SANEYITSO LƐ MLITSƆƆMƆ | YESU KPƆ̃Ɔ WƆ
Nɔ Hewɔ ni Esa akɛ Akpɔ̃ Wɔ
“Gbɔmɔ ni yoo fɔ́ lɛ yɔɔ nɛɛ, kukuoo kɛkɛ ji egbii lɛ, ni emli eyi tɔ́ kɛ haomɔ sɔŋŋ; ekwɛ̃ɔ tamɔ fɔfɔi, ni eŋãlaa; asaŋ ejoɔ foi tamɔ hɔ̃ɔŋ, ni etsɛɛɛ.”
Kɛjɛ blema tɔ̃ɔ lɛ, mɛi susuɔ bɔ ni kulɛ shihilɛ baafee miishɛɛ ahã kɛji gbɔmɔ baahi shi kɛya naanɔ ni egbɔɔɔ, ni hela hu mɔɔɔ lɛ lɛ he. Shi dɔlɛ sane ji akɛ: Gbɔmɔ ehiii shi kɛyaaa naanɔ. Wiemɔi ni atsɛ yisɛɛ kɛtsɔ hiɛ lɛ, ní Hiob wie aaafee afii akpei etɛ ni eho nɛ lɛ, kã he eji anɔkwale.
Adesai ni yɔɔ je lɛŋ fɛɛ lɛ yɛ shwelɛ ni mli wa akɛ amɛbaa hi shi kɛya naanɔ. Biblia lɛ hãa wɔleɔ akɛ, Nyɔŋmɔ kɛ naanɔ wala he shwelɛ ewo wɔtsui mli, ni eesumɔ ni wɔle nɔ ni eji. (Jajelɔ 3:11) Kɛ́ nakai ji sane lɛ, ani osusuɔ akɛ Nyɔŋmɔ ni yɔɔ suɔmɔ lɛ kɛ shwelɛ ko ni wɔnine nyɛŋ ashɛ nɔ lɛ baawo wɔmli? Kɛ́ ohã hetoo akɛ dabi lɛ, okɛɛ jogbaŋŋ. Nyɔŋmɔ Wiemɔ lɛ tsɛɔ gbele akɛ henyɛlɔ, ni ewo shi akɛ ‘abaafo gbele sɛɛ.’
Ŋwanejee ko bɛ he akɛ gbele ji henyɛlɔ. Mɔ ko mɔ ko bɛ ni yɛ jogbaŋŋ ni baasumɔ ni egbo. Kɛ́ oshara ko miiba lɛ, wɔtsiɔ wɔhe, wɔteɔ, loo wɔjoɔ foi. Kɛ́ wɔbɛ hewalɛ lɛ, wɔfeɔ nibii ni baahã wɔná hewalɛ ekoŋŋ. Wɔfeɔ nɔ fɛɛ nɔ ni wɔbaanyɛ koni wɔtsi wɔhe kɛjɛ nibii ni baanyɛ agbe wɔ lɛ ahe.
Ani nɔ ko yɛ ni wɔbaanyɛ wɔdamɔ nɔ wɔhe wɔye akɛ abaafo henyɛlɔ ni ehi shi kɛjɛ blema nɛɛ sɛɛ? Hɛɛ. Yehowa Nyɔŋmɔ, ni ji Bɔlɔ lɛ, ebɔɔɔ adesai ni amɛhi shi afii fioo pɛ kɛkɛ ní amɛgboi. Adesai agbele fataaa Nyɔŋmɔ yiŋtoo kɛhã adesai lɛ he. Eto ni adesai ahi shikpɔŋ lɛ nɔ kɛya naanɔ, ni kɛ́ eto eyiŋ yɛ nɔ ko he lɛ, efeɔ.
Belɛ, mɛɛ gbɛ nɔ abaatsɔ afo gbele sɛɛ? Yɛ yinɔsane mli fɛɛ lɛ, adesai ebɔ mɔdɛŋ akɛ amɛbaaku gbele naa, shi amɛyeko omanye. Adesai miibɔ he mɔdɛŋ lolo ŋmɛnɛ. Jeŋ shikpalɔi efee tsofai komɛi ni ehã amɛnyɛ amɛmɔ helai komɛi anaa. Amɛpɛi nibii ni wala yɔɔ amɛmli lɛ awalayibii lɛ amli. Yɛ hei babaoo lɛ, mɛi tsɛɔ yɛ jeŋ bianɛ, kɛ́ akɛto mɛi ni hi shi aaafee afii oha ni eho nɛ lɛ ahe. Yɛ enɛ fɛɛ sɛɛ lɛ, adesai nyɛko aye gbele nɔ kunim. Biblia lɛ wieɔ akɛ, “amɛ fɛɛ amɛtsɔɔ sũ ekoŋŋ.”
Miishɛɛ sane ji akɛ, ehe ehiaaa ni wɔkɛ wɔhe afɔ̃ adesai aŋaalee nɔ kɛhã naagba ni etsɛ nɛɛ naa tsabaa. Yehowa Nyɔŋmɔ etsɔ hiɛ eto gbɛjianɔ koni akpɔ̃ wɔ loo ahere wɔ kɛjɛ gbele mli, ni mɔ ni ji otu yɛ nakai gbɛjianɔtoo lɛ mli ji Yesu Kristo.
