Nɔ ni Yesu Tsɔɔ yɛ Lɛ Diɛŋtsɛ Ehe
Nɔ ni Yesu Tsɔɔ yɛ Lɛ Diɛŋtsɛ Ehe
“Yesu le mɔ ni eji, heni ejɛ, nɔ̃ hewɔ ni eba je lɛŋ, kɛ nɔ ni kã ehiɛ lɛ.”—WOLOŊMALƆ HERBERT LOCKYER.
DANI wɔbaanyɛ wɔkpɛlɛ nɔ ni Yesu tsɔɔ lɛ nɔ, ni wɔhe wɔye lɛ, ebiɔ ni wɔle Yesu he nɔ ko. Namɔ ji Yesu? Nɛgbɛ ejɛ kɛba? Mɛni ji eyiŋtoo yɛ shihilɛ mli? Wɔbaanyɛ wɔnu sanebimɔi nɛɛ ahetoo lɛ yɛ Yesu diɛŋtsɛ naa yɛ amaniɛbɔi ni yɔɔ Mateo, Marko, Luka kɛ Yohane Sanekpakpai lɛ amli.
Eyɛ shihilɛ mli momo dani abafɔ lɛ yɛ shikpɔŋ lɛ nɔ Be ko lɛ, Yesu wie akɛ: “Miyɛ dani Abraham yɔɔ.” (Yohane 8:58) Abraham hi shi aaafee afii 2,000 dani afɔ Yesu yɛ shikpɔŋ lɛ nɔ. Kɛlɛ, Yesu yɛ shihilɛ mli kwraa dani afɔ anɔkwafo Abraham. No mli lɛ, nɛgbɛ Yesu yɔɔ? Etsɔɔ mli akɛ “mijɛ ŋwɛi miba.”—Yohane 6:38.
Nyɔŋmɔ Bi Yehowa yɛ bii pii ni ji ŋwɛi bɔfoi. Kɛlɛ, Yesu yɛ srɔto. Etsɛ́ ehe akɛ “Nyɔŋmɔ bi koome lɛ.” (Yohane 3:18) Nakai wiemɔ lɛ tsɔɔ akɛ Yesu pɛ ji mɔ ni Nyɔŋmɔ bɔ lɛ tɛ̃ɛ. Bi koome lɛ nɔ Nyɔŋmɔ tsɔ ebɔ nibii krokomɛi fɛɛ.—Kolosebii 1:16.
“Gbɔmɔ Bi” Yesu kɛ gbɛi nɛɛ tsu nii kɛtsɛ́ ehe fe gbɛi krokomɛi fɛɛ. (Mateo 8:20) Ekɛ no tsɔɔ akɛ ejeee ŋwɛi bɔfo ni etsake ehe loo nɔ ko he su ko. Shi moŋ eji gbɔmɔ diɛŋtsɛ. Nyɔŋmɔ tsɔ emumɔ krɔŋkrɔŋ lɛ nɔ eŋɔ e-Bi lɛ wala kɛjɛ ŋwɛi kɛbawo oblayoo folo Maria musuŋ yɛ shikpɔŋ lɛ nɔ. No hewɔ lɛ, afɔ́ Yesu akɛ adesa ni eye emuu ni esha bɛ ehe.—Mateo 1:18; Luka 1:35; Yohane 8:46.
Shiwoo Mesia lɛ Samaria yoo lɛ kɛɛ Yesu akɛ, “Mile akɛ Mesia . . . lɛ miiba.” Yesu to he eha lɛ akɛ: “Mi ni mikɛo wieɔ nɛɛ, mi ni.” (Yohane 4:25, 26) Wiemɔ “Mesia” kɛ “Kristo” lɛ fɛɛ hiɛ shishinumɔ kome ni ji “Mɔ ni Afɔ Lɛ Mu.” Nyɔŋmɔ fɔ Yesu mu loo ehala lɛ, koni etsu nɔ ko krɛdɛɛ ni baaha Nyɔŋmɔ shiwoi lɛ aba mli.
Yiŋtoo titri hewɔ ni eba Be ko lɛ, Yesu kɛɛ akɛ: “Esa akɛ miyajajeɔ Nyɔŋmɔ maŋtsɛyeli lɛ he sanekpakpa lɛ mitsɔɔ maji krokomɛi hu, ejaakɛ no hewɔ atsu mi.” (Luka 4:43) Eyɛ mli akɛ efee nibii kpakpai babaoo eha mɛi ni ehia amɛ lɛ moŋ, shi Nyɔŋmɔ Maŋtsɛyeli lɛ shiɛmɔ ji oti ni ekɛma ehiɛ yɛ eshihilɛ mli. Sɛɛ mli lɛ abaasusu nɔ ni etsɔɔ yɛ Maŋtsɛyeli lɛ he lɛ he.
Ekã shi faŋŋ akɛ Yesu jeee mɔ ko kɛkɛ. * Taakɛ wɔbaana lɛ, shihilɛ mli ni no mli lɛ eyɔɔ yɛ ŋwɛi lɛ ha anu wiemɔi ni ewie yɛ shikpɔŋ lɛ nɔ lɛ shishi jogbaŋŋ. Ebɛ naakpɛɛ mɔ akɛ eshiɛ shɛɛ sane ko ni baaná mɛi akpekpei abɔ ni yɔɔ je lɛŋ fɛɛ lɛ ashihilɛi anɔ hewalɛ!
[Shishigbɛ niŋmaa]
^ kk. 9 Kɛ́ ootao saji babaoo ni kɔɔ Yesu, kɛ gbɛfaŋnɔ ni etsuɔ yɛ Nyɔŋmɔ yiŋtoo mli lɛ he lɛ, kwɛmɔ yitso 4 ni yɔɔ Mɛni Biblia lɛ Tsɔɔ Diɛŋtsɛ? wolo lɛ ni Yehowa Odasefoi fee lɛ mli lɛ.