Namɔ ji Sɔlemɔ Toibolɔ Lɛ?

KƐ́ MƆ ko yɛ ni Boɔ sɔlemɔ toi lɛ, ŋwanejee ko bɛ he akɛ lɛ ji Bɔlɔ lɛ. Kɛ́ jeee Mɔ ni fee gbɔmɔ jwɛŋmɔ lɛ ji mɔ ni baanyɛ ale osusumɔi lɛ, belɛ namɔ dɔŋŋ? Yehowa sɛɛ lɛ namɔ po baanyɛ abo sɔlemɔi atoi, ni ekɛ yelikɛbuamɔ ni he hiaa adesai lɛ aha amɛ? Ekolɛ obaabi akɛ, ‘Ani jwɛŋmɔ yɛ mli akɛ mahe maye akɛ Bɔlɔ ko yɛ?’

Mɛi babaoo susuɔ akɛ ja okpɛlɛɛɛ ŋmɛnɛ beaŋ jeŋ niiashikpmɔi ni yɔɔ lɛ anɔ dani obaanyɛ ohe oye akɛ Bɔlɔ ko yɛ. Shi, susumɔ ni ahiɛ akɛ Nyɔŋmɔ mli hemɔkɛyeli kɛ jeŋ niiashikpmɔ kpãaa gbee lɛ ejaaa. Susumɔ saji ni nyiɛ sɛɛ nɛɛ ahe okwɛ.

▪ Afee niiamlitaomɔ ko yɛ yunivɛsiti tsɔɔlɔi 1,646 ni tsɔɔ jeŋ niiashikpmɔ he nii yɛ United States yunivɛsiti kpakpai 21 ni ehe gbɛ́i fe fɛɛ lɛ amli. Tsɔɔlɔi nɛɛ ateŋ mɛi aaashɛ 550 pɛ kɛ wiemɔ ni ji “Miheee Nyɔŋmɔ nɔ miyeee” lɛ tsɔɔ amɛsusumɔ yɛ sane nɛɛ he.

Anɔkwa sane ji akɛ, jeŋ niiashikpalɔi babaoo heɔ amɛyeɔ akɛ Nyɔŋmɔ yɛ.

Odase ni Tsɔɔ akɛ Bɔlɔ ko Yɛ

Ani esa akɛ wɔkpɛlɛ nɔ kɛkɛ akɛ mɔ ko yɛ ni boɔ sɔlemɔ toi? Dabi kwraa. Susumɔ ni ahiɛ akɛ hemɔkɛyeli tsɔɔ nɔ ko ni aheɔ ayeɔ ni abɛ nɔmimaa ko yɛ he lɛ ejaaa kwraa. Biblia lɛ tsɔɔ hemɔkɛyeli shishi akɛ “nii ni mɛi ahiɛ kã nɔ lɛ anɔ hewalɛnamɔ kɛ nii ni anaaa lɛ anɔmimaa.” (Hebribii 11:1) Biblia shishitsɔɔmɔ kroko (The New English Bible) wie akɛ hemɔkɛyeli “haa wɔnáa nɔmimaa diɛŋtsɛ yɛ nibii ni wɔkɛ wɔhiŋmɛi enaaa lɛ ahe.” Akɛ nɔkwɛmɔnɔ lɛ, onaaa kɔɔyɔɔ kɛ ohiŋmɛi, kɛlɛ, onaa nibii ni kɔɔyɔɔ tsuɔ beni etswaa ni ehosoɔ tsei abaji lɛ; enɛ haa oheɔ oyeɔ akɛ kɔɔyɔɔ yɛ, tsɛ onaaa kɛ ohiŋmɛi. Nakai nɔŋŋ hu eyɛ mli akɛ wɔnaaa sɔlemɔ Toibolɔ lɛ moŋ nɛ, shi wɔbaanyɛ wɔdamɔ nibii ni yɔɔ diɛŋtsɛ lɛ anɔ wɔkpɛlɛ akɛ eyɛ.

 Nɛgbɛ wɔbaanyɛ wɔna nibii ni tsɔɔ akɛ Nyɔŋmɔ yɛ lɛ yɛ? Nɔ pɛ ni he hiaa ji ni wɔkwɛ nibii ni ebɔle wɔ kɛkpe lɛ. Biblia lɛ tsɔɔ mli akɛ: “Ejaakɛ shĩa fɛɛ shĩa lɛ, mɔ ko kɛ̃ ma, shi mɔ ni saa nii fiaa to ji Nyɔŋmɔ.” (Hebribii 3:4) Ani okɛ nɛkɛ sane nɛɛ kpaa gbee? Ekolɛ, kɛ́ ojwɛŋ bɔ ni ato nibii ni yɔɔ jeŋ muu lɛ fɛɛ he gbɛjianɔ aha lɛ nɔ, wala jɛɛhe loo adesa jwɛŋmɔ, ni ji nɔ ko ni yɔɔ hwanyaŋŋ fe fɛɛ ni ato he gbɛjianɔ yɛ shikpɔŋ lɛ nɔ lɛ, ehaa omuɔ sane naa akɛ nɔ ko ni nɔ kwɔ kwraa fe adesai yɛ shihilɛ mli. *

Shi, adebɔɔ nyɛŋ atsɔɔ wɔ nɔ fɛɛ nɔ kwraa yɛ Nyɔŋmɔ he. Adebɔɔ nibii ni adamɔɔ nɔ akɛyɔseɔ Nyɔŋmɔ lɛ bafeɔ tamɔ mɔ ko ni miinyiɛ kɛmiibɛŋkɛ shinaa ko ni aŋa lɛ naji faamɔi agbɛɛmɔ. Onuɔ he akɛ mɔ ko yɛ shinaa lɛ naa, shi namɔ ni? Dani obaana mɔ ni ji lɛ, ja ogbele shinaa lɛ. Ehe miihia ni wɔfee nɔ ko tamɔ nakai nɔŋŋ bɔni afee ni wɔna Mɔ ni bɔ nibii fɛɛ lɛ.

Biblia lɛ ji Nyɔŋmɔ he nilee lɛ naa shinaa. Kɛ́ ogbele nakai shinaa lɛ ni osusu emli gbalɛi lɛ ekomɛi kɛ amɛmlibaa lɛ he fitsofitso lɛ, obaana odaseyelii ni tsɔɔ akɛ Nyɔŋmɔ yɛ. * Shi nɔ ni fe nakai lɛ, saji ni tsɔɔ bɔ ni Nyɔŋmɔ kɛ mɛi yeɔ ehaa lɛ haa anaa nɔ mɔ diɛŋtsɛ ni sɔlemɔ Toibolɔ lɛ ji.

Mɛɛ Mɔ Nɛkɛ Sɔlemɔ Toibolɔ lɛ Ji?

Biblia lɛ haa wɔnaa akɛ sɔlemɔ Toibolɔ lɛ ji mɔ ko ni yɔɔ diɛŋtsɛ—mɔ ko ni obaanyɛ ole lɛ.  Ekã shi faŋŋ akɛ, ja mɔ ko ni yɔɔ shihilɛ mli pɛ baanyɛ abo sane toi ni enu shishi. Wɔtsui nyɔɔ wɔmli akɛ wɔɔkane akɛ: “Bo ni oboɔ sɔlemɔ toi, bo oŋɔɔ heloo fɛɛ baa.” (Lala 65:3) Eboɔ mɛi ni kɛ hekɛnɔfɔ̃ɔ sɔleɔ amɛhaa lɛ lɛ toi. Eyɛ gbɛ́i hu. Biblia lɛ kɛɔ akɛ: “Yehowa kɛ mɛi fɔji ateŋ jɛkɛ; shi eboɔ jalɔi afaikpamɔ toi.”—Abɛi 15:29.

Yehowa nuɔ nii ahe. Eji ‘suɔmɔ Nyɔŋmɔ’ ni atsɛɔ lɛ akɛ “miishɛɛ Nyɔŋmɔ.” (2 Korintobii 13:11; 1 Timoteo 1:11, NW) Be ko beni nɔfɔŋfeemɔ kwɔ tso yɛ shikpɔŋ lɛ nɔ lɛ, Biblia lɛ wie bɔ ni Yehowa nu he eha lɛ he akɛ: “Edɔ lɛ yɛ etsui mli.” (1 Mose 6:5,  6) Nɔ ni mɛi kɛɔ akɛ Nyɔŋmɔ piŋɔ mɛi koni ekɛka amɛ lɛ ji amale. Biblia lɛ kɛɔ akɛ: “Enɛ akagbale Mawu [anɔkwa Nyɔŋmɔ lɛ] akɛ eeefee nɔ̃ fɔŋ.” (Hiob 34: 10) Fɛɛ sɛɛ lɛ, ekolɛ obaashwie oyiŋ akɛ, ‘Kɛ́ Nyɔŋmɔ ji Adebɔlɔ kpeteŋkpele lɛ, mɛni hewɔ ni eŋmɛ gbɛ ni piŋmɔ yaa nɔ lɛ?’

Yehowa eha adesai hegbɛ ni amɛkpɛ yiŋ amɛha amɛhe, ni no kɛɔ wɔ nɔ ko yɛ nɔ mɔ ni Nyɔŋmɔ ji lɛ he. Ani wɔhiɛ esɔɔɔ hegbɛ ni wɔyɔɔ akɛ wɔhala bɔ ni wɔsumɔɔ ni wɔhi shi wɔha lɛ? Shi mɔbɔ sane ji akɛ, mɛi babaoo kɛ hegbɛ nɛɛ tsuuu nii jogbaŋŋ, ni no haa amɛ kɛ mɛi krokomɛi piŋɔ. Agbɛnɛ náa sanebimɔ ko ni esa akɛ wɔkɛ hiɛdɔɔ asusu he jogbaŋŋ: Te Nyɔŋmɔ aaafee tɛŋŋ ejie piŋmɔ kɛya ni etsiŋ heyeli ni adesai yɔɔ akɛ amɛhala nɔ ni amɛsumɔɔ lɛ naa lɛ? Wɔbaasusu sanebimɔ nɛɛ he yɛ sane ni nyiɛ sɛɛ nɛɛ mli.

[Shishigbɛ niŋmai]

[Akrabatsa ni yɔɔ baafa 5]

Ani Nibii Gbohii ni Jamɔi Feɔ lɛ Haa Oyiŋ Feɔ Bo Enyɔɔnyɔ Akɛ Nyɔŋmɔ Yɛ?

Dɔlɛ sane ji akɛ jamɔ ji nɔ ni haa mɛi ayiŋ etɛ̃ɛɛ amɛ akɛ sɔlemɔ Toibolɔ ko yɛ, ni emusuŋ tsɔɔ lɛ. Bɔ ni jamɔ kɛ ehe woɔ tai, awuiyelii ni naa wala, kɛ gbekɛbii aniseniianii feemɔi amli lɛ haa mɛi ni sɔleɔ po wieɔ akɛ, “Miheee miyeee akɛ Nyɔŋmɔ yɛ.”

Mɛni hewɔ bei pii lɛ, jamɔ haa afeɔ nibii gbohii lɛ? Sane lɛ kukufoo ji akɛ: Mɛi fɔji etee nɔ efee nibii gbohii yɛ jamɔ gbɛ́i amli. Biblia lɛ gba akɛ, mɛi kɛ Kristojamɔ baatsu nibii gbohii. Bɔfo Paulo kɛɛ Kristofoi nɔkwɛlɔi akɛ: “Nyɛ diɛŋtsɛ nyɛteŋ hu lɛ, hii ni wieɔ nii ni ejaaa aaate shi, ni amɛaakpala kaselɔi lɛ amɛshwie amɛsɛɛ.”—Bɔfoi lɛ Asaji 20:29, 30.

Nyɔŋmɔ miihi apasa jamɔ kwrakwra. Anɔkwa, Nyɔŋmɔ Wiemɔ ni ji Biblia lɛ kɛ “mɛi fɛɛ ni agbe yɛ shikpɔŋ nɔ lɛ ala lɛ” he sɔ̃ fɔɔ apasa jamɔ nɔ. (Kpojiemɔ 18:24) Akɛni apasa jamɔ haaa mɛi ale anɔkwa Nyɔŋmɔ, mɔ ni ji suɔmɔ, lɛ he nii hewɔ lɛ, yɛ Nyɔŋmɔ hiɛ lɛ, jamɔi nɛɛ eye la yi sɔ̃.—1 Yohane 4:8.

Sɔlemɔ Toibolɔ lɛ nuɔ he waa ehaa mɛi ni jamɔ waa amɛ yi lɛ. Etsɛŋ, suɔmɔ ni Nyɔŋmɔ yɔɔ kɛha adesai lɛ baatsirɛ lɛ koni etsɔ Yesu nɔ ekojo jamɔi fɛɛ ni feɔ osato lɛ. Yesu kɛɛ akɛ: “Mɛi pii aaakɛɛ mi yɛ no gbi lɛ nɔ akɛ: Nuŋtsɔ, Nuŋtsɔ! ani jeee bo ogbɛi lɛ mli wɔgba yɛ . . . ? Ni no lɛ magba mli makɛɛ amɛ akɛ: Mileee nyɛ kwraa, nyɛjea minɔ nyɛyaa, nyɛ mɛi ni nyɛtsuɔ nibii ni ejaaa gbɛ!”—Mateo 7:22, 23.