‘Lɛ lɛ Tsui Mli Ekwɛɔ’
Tsi Obɛŋkɛ Nyɔŋmɔ
‘Lɛ lɛ Tsui Mli Ekwɛɔ’
BƆ NI anaa nɔ ko ahaa lɛ baanyɛ alaka mɔ. Bɔ ni anaa mɔ ko ahaa yɛ kponɔgbɛ lɛ etsɔɔɔ doo akɛ nakai mɔ lɛ yɔɔ diɛŋtsɛ. Bei pii lɛ, adesai damɔɔ nɔ ni amɛnaa yɛ kponɔgbɛ lɛ nɔ amɛkojoɔ. Miishɛɛ sane ji akɛ Yehowa Nyɔŋmɔ kwɛɔ nii kɛtekeɔ bɔ ni anaa mɔ ko ahaa yɛ kponɔgbɛ lɛ. Anaa enɛ faŋŋ yɛ sane ni aŋma afɔ̃ shi yɛ 1 Samuel 16:1-12.
Feemɔ nɔ ni ba yɛ amaniɛbɔɔ ni nyiɛ sɛɛ nɛɛ mli lɛ he mfoniri okwɛ. Yehowa miisumɔ ni efɔ mɔ kroko mu ni ewó lɛ Israel maŋ lɛ nɔ maŋtsɛ. Nyɔŋmɔ kɛɛ gbalɔ Samuel akɛ: “Mibatsuo Ishai, Betlehemnyo lɛ, ŋɔɔ; ejaakɛ miná maŋtsɛ yɛ ebihii lɛ ateŋ.” (Kuku 1) Yehowa etsɔɔɔ mɔ ni ji lɛ gbɛi, shi nɔ pɛ ni ekɛɛ kɛkɛ ji akɛ mɔ ni abaahala lɛ lɛ baajɛ Ishai weku lɛ mli. Beni Samuel yaa Betlehem lɛ, ekolɛ esusu eyiŋ akɛ, ‘Te mafee tɛŋŋ male Ishai bii lɛ ateŋ mɔ ni Yehowa ehala lɛ lɛ?’
Beni Samuel yashɛ Betlehem lɛ, eto gbɛjianɔ koni ekɛ Ishai kɛ ebihii lɛ aye afɔleshãa niyenii. Beni Ishai binuu onukpa Eliab pue ni Samuel na ehefɛo kɛ ekwɔlɛ lɛ nɔŋŋ kɛkɛ ni etsui mɔ lɛ. Samuel susu akɛ Eliab kwɔlɛ tsɔɔ akɛ lɛ nɔŋŋ ji mɔ ni esa akɛ awó lɛ maŋtsɛ, kɛkɛ ni ekɛɛ ehe akɛ: “Mɔ ni Yehowa efɔ lɛ mu lɛ damɔ ehiɛ nɛɛ!”—Kuku 6.
Shi kɛlɛ, soro bɔ ni Yehowa kwɛɔ nii ehaa. Ekɛɛ Samuel akɛ: “Kaakwɛ ehiɛŋtso loo ekwɔlɛ nyenyereŋŋ lɛ; shi misumɔɔɔ lɛ.” (Kuku 7) Jeee Eliab kwɔlɛ kɛ ehefɛo lɛ ji nɔ ni Yehowa taoɔ. Yehowa hiŋmɛi naa nɔ fɛɛ nɔ ni yɔɔ mɔ ko he, ekwɛɔ nii kɛtekeɔ bɔ ni mɔ ko ji yɛ kponɔgbɛ, ni enaa nɔ ni yɔɔ mɔ lɛ tsui mli.
Yehowa gbala mli etsɔɔ Samuel akɛ: “Ejaakɛ Yehowa kwɛɛɛ nii tamɔ gbɔmɔ; ejaakɛ gbɔmɔ lɛ ekwɛɔ kponɔgbɛ nii, shi Yehowa lɛ tsui ekwɛɔ!” (Kuku 7) Hɛɛ, tsui lɛ ni ji mligbɛ gbɔmɔ lɛ, he ni mɔ susumɔi, sui, kɛ henumɔi jɛɔ lɛ—no ji nɔ ni he hiaa Yehowa. “Mɔ ni kaa tsuii ekwɛɔ” lɛ kpoo Eliab, ni nakai nɔŋŋ hu ekpoo Ishai bihii ekpaa ni badamɔ Samuel hiɛ lɛ.—Abɛi 17:3.
Eshwɛ Ishai bihii lɛ ateŋ mɔ kome ni ji David, lɛ ji gbekɛ kwraa yɛ amɛteŋ, ni no mli lɛ “eekwɛ tooi.” (Kuku 11) No hewɔ lɛ, atsu ayatsɛ David kɛba Samuel hiɛ. Kɛkɛ ni Yehowa kɛɛ Samuel akɛ: “Tee shi! ni ofɔ lɛ mu; ejaakɛ lɛ pi nɛ!” (Kuku 12) Yɛ anɔkwale mli lɛ, David ‘hiŋmɛii yɛ fɛo, ni kɛ́ okwɛ lɛ hu, ehe yɛ fɛo.’ Shi etsui mli Nyɔŋmɔ kwɛ ni ekpɛlɛ enɔ.—1 Samuel 13:14.
Eyɛ mli akɛ wɔyɛ jeŋ ko ni mɛi kɛ amɛhiɛ maa hefɛo nɔ fe nɔ fɛɛ nɔ mli moŋ, kɛlɛ wɔtsui baanyɛ anyɔ wɔ mli ejaakɛ wɔle akɛ mɔ ko nyɛŋ ekɛ bɔ ni eji yɛ kponɔgbɛ lɛ alaka Yehowa Nyɔŋmɔ. Jeee onɔkwɔlɛ loo bɔ ni mɛi naa bo akɛ ohe yɛ fɛo ha lɛ he hiaa Yehowa. Nɔ ni he hiaa lɛ titri ji bɔ ni oji yɛ mligbɛ, ni ji otsui mli. Ani enɛ ni oná ole lɛ tsirɛɔ bo koni obɔ mɔdɛŋ akɛ obaaná sui ni baaha ohe afee fɛo yɛ Nyɔŋmɔ hiɛ?—w10-E 03/1.