Be ni Yesu tsa nuu ni ekumɔ lɛ sɛɛ lɛ, etee nɔ ehi Kapernaum ní bɛŋkɛ Galilea Ŋshɔ lɛ be fioo ko. Shi kome ekoŋŋ lɛ, asafoku ko ba eŋɔɔ, ni ebɔi amɛ nitsɔɔmɔ. Be ni enyiɛ gbɛ eyaa lɛ, ena Mateo, mɔ ni atsɛɔ lɛ Levi hu lɛ ta toohemɔhe lɛ. Yesu fɔ̃ lɛ nine krɛdɛɛ ko akɛ: “Baatsɔ misɛɛnyiɛlɔ.”​—Mateo 9:9.

Eeenyɛ efee akɛ, Mateo le Yesu tsɔɔmɔi kɛ nitsumɔi ni etsu yɛ jɛmɛ niiaŋ lɛ he nɔ ko fioo, taakɛ Petro, Andrea, Yakobo, kɛ Yohane hu le lɛ. Taakɛ amɛfee lɛ, Mateo hu banyiɛ Yesu sɛɛ amrɔ nɔŋŋ. Mateo wie enɛ he yɛ e-Sanekpakpa lɛ mli akɛ: “Kɛkɛ ni [Mateo te] shi ni enyiɛ” Yesu ‘sɛɛ.’ (Mateo 9:9) Enɛ hewɔ lɛ, Mateo shi enitsumɔ akɛ toohelɔ lɛ, ni ebatsɔ Yesu kaselɔ.

Sɛɛ mli lɛ, Mateo ŋmɛ okpɔlɔ wulu ko yɛ eshĩa lɛ, ekolɛ koni ekɛtsɔɔ akɛ ehiɛ esɔ nine ni Yesu fɔ̃ etsɛ lɛ nɛɛ waa. Namɛi hu afɔ̃ amɛ nine afata Yesu kɛ ekaselɔi lɛ ahe? Afɔ̃ toohelɔi krokomɛi ni Mateo kɛtsu nii lɛ saŋŋ nine kɛba okpɔlɔŋmɛɛ lɛ shishi. Amɛheɔ too amɛhãa Roma amralofoi ni asumɔɔɔ amɛsane kwraa lɛ, ni ekomɛi ji too ni aheɔ yɛ meelei ni baa lɛjiadaamɔhe lɛ he, nɔ ni aheɔ yɛ jatsui ni kooloi loo shwiilii kɛtsɔɔ gbɛjegbɛi titrii lɛ anɔ lɛ ahe, kɛ nɔ ni aheɔ yɛ nibii ni ashɛɔ kɛbaa maŋ lɛ mli lɛ he. Te Yudafoi lɛ buɔ nakai toohelɔi lɛ amɛhãa tɛŋŋ? Amɛsumɔɔɔ amɛsane kwraa, ejaakɛ bei pii lɛ toohelɔi lɛ shishiuɔ amɛ, ni amɛheɔ bɔ ni fe nɔ ni ato akɛ amɛhe lɛ. Kɛfata he lɛ, ‘eshafeelɔi,’ ni ji mɛi ni ale amɛ akɛ amɛfeɔ nibii fɔji lɛ hu ba okpɔlɔŋmɛɛ lɛ shishi.​—Luka 7:37-39.

Be ni Farisifoi ni buɔ amɛhe jalɔi ni yɔɔ jɛmɛ lɛ na Yesu kɛ mɛi ni tamɔ nɛkɛ yɛ okpɔlɔŋmɛɛ lɛ shishi lɛ, amɛbi ekaselɔi lɛ akɛ: “Mɛni hewɔ nyɛtsɔɔlɔ lɛ kɛ toohelɔi kɛ eshafeelɔi yeɔ nii lɛ?” (Mateo 9:11) Be ni Yesu nu nɔ ni amɛwieɔ lɛ, ehã amɛ hetoo akɛ: “Mɛi ni yɔɔ hewalɛ lɛ, helatsalɔ he ehiaaa amɛ, shi mɛi ni he yeɔ lɛ moŋ ehe hiaa. Belɛ, nyɛyaa ni nyɛyakasea nɔ ni ji enɛ shishi: ‘Mɔbɔnalɛ mitaoɔ, shi jeee afɔle.’ Ejaakɛ mibaaa jalɔi atsɛmɔ, shi moŋ eshafeelɔi.” (Mateo 9:12, 13; Hoshea 6:6) Jeee Farisifoi lɛ atsuiŋ amɛjɛ amɛtsɛ Yesu akɛ ‘tsɔɔlɔ’ lɛ, shi amɛbaanyɛ amɛkase nɔ ko ni kɔɔ nɔ ni ja he yɛ edɛŋ.

Eeenyɛ efee akɛ, Mateo fɔ̃ toohelɔi kɛ eshafeelɔi lɛ nine kɛba eshĩa lɛ koni amɛbabo Yesu toi, ní agbɛnɛ hu, atsa amɛ yɛ mumɔŋ, “ejaakɛ amɛteŋ mɛi babaoo ebatsɔmɔ esɛɛnyiɛlɔi.” (Marko 2:15) Yesu miitao eye ebua amɛ koni wekukpãa kpakpa abakã amɛ kɛ Nyɔŋmɔ teŋ. Farisifoi ni buɔ amɛhe jalɔi lɛ nyaŋeɔ eshafeelɔi lɛ, shi Yesu efeee nakai. Emusuŋ tsɔɔ lɛ ni enaa mɔbɔ; ebaanyɛ etsa mɛi fɛɛ ni he yeɔ yɛ mumɔŋ lɛ.

Jeee akɛ Yesu miitao efi toohelɔi kɛ eshafeelɔi lɛ asɛɛ hewɔ ena amɛ mɔbɔ lɛ, shi efee nakai akɛni enuɔ he ehãa amɛ taakɛ enuɔ he ehãa mɛi ni bɛ gbɔmɔtsoŋ hewalɛ lɛ hewɔ. Akɛ nɔkwɛmɔnɔ lɛ, kaimɔ akɛ ejɛ musuŋtsɔlɛ mli eta kpitiyelɔ lɛ he ni ekɛɛ: “Miisumɔ! Ohe atse.” (Mateo 8:3) Ani esaaa akɛ wɔ hu wɔnaa mɛi ni ehia amɛ lɛ mɔbɔ, ni wɔye wɔbua amɛ, titri lɛ koni wekukpaa kpakpa ahi amɛ kɛ Yehowa teŋ?