Ani Ole?

Mɛni ji “kojomɔ sɛi” ni akpala bɔfo Paulo kɛtee hiɛ lɛ?

▪ Amaniɛbɔɔ ni yɔɔ Bɔfoi lɛ Asaji 18:12, 13 lɛ kɛɔ akɛ Yudafoi ni yɔɔ Korinto lɛ folɔ Paulo naa akɛ eetsɔ mɛi ayiŋ bɔ ni teɔ shi woɔ amɛmla, ni akpala lɛ kɛtee “kojomɔ sɛi” lɛ, loo beʹma (Hela wiemɔ ni shishi ji “atrakpo”) lɛ hiɛ. Blema Korintobii lɛ yɛ kpoku ko ni nɔ kwɔ yɛ kpoteŋ ni ebɛŋkɛ agora loo jarayelihe lɛ teŋgbɛ, ni ekɛ kpeehe lɛ teŋ jekɛmɔ aaafee nanefaamɔi fioo ko. He ni kpoku nɛɛ ma lɛ haa anyɛɔ ajɛɔ jɛmɛ akɛ maŋbii lɛ wieɔ. Akɛ tɛ bluu kɛ eyɛŋ tswa wiemɔ kpoku nɛɛ, ni aye samai fɛfɛji awo he, ni ayɛ tsũi enyɔ yɛ kpoku lɛ he kɛ amɛmli sɛii ni akɛ tɛ fee, ni asaa shikpɔŋ lɛ fɛfɛo, ni amɛɔ yɛ tsũi nɛɛ amli.

Etamɔ nɔ ni nakai wiemɔ kpoku lɛ nɔŋŋ ji kojomɔ sɛi ni akɛ bɔfo Paulo yadamɔ amralo Galio, ni ji Roma amralo yɛ Akaia lɛ hiɛ yɛ jɛmɛ lɛ. Maŋ onukpai taa biɛ nɛɛ ni amɛyeɔ saji, ni amɛhaa mɛi ni ebua amɛhe naa lɛ leɔ bɔ ni amɛbua saji lɛ amɛha.

Yɛ Hela maji lɛ amli lɛ, maŋbii lɛ fɔɔ amɛhe naa buamɔ yɛ beʹma ni tamɔ nɛkɛ hiɛ, ni atsuɔ maŋsaji ahe nii yɛ jɛmɛ. Hela wiemɔ ni akɛtsu nii yɛ Yesu saneyeli lɛ he amaniɛbɔɔ ni yɔɔ Mateo 27:19 kɛ Yohane 19:13 lɛ mli lɛ fɛɛ tsɔɔ akɛ Pontio Pilato kɛ asafo lɛ wie kɛjɛ e-beʹma lɛ nɔ.—Bɔfoi lɛ Asaji 12:21.

Mɛni hewɔ gbɛ nɔ ni Yesu tsɔ egbo lɛ tsɔ pampi eha Yudafoi komɛi lɛ?

▪ Bɔfo Paulo wie mra be mli Kristofoi lɛ ahe akɛ: “Kristo ni asɛŋ lɛ lɛ, wɔshiɛɔ, mɔ ni tsɔ pampi eha Yudafoi kɛ kwashiai asane eha jeŋmaji lɛ.” (1 Korintobii 1:23) Mɛni hewɔ gbɛ nɔ ni Yesu tsɔ egbo lɛ to mɛi komɛi pampi lɛ?

Biblia mli saji ahe wielɔ ko ni atsɛɔ lɛ Ben Witherington III lɛ wie akɛ gbɛ nɔ ni Yesu tsɔ egbo lɛ ji “gbɛ ni yɔɔ hiɛgbele fe fɛɛ ni mɔ aaatsɔ nɔ egbo yɛ nakai beaŋ” yɛ mɛi ni hi shi yɛ klɛŋklɛŋ afii 100 lɛ mli yɛ Middle East lɛ akusum naa. Ekɛshi sɛɛ akɛ: “Abuuu gbɛ ni etsɔ nɔ egbo lɛ kwraa akɛ eyɛ nyam.” Witherington kɛfata he akɛ: “Mɛi ni hi shi yɛ nakai beaŋ lɛ hiɛ susumɔ akɛ gbɛ ni otsɔɔ nɔ ogboɔ lɛ, no tsɔɔ osubaŋ diɛŋtsɛ. Enɛ hewɔ lɛ, abu Yesu akɛ eji mɔ fɔŋ, maŋjwalɔ, mɔ ni sa toigbalamɔ ni akɛhaa nyɔji ni tseɔ atua lɛ.” Niiamlitsɔɔmɔ nɛɛ naa lɛ, etamɔ nɔ ni nilee bɛ mli akɛ aaakɛɛ akɛ mra be mli Kristofoi lɛ fo saji ni kɔɔ Yesu gbele kɛ eshitee lɛ he lɛ amɛtã.—w12-E 05/1.