Dani Yesu Kristo baaya ŋwɛi yɛ afi 33 Ŋ.B. lɛ, ewo shi akɛ ebaaku esɛɛ. Ekɛ ehe to ablade ko ni dom be kplaŋŋ, ni ku esɛɛ eba kɛ hewalɛ koni ebaye nɔ akɛ maŋtsɛ lɛ he. Yiŋtoo hewɔ ni Yesu baaku esɛɛ aba lɛ ji koni ekɛ nɔyeli kpakpa abaha adesai.—Kanemɔ Luka 19:11, 12.

Mɛɛ gbɔmɔtso Kristo kɛbaa? Atee lɛ shi akɛ mumɔŋ bɔɔ nɔ ni anaaa lɛ. (1 Petro 3:18) No sɛɛ lɛ, etee ŋwɛi ni eyata Nyɔŋmɔ nine jurɔ nɔ. (Lala 110:1) Sɛɛ mli kwraa lɛ, akɛ Yesu ba Yehowa Nyɔŋmɔ, “mɔ ni eye gbii pii lɛ” ŋɔɔ, ni eha Yesu hegbɛ koni eye adesai anɔ. No hewɔ lɛ, Yesu ekuŋ esɛɛ kɛbaŋ akɛ adesa, shi moŋ akɛ Maŋtsɛ ni anaaa lɛ.—Kanemɔ Daniel 7:13, 14.

Kɛ́ Yesu ba lɛ, anaŋ lɛ, ekɛ ebɔfoi lɛ baaba ni ebaakojo adesai. Ebaakpãta mɛi fɔji lɛ ahiɛ, ni ekɛ naanɔ wala baajuro mɛi ni kpɛlɛɔ enɔ akɛ Maŋtsɛ lɛ.—Kanemɔ Mateo 25:31-33, 46.

Akɛ Maŋtsɛ ni miiye nɔ lɛ, Yesu baatsake shikpɔŋ lɛ efee lɛ paradeiso. Ebaatee gbohii lɛ ashi koni amɛná wala mli ŋɔɔmɔ yɛ nakai shikpɔŋ nɔ paradeiso lɛ mli.—Kanemɔ Lala 37:29; Yohane 11:35.