Be ni atee Yesu shi sɛɛ lɛ, eto gbɛjianɔ koni ebɔfoi 11 lɛ kɛ lɛ akpe yɛ gɔŋ ko nɔ yɛ Galilea. No mli lɛ, kaselɔi krokomɛi aaafee 500 hu yɛ jɛmɛ, ni amɛteŋ mɛi komɛi ayiŋ miifee amɛ kɔshikɔshi. (Mateo 28:17; 1 Korintobii 15:6) Shi nɔ ni Yesu wie agbɛnɛ lɛ ye ebua amɛ fɛɛ ni amɛyiŋ tsɔ akɛ ehiɛ kã lɛɛlɛŋ.

Yesu tsɔɔ mli akɛ Nyɔŋmɔ eŋɔ hegbɛ fɛɛ ehã lɛ yɛ ŋwɛi kɛ shikpɔŋ lɛ nɔ. Yesu kɛɛ amɛ akɛ: “No hewɔ lɛ, nyɛyaa nyɛyafea mɛi ni jɛ jeŋmaji lɛ fɛɛ mli lɛ kaselɔi, nyɛbaptisia amɛ yɛ Tsɛ lɛ gbɛ́i mli, kɛ Bi lɛ gbɛ́i mli, kɛ mumɔ krɔŋkrɔŋ lɛ gbɛ́i mli, nyɛtsɔa amɛ ni amɛye nii fiaa ni mifã nyɛ lɛ nɔ.” (Mateo 28:18-20) Hɛɛ, Yesu hiɛ kã, shi jeee no pɛ kɛkɛ, ebaakã he ekwɛ koni ashiɛ sane kpakpa lɛ.

Yesu kɛ famɔ nɛɛ nɔŋŋ miihã esɛɛnyiɛlɔi fɛɛ​—hii, yei, kɛ gbekɛbii​—akɛ amɛfee mɛi kaselɔi. Shiteekɛwolɔi baabɔ mɔdɛŋ akɛ amɛtsĩ esɛɛnyiɛlɔi lɛ ashiɛmɔ kɛ nitsɔɔmɔ nitsumɔ lɛ naa, shi ema nɔ mi ehã amɛ akɛ: “Aŋɔ hegbɛ fɛɛ ahã mi yɛ ŋwɛi kɛ shikpɔŋ lɛ nɔ.” Mɛni no tsɔɔ kɛhã esɛɛnyiɛlɔi lɛ? Ekɛɛ amɛ akɛ: “Naa! mikɛ nyɛ yɛ gbii lɛ fɛɛ kɛyashi shihilɛ gbɛjianɔtoo lɛ naagbee.” Yesu ekɛɛɛ akɛ abaahã mɛi fɛɛ ni shiɛɔ sane kpakpa lɛ atsu naakpɛɛ nitsumɔi. Moŋ lɛ, mumɔ krɔŋkrɔŋ lɛ baaya nɔ aye abua amɛ.

Yesu shitee lɛ sɛɛ lɛ, ejie ehe kpo etsɔɔ ekaselɔi lɛ ‘shii abɔ yɛ gbii nyɔŋmai ejwɛ mli.’ Etsake ehe kɛ heloo gbɔmɔtsei srɔtoi, ni “etsɔ odaseyelii babaoo ni hãa mɔ yiŋ tsɔɔ anɔ ejie ehe kpo akɛ hiɛkãalɔ etsɔɔ amɛ,” ni ewie “Nyɔŋmɔ Maŋtsɛyeli lɛ he” etsɔɔ amɛ.​—Bɔfoi 1:3; 1 Korintobii 15:7.

Ekã shi faŋŋ akɛ be ni bɔfoi lɛ yɔɔ Galilea lolo lɛ, Yesu kɛɛ amɛ akɛ amɛku sɛɛ kɛya Yerusalem. Be ni ekɛ amɛ naa bakpe shi yɛ Yerusalem lɛ, ekɛɛ amɛ akɛ: “Nyɛkajea Yerusalem, shi nyɛyaa nɔ nyɛmɛa nɔ ni Tsɛ lɛ ewo he shi, ni nyɛnu yɛ minaa lɛ; ejaakɛ anɔkwa, Yohane kɛ nu baptisi, shi nyɛ lɛ, enɛ sɛɛ lɛ, eyeŋ gbii pii ko ni akɛ mumɔ krɔŋkrɔŋ baabaptisi nyɛ.”​—Bɔfoi 1:4, 5.

Sɛɛ mli lɛ, Yesu kɛ ebɔfoi lɛ naa kpe shi ekoŋŋ. Enyiɛ “amɛhiɛ kɛje kpo kɛtee Betania tɔ̃ɔ,” yɛ Oliv Gɔŋ lɛ bokagbɛ jɔɔ lɛ mli. (Luka 24:50) Yɛ nibii ni Yesu ekɛɛ amɛ ni kɔɔ ŋwɛi ni ebaaya lɛ he lɛ fɛɛ sɛɛ lɛ, amɛheɔ amɛyeɔ lolo akɛ ebaatsɔ gbɛ ko nɔ eto e-Maŋtsɛyeli lɛ ema shi yɛ shikpɔŋ lɛ nɔ.​—Luka 22:16, 18, 30; Yohane 14:2, 3.

Bɔfoi lɛ bi Yesu akɛ: “Nuŋtsɔ, ani nɛkɛ be nɛɛ mli obaasaa oto maŋtsɛyeli lɛ oma shi ohã Israel lɛ?” Ehã amɛ hetoo kɛkɛ akɛ: “Jeee nyɛnɔ ji akɛ nyɛaale bei loo gbii lɛ ni Tsɛ lɛ eto yɛ lɛ diɛŋtsɛ ehewalɛ mli lɛ.” No sɛɛ lɛ, ema nitsumɔ ni sa akɛ amɛtsu lɛ nɔ mi ekoŋŋ akɛ: “Kɛ́ mumɔ krɔŋkrɔŋ lɛ ba nyɛnɔ lɛ, nyɛbaaná hewalɛ, ni nyɛbaatsɔmɔ midasefoi yɛ Yerusalem, kɛ Yudea kɛ Samaria fɛɛ, kɛ agbɛnɛ, kɛyashi shikpɔŋ lɛ nɔ hei ni yɔɔ shɔŋŋshɔŋŋ lɛ.”​—Bɔfoi 1:6-8.

Bɔfoi lɛ kɛ Yesu ni atee lɛ shi lɛ yɛ Oliv Gɔŋ lɛ nɔ, kɛkɛ ni ebɔi ŋwɛigbɛ yaa. Etsɛɛɛ kwraa ni atatu ko ŋɔ lɛ kɛje amɛhiɛ ni amɛnaaa lɛ dɔŋŋ. Be ni atee Yesu shi sɛɛ lɛ, ejie ehe kpo kɛ heloo gbɔmɔtso yɛ bei srɔtoi amli. Shi yɛ nɛkɛ be nɛɛ mli lɛ, Yesu tsake eheloo gbɔmɔtso lɛ, ni ekwɔ kɛtee ŋwɛi akɛ mumɔŋ bɔɔnɔ. (1 Korintobii 15:44, 50; 1 Petro 3:18) Bɔfoi anɔkwafoi lɛ hiɛ eyisɛɛ kwɛmɔ gãa, kɛkɛ ni “hii enyɔ ni wo atadei yɛji” badamɔ amɛmasɛi. Bɔfoi ni eŋɔ heloo gbɔmɔtsei nɛɛ bi kaselɔi lɛ akɛ: “Galilea hii, mɛni hewɔ nyɛdamɔ shi nyɛkwɛɔ ŋwɛi nɛkɛ? Nɛkɛ Yesu nɛɛ ni aŋɔ lɛ kɛjɛ nyɛŋɔɔ kɛtee ŋwɛi lɛ, ebaaba yɛ gbɛ ni tamɔ nakai nɔŋŋ nɔ, taakɛ nyɛna lɛ akɛ eeya ŋwɛi lɛ”​—Bɔfoi 1:10, 11.

Yesu shiii shikpɔŋ lɛ nɔ kɛyaaa ŋwɛi kɛ hoofeemɔ ní mɛi fɛɛ miina lɛ, esɛɛnyiɛlɔi anɔkwafoi lɛ ji  mɛi pɛ ni na lɛ be ni eyaa lɛ. Ebaaku esɛɛ eba “yɛ gbɛ ni tamɔ nakai nɔŋŋ nɔ”​—jeee kɛ hoofeemɔ ní mɛi fɛɛ miina lɛ, esɛɛnyiɛlɔi anɔkwafoi lɛ pɛ baayoo be ni eba akɛ Maŋtsɛyeli lɛ nɔ Maŋtsɛ lɛ.

Bɔfoi lɛ ku sɛɛ kɛtee Yerusalem. Yɛ gbii ni nyiɛ sɛɛ lɛ amli lɛ, amɛ kɛ kaselɔi krokomɛi lɛ kpeɔ kutuu, ni “Yesu nyɛ Maria kɛ Yesu nyɛmimɛi hii lɛ” fata he. (Bɔfoi 1:14) Kuu nɛɛ kãa he amɛsɔleɔ. Nibii ni amɛsɔle yɛ he lɛ ateŋ eko ji kaselɔ ni baaye Yuda Iskariot najiaŋ lɛ halamɔ, koni bɔfoi lɛ ayibɔ lɛ afee 12 ekoŋŋ. (Mateo 19:28) Esa akɛ amɛná kaselɔ ko ni na nibii ni Yesu fee lɛ, ní agbɛnɛ hu ena Yesu yɛ eshitee lɛ sɛɛ. Amɛfɔ̃ oshiki koni amɛkɛna mɔ ni Nyɔŋmɔ sumɔɔ ni ahala, ni enɛ ji naagbee oshikifɔɔ ni atsĩ tã yɛ Biblia lɛ mli. (Lala 109:8; Abɛi 16:33) Ahala Matia, ní ekolɛ efata mɛi 70 ni Yesu tsu amɛ lɛ ahe lɛ, ni “akane lɛ afata bɔfoi nyɔŋma kɛ ekome lɛ ahe.”​—Bɔfoi 1:26.

Be ni Yesu kwɔ kɛtee ŋwɛi gbii nyɔŋma sɛɛ lɛ, aye Yudafoi Agbi Jurɔ ni ji Pentekoste lɛ yɛ afi 33 Ŋ.B. Kaselɔi aaafee 120 bua amɛhe naa yɛ ŋwɛitsu ko nɔ yɛ Yerusalem. Trukaa lɛ, gbɛɛmɔ ko ni tamɔ kɔɔyɔɔ ni miitswa waa ba, ni ejije yɛ shĩa lɛ mli fɛɛ. Amɛna lilɛii ni tamɔ la, ni eko bama mɛi ni naa ekpe shi lɛ ateŋ mɔ fɛɛ mɔ nɔ. Kaselɔi lɛ fɛɛ bɔi wiemɔi srɔtoisrɔtoi awiemɔ. Enɛ ji mumɔ krɔŋkrɔŋ lɛ ni Yesu wo he shi akɛ abaafɔse ashwie amɛ nɔ lɛ!​—Yohane 14:26.