Kɛ́ afɔ abifao lɛ, efɔlɔi náa miishɛɛ naakpa, shi yɛ nakai beaŋ nɔŋŋ lɛ no kɛ sɔ̃ kpele bafɔ̃ɔ amɛnɔ. Kɛ́ nyɛfɔ klɛŋklɛŋ kwraa lɛ, ekolɛ nyɛhiɛ baafee nyɛ yaa akɛ abifao lɛ kwɛmɔ miihe nyɛbe kɛ nyɛhewalɛ fɛɛ. Wɔ kpakpa ni nyɛnáaa nyɛwɔ kɛ tsakemɔi ni baa yɛ bɔ ni nyɛnuɔ nii ahe nyɛhãa lɛ mli lɛ baanyɛ ekɛ naagba aba nyɛteŋ. Esa akɛ okɛ ohefatalɔ lɛ fɛɛ afee tsakemɔi koni nyɛkwɛ nyɛbi lɛ, ni yɛ nakai beaŋ nɔŋŋ lɛ nyɛbaa nyɛgbãla lɛ yi. Mɛɛ gbɛ nɔ ŋaawoi ni yɔɔ Biblia lɛ mli lɛ baanyɛ aye abua nyɛ koni nyɛtsu naagbai nɛɛ ahe nii?

NƆ NI BIBLIA LƐ KƐƆ: “Suɔmɔ toɔ etsui shi ni emli hi.” Kɛfata he lɛ, suɔmɔ ‘fooo lɛ diɛŋtsɛ enɔ mli, emli wooo la.’ (1 Korintobii 13:4, 5) Akɛ yoofɔyoo lɛ, ekã shi faŋŋ akɛ okɛ ojwɛŋmɔ fɛɛ baama obi lɛ nɔ. Ni enɛ baanyɛ ahã owu lɛ anu he akɛ okpoo lɛ. No hewɔ lɛ, ohiɛ akakpa nɔ akɛ ehe miihia ni okɛ ojwɛŋmɔ ama lɛ hu enɔ. Kɛ́ oto otsui shi ni ojie mlihilɛ kpo lɛ, obaanyɛ oye obua lɛ ni efata ohe kɛkwɛ nyɛbi lɛ, ni enu he hu akɛ esane kã otsui nɔ.

“Nyɛ wumɛi, nyɛkɛ amɛ ahia shi yɛ nilee naa.” (1 Petro 3:7) Ná ole akɛ oŋa lɛ kɛ ehewalɛ kpotoo baakwɛ nyɛbi lɛ. Ená sɔi hei ni esa akɛ etsu he nii, ni ekolɛ ebaatɔ lɛ loo ebaahao po. Bei komɛi lɛ, emli baanyɛ afu bo tete po, shi bɔɔ mɔdɛŋ ni oye ohe nɔ, ejaakɛ “mɔ ni mli fũuu mra lɛ ehi fe ekãalɔ.” (Abɛi 16:32) Okɛ sɛɛyoomɔ atsu nii, ni oye obua lɛ.​—Abɛi 14:29.

NƆ NI OBAANYƐ OFEE:

• Tsɛmɛi: Ye obua oŋa lɛ kɛkwɛ abifao lɛ, yɛ nyɔɔŋteŋ po. Gbɔ be ni okɛtsuɔ nibii krokomɛi ahe nii lɛ nɔ, bɔ ni afee ni oná be babaoo ohã oŋa kɛ nyɛbi lɛ

• Nyɛmɛi: Kɛ́ owu lɛ miitao eye ebua bo kɛ abifao lɛ kwɛmɔ lɛ, kpɛlɛmɔ. Kɛ́ efeee lɛ jogbaŋŋ po lɛ, kaawie ehiɛ, moŋ lɛ okɛ mlihilɛ atsɔɔ lɛ bɔ ni afeɔ lɛ ahãa

NƆ NI BIBLIA LƐ KƐƆ: “Amɛaatsɔ̃ heloo kome.” (1 Mose 2:24) Eyɛ mli akɛ nyɛná mɔ hee yɛ nyɛweku lɛ mli moŋ, shi kaimɔ akɛ okɛ ohefatalɔ lɛ kã he nyɛji “heloo kome.” Nyɛbɔa mɔdɛŋ fɛɛ ni nyɛaanyɛ kɛwaje wekukpaa ni kã nyɛteŋ lɛ.

Ŋa, kɛ́ owu ye ebua bo lɛ, daa lɛ shi. Kɛ́ oda lɛ shi lɛ, no baanyɛ ‘atsa lɛ.’ (Abɛi 12:18) Wu, kɛɛmɔ oŋa akɛ osumɔɔ lɛ waa ni esane kã otsui nɔ. Jiemɔ eyi yɛ bɔ ni ekwɛɔ weku lɛ ehãa lɛ hewɔ.​—Abɛi 31:10, 28.

“Mɔ ko mɔ ko akapele miihã ehe, shi moŋ mɔ fɛɛ mɔ apele ahã enaanyo.” (1 Korintobii 10:24) Be fɛɛ be lɛ, feemɔ nɔ ni baahi jogbaŋŋ kɛhã ohefatalɔ lɛ. Nyɛhea be kɛgbaa sane akɛ mɔ kɛ ehefatalɔ, nyɛjiejiea nyɛhe yi, ni mɔ fɛɛ mɔ abo enyɛmi toi. Nyɛteŋ mɔ ko akafo lɛ pɛ enɔ mli yɛ bɔlɛnamɔ gbɛfaŋ. Susumɔ ohefatalɔ lɛ hiamɔ nii ahe. Biblia lɛ kɛɔ akɛ: “Nyɛkɛ nyɛhe akakamaa nyɛhe, akɛ ja nyɛyi enyɔ lɛ fɛɛ nyɛkpɛlɛ akɛ nyɛaafee nakai.” (1 Korintobii 7:3-5) No hewɔ lɛ, nyɛfea ekome kɛsusua bɔlɛnamɔ he, ni nyɛteŋ mɔ ko akashiu nɔ ko nɔ. Kɛ́ nyɛto nyɛtsui shi nyɛhã nyɛhe, ni nyɛnu nyɛhe shishi lɛ, ebaahã wekukpaa ni kã nyɛteŋ lɛ mli awa.

NƆ NI OBAANYƐ OFEE:

• Nyɛbɔa mɔdɛŋ nyɛnáa be nyɛhãa nyɛhe​—nyɛ sɔŋŋ

• Feemɔ nibii komɛi ni baahã ohefatalɔ lɛ anu he akɛ osumɔɔ lɛ, tamɔ wolo fioo ko ni oooŋma lɛ aloo nɔ ko fioo ní obaake lɛ nɛkɛ

NƆ NI BIBLIA LƐ KƐƆ: “Ogbekɛbiiashi ojɛ ole ŋmalɛi krɔŋkrɔŋi lɛ, ni aaanyɛ ahã ole nii . . . kɛya yiwalaheremɔ mli lɛ.” (2 Timoteo 3:15) Nyɛtsɔa hiɛ nyɛtoa nɔ ni nyɛbaafee kɛtsɔɔ nyɛbi lɛ nii lɛ he gbɛjianɔ. Dani abaafɔ lɛ po lɛ, eyɛ nyɛmɔ babaoo ni akɛkaseɔ nii. Be ni eyɔɔ enyɛ musuŋ lɛ, eyoɔ nyɛgbee, ni kɛ́ nyɛná miishɛɛ, nyɛmli fu, loo nyɛwerɛ ho nyɛhe lɛ, enáa enɔ hewalɛ. No hewɔ lɛ, be ni eji abifao po lɛ nyɛkanea nii nyɛhãa lɛ. Eyɛ mli akɛ enuŋ nɔ ni nyɛkaneɔ lɛ shishi moŋ, shi no baanyɛ ahã esumɔ nikanemɔ kɛ́ eda.

Nyɛkabua nyɛbi abifao lɛ akɛ edako bɔ ni eeenu akɛ nyɛmiiwie Nyɔŋmɔ he sane. Nyɛhãa enua ni nyɛmiisɔle nyɛmiihã Yehowa. (5 Mose 11:19) Kɛ́ nyɛkɛ lɛ miishwɛ po lɛ, nyɛwiea nibii ni Nyɔŋmɔ efee lɛ ahe. (Lala 78:3, 4) Be ni nyɛbi lɛ daa lɛ, ebaana akɛ nyɛsumɔɔ Yehowa, ni no baahã lɛ hu esumɔ Yehowa.

NƆ NI NYƐBAANYƐ NYƐFEE:

• Nyɛsɔlea nyɛbia Yehowa koni ehã nyɛ hiɛshikamɔ ni nyɛkɛbaatsɔse nyɛbi lɛ

• Nyɛtĩa wiemɔi titrii komɛi amli nyɛhãa nyɛbi abifao lɛ koni ebɔi nikasemɔ mra