔmɔ yɛ Turin. Shishijee mli lɛ, yoo ko kɛ etsu hai wɔ, ni ehaa wɔjuɔ wɔhe yɛ ehejuuhe lɛ, ni wɔhoɔ nii yɛ ekpatashi. Beni Carl Ridgeway kɛ eŋa bashɛ Turin lɛ, wɔkɛ amɛfɛɛ yahai shĩa kome. Beni be shwie mli lɛ, gbalashihilɛ mli hefatalɔi enumɔ ni ji maŋsɛɛ sanekpakpa shiɛlɔi hi nakai shĩa lɛ mli.

Yɛ afi 1955, beni maŋ hiɛnyiɛlɔi lɛ bi ni wɔshi maŋ lɛ mli lɛ, no mli lɛ ato asafo hei ejwɛ shishi. Agbɛnɛ nyɛmimɛi hii ni jɛ maŋ lɛ mli ni sa baanyɛ akwɛ asafoi nɛɛ anɔ. Maŋ hiɛnyiɛlɔi lɛ kɛɛ wɔ akɛ, “Wɔyɛ nɔmimaa akɛ kɛ́ nyɛ ni nyɛji Amɛrikabii lɛ shi nyɛtee lɛ, nyɛnitsumɔi lɛ fɛɛ baafee efolo.” Shi shweremɔ ni ba yɛ sɛɛ mli lɛ tsɔɔ akɛ Nyɔŋmɔ ji mɔ ni haa nitsumɔ lɛ shwereɔ. Ŋmɛnɛ lɛ, ayɛ Odasefoi ni fa fe 4,600 kɛ asafoi 56 yɛ Turin.

Florence—Maŋ Fɛɛfɛo

Beni wɔshi Turin lɛ aha wɔyasɔmɔ yɛ Florence. Wɔnu maŋ nɛɛ he saji babaoo, ejaakɛ jɛmɛ ji he ni minyɛmi yoo Carmela, kɛ ewu, Merlin Hartzler ni amɛji maŋsɛɛ sanekpakpa shiɛlɔi lɛ sɔmɔɔ yɛ. Hei tamɔ Piazza della Signoria, Ponte Vecchio, Piazzale Michelangelo kɛ Palazzo Pitti haa jɛmɛ shihilɛ ŋɔɔ waa! Bɔ ni Florence maŋ lɛ nɔ bii lɛ ekomɛi fee amɛnii yɛ sanekpakpa lɛ he lɛ yɛ miishɛɛ waa.

Wɔkɛ weku ko kase nii, ni abaptisi fɔlɔi lɛ. Shi no mli lɛ tsɛ lɛ shɛreɔ tawa. Yɛ afi 1973 lɛ, Buu-Mɔɔ lɛ tsɔɔ akɛ tawa shɛremɔ jeee su kpakpa, ni ewo mɛi ni kaneɔ lɛ hewalɛ koni amɛkpa. Nuu nɛɛ bii ni edara lɛ kpa lɛ fai koni ekpa. Ewo amɛ shi akɛ ebaakpa, shi ekpaaa. Gbi ko gbɛkɛ lɛ, eŋa lɛ ha amɛbihii haaji ni amɛye afii nɛɛhu lɛ yakã shi ní ekɛ amɛ sɔleee. Sɛɛ mli lɛ, nɔ ni efee lɛ gba enaa ni eku esɛɛ etee gbekɛbii lɛ atsu lɛ mli ekoŋŋ. Beni etee lɛ amɛ diɛŋtsɛ amɛsɔle momo. Ebi amɛ akɛ:  “Mɛni nyɛkɛɛ yɛ sɔlemɔ lɛ mli?” Amɛkɛɛ lɛ akɛ: “Yehowa, ofainɛ ye obua Dada ni ekpa tawa shɛremɔ.” Yoo lɛ tsɛ ewu ni ekɛɛ, “Ba ni obabo obii lɛ asɔlemɔ lɛ toi.” Beni ebabo toi lɛ, ejwa yaafo ni ekɛɛ, “Mishɛreŋ tawa dɔŋŋ!” Eye eshiwoo lɛ nɔ, ni amrɔ nɛɛ, weku nɛɛ mlibii ni fa fe 15 ji Odasefoi.

Wɔsɔmɔ yɛ Afrika

Yɛ afi 1959 lɛ, aha wɔkɛ Arturo Leveris kɛ minyɛmi nuu Angelo ni amɛ hu amɛji maŋsɛɛ sanekpakpa shiɛlɔi lɛ yasɔmɔ yɛ Mogadishu, yɛ Somalia. Beni wɔshɛ jɛmɛ lɛ, no mli lɛ maŋkwramɔŋ saji eha jɛmɛ shihilɛ lɛ bɛ shweshweeshwe. No mli lɛ, Jeŋmaji Ekomefeemɔ lɛ kɛwo Italy nɔyeli lɛ dɛŋ koni eye ebua Somalia maŋ lɛ kɛyashi amɛ diɛŋtsɛ amɛbaanyɛ amɛye amɛhe nɔ, shi nibii eyaaa lɛ jogbaŋŋ. Italybii komɛi ni wɔkɛkase nii lɛ shi maŋ lɛ nɔ, ni no hewɔ lɛ wɔnyɛɛɛ wɔto asafo yɛ jɛmɛ.

Nakai be mli ni zone overseer lɛ kɛɛ mi akɛ mifata ehe kɛsɔmɔ. Hewɔ lɛ wɔbɔi maji ni bɛŋkɛ Somalia lɛ saramɔ. Mɛi ni wɔkɛkase Biblia lɛ ateŋ mɛi komɛi tee hiɛ waa, shi shiteekɛwoo ni amɛkɛkpe lɛ ha amɛshi amɛjakumaji lɛ anɔ. Mɛi krokomɛi hi shi, eyɛ mli akɛ amɛkɛ jaramɔ shihilɛi babaoo kpe. * Kɛbashi amrɔ nɛɛ, kɛ́ wɔjwɛŋ suɔmɔ ni amɛyɔɔ kɛha Yehowa, kɛ nibii ni amɛtsɔ mli shi fɛɛ sɛɛ lɛ amɛtee nɔ amɛye anɔkwa lɛ nɔ lɛ, etaa wɔtsuiŋ waa.

Bei pii lɛ jeŋ dɔɔ waa yɛ Somalia kɛ Eritrea. Amɛniyenii lɛ ekomɛi haa dɔlɛ lɛ naa waa. Gbi klɛŋklɛŋ ni wɔye niyenii nɛɛ eko yɛ wɔ-Biblia kaselɔi lɛ eko shĩa lɛ, miŋa kɛfee shwɛmɔ ni ekɛɛ akɛ etoii tsu paa tamɔ trafik kane ni esu etsuru!

Beni aha Angelo kɛ Arturo yasɔmɔ yɛ he kroko lɛ, eshwɛ wɔ pɛ. Wɔnáaa mɔ ko ni baawo wɔ hewalɛ, ni enɛ bɛ mlɛo kwraa kɛha wɔ. Shi no ha wɔtsi wɔbɛŋkɛ Yehowa kpaakpa ni wɔná hekɛnɔfɔɔ babaoo yɛ emli. Wɔyasara maji ni atsi shiɛmɔ nitsumɔ lɛ naa yɛ jɛmɛ lɛ, ni enɛ wo wɔ hewalɛ waa.

Wɔkɛ naagbai srɔtoi kpe yɛ Somalia. No mli lɛ wɔbɛ friji, hewɔ lɛ wɔheɔ niyenii ni baashɛ wɔ gbi kome pɛ, kɛ́ eji loo jio, aduawai tamɔ maŋo, akpakpa, akutu, akokooshi, loo akwadu jio. Bei pii lɛ flikilɔi gbaa wɔnaa. Bei komɛi kɛ́ wɔkɛ mɛi miikase nii lɛ, amɛbasɔ̃mɔɔ wɔkuɛ he. Shi wɔyɛ moto bibioo ko hewɔ lɛ, wɔnyiɛɛɛ hulu ni naa wa lɛ nɔ pii.

Wɔku Wɔsɛɛ Kɛba Italy

Yɛ yelikɛbuamɔ ni wɔnanemɛi kɛha wɔ lɛ hewɔ lɛ, wɔná lɛlɛ ko ni akɛwóɔ akwadu mli  wɔta kɛtee majimaji ateŋ kpee ni afee yɛ afi 1961 yɛ Turin yɛ Italy lɛ. Wɔná wɔle akɛ abaaha wɔyasɔmɔ yɛ he kroko. Yɛ September 1962 lɛ, wɔku wɔsɛɛ kɛtee Italy, ni mibɔi sɔɔmɔ yɛ jɛmɛ akɛ kpokpaa nɔkwɛlɔ. Wɔhé kar bibioo ko, ni wɔkɛtsu nii afii enumɔ yɛ kpokpai srɔtoi enyɔ amli.

Yɛ jeŋ dɔlɛ babaoo ni wɔkɛkpe yɛ Afrika lɛ sɛɛ lɛ, agbɛnɛ lɛ ehe bahia ni wɔdamɔ fɛi ni naa wa naa. Beni wɔyasara asafo ko ni yɔɔ Alps gɔji lɛ shishi yɛ klɛŋklɛŋ snoonɛmɔ be ni wɔkɛkpe lɛ mli lɛ, wɔyahi tsu ko ni yɔɔ tsu ni akɛ kooloi aniyenii woɔ mli lɛ yiteŋ lɛ mli, ni la bɛ jɛmɛ ni baaha wɔhe adɔ. Fɛi ni yɔɔ jɛmɛ lɛ sɔŋŋ hewɔ lɛ, wɔwo wɔkootui lɛ kɛwɔ. Nakai gbɛkɛ lɛ, fɛi lɛ gbe wuɔi ejwɛ, kɛ gbeei enyɔ ni yɔɔ jɛmɛ niiaŋ lɛ!

Sɛɛ mli lɛ, misɔmɔ hu akɛ kpokpaa wulu nɔkwɛlɔ. Yɛ nakai afii lɛ amli lɛ, wɔtsu nii yɛ Italy fɛɛ. Wɔyasara hei komɛi tamɔ Calabria kɛ Sicily shii abɔ. Wɔwo oblahii kɛ oblayei bibii hewalɛ koni amɛya amɛhiɛ yɛ mumɔŋ, ní amɛkɛ otii amamɔ amɛhiɛ akɛ amɛbaasɔmɔ akɛ asafoŋ onukpai, nɔkwɛlɔi gbɛfalɔi, loo Betelbii.

Wɔkase nii babaoo kɛjɛ wɔnanemɛi anɔkwafoi ni kɛ amɛtsui fɛɛ esɔmɔ Yehowa lɛ adɛŋ. Wɔhiɛ esɔ sui kpakpai ni amɛjieɔ lɛ kpo, tamɔ anɔkwa ni amɛyeɔ Yehowa kwraa, ejurɔ ni amɛfeɔ, suɔmɔ ni amɛyɔɔ kɛha amɛnyɛmimɛi lɛ, bɔ ni amɛtsakeɔ amɛhe kɛwoɔ shihilɛi srɔtoi amli, kɛ hekɛafɔleshaa mumɔ ni amɛyɔɔ lɛ. Wɔtee yookpeemɔi yɛ Maŋtsɛyeli Asai anɔ. Odasefoi ni akpɛlɛ amɛnɔ yɛ mla naa akɛ osɔfoi kwɛ nɔ, eyɛ mli akɛ afii komɛi ni eho lɛ wɔsusuuu akɛ nɔ ko ni tamɔ nakai baanyɛ aba. Amrɔ nɛɛ, afeee kpeei yɛ nyɛmimɛi akpatashi, ni nyɛmimɛi taraaa ŋmoŋmolo tsei anɔ tamɔ beni tsutsu ko lɛ afeɔ yɛ Turin lɛ dɔŋŋ. Moŋ lɛ, asafoi babaoo kpeɔ yɛ Maŋtsɛyeli Asai fɛfɛji ni woɔ Yehowa hiɛ nyam anɔ. Amrɔ nɛɛ wɔfeee kpeei wuji yɛ hei ní ayakwɛɔ drama yɛ ní nibii bɛ jɛmɛ bɔ ni sa kɛha kpeei lɛ dɔŋŋ, shi moŋ yɛ Kpeei Asai ni mli dara anɔ. Ni kwɛ bɔ ni wɔnáa miishɛɛ akɛ amrɔ nɛɛ shiɛlɔi lɛ ayi efa fe 243,000. Beni wɔtee Italy klɛŋklɛŋ kwraa lɛ, no mli lɛ shiɛlɔi 490 pɛ yɔɔ jɛmɛ.

Wɔkɔ Gbɛ ni Hi

Wɔkɛ naagbai srɔtoi ekpe, ni ekomɛi ji wɔhiɛ ni tseɔ shĩa, kɛ hela. Be ko ni eho lɛ, be fɛɛ be ni Fern baana ŋshɔ lɛ, ehiɛ tseɔ shĩa. Agbɛnɛ hu, afee lɛ opireshɛn wuji etɛ. Be ko beni enyiɛ gbɛ kɛmiiya eyafee Biblia mli nikasemɔ lɛ, shiteekɛwolɔ ko kɛ ŋmɔ mli faka batutua lɛ. No hu ha eyagbe naa yɛ helatsamɔhe.

Eyɛ mli akɛ bei komɛi lɛ wɔnijiaŋ jeɔ wui moŋ, shi taakɛ Yaafo 3:24 lɛ kɛɔ lɛ, ‘wɔhiɛ  kã Yehowa nɔ.’ Eji miishɛjemɔ Nyɔŋmɔ. Be ko beni wɔnijiaŋ eje wui lɛ, Fern nine shɛ wolo ko nɔ kɛjɛ Nyɛminuu Nathan Knorr dɛŋ ni wo lɛ hewalɛ waa. Eŋma akɛ, akɛni afɔ́ lɛ yɛ Bethlehem, Pennsylvania, he ni Fern bɔi gbɛgbamɔ nitsumɔ lɛ yɛ lɛ hewɔ lɛ, ele jogbaŋŋ akɛ Fern baafee mɔ ko ni he wa ni hiɛ wa hu, ejaakɛ eji Pennsylvania Dutch yoo. Nɔ ni eŋma lɛ ji anɔkwale. Yɛ afii ni eho lɛ amli lɛ, wɔnine eshɛ hewalɛwoo nɔ yɛ gbɛi srɔtoi anɔ, kɛ agbɛnɛ hu kɛjɛ mɛi srɔtoi adɛŋ.

Yɛ naagbai ni wɔkɛkpeɔ lɛ fɛɛ sɛɛ lɛ, wɔbɔɔ mɔdɛŋ akɛ ekãa ni wɔkɛtsuɔ sɔɔmɔ nitsumɔ lɛ naa akaba shi. Bei pii lɛ, Fern kɛ ekãa ni akɛtsuɔ nii lɛ toɔ Lambrusco, ni ji Italybii lɛ awein ko ni ŋɔɔ ni tswaa afui lɛ he, ni ekɛfeɔ shwɛmɔ ekɛɔ akɛ, “Esaaa akɛ wɔhaa wɔmumɔ lɛ kpaa afui tswaa.” Beni wɔkɛ nɔ ni fa fe afii 40 etsu nii yɛ kpokpaa nɔkwɛmɔ kɛ kpokpaa wulu nɔkwɛmɔ nitsumɔ lɛ mli lɛ, akɛ hegbɛ hee ha wɔ akɛ wɔyasara kui kɛ asafoi ni ewieee Italy wiemɔ lɛ, ni wɔto amɛhe gbɛjianɔ. Kui nɛɛ shiɛɔ amɛhaa mɛi ni jɛ Bangladesh, China, Eritrea, Ethiopia, Ghana, India, Nigeria, Philippine Ŋshɔkpɔi lɛ, Sri Lanka, kɛ shikpɔji krokomɛi anɔ lɛ. Kɛ́ mikɛɛ magba bɔ ni hewalɛ ni Nyɔŋmɔ Wiemɔ lɛ yɔɔ lɛ etsake mɛi ni esa Yehowa mɔbɔnalɛ lɛ naa amɛkwɛ lɛ ashihilɛ eha lɛ, anyɛŋ aŋma fɛɛ yɛ wolo mli.—Mika 7:18, 19.

Wɔsɔleɔ daa gbi ni Yehowa aya nɔ aha wɔ hewalɛ yɛ gbɔmɔtsoŋ kɛ henumɔŋ koni wɔnyɛ wɔkɛtsu wɔsɔɔmɔ nitsumɔ lɛ. Nuŋtsɔ lɛ he nyamɔ lɛ ji wɔhewalɛ. Ehaa wɔnáa miishɛɛ, ni wɔnáa nɔmimaa hu akɛ wɔkɔ gbɛ ni hi yɛ shihilɛ mli akɛ wɔbaashiɛ Biblia mli anɔkwale lɛ.—Efe. 3:7; Kol. 1:29.

[Shishigbɛ niŋmaa]

[Akrabatsa/Mfonirii ni yɔɔ baafa 27-29]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Mifɔlɔi yɛ Rochester, NY

1948

Beni miyɔɔ South Lansing kɛha Gilead klas ni ji 12 lɛ

1949

Mi kɛ Fern, dani wɔbaashi kɛya Italy lɛ

Capri, yɛ Italy

1952

Wɔkɛ maŋsɛɛ sanekpakpa shiɛlɔi krokomɛi yɛ Turin kɛ Naples

1963

Fern kɛ e-Biblia kaselɔi komɛi

“Esaaa akɛ wɔhaa wɔmumɔ lɛ kpaa afui tswaa”