Nyɛhaa Nyɛwiemɔ Afea Hɛɛ, Hɛɛ
Nyɛhaa Nyɛwiemɔ Afea Hɛɛ, Hɛɛ
“Nyɛhaa nyɛwiemɔ afea: Hɛɛ, hɛɛ! dabi, dabi!”—MAT. 5:37.
KWƐMƆ AKƐ OBAANYƐ OHA HETOO LO:
Mɛni Yesu wie yɛ kitakamɔ he?
Mɛɛ gbɛ nɔ Yesu ha ewiemɔ fee hɛɛ, hɛɛ ni ekɛfee nɔkwɛmɔnɔ kpakpa eha wɔ?
Mɛɛ shihilɛi amli esa akɛ wɔha wɔwiemɔ afee hɛɛ, hɛɛ?
1. Mɛni Yesu kɛɛ yɛ kitakamɔ he, ni mɛni hewɔ?
BEI pii lɛ, ehe ehiaaa ni anɔkwa Kristofoi akã kita. Ejaakɛ amɛyeɔ Yesu fãmɔ akɛ: ‘Nyɛhaa nyɛwiemɔ afea: Hɛɛ, hɛɛ’ lɛ nɔ. Nɔ ni ekɛɛ lɛ tsɔɔ akɛ, kɛ́ mɔ ko wie nɔ ko lɛ, esa akɛ eye nɔ. No mli lɛ, Yesu etsɔ hiɛ ewie akɛ: “Nyɛkakãa kitã kwraa!” Ewie enɛ ejaakɛ mɛi ni yɔɔ ebeaŋ lɛ kãa kita kɛkɛ ní amɛfeko amɛjwɛŋmɔ po akɛ amɛbaaye nɔ ni amɛkɛɔ lɛ nɔ. Kɛ́ mɔ ko kã kita yɛ nɔ ko he ni eyeee nɔ lɛ, mɔ lɛ tsɔɔ diɛŋtsɛ akɛ anyɛŋ amu afɔ enɔ, ni ákɛ, “mɔ fɔŋ” lɛ miikudɔ lɛ.—Nyɛkanea Mateo 5:33-37.
2. Mɛni hewɔ ejeee tɔmɔ akɛ mɔ ko baakã kita bei komɛi lɛ?
2 Ani Yesu miitsɔɔ akɛ be fɛɛ be ni mɔ ko baakã kita lɛ etɔ̃? Jeee nakai etsɔɔ. Taakɛ wɔkase yɛ nikasemɔ ni tsɔ hiɛ lɛ mli lɛ, Yehowa Nyɔŋmɔ kɛ etsulɔ anɔkwafo Abraham fɛɛ kãmɔ kita yɛ saji ni he hiaa ahe. Kɛfata he lɛ, Nyɔŋmɔ Mla lɛ bi ni akã kita kɛtsu naagbai komɛi ahe nii. (2 Mose 22:10, 11; 4 Mose 5:21, 22) No hewɔ lɛ, ekolɛ ehe baahia ni Kristofonyo ko akã kita yɛ saneyelihe kɛma nɔ mi akɛ ebaawie anɔkwale. Aloo yɛ shihilɛi ni efɔɔɔ kaa amli lɛ, ekolɛ ehe baahia ni Kristofonyo ko akã kita kɛma nɔ ko ni etaoɔ efee lɛ nɔ mi, loo koni ekɛtsɔɔ akɛ nɔ ni ebaawie lɛ ji anɔkwale. Beni osɔfonukpa ni yɔɔ Yudafoi Akuashɔŋ lɛ mli lɛ kɛ kitakamɔ bi ni Yesu awie anɔkwale lɛ, ewie anɔkwale. (Mat. 26:63, 64) Kɛlɛ, ehe ehiaaa ni Yesu akã kita, ejaakɛ ewieɔ anɔkwale daa. Shi bei komɛi lɛ, ekɛ wiemɔ ni ji “Lɛlɛŋ, lɛlɛŋ, miikɛɛ nyɛ akɛ” lɛ jeɔ ewiemɔ shishi koni ekɛma esane lɛ nɔ mi. (Yoh. 1:51; 13:16, 20, 21, 38) Nyɛhaa wɔsusua nibii krokomɛi ni wɔbaanyɛ wɔkase kɛjɛ Yesu, Paulo, kɛ mɛi krokomɛi ni ha amɛwiemɔ fee hɛɛ, hɛɛ lɛ aŋɔɔ.
YESU HA EWIEMƆ FEE HƐƐ, HƐƐ
3. Mɛɛ shi Yesu wo Nyɔŋmɔ yɛ sɔlemɔ mli, ni te eŋwɛi Tsɛ lɛ here sɔlemɔ lɛ nɔ eha tɛŋŋ?
3 “Naa, miba . . . ní mibafee bo, Nyɔŋmɔ osuɔmɔnaa nii.” (Heb. 10:7) Yesu tsɔ sɔlemɔ nɛɛ nɔ ewo Nyɔŋmɔ shi akɛ ebaatsu nɔ fɛɛ nɔ ni agba yɛ shiwoo Seshi lɛ he, ní “enanetsitsi nɔ” ni Satan ‘baatswa’ lɛ hu fata he lɛ he nii. (1 Mose 3:15) Adesa ko kwraa bɛ ni eŋɔ sɔ̃ ni tsii tamɔ nɛkɛ efɔ̃ enɔ pɛŋ. Yehowa wie kɛjɛ ŋwɛi kɛtsɔɔ akɛ eyɛ hekɛnɔfɔɔ yɛ e-Bi lɛ mli, eyɛ mli akɛ ebiii ni Yesu akã kita akɛ ebaaye eshiwoo lɛ nɔ.—Luka 3:21, 22.
4. Mɛni Yesu fee koni no aha ewiemɔ afee hɛɛ, hɛɛ?
4 Yesu ha ewiemɔ fee hɛɛ, hɛɛ, kɛtsɔ nɔ ni eshiɛ lɛ ni ehi shi yɛ naa be fɛɛ be lɛ nɔ. Yesu haaa nɔ ko agbala ejwɛŋmɔ kɛjɛ nitsumɔ ni e-Tsɛ lɛ kɛwo edɛŋ akɛ eshiɛ Nyɔŋmɔ Maŋtsɛyeli lɛ he sanekpakpa lɛ nɔ, ni efee mɛi ni Nyɔŋmɔ gbala kɛba eŋɔɔ lɛ kaselɔi. (Yoh. 6:44) Biblia lɛ haa wɔnaa bɔ ni Yesu ye shi ni ewo lɛ nɔ kɛtsɔ wiemɔi nyiɛ sɛɛ nɛɛ anɔ akɛ: “Nyɔŋmɔ shiwoi abɔ ni yɔɔ nɛɛ, emli hɛɛ lɛ yɔɔ.” (2 Kor. 1:20) Kɛ́ aawie mɛi ni wo Nyɔŋmɔ shi ni amɛye nɔ lɛ ahe lɛ, Yesu ji mɔ ni fe fɛɛ lɛɛlɛŋ. Agbɛnɛ, nyɛhaa wɔsusua mɔ ko ni bɔ mɔdɛŋ waa ekase Yesu lɛ he wɔkwɛa.
PAULO HA EWIEMƆ FEE HƐƐ, HƐƐ
5. Mɛɛ nɔkwɛmɔnɔ Paulo fee eha wɔ?
5 “Mɛni mafee, Nuŋtsɔ?” (Bɔf. 22:10) Enɛ ji nɔ ni Paulo, ni no mli lɛ atsɛɔ lɛ Saulo lɛ wie beni Nuŋtsɔ Yesu jie ehe kpo yɛ ninaa mli etsɔɔ lɛ koni ekpa Kristofoi lɛ ayi waa lɛ. Enɛ ha Saulo je ehe sɛɛ, ni eha abaptisi lɛ, ni ekpɛlɛ nitsumɔ krɛdɛɛ ni akɛwo edɛŋ akɛ eye Yesu he odase etsɔɔ jeŋmajiaŋbii lɛ nɔ. Kɛjɛ nakai be lɛ nɔ kɛbaa lɛ, Paulo tee nɔ etsɛ Yesu akɛ ‘e-Nuŋtsɔ,’ ni ehi shi yɛ nakai wiemɔ lɛ naa kɛyashi egbo. (Bɔf. 22:6-16; 2 Kor. 4:5; 2 Tim. 4:8) Paulo efeee enii tamɔ mɛi ni Yesu bi amɛ akɛ: “Shi mɛni hewɔ nyɛtsɛɔ mi akɛ: Nuŋtsɔ, Nuŋtsɔ! ni nyɛfeee nii ni mikɛɔ lɛ?” (Luka 6:46) Hɛɛ, Yesu miikpa mɛi fɛɛ ni kpɛlɛɔ enɔ akɛ amɛ-Nuŋtsɔ lɛ gbɛ akɛ amɛye amɛwiemɔ nɔ taakɛ Paulo fee lɛ.
6, 7. (a) Mɛni hewɔ Paulo ha esɛɛ gbala shi kɛ Korinto asafo lɛ saramɔ lɛ, ni mɛni hewɔ mɛi ni wie amɛshi lɛ akɛ ewieee anɔkwale lɛ asane ejaaa? (b) Mɛɛ su esa akɛ wɔjie lɛ kpo wɔtsɔɔ wɔnɔkwɛlɔi lɛ?
6 Paulo kɛ ekãa jaje Maŋtsɛyeli lɛ he sane lɛ yɛ Asia Bibioo lɛ kɛ Yuropa fɛɛ, eto asafoi babaoo, ni eku esɛɛ eyasara asafoi nɛɛ. Bei komɛi lɛ, ekãa kita kɛmaa sane ko ni eŋma lɛ nɔ mi akɛ eji anɔkwale. (Gal. 1:20) Beni mɛi komɛi folɔ Paulo naa yɛ Korinto akɛ nɔ ni ewieɔ jeee anɔkwale lɛ, eŋma kɛfã ehe akɛ: “Anɔkwafo ji Nyɔŋmɔ, akɛ wɔwiemɔ ni wɔkɛ nyɛ wie lɛ ejeee hɛɛ kɛ dabi shi kome.” (2 Kor. 1:18) Beni Paulo ŋma sane nɛɛ, no mli lɛ eshi Efeso, ni eetsɔ Makedonia kɛya Korinto. Kulɛ, eto ni ebaaya Korinto dani eya Makedonia. (2 Kor. 1:15, 16) Shi taakɛ bei komɛi lɛ ebaalɛ yɛ nɔkwɛlɔi gbɛfalɔi ni yɔɔ ŋmɛnɛ lɛ agbɛfaŋ lɛ, ehe bahia ni etsake egbɛfãa lɛ mli. Jeee amɛ diɛŋtsɛ amɛhilɛkɛhamɔ loo nɔ ko ni he ehiaaa hewɔ amɛfeɔ nakai tsakemɔi lɛ, shi moŋ lɛ shihilɛ ko ni haa ebaalɛ nakai. Korinto asafo lɛ hilɛkɛhamɔ hewɔ Paulo ha esɛɛ gbala shi fioo kɛ amɛsaramɔ lɛ. Mɛni hewɔ?
7 Beni Paulo to gbɛjianɔ kɛha amɛsaramɔ lɛ, enu akɛ mligbalamɔ yɛ Korinto asafo lɛ mli, ni amɛŋmɛ mɔ ko ni kɛ ehe miiwo jeŋba sha mli lɛ gbɛ ni ehi asafo lɛ mli. (1 Kor. 1:11; 5:1) Yɛ klɛŋklɛŋ wolo ni Paulo ŋma Korinto asafo lɛ mli lɛ, ekɛ hiɛdɔɔ bɔ amɛ kɔkɔ koni amɛtsu saji nɛɛ ahe nii. No sɛɛ lɛ, yɛ nɔ najiaŋ ni ebaafo lɛlɛ kɛjɛ Efeso kɛya Korinto tɛ̃ɛ lɛ, ekpɛ eyiŋ akɛ ebaaha enyɛmimɛi lɛ bei fioo ni amɛkɛtsu sane lɛ he nii koni kɛ́ etee lɛ, esaramɔ lɛ awo amɛ hewalɛ. Yɛ wolo ni ji enyɔ ni Paulo ŋma amɛ lɛ mli lɛ, eha amɛle akɛ enɛ hewɔ ni esɛɛ gbala shi lɛ beni ekɛɛ akɛ: “Miitsɛ́ Nyɔŋmɔ ni ebaye misusuma odase, akɛ nyɛyibaamɔ hewɔ ni mináko maba Korinto lɛ.” (2 Kor. 1:23) Esaaa akɛ wɔfeɔ wɔnii tamɔ mɛi ni wie amɛshi Paulo lɛ, shi moŋ nyɛhaa wɔjiea bulɛ ni mli kwɔ kpo wɔtsɔa wɔnɔkwɛlɔi lɛ. Anɔkwa sane ji akɛ, esa akɛ wɔbɔ mɔdɛŋ wɔkase Paulo, taakɛ ekase Kristo lɛ.—1 Kor. 11:1; Heb. 13:7.
MƐI KROKOMƐI NI HA AMƐWIEMƆ FEE HƐƐ, HƐƐ
8. Mɛɛ nɔkwɛmɔnɔ Rebeka fee eha wɔ?
8 “Matee.” (1 Mose 24:58) Enɛ ji nɔ ni Rebeka wie beni enyɛ kɛ enyɛmi nuu lɛ bi lɛ kɛji ebaasumɔ ni eshi shĩa nakai gbi lɛ nɔŋŋ, ni efã gbɛ kilomitai 800 ni ekɛ Abraham bi Isak ni eleee lɛ lɛ ayahi shi akɛ ewu lɛ. (1 Mose 24:50-58) Rebeka ha ewiemɔ fee hɛɛ, hɛɛ, ni ekɛ Isak yahi shi, ni ehi shi akɛ ŋa kpakpa, ni ekɛ anɔkwayeli sɔmɔ Nyɔŋmɔ. Enɛ babi ni ehi shi yɛ bui amli akɛ mɔkpɔŋ yɛ Shiwoo Shikpɔŋ lɛ nɔ ewala gbii abɔ fɛɛ. Akɛni eye ewiemɔ nɔ hewɔ lɛ, Nyɔŋmɔ jɔɔ lɛ ni eha ebatsɔ Yesu Kristo, ni ji shiwoo Seshi lɛ blemanyɛ.—Heb. 11:9, 13.
9. Mɛɛ gbɛ nɔ Rut ha ewiemɔ fee dabi, dabi?
9 “Dabi, shi wɔkɛo aaatee omaŋbii lɛ aŋɔɔ!” (Rut 1:10) Moab yei okulafoi enyɔ, Rut kɛ Orpa tee nɔ amɛwie nɛkɛ amɛtsɔɔ amɛshaayoo Naomi, ni lɛ hu eji okulafo lɛ. No mli lɛ, eeku esɛɛ kɛmiijɛ Moab kɛmiiya Betlehem. Naomi tee nɔ ekpa amɛfai aahu ni amɛku amɛsɛɛ, ni sɛɛ mli lɛ, Orpa ku esɛɛ etee emaŋ. Shi Rut ha ewiemɔ fee dabi, dabi. (Nyɛkanea Rut 1:16, 17.) Ekɛ ehe kpɛtɛ Naomi he, ni eshi ewekumɛi kɛ apasa nyɔŋmɔi ni Moabbii lɛ jáa lɛ kwraa. Etee nɔ ekɛ anɔkwayeli já Yehowa, ni Yehowa hu jɔɔ lɛ. Efata yei enumɔ pɛ ni Mateo tsi amɛtã akɛ Kristo blemanyɛmɛi lɛ ahe.—Mat. 1:1, 3, 5, 6, 16.
10. Mɛni hewɔ Yesaia ji nɔkwɛmɔnɔ kpakpa kɛha wɔ lɛ?
10 “Naa mi, tsũ mi!” (Yes. 6:8) Dani Yesaia baawie enɛ lɛ, no mli lɛ ena Yehowa yɛ ninaa ko ni yɔɔ nyam mli ni eta E-maŋtsɛsɛi nɔ yɛ Israel sɔlemɔtsu lɛ yiteŋ. Yɛ ninaa lɛ mli lɛ, Yesaia nu ni Yehowa bi akɛ: “Namɔ matsũ? ni namɔ aaatee aha wɔ?” No mli lɛ, Yehowa miibi mɔ ni baaya ni ekɛ ewiemɔ lɛ ayaha E-webii ni toi egbo lɛ. Yesaia ha ewiemɔ fee hɛɛ, hɛɛ. Ekɛ anɔkwayeli sɔmɔ akɛ gbalɔ nɔ ni fa fe afii 46, ni ejaje fɔbuu wiemɔi ni naa wala kɛ shiwoi ni yɔɔ miishɛɛ ni kɔɔ bɔ ni abaasaa ato anɔkwa jamɔ shishi ekoŋŋ lɛ he.
11. (a) Mɛni hewɔ ehe hiaa waa ni wɔha wɔwiemɔ afee hɛɛ, hɛɛ lɛ? (b) Namɛi awie amɛhe akɛ amɛhaaa amɛwiemɔ afee hɛɛ, hɛɛ?
11 Mɛni hewɔ Yehowa ha aŋmala saji nɛɛ aha wɔ yɛ e-Wiemɔ lɛ mli lɛ? Ni mɛni hewɔ ehe hiaa ni wɔha wɔwiemɔ afee hɛɛ, hɛɛ lɛ? Biblia lɛ bɔɔ kɔkɔ akɛ “kpaŋmɔ mlikulɔi” fata mɛi ni “sa gbele” lɛ ahe. (Rom. 1:31, 32) Mizraim Maŋtsɛ Farao, Yuda Maŋtsɛ Zedekia, kɛ Anania kɛ Safira haaa amɛwiemɔ afee hɛɛ, hɛɛ. Amɛ fɛɛ amɛnaagbee eyahiii, ni amɛnifeemɔ lɛ ji kɔkɔbɔɔ kɛha wɔ.—2 Mose 9:27, 28, 34, 35; Ezek. 17:13-15, 19, 20; Bɔf. 5:1-10.
12. Mɛni baaye abua wɔ koni wɔwiemɔ afee hɛɛ, hɛɛ?
12 Akɛni wɔyɛ “naagbee gbii lɛ” amli hewɔ lɛ, ‘mɛi ni yeee anɔkwa,’ kɛ “mɛi ni hiɛ Nyɔŋmɔ jamɔ su, shi amɛkwa emli hewalɛ lɛ” ebɔle wɔ. (2 Tim. 3:1-5) Esaaa akɛ wɔkɛ nanemɛi fɔji ni tamɔ nɛkɛ lɛ bɔɔ yɛ gbɛ ko kwraa nɔ. Yɛ no najiaŋ lɛ, esa akɛ wɔkɛ mɛi ni haa amɛwiemɔ feɔ hɛɛ, hɛɛ lɛ abɔ daa.—Heb. 10:24, 25.
HƐƐ NI HE HIAA FE FƐƐ NI OKƐƐ
13. Mɛɛ hɛɛ ni he hiaa fe fɛɛ ni mɔ fɛɛ mɔ ni ebatsɔ Yesu Kristo sɛɛnyiɛlɔ lɛ ekɛɛ yɛ bei srɔtoi etɛ mli?
13 Shi ni he hiaa fe fɛɛ ni mɔ ko baanyɛ awo lɛ kɔɔ yiŋ ni ebaakpɛ akɛ ebaasɔmɔ Nyɔŋmɔ lɛ he. Abiɔ ni mɛi ni miisumɔ ni amɛkwa amɛhe ni amɛbatsɔmɔ Yesu kaselɔi lɛ akɛɛ hɛɛ yɛ bei srɔtoi etɛ mli kɛtsɔɔ akɛ amɛbaafee nakai lɛɛlɛŋ. (Mat. 16:24) Kɛ́ asafoŋ onukpai enyɔ kɛ mɔ ko ta shi kɛha shiɛmɔyaa lɛ, amɛbiɔ mɔ lɛ akɛ, ‘Ani oosumɔ ni otsɔ Yehowa Odasefoi lɛ ateŋ mɔ kome lɛɛlɛŋ?’ Sɛɛ mli kɛ́ mɔ lɛ tee hiɛ saŋŋ yɛ mumɔŋ ni eesumɔ ni abaptisi lɛ lɛ, asafoŋ onukpai lɛ kɛ lɛ baakpe ni amɛbaabi lɛ akɛ, “Ani bo diɛŋtsɛ lɛ ojɔɔ ohe nɔ oha Yehowa yɛ sɔlemɔ mli?” Naagbee kwraa lɛ, yɛ baptisimɔ gbi lɛ nɔ lɛ, abiɔ mɛi ni abaabaptisi amɛ lɛ akɛ, “Yɛ Yesu Kristo afɔleshaa lɛ hewɔ lɛ, ani oshwa ohe kɛjɛ ohe eshai lɛ amli ni ojɔɔ ohe nɔ oha Yehowa akɛ obaafee esuɔmɔnaa nii?” No hewɔ lɛ, mɛi nɛɛ kɛɔ hɛɛ yɛ mɛi ni eba kpee lɛ fɛɛ hiɛ kɛtsɔɔ akɛ amɛwo Nyɔŋmɔ shi akɛ amɛbaasɔmɔ lɛ kɛya naanɔ.
14. Mɛɛ saji esa akɛ wɔbi wɔhe yɛ be kɛ beaŋ?
14 Kɛ́ abaptisi bo etsɛ jio, abaptisi bo etsɛko jio lɛ, esa akɛ yɛ be kɛ beaŋ lɛ obi ohe akɛ: ‘Ani miihi shi yɛ hɛɛ ni he hiaa fe fɛɛ ni mikɛɛ lɛ naa kɛmiikase Yesu Kristo? Ani miiya nɔ miibo Yesu toi kɛtsɔ shiɛmɔ kɛ kaselɔfeemɔ nitsumɔ lɛ ni mikɛfeɔ oti yɛ mishihilɛ mli lɛ nɔ?’—Nyɛkanea 2 Korintobii 13:5.
15. Mɛɛ shihilɛi komɛi amli ehe hiaa ni oha owiemɔ afee hɛɛ, hɛɛ?
15 Shi ni wɔɔhi yɛ wɔhenɔjɔɔmɔ lɛ naa lɛ hu biɔ ni wɔye anɔkwa yɛ saji krokomɛi amli. Ákɛ nɔkwɛmɔnɔ lɛ: Ani obote gbalashihilɛ mli? No lɛ yaa nɔ ohi shi yɛ shi krɛdɛɛ ni owo akɛ obaasumɔ ohefatalɔ lɛ ni obu lɛ hu lɛ naa. Ani okɛ onine ewo wolo shishi akɛ obaatsu maŋ nitsumɔ loo asafoŋ nitsumɔ ko? No lɛ yaa nɔ oye shi ni owo akɛ obaatsu nakai nitsumɔ lɛ nɔ. Ani mɔ ko ni bɛ nɔ ko tsɔ efɔ̃ bo nine kɛha niyeli, ni okpɛlɛ nɔ? No lɛ bɔɔ mɔdɛŋ ni oye nɔ, kɛ́ mɔ kroko hu fɔ̃ bo nine ni osusuɔ akɛ no hi fe klɛŋklɛŋ nɔ lɛ po. Ni kɛ́ owo mɔ ko ni okɛkpe yɛ shĩa kɛ shĩa nitsumɔ lɛ mli lɛ shi akɛ obaaku osɛɛ ni okɛ lɛ abatsa nikasemɔ lɛ nɔ lɛ, bɔɔ mɔdɛŋ ni oha owiemɔ afee hɛɛ, hɛɛ. Yehowa baajɔɔ oshiɛmɔ nitsumɔ lɛ nɔ kɛ́ ofee nakai.—Nyɛkanea Luka 16:10.
WƆSƆFONUKPA KƐ MAŊTSƐ LƐ BAANYƐ AYE ABUA WƆ
16. Kɛ́ wɔwo shi ko ni wɔnyɛɛɛ wɔye nɔ lɛ, mɛni esa akɛ wɔfee?
16 Biblia lɛ tsɔɔ akɛ, ákɛ adesai ni yeee emuu lɛ, “wɔ fɛɛ wɔtɔ̃ɔ,” titri lɛ yɛ wɔwiemɔ mli. (Yak. 3:2) Kɛ́ wɔna akɛ wɔyeko wɔwiemɔ nɔ lɛ, mɛni esa akɛ wɔfee? Yɛ Mla ni Nyɔŋmɔ kɛha Israelbii lɛ mli lɛ, eto gbɛjianɔ koni kɛ́ mɔ ko “naa kpa” lɛ, ana lɛ mɔbɔ. (3 Mose 5:4-7, 11) Gbɛjianɔtoo ni tamɔ nakai nɔŋŋ yɛ kɛha Kristofoi, koni kɛ́ amɛtɔ̃ lɛ akɛfa amɛ. Kɛ́ wɔjaje esha pɔtɛɛ ni wɔfee lɛ wɔtsɔɔ Yehowa lɛ, ebaana wɔ mɔbɔ ni ekɛbaafa wɔ kɛtsɔ Yesu Kristo, ni ji wɔ-Osɔfonukpa lɛ nɔ. (1 Yoh. 2:1, 2) Shi bɔni afee ni wɔya nɔ wɔná Nyɔŋmɔ hiɛ duromɔ lɛ, esa akɛ wɔwo yibii ni sa tsuitsakemɔ, kɛtsɔ nakai esha lɛ ni wɔɔtsi wɔhe kɛjɛ he lɛ nɔ, ni wɔfee bɔ fɛɛ bɔ ni wɔɔnyɛ kɛjaje nɔ ni ejɛ wɔwiemɔ nɔ ni wɔyeee lɛ mli kɛba lɛ. (Abɛi 6:2, 3) Shi ehi akɛ wɔbaasusu nii ahe jogbaŋŋ dani wɔwo shi ko ni ekolɛ wɔnyɛŋ wɔye nɔ.—Nyɛkanea Jajelɔ 5:2.
17, 18. Mɛni mɛi fɛɛ ni haa amɛwiemɔ feɔ hɛɛ, hɛɛ lɛ baaná wɔsɛɛ?
17 Yehowa jálɔi fɛɛ ni haa amɛwiemɔ feɔ hɛɛ, hɛɛ lɛ baaná wɔsɛɛ be kpakpa! Yɛ mɛi 144,000 ni afɔ amɛ mu lɛ agbɛfaŋ lɛ, amɛbaaná wala ni anyɛŋ akpata hiɛ, ni amɛkɛ Yesu “aaaye maŋtsɛ afii akpe” yɛ e-Maŋtsɛyeli lɛ mli yɛ ŋwɛi. (Kpoj. 20:6) Mɛi akpekpei abɔ hu baahi shikpɔŋ nɔ yɛ paradeiso yɛ Kristo Maŋtsɛyeli lɛ shishi. Nakai beaŋ lɛ, abaaye abua amɛ ni amɛye emuu yɛ gbɔmɔtsoŋ kɛ jwɛŋmɔŋ fɛɛ.—Kpoj. 21:3-5.
18 Kɛ́ wɔye anɔkwa yɛ naagbee kaa ni akɛbaaba yɛ Kristo Afii Akpe Nɔyeli lɛ naagbee lɛ mli lɛ, wɔ fɛɛ wɔbaahe wɔhe wɔye agbɛnɛ. (Kpoj. 20:7-10) Mɔ fɛɛ mɔ wiemɔ baafee hɛɛ, hɛɛ loo dabi, dabi. Ejaakɛ mɛi fɛɛ ni baahi shi nakai beaŋ lɛ baakase wɔŋwɛi Tsɛ Yehowa, ni ji “Nyɔŋmɔ anɔkwafo” lɛ yɛ gbɛ ni eye emuu nɔ.—Lala 31:6.
[Nikasemɔ lɛ he Sanebimɔi]
[Mfoniri ni yɔɔ baafa 28]
Kɛjɛ be ni abaptisi Yesu aahu kɛyashi egbo lɛ, eye shi ni ewo e-Tsɛ lɛ nɔ
[Mfoniri ni yɔɔ baafa 30]
Ani oohi shi yɛ hɛɛ ni he hiaa fe fɛɛ ni okɛɛ lɛ naa?
