Tsɔɔmɔ Obii lɛ Anii

Yesu Kase Toiboo

ANI bei komɛi lɛ ewaa kɛhaa bo akɛ obaafee toiboo?— * Kɛ́ nakai eji yɛ ogbɛfaŋ lɛ, ebɛ naakpɛɛ. Ejaakɛ ewaa kɛhaa mɔ fɛɛ mɔ yɛ bei komɛi amli akɛ ebaafee toiboo. Ani ole akɛ ehe bahia ni Yesu po akase toiboo?—

Ani ole mɛi ni esa akɛ gbekɛbii fɛɛ abo amɛ toi?— Hɛɛ, wɔpapa kɛ wɔmami. Biblia lɛ kɛɔ akɛ: “Nyɛ bii lɛ, nyɛboa nyɛfɔlɔi lɛ atoi yɛ Nuŋtsɔ lɛ mli.” (Efesobii 6:1) Namɔ ji Yesu tsɛ?— Yehowa Nyɔŋmɔ, ni eji wɔ hu wɔ Tsɛ. (Mateo 6:9, 10) Shi kɛ́ okɛɛ Yosef ji Yesu tsɛ ni Maria hu ji enyɛ lɛ, no hu ja. Ani ole bɔ ni fee ni amɛbatsɔmɔ efɔlɔi?—

Bɔfo Gabriel kɛɛ Maria bɔ ni baafee ni ebaatsɔ mami, eyɛ mli akɛ ekɛ nuu ko nako bɔlɛ. Yehowa ha ená musu lɛ kɛtsɔ naakpɛɛ nii kpele ko ni efee lɛ nɔ. Gabriel kɛɛ Maria akɛ: “Ŋwɛinyo lɛ hewalɛ aaabaha onɔ, no hewɔ lɛ nakai bi krɔŋkrɔŋ lɛ hu ní ooofɔ́ lɛ, aaatsɛ́ lɛ Nyɔŋmɔ bi.”—Luka 1:30-35.

Nyɔŋmɔ ŋɔ e-Bi lɛ wala kɛjɛ ŋwɛi ni ekɛbawo Maria musu mli. Kɛkɛ ni nakai wala lɛ da yɛ Maria musuŋ taakɛ bii krokomɛi daa yɛ amɛnyɛmɛi amusuŋ lɛ. Aaafee nyɔji nɛɛhu sɛɛ lɛ, afɔ́ Yesu. No mli lɛ, Yosef kɛ Maria ebote gbalashihilɛ mli, no hewɔ lɛ, mɛi babaoo susu akɛ Yesu papa diɛŋtsɛ ji Yosef. Shi yɛ anɔkwale mli lɛ, Yosef banuma ji Yesu. No hewɔ lɛ, yɛ gbɛ ko nɔ lɛ, Yesu ná tsɛmɛi enyɔ.

Beni Yesu eye afii 12 pɛ lɛ, efee nɔ ko ni tsɔɔ akɛ esumɔɔ eŋwɛi Tsɛ ni ji Yehowa lɛ waa. Nakai beaŋ lɛ Yesu weku lɛ efã gbɛ kakadaŋŋ kɛtee Yerusalem taakɛ amɛfɔɔ feemɔ kɛha Hehoo gbijurɔyeli. Be ni agbe naa ni amɛkuɔ amɛsɛɛ kɛbaa Nazaret lɛ, Yosef kɛ Maria yɔseee akɛ Yesu fataaa amɛhe. Ani ohiɛ miifee bo yaa akɛ amɛhiɛ kpa enɔ?—

Ojogbaŋŋ, no mli lɛ Yosef kɛ Maria yɛ bii krokomɛi hu. (Mateo 13:55, 56) Ekolɛ, amɛwekumɛi, tamɔ Yakobo kɛ Yohane kɛ amɛpapa Zebedeo, kɛ amɛmami Salome ni ekolɛ eji Maria nyɛmiyoo lɛ hu fata amɛhe kɛfãa gbɛ lɛ. No hewɔ lɛ, ekolɛ Maria susu akɛ Yesu fata ewekumɛi krokomɛi ni amɛkɛfãa gbɛ lɛ ahe.—Mateo 27:56; Marko 15:40; Yohane 19:25.

Beni Yosef kɛ Maria yɔse akɛ Yesu elaaje lɛ, amɛkɛ oyaiyeli ku amɛsɛɛ kɛtee Yerusalem. Amɛtao amɛbi lɛ aahu ní amɛhao. Yɛ gbi ni ji etɛ lɛ nɔ lɛ, amɛyana lɛ yɛ sɔlemɔwe lɛ. Maria bi lɛ akɛ: “Mɛɛba ofee wɔ nɛkɛ? Naa, mikɛ otsɛ etao bo kɛ awerɛhoo.” Shi Yesu ha hetoo akɛ: “Mɛɛba ni nyɛtaoɔ mi? Ani nyɛleee akɛ esa mi akɛ mihiɔ shi yɛ nii ni ji mitsɛ nɔ̃ lɛ mli?”—Luka 2:45-50.

Ani osusuɔ akɛ kulɛ esaaa akɛ Yesu haa emami hetoo nakai?— Ojogbaŋŋ, efɔlɔi lɛ le akɛ esumɔɔ akɛ ekɛ jamɔ aha  yɛ Nyɔŋmɔ shĩa lɛ. (Lala 122:1) No hewɔ lɛ tɔmɔ bɛ he akɛ Yesu aaasusu akɛ kɛ́ aatao lɛ lɛ, heni abaaya ji Nyɔŋmɔ sɔlemɔwe lɛ?— Sɛɛ mli lɛ, Maria tee nɔ esusu nɔ ni Yesu wie lɛ he.

Te Yesu kɛ Yosef kɛ Maria, ni ji efɔlɔi lɛ ye eha tɛŋŋ?— Biblia lɛ kɛɛ akɛ: ‘Ni Yesu kɛ amɛ yiŋ kɛtee Nazaret, ni etee nɔ eba ehe shi eha amɛ.’ (Luka 2:51, 52) Mɛni wɔbaanyɛ wɔkase kɛjɛ Yesu nɔkwɛmɔnɔ lɛ mli?— Hɛɛ, esa akɛ wɔ hu wɔbo wɔfɔlɔi atoi.

Kɛlɛ, Yesu náaa lɛ mlɛo akɛ ebaafee toiboo be fɛɛ be—toiboo kɛha eŋwɛi Tsɛ lɛ tete po.

Gbi gbɛkɛ dani enɔ jetsɛremɔ ni Yesu gbo lɛ, Yesu bi Yehowa kɛji Ebaatsake Ejwɛŋmɔ yɛ nitsumɔ ni Ekɛha lɛ ni etsu lɛ he. (Luka 22:42) Shi Yesu bo Nyɔŋmɔ toi, eyɛ mli akɛ enáaa lɛ mlɛo akɛ efee nakai. Biblia lɛ kɛɔ akɛ, “ekase toiboo yɛ amanehului ní ena lɛ amli.” (Hebribii 5:8) Ani osusuɔ akɛ wɔ hu wɔbaanyɛ wɔkase toiboo?—

[Shishigbɛ niŋmaa]

SANEBIMƆI:

▪ Te fee tɛŋŋ ni Maria batsɔ Yesu mami, ni yɛ gbɛ ko nɔ lɛ te eba lɛ tɛŋŋ ni Yesu ná tsɛmɛi enyɔ lɛ?

▪ Mɛni hewɔ Yesu fɔlɔi lɛ ajwɛŋmɔ baaa nɔ akɛ amɛshi Yesu yɛ sɛɛ lɛ?

▪ Nɛgbɛ Yesu kpa gbɛ akɛ efɔlɔi lɛ baatao lɛ yɛ?

▪ Mɛni obaanyɛ okase kɛjɛ nɔkwɛmɔnɔ ni Yesu fee lɛ mli?

[Mfoniri ni yɔɔ baafa 31]

Mɛni hewɔ osusuɔ akɛ kulɛ esa akɛ Yosef kɛ Maria atao Yesu yɛ sɔlemɔwe lɛ klɛŋklɛŋ?